“Matinumanon Ilarom han mga Pagsari”

TEMPRANO han Abril 1951, an gamhanan nga gobyerno han Sobyet tigda nga inatake ha usa nga inosente nga grupo han mga Kristiano ha weste nga Unyon Sobyet—an mga Saksi ni Jehova. Yinukot nga pamilya—upod na an gudtiay nga kabataan, burod nga kababayin-an, ngan an kalagasan—an iginsakay ha mga bagón para ha makapoy hinduro nga 20-ka-adlaw nga biyahe pinaagi hin tren pakadto ha Siberia. Ginsentensyahan hira hin permanente nga pagkadistyero ha ura-ura kamakuri ngan kinadaan gud nga mga palibot.

Han Abril 2001, ginselebrar ha Moscow an ika-50 nga anibersaryo hini nga panhitabo ha kasaysayan pinaagi han pagpagowa han usa nga dokumentaryo nga video mahitungod han 50-ka-tuig nga panalumpigos ha mga Saksi ni Jehova ha Unyon Sobyet hadto. Ha dokumentaryo, iginsasaysay han mga historyador ngan han mga nakaeksperyensya mismo kon paonan-o an mga Saksi nakatalwas ngan nag-uswag pa ngani bisan pa han duro nga pag-ipit.

Minilyon na yana ha Russia ngan ha iba nga mga lugar an nakakita hini nga dokumentaryo, an Faithful Under Trials—Jehovah’s Witnesses in the Soviet Union, ngan nakakarawat ito hin duro nga pagdayaw tikang ha publiko ha kabug-osan ngan tikang ha mga historyador. An masunod amo an duha nga komento han Ruso nga mga eskolar nga naukoy ha lugar diin gindistyero an kadam-an han mga pamilya nga Saksi:

“Naruyagan ko gud ini nga pelikula. Tikang pa hadto, naayon na ako ha mga representante han iyo relihiyon, kondi katapos kitaon an pelikula, dinugang pa gud an akon maopay nga impresyon ha iyo. Propesyonal hinduro an pagkahimo han pelikula! Naruyagan ko labi na an paagi han iyo pagpresenta han tagsa nga tawo sugad nga indibiduwal. Bisan kon Ortodokso ako ngan waray plano nga magbag-o han akon relihiyon, nalilipay ako ha mga Saksi ni Jehova. Karuyag ko nga an amon grupo han mga magturutdo magtipig hin kopya hini nga pelikula. Nagdesisyon kami han akon mga igkasi-magturutdo nga ipasalida ito ha amon mga estudyante ngan iapi ito ha kurikulum.”—Propesor Sergei Nikolayevich Rubtsov, punoan han grupo han mga magturutdo han kasaysayan ha State Pedagogical University, Irkutsk, Russia.

“Nalilipay ako nga nagkaada hini nga pelikula. Kon an usa naghihimo hin pelikula mahitungod han panalumpigos, makuri gud pirme an paghan-ay han istorya ha lohikal nga paagi. Kondi nahimo niyo ito. Alayon ayaw pag-alang ha pagdul-ong ha akon hin iba pa niyo nga mga video.”—Propesor Sergei Ilyich Kuznetsov, punoan han grupo han mga magturutdo han kasaysayan ha Irkutsk State University, Russia.

Inapresyar liwat hinduro han mga Saksi ni Jehova nga naukoy ha Siberia an dokumentaryo. An masunod amo an pipira la han ira mga reaksyon:

“Durante han panahon hini nga mga panhitabo ha pelikula, damu nga mga tawo ha Russia an nalimbongan mahitungod han mga buruhaton han mga Saksi ni Jehova. Kondi katapos kitaon an pelikula, nasabtan na nira nga an aton organisasyon diri la kay usa nga sekta, sugad han ira paghunahuna hadto. An iba nga bag-o la nga nagin mga Saksi nasiring:  ‘Waray gud namon mahunahuna nga nagkikinabuhi kami ngan nagbubuhat kaupod han Kristiano nga kabugtoan nga damu na an gin-ilob!’ Katapos kitaon an pelikula, iginpahayag han usa nga Saksi an iya hingyap nga magin bug-os-panahon nga payunir nga ministro.”—Anna Vovchuk, nga nadistyero ha Siberia.

“Han iginpakita ha pelikula an mga polis nga nagtutuktok ha purtahan han usa nga balay han mga Saksi, nangurog ako. Pariho adto han pagtuktok ha amon purtahan, ngan nahinunumdom ako nga nasiring hi Nanay: ‘Bangin may sunog.’ Kondi an pelikula nagpapahinumdom liwat ha akon nga mas makuri pa ngay-an an gin-antos han damu nga mga Saksi kay ha akon. Ini ngatanan nga impormasyon naghahatag ha aton hin dugang nga kusog ngan kadasig nga magpadayon ha pag-alagad kan Jehova.”—Stepan Vovchuk, nga nadistyero ha Siberia.

“Anak ako han nadistyero nga mga Saksi. Salit, kahuna ko nga damu na an akon hinbatian mahitungod hito nga mga panahon. Kondi katapos kitaon ini nga pelikula, nasantop ko nga haros waray pa gud ngay-an ako hinbaroan. Samtang namamati ako ha mga interbyu, napuno hin luha an akon mga mata. Yana, para ha akon an mga eksperyensya diri kay basta mga istorya la kondi totoo gud nga hitabo ha kinabuhi. An pelikula nakaparig-on han akon relasyon ha Dios ngan nakabulig basi maandam ako nga ilubon an ngatanan nga kakurian ha tidaraon.”—Vladimir Kovash, Irkutsk.

“Para ha akon, ini nga pelikula mas nakakaapekto kay ha sinurat nga asoy. Han nagkita ako ngan namati ha mga interbyu ha kabugtoan, ha akon pag-abat sugad hin kaupod ko hira ngan nakaeksperyensya liwat han ngatanan nga ira gin-antos. An susbaranan han bugto nga lalaki nga nagdibuho hin mga postcard para ha iya bata pa nga mga anak nga kababayin-an samtang priso hiya nagpapagios ha akon nga mangalimbasog nga bantaron an mga kasingkasing han akon kalugaringon nga mga anak han mga kamatuoran ha Biblia. Salamat! Tungod hini nga pelikula, labaw kay ha kan-o pa man nga inaabat han mga Saksi ni Jehova ha Russia nga bahin hira han organisasyon ni Jehova ha bug-os nga kalibotan.”—Tatyana Kalina, Irkutsk.

“Aplikado gud hini nga pelikula an darawhanon nga, ‘Mas maopay an pakakita hin makausa kay ha pakabati hin usa ka gatos ka beses.’ Klaro hinduro ito, totoo hinduro, may kalabotan gud ha aton! Katapos magkita hito, ginhinunahuna ko ito hin maiha nga panahon. Tungod hini nga pelikula nahatagan ko hin daku nga atensyon an mga kinabuhi hiton gindistyero nga mga Saksi. Yana kon igintatanding ko an akon kahimtang ha ira kahimtang, nabubuligan ako nga bag-ohon an akon panhunahuna mahitungod ha aton mga problema yana nga panahon.”—Lidia Beda, Irkutsk.

An Faithful Under Trials naipagowa na ha 25 nga yinaknan ngan kinakarawat gud hin maopay ha bug-os nga kalibotan. a An bug-os nga dokumentaryo iginpasalida na han mga estasyon han telebisyon ha St. Petersburg, Omsk, ngan iba pa nga mga syudad ha Russia, sugad man ha Vynnytsya, Kerch, ngan Melitopol, nga mga syudad han Ukraine, ngan ha rehiyon han Lviv. Nakakarawat liwat ito hin mga pagpasidungog tikang ha internasyonal nga mga asosasyon han mga parausisa hin pelikula.

An pwersa han mensahe hini nga dokumentaryo makikita ha mga ehemplo han yinukot nga ordinaryo nga mga tawo nga nagpakita hin talagsahon nga kaisog ngan espirituwal nga kusog durante han damu ka tuig nga pagpersigir. An mga Saksi ni Jehova ha Unyon Sobyet napamatud-an gud nga matinumanon ilarom han mga pagsari. Kon karuyag mo kitaon ini nga dokumentaryo, malilipay an mga Saksi ni Jehova ha pagtagana hito ha imo. Alayon pakigkomunikar ha usa ha ira dida ha iyo komunidad.

[Footnote]

[Ginkuhaan han Retrato ha pahina 8]

Stalin: U.S. Army photo

[Ginkuhaan han Retrato ha pahina 9]

Stalin: U.S. Army photo