Araway Pinaagi hin mga Pulong—Kay Ano nga Nakakadaot Ito?

“Diin tumikang an mga araway ngan mga kasamokan ha butnga niyo?”—JAKOBO 4:1.

INI nga pakiana han parasurat han Biblia nga hi Jakobo diri para ha mga sundalo ha daku nga pwersa militar han Roma, nga hito nga panahon nakikiggirra basi manakop; diri liwat niya gin-uusisa an mga motibo han pakig-away han mga girilya nga Judio nga tinatawag nga Sicarii, o Dagger Men, han siyahan nga siglo K.P. An gin-uunabi dinhi ni Jakobo amo an mga paglantugi butnga han bisan duha la nga tawo. Kay ano? Tungod kay pariho han mga girra, an personal nga mga araway nakakadaot. Tigamni ini nga mga asoy han Biblia.

An mga anak nga kalalakin-an han patriarka nga hi Jakob nangalas hinduro ha ira bugto nga hi Jose, amo nga ira iginbaligya hiya ha pagkauripon. (Genesis 37:4-28) Ha urhi, hi David gin-iparatay ni Hadi Saul han Israel. Kay ano? Tungod kay naaawa hiya kan David. (1 Samuel 18:7-11; 23:14, 15) Ha siyahan nga siglo, duha nga Kristiano nga kababayin-an, hira Euodia ngan Sintike, an nakasamok ha kamurayawan han bug-os nga kongregasyon tungod han ira paglantugi.—Filipos 4:2.

Ha naglabay pa la nga mga panahon, ginsulbad han mga tawo an ira mga diri pagsinabtanay pinaagi han pag-away, nag-aatubang nga may mga espada o mga pistol. Agsob nga an usa ha ira namamatay o permanente nga nababaldado. Yana nga panahon, adton nag-aaway kasagaran nga nagamit hin mapintas, nakakasakit nga mga pulong sugad nga ira hinganiban. Bisan kon waray dugo nga ginpapaagay, an mga pag-atake pinaagi hin mga pulong nakakadaot han mga emosyon ngan mga reputasyon. An mga inosente agsob nga nag-aantos hini nga “mga girra.”

Tagda an nahitabo mga pipira ka tuig na an naglabay han an usa nga padi nga Anglikano nag-akusar ha usa pa nga padi hin sayop nga pagdumara ha pundo han singbahan. An ira away hinbaroan han publiko, ngan nagkabahin-bahin an kongregasyon nga ira ginsiserbihan. An iba nga mga membro nadiri na pagsingba kon an padi nga kontra nira an nagmimisa. Duro gud an kasina ha usa kag usa hini nga mga membro salit diri na hira nag-aasihay kon naniningba hira. Han an padi mismo nga  nag-akusar gin-akusahan hin pagbuhat hin seksuwal nga kalaw-ayan, nagtikadugang la an away.

An Arsobispo han Canterbury nanginyupo ha duha nga padi, an ira away iya gintawag nga “kanser” ngan “iskandalo nga nagpapasipara ha ngaran han Aton Ginoo.” Han 1997, an usa hito nga mga padi inuyon nga magretiro. An usa nagpadayon ha iya katungdanan tubtob nga kinahanglan na gud hiya bumaya tungod kay inabot na hiya ha edad basi magretiro. Kondi, nagpabilin pa gihapon hiya tubtob ha ultimo gud nga takna, ngan dida na la nagretiro han iya ika-70 nga kompleanyo, han Agosto 7, 2001. An The Church of England Newspaper nag-unabi nga an adlaw han iya pagretiro amo an adlaw han piyesta ni “Santo” Victricius. Hin-o hi “Santo” Victricius? Usa hiya nga obispo han ikaupat ka siglo nga sumala ha report, ginkastigo tungod kay diniri hiya pagsundalo basi makig-away. Ha pagpatin-aw han kaibahan nira nga duha, an pahayagan nagsiring: “An pagdumiri ha pakig-away ha usa nga away han singbahan diri kinaiya nga batasan han [nagriretiro nga padi].”

Waray na unta madaot hito nga mga padi an ira kalugaringon ngan an iba kon ira la igin-aplikar an sagdon ha Roma 12:17, 18: “Diri kamo magbayad bisan kanay hin maraot ha maraot; magtitinguha kamo ha mga maopay nga bagay ha atubangan han ngatanan nga mga tawo. Kon sadang mahimo, sugad han nahitutungod ha iyo, makigmurayaw kamo ha ngatanan nga mga tawo.”

Kumusta ka man? Kon may-ada nakakasala ha imo, nakikiglantugi ka ba tungod ha kasina? O naglilikay ka ba nga makayakan hin maraot nga mga pulong ngan andam pirme makigmurayaw? Kon nakasala ka ha usa ka tawo, imo ba linilikyan ito nga tawo ngan naglalaom ka na la nga ha paglabay han panahon hingangalimtan na la niya an problema? O nangangaro ka ba dayon hin pasaylo? Nangangaro ka man hin pasaylo o nagpapasaylo ha iba, an imo pangalimbasog ha pakigmurayaw makakadugang han imo kalipay. An sagdon han Biblia makakabulig ha aton ha pagsulbad bisan han maiha na nga mga away, sugad han iginsasaysay ha masunod nga artikulo.