Pagkuha hin Kahibaro—Yana Ngan ha Waray Kataposan

AN Aleman nga doktor nga hi Ulrich Strunz nagsurat hin usa ka serye hin mga libro nga may ulohan nga Forever Young. Dida hini hiya marig-on nga nagsiring nga an pag-ehersisyo, nutrisyon, ngan maopay nga estilo han kinabuhi nakakabulig basi magkaada mas maopay nga kahimsog ngan posible magresulta hin mas hilawig nga kinabuhi. Ha gihapon, diri hiya nagsasaad ha iya mga magbarasa nga hira literal nga mahimo mabuhi ha waray kataposan pinaagi ha pagsunod han iya sagdon.

Kondi, may-ada usa nga klase hin kahibaro nga nagsasaad gud hin waray kataposan nga kinabuhi. Ha iba nga punto-de-bista, kon mabuhi ka ha waray kataposan, makakakuha ka hin mapulsanon nga kahibaro ha waray kataposan. Hi Jesus nagsiring ha pag-ampo ngadto ha Dios: “Ini nangangahulogan hin kinabuhi nga waray kataposan, an ira pagkuha hin kahibaro mahitungod ha imo, an amo la nga matuod nga Dios, ngan ha usa nga imo sinugo, hi Jesu-Kristo.” (Juan 17:3, NW) Aton siyahan tagan hin kahulogan an termino nga “kinabuhi nga waray kataposan” ngan katapos, klaruhon kon ano an nahiuupod hini nga klase hin kahibaro ngan kon paonan-o mo makukuha ito.

Sumala ha Biblia, hirani na bag-ohon han Maglalarang an tuna ngadto ha pagin literal nga paraiso, nga magtatagana han angayan nga mga kahimtang para han hilawig nga kinabuhi. An pagpahinabo hito nga Paraiso maghihidabi hin daku gud nga buhat, pariho han ha Baha han panahon ni Noe. An Mateo kapitulo 24, bersikulo 37 tubtob ha 39, nagpapakita nga iginpariho ni Jesus an aton panahon ha “mga adlaw ni Noe,” diin an mga tawo “waray hibaro [“magtagad,” NW]” han ira peligroso nga kahimtang. Ira liwat ginbalewaray an mensahe nga iginsangyaw ni Noe. Katapos inabot “[“an adlaw,” NW] ha pagsulod ni Noe ha arka” ngan ginbungkag han Baha an ngatanan nga nagbalewaray  hini nga kahibaro. Hi Noe ngan adton kaupod niya ha arka nagpabilin nga buhi.

Hi Jesus nagsiring nga tiabot an pariho hito nga “adlaw” ha aton panahon. Adton naghahatag hin atensyon ha kahibaro nga nakakaw-ing hini nga panhitabo magkakaada han paglaom nga diri la kay matalwas kondi mabuhi liwat ha waray kataposan. Dugang pa, an mga patay nga aada ha hinumdoman han Dios babanhawon nga may paglaom nga diri na gud mamatay utro. (Juan 5:28, 29) Tigamni kon paonan-o iginpahayag ni Jesus inin duha nga punto. Han nakikiistorya hiya kan Marta mahitungod han pagkabanhaw han mga patay, hiya nagsiring: “An nagtotoo ha akon, bisan hiya patay, hiya mabubuhi. Ngan an ngatanan nga nabubuhi, ngan nagtotoo ha akon, diri mamamatay.” An ngatanan nga ebidensya nagpapakita nga ini nga “adlaw” hirani na hinduro, nga nangangahulogan nga bangin “diri [ka na gud] mamamatay.”—Juan 11:25-27.

