Pagsagka Ngadto ha “The Bottom” han Saba

AN Saba, usa nga isla nga ginmamandoan han mga Olandes, nagin darangpanan hadto han mga pirata nga naglalayag ha katubigan han Dagat Caribbeano ha pamiling hin mga tirikason. Yana, ini nga gutiay nga isla, nga nahimumutang hin 240 kilometros ha este han Puerto Rico, may mga 1,600 nga umurukoy, ngan 5 hito an mga Saksi ni Jehova. Kondi, inin maisugon nga mga ministro may-ada pinamimiling nga mas birilhon pa kay han mga tirikason. Maduruto nga namimiling hira hin mga tawo nga “tinunguran han kinabuhi nga waray kataposan.”—Buhat 13:48.

An maopay nga sumat han Ginhadian han Dios siyahan nga naisangyaw ha isla han Hunyo 22, 1952, han an 18-metros nga lantsa nga Sibia, nga ginpapaandar han mga Saksi ni Jehova, inabot ha baybayon han Saba. (Mateo 24:14) An mga misyonero nga hira Gust Maki ngan Stanley Carter sinagka ha The Ladder, usa nga aragian nga may-ada sobra 500 nga bato nga balitang tipasagka ngadto ha The Bottom, an kapital han Saba. a Ha sulod hin mga siglo, inin haligot nga aragian amo la an paagi nga madangat an mga umurukoy han isla.

An siyahan nga opisyal nga report nga naipublikar mahitungod han pagsangyaw nga buruhaton han mga Kristiano ha Saba aada ha 1966 Yearbook of Jehovah’s Witnesses. Sumala hito nga report, may-ada usa la nga aktibo nga Saksi dida hito nga isla. Ha urhi, usa nga pamilya tikang ha Canada an naggasto hin pipira ka tuig ha pagsangyaw han maopay nga sumat didto. Diri pa la maiha, hira Russel ngan Kathy, usa nga retirado nga mag-asawa tikang ha Estados Unidos, kinadto ha Saba ngan nakigbahin ha pagsangyaw didto. Tagda an ira istorya.

Pagbisita ha Saba

Inabot kami nga mag-asawa ha isla nga sakay hin eruplano sugad nga mga bisita ni Ronald, nga amo la an Saksi ha isla durante han kadak-an nga bahin  han dekada 1990. Ginhuhulat kami han nag-abi-abi ha amon ha paluparan. Nalipay hiya ha gutiay nga kahon han mga utan nga amon iginregalo ha iya, tungod kay ha isla waray nag-uuma para hin mga ibaraligya. Sinakay kami ha gutiay nga trak, ngan hinay-hinay nga nagliko-liko kami ha ligid han Mount Scenery ngadto ha pungkay hinin diri na aktibo nga bulkan.

Inundang kami hin madaliay ha barangay han Hell’s Gate ngan gin-usisa ni Ronald an bulletin board han publiko basi kitaon kon nakapaskin pa gihapon an imbitasyon para ha pahayag publiko ha Domingo. Nalipay kami ha pagkita nga nakapaskin pa gihapon ito. Sinakay utro hiya ha trak, ngan nagpadayon kami ha amon pagsagka ngadto ha gidakui nga barangay han isla, an Windwardside. Sugad han iginpapasabot han ngaran hito, inin maopay pagkit-on nga barangay nahimumutang ha bahin han isla nga naatubang ha hangin, nga nahimumutang mga 400 metros tikang ha igbaw han lebel han dagat. Samtang nagmamaneho kami ha aragian tipakadto ha balay ni Ronald, nakita namon an de-kolor nga karatola ha atubangan nga beranda nga nagpapakilala hito sugad nga usa nga Kingdom Hall han mga Saksi ni Jehova.

Han naniniudto kami, iginbangon ko an pakiana nga nagin hinungdan han amon pagbisita, “Paonan-o ka nagin usa nga magwarali han Ginhadian ha Saba?”

