Sarig ha Pulong ni Jehova

“Nasarig ako dida ha imo pulong.”—Salmo 119:42.

 1. Ano an masisiring mo mahitungod han pangirilal-an ngan disposisyon han parasurat han Salmo 119?

 AN PULONG ni Jehova ginhigugma han nagkomposo han Salmo 119. Bangin hiya hi Prinsipe Hesekia han Juda. An mga pagbati nga iginpahayag dinhi hinin giniyahan nga karantahon naangay ha disposisyon ni Hesekia, nga padayon nga “kinupkop kan Jehova” samtang nag-aalagad sugad nga hadi han Juda. (2 Hadi 18:3-7) Usa nga butang an sigurado: An nagkomposo mahunahunaon han iya espirituwal nga panginahanglan.—Mateo 5:3.

 2. Ano an tema han Salmo 119, ngan paonan-o ginhan-ay ini nga karantahon?

² Usa nga importante nga punto han Salmo 119 amo an bili han pulong, o mensahe han Dios. a Posible nga sugad nga bulig ha pagmemorya, ginhimo han parasurat inin karantahon nga iginbasar ha alpabeto. An 176 nga mga bersikulo hito iginbasar ha sunod-sunod nga mga letra han Hebreo nga alpabeto. Ha orihinal nga Hebreo, an tagsa nga 22 nga estansa han salmo may-ada 8 nga mga linya nga nagtitikang ha pariho nga letra. Ini nga salmo nag-uunabi han pulong, balaud, mga pahinumdom, mga paagi, mga kahikayan, mga regulasyon, mga kasugoan, hudisyal nga mga desisyon, mga puplunganon, ngan mga lagda han Dios. Dinhi hini nga artikulo ngan ha masunod, paghihisgotan an Salmo 119 sumala ha husto nga hubad han Hebreo nga teksto han Biblia. An pamalandong ha mga eksperyensya han mga surugoon ni Jehova ha naglabay ngan yana nga panahon sadang magpauswag han aton apresasyon hinin giniyahan han Dios nga karantahon ngan makadugang han aton pagpasalamat ha sinurat nga Pulong han Dios, an Biblia.

Magmamalipayon Kita Kon Susundon Naton an Pulong han Dios

 3. Isaysay ngan iilustrar kon ano an kahulogan han pagin waray kasaypanan.

³ An totoo nga kalipayan nadepende ha aton paglakat uyon ha balaud han Dios. (Salmo 119:1-8) Kon buhaton naton ini, tatagdon kita ni Jehova nga ‘waray kasaypanan ha aton paglakat.’ (Salmo 119:1, NW) An pagin waray kasaypanan diri nangangahulogan nga kita hingpit, kondi iginpapasabot hito nga nangangalimbasog kita ha pagbuhat han kaburut-on ni Jehova nga Dios. Pinamatud-an ni Noe nga “hiya putli ha iya katulinan” sugad nga usa ka tawo nga “naglakat kaupod han Dios.” Iton matinumanon nga patriarka ngan an iya pamilya naluwas ha Baha tungod kay ginsunod niya an pagkinabuhi nga iginsugo ni Jehova. (Genesis 6:9; 1 Pedro 3:20) Ha sugad man nga paagi, an aton kaluwasan tikang ha kabungkagan hini nga kalibotan nadepende ha aton ‘pagbantay ha mga iginpapatuman’ han Dios, hito nga paagi ginbubuhat naton an iya kaburut-on.—Salmo 119:4.

 4. Ha ano nadepende an aton kalipayan ngan kalamposan?

⁴ Diri gud kita babayaan ni Jehova kon kita ‘magdadayaw ha iya nga may matadong nga kasingkasing ngan padayon nga magtutuman han iya mga kasugoanan.’ (Salmo 119:7, 8, NW) Waray bayai han Dios an Israelita nga lider nga hi Josue, nga nagsunod han sagdon nga ‘basahon an balaud ha adlaw ngan gab-i basi mabantayan an pagbuhat sumala  han ngatanan nga nahisurat dida.’ Nakabulig ito ha iya nga maglampos ngan gumios hin maaramon. (Josue 1:8) Han hirani na mamatay hi Josue, nagdadayaw pa gihapon hiya ha Dios ngan nagpahinumdom ha mga Israelita: “Maaram kamo ha ngatanan niyo nga mga kasingkasing ngan ha ngatanan niyo nga mga kalag, nga waray usa nga butang nga nakawang ha ngatanan nga mag-opay nga butang nga kan Jehova nga iyo Dios iginyakan . . . ha iyo.” (Josue 23:14) Pariho kan Josue ngan ha parasurat han Salmo 119, mabibilngan naton an kalipayan ngan kalamposan pinaagi han pagdayaw kan Jehova ngan pagsarig ha iya pulong.

An Pulong ni Jehova Nagtitipig ha Aton nga Limpyo

 5. (a) Ipakita kon paonan-o posible an pagpabilin nga limpyo ha espirituwal. (b) Ano an bulig para ha usa ka batan-on nga nakasala hin seryoso?

⁵ Mahimo kita magin limpyo ha espirituwal kon padayon nga magbabantay kita sumala ha pulong han Dios. (Salmo 119:9-16) Ini an angay buhaton bisan kon an aton mga ginikanan diri nagpapakita hin maopay nga susbaranan. Bisan kon an amay ni Hesekia parasingba ha diosdios, kan Hesekia ‘ginhamis an iya dalan,’ posible nga ginkuha niya an pagano nga mga impluwensya. Pananglitan an usa ka batan-on nga nag-aalagad ha Dios yana nakabuhat hin seryoso nga sala. An pagbasol, pag-ampo, bulig han ginikanan, ngan an mahigugmaon nga bulig han Kristiano nga mga tigurang makakabulig ha iya nga magin pariho kan Hesekia ngan ‘hamison an iya dalan ngan [padayon nga] magbantay.’—Jakobo 5:13-15.

 6. Hin-o nga kababayin-an an ‘naghamis han ira dalan ngan nagpadayon ha pagbantay sumala ha pulong han Dios’?

⁶ Bisan kon hi Rahab ngan hi Rut maiha na nga buhi antes igsurat an Salmo 119, ira ‘ginhamis an ira dalan.’ Hi Rahab usa nga Kanaanhon nga bigaon, kondi nagin bantogan hiya tungod han iya pagtoo sugad nga magsiringba ni Jehova. (Hebreo 11:30, 31) Binayaan han Moabitanhon nga hi Rut an iya mga dios, nag-alagad kan Jehova, ngan sinugot ha iya Balaud ha Israel. (