Katapos ginpakianhan ni Jesus hi Marta: “Natoo ka ba hini?” Hiya binaton: “Oo, Ginoo.” Kon pananglitan igpakiana liwat ha imo ni Jesus ito nga pakiana yana, ano an imo magigin baton? Bangin makurian ka nga tumoo ha posibilidad nga diri na gud mamatay. Kondi bisan kon ito an imo magin reaksyon, waray ruhaduha nga maruruyag ka ha pagtoo hito. Hunahunaa la kon mationan-o kadamu an imo mahibabaroan kon diri ka na gud mamamatay! Handurawa an imo kalugaringon nga nagpapahimulos han ngatanan nga mga butang nga hingyap mo yana hibaroan ngan buhaton kondi waray ka gud panahon nga buhaton ito. Ngan hunahunaa la an pagin kaupod utro han imo mga hinigugma nga nagkamatay na! Ano an kahibaro nga, kon iaplikar, puydi makahimo hito nga mga butang nga posible, ngan paonan-o mo makukuha ito?

May-ada Kita Kapasidad ha Pagkuha han Naghahatag-Kinabuhi nga Kahibaro

Imposible ba para ha aton an pagkuha hin kahibaro mahitungod ha Dios ngan kan Kristo? Diri. Totoo nga waray kataposan an kahibaro mahitungod han mga buhat han Maglalarang. Kondi, diri an astronomiya o an usa han iba nga mga syensya an gintutudlok ni Jesus han iya iginkaw-ing an “kahibaro” ngan an “kinabuhi nga waray kataposan.” An Proberbios kapitulo 2, bersikulo 1 ngan 5, nasiring nga an “mga pulong” ngan “mga sugo” nga aada ha Biblia importante ha ‘kahibaro han Dios.’ Ngan may kalabotan kan Jesus, an Juan 20:30, 31 nasiring nga an mga butang nga nahisurat igo na basi kita magkaada “kinabuhi.”

Kon sugad, an kahibaro mahitungod kan Jehova ngan kan Jesu-Kristo sugad han mabibilngan ha Biblia igo na ha pagpakita ha imo kon paonan-o magkaada kinabuhi nga waray kataposan. Naiiba nga libro an Biblia. May pagkabuotan nga giniyahan han Maglalarang an mga tawo nga isurat ito ha paagi nga bisan adton waray pormal nga edukasyon nga gutiay la an mga higayon ha pag-aram ngan paghibaro mahimo makakuha hin igo nga kahibaro basi magkaada kinabuhi nga waray kataposan. Ha sugad man nga paagi, an usa nga madagmit mahibaro ngan may-ada daku nga panahon ngan katigayonan nga magagamit pirme may mahibabaroan nga bag-o tikang ha giniyahan nga Kasuratan. An kamatuoran nga nababasa mo ini nga artikulo usa nga pamatuod nga may-ada ka kapasidad ha paghibaro, kondi paonan-o mo sadang gamiton ito nga kapasidad?

Ha bug-os nga kalibotan, ipinapakita han mga ehemplo han damu nga mga tawo nga an pinakaepektibo nga paagi ha pagkuha hini nga kahibaro amo an personal nga pag-aram ha Biblia nga gindudumara han usa nga nakasabot na hito. Sugad la nga nangalimbasog hi Noe nga magsumat hin kahibaro ha iya mga kadungandungan, disidido an mga Saksi ni Jehova nga kumadto ha imo balay basi ipakiistorya an Biblia ha imo. Bangin gamiton nira an brosyur nga Ano an Ginkikinahanglan ha Aton han Dios? o an gutiay nga libro nga may angayan nga ulohan nga Kahibaro nga Nagtutugway Ngadto ha Kinabuhi nga Waray Kataposan. a Bisan kon nakukurian ka  ha pagtoo ha ideya nga ha Paraiso ha tuna, an magtinumanon nga mga tawo diri na gud mamamatay, mahibabaro ka ha pagsarig hini nga saad pinaagi hini nga mga paghisgot nga ginagamit an Biblia. Salit kon karuyag mo mabuhi ha waray kataposan o karuyag mo la mahibaro kon makatadunganon ba an pagtoo nga mahimo ka mabuhi ha waray kataposan, ano an imo sadang buhaton? Karawata ini nga higayon ha pag-aram han Biblia.

Mationan-o kaiha an sugad nga pag-aram ha Biblia? An gin-unabi pa la nga 32-pahina nga brosyur, nga makukuha ha ginatos nga yinaknan, may-ada 16 la nga halipot nga mga leksyon. O kon makakagahin ka hin mga usa ka oras ha usa ka semana, magkikinahanglan ka hin pipira la ka bulan basi adman an importante nga mga topiko ha Biblia, nga ginagamit an libro nga Kahibaro nga Nagtutugway Ngadto ha Kinabuhi nga Waray Kataposan. Ini nga mga publikasyon nakabulig ha damu na nga mga tawo nga makakuha hin damu hinduro nga kahibaro ngan makapatubo hin hilarom nga gugma ha Dios. Babalosan han Maglalarang adton mga tawo nga totoo nga nahigugma ha iya, binubuligan hira nga magkaada kinabuhi nga waray kataposan.

Ha pagkatinuod, mahimo kita magkaada hin kahibaro nga naghahatag hin kinabuhi, ngan masayon liwat ito makuha. An bug-os nga Biblia, o ha pinakaminos an mga bahin hito, iginhubad na ngadto ha sobra 2,000 nga yinaknan. An mga Saksi ni Jehova ha 235 nga mga katunaan nalilipay ha paghatag hin personal nga bulig ngan ha pagsuplay hin basado ha Biblia nga mga publikasyon basi mapauswag mo pa gud an imo kahibaro.

Personal nga Pag-aram

An imo relasyon ha Dios usa nga personal nga butang butnga ha imo ngan han Maglalarang. Ikaw la an makakagpadayon ngan makakaparig-on hito, ngan hiya la an makakahatag ha imo hin waray kataposan nga kinabuhi. Salit, sadang mo ipadayon an personal nga pag-aram han iya sinurat nga Pulong. Pinaagi ha pagtugot ha usa nga regular nga bumisita ha imo balay, maoobserbahan mo nga mas masayon an paggahin hin oras para ha pag-aram.

Tungod kay an Biblia ngan an mga bulig ha pag-aram han Biblia nagsusulod han “[kahibaro] han Dios,” angayan hinduro nga hirotan mo gud ito. (Proberbios 2:5) Hini nga paagi mapapahimulsan mo ito ha sulod hin damu ka mga tuig. Kon naukoy ka ha nagkukuri nga nasud, bangin waray ka makagamit hin damu nga aradman nga mga libro ha eskwelahan, ngan ha kadak-an nahibaro ka pinaagi ha pagpamati ngan pag-obserba. Pananglitan, ha Benin, sobra 50 nga pinulongan an ginyayakan. Ordinaryo para ha mga indibiduwal an pagyakan hin maopay hin upat o lima nga yinaknan, bisan kon waray gud hira magkaada hin aradman nga libro mahitungod hini nga mga yinaknan. Usa nga regalo an imo abilidad ha paghibaro pinaagi ha pagpamati, pag-obserba, ngan pagsentro han hunahuna. Ha gihapon, maoobserbahan mo nga an mga libro may-ada daku gud nga maibubulig ha imo pag-aram.

Bisan kon naghuhuruot an imo balay, pangalimbasog ha pagkaada hin maopay nga lugar nga mabubutangan han imo Biblia ngan han basado ha Biblia nga mga publikasyon. Ibutang ito ha lugar diin masayon ito makuha ngan ha lugar diin diri ito maguguba.

Pag-aram han Pamilya

Kon usa ka nga kag-anak, sadang ka magin interesado ha pagbulig ha imo mga anak nga makakuha han kahibaro nga imo liwat kinukuha. Ha nagkukuri nga mga nasud, agsob nga hiara an mga kag-anak ha pagtutdo ha ira mga anak hin damu nga mga kaabtik nga kinahanglanon basi mabuhi. Bangin kaupod hito an pagluto, pagtirok hin sungo, pag-alog, pag-uma, pangisda, ngan pagbaligya ha merkado. Importante gud ini nga edukasyon basi mabuhi. Kondi, diri igin-uupod han damu nga mga kag-anak hini nga edukasyon an kahibaro nga makakagtugway ha kinabuhi nga waray kataposan.

Anoman an imo kahimtang, bangin naabat ka nga waray ka damu nga ekstra nga oras. Maaram liwat hini an Maglalarang. May kalabotan ha kon paonan-o sadang igtutdo ha kabataan an iya mga paagi, tigamni kon ano an iya ginsiring maiha na nga panahon an naglabay: “Igtutdo mo hira ka mainuyatmon ha imo mga anak, ngan maghimangraw ka mahitungod hini kon malingkod ka ha imo balay, ngan kon maglalakat ka ha dalan, ngan kon ikaw mahigda, ngan ha imo pagbuhat.” (Deuteronomio 6:7) Basado hini nga mga punto, kay ano nga diri sarihan nga maghimo hin imo kalugaringon nga programa han pagtutdo, sugad han masunod:

1. “Kon malingkod ka ha imo balay”: Pangalimbasog nga magkaada regular nga mga pakighisgot mahitungod ha Biblia, kon puydi kada semana, ha imo mga anak ha balay, sugad la han bangin ginbuhat han usa ha imo. An mga Saksi ni Jehova nagtatagana  hin basado ha Biblia nga mga publikasyon nga angayan ha pagtutdo ha kabataan anoman an ira pangidaron.

2. “Kon maglalakat ka ha dalan”: Ha diri pormal nga paagi, pakiistorya ha imo mga anak mahitungod kan Jehova, ha pariho nga paagi nga gintututdoan mo hira mahitungod han mga kinahanglanon ha kinabuhi o gintatagan hira hin mga giya.

3. “Kon ikaw mahigda”: Pag-ampo upod han imo mga anak kada gab-i.

4. “Ha imo pagbuhat”: Damu nga mga pamilya an nakaeksperyensya hin makapatagbaw nga mga resulta han paghisgot hin usa nga teksto ha Biblia kada aga. Ginagamit han mga Saksi ni Jehova an bokleta nga Pag-usisa han Kasuratan Adlaw-adlaw b sugad nga basihan para hini.

Ha nagkukuri nga mga nasud, damu nga kag-anak an nangangalimbasog gud ha pagsiguro nga an usa han ira mga anak magkaada hin maopay nga sekular nga edukasyon. Hito nga paagi maaataman han anak an mga kag-anak kon malagas na hira. Kondi, kon pag-adman mo an Biblia ngan buligan an ngatanan mo nga anak nga buhaton liwat ito, makakarawat mo an kahibaro nga maghihimo nga posible para ha imo ngan han imo bug-os nga pamilya nga mabuhi ha waray kataposan.

Maabot ba an adlaw nga mahibabaroan naton an ngatanan nga butang? Diri. Samtang an aton tuna nagpapadayon ha pagbiyahe ha waray kataposan ha kawanangan, kita magpapadayon ha pagkuha hin kahibaro. Oo, an Eklesiastes 3:11 nasiring: “Ginhimo [han Dios] an tagsa nga butang nga matahom ha panahon hini: iya man iginpahamutang an kadayonan ha ira kasingkasing, basi nga an tawo diri makaagi han buhat nga kanan Dios ginbuhat tikang ha tinikangan bisan ngadto ha kataposan.” An pagkuha hin kahibaro usa nga kalipay nga diri gud matatapos.

[Mga footnote]

[Blurb ha pahina 5]

“Ini nangangahulogan hin kinabuhi nga waray kataposan, an ira pagkuha hin kahibaro . . .”

[Mga Retrato ha pahina 7]

Buligi an imo pamilya nga kumuha hin kahibaro yana ngan ha waray kataposan