“Han matapos an konstruksyon han sanga han mga Saksi ni Jehova ha Puerto Rico han 1993,” siring ni Ronald, “interesado kami nga mag-asawa nga magpabilin ha usa nga toka ha langyaw nga nasud. Antes pa hito, nabisita na namon an Saba upod han usa pa nga mag-asawa nga payunir ngan hinbaroan namon nga may-ada 1,400 nga umurukoy dinhi kondi waray mga Saksi. Salit nakiistorya kami ha Komite han Sanga han Puerto Rico mahitungod han amon pagbalhin nganhi.

“Nagin maopay an resulta han mga panhitabo, ngan ha kataposan kinarawat kami hin pag-uyon nga bumalhin. Makasurubo la nga paglabay hin duha ka tuig, grabe nga nagkasakit an akon asawa, ngan binalik kami ha California. Han mamatay hiya, binalik ako ha Saba. Maaram ka, nadiri ako nga magtikang hin buruhaton ngan diri tatapuson.”

Pagbalay-balay ha Saba

An sala han usa ka gatos na ka tuig nga balay ni Ronald amo liwat an ginagamit nga Kingdom Hall. b Samtang namamahaw kami ngan nag-aandam pagkadto ha ministeryo, ginhulos han uran tikang ha nalabay nga dampog an waray atop nga kusina. Katapos namon mamahaw, linakat kami ilarom han madampog nga kalangitan basi magbalay-balay ha bug-os nga aga ha The Bottom. Ha kada balay, kinukumusta ni Ronald an tagbalay ha ira personal nga ngaran. An amon paghisgot nakasentro ha usa nga bag-o pa nga panhitabo hito nga lugar. An kadam-an nga mga tawo pamilyar kan Ronald ngan ha iya ministeryo, ngan damu an nakarawat dayon hin literatura mahitungod han Biblia.

Makuri an pagtipig hin rekord mahitungod han mga interesado ha mensahe han Ginhadian kon diri mo kilala an mga tawo ha barangay. Kay ano? Tungod kay “an balaud nag-oobligar nga an ngatanan nga balay pintaran hin uusa la nga kolor,” siring ni Ronald. Totoo gud man, kay han ginkita ko an bug-os nga Saba, naobserbahan ko nga an ngatanan nga mga balay busag nga may pula nga mga atop.

Katima namon tapuson an amon paghisgot ha Biblia, dinadapit namon an tagbalay nga tumambong ha pahayag publiko mahitungod han usa nga topiko ha Biblia nga pagdudumarahon ha Domingo ha Kingdom Hall. Kon aada hi Ronald ha isla, naghahatag hiya hin pahayag publiko kada semana. Yana, ha Saba 17 nga pag-aram ha Biblia an gindudumara. Bainte ka tawo an tinambong ha Memoryal han kamatayon ni Kristo han 2004. Ngan bisan kon baga hin gutiay la ito nga numero, nagrirepresentar ito han 1 ka porsyento han bug-os nga populasyon han Saba!

Oo, nangangalimbasog gud an mga Saksi ni Jehova nga makaistorya an gidadamui nga mga tawo tubtob nga posible mahitungod han mensahe han Dios han kaluwasan. Gutiay man ito nga isla pariho han Saba o bug-os nga kontinente, matinumanon nga gintutuman han mga Saksi ni Jehova an sugo nga “manhimo . . . hin mga tinon-an ha ngatanan nga mga nasud.”—Mateo 28:19.

Makasurubo, natapos na an amon pagbisita. Samtang nasakay kami utro ha eruplano, nanarit kami. Pirme namon mahinunumdoman an amon pagbisita ha Saba ngan an panahon nga amon gin-gamit ha pagsagka ngadto ha The Bottom!

[Mga footnote]

[Mga Mapa ha pahina 10]

(Para ha aktuwal nga format, kitaa an publikasyon)

PUERTO RICO

[Ginkuhaan han Retrato ha pahina 10]

Background: www.sabatourism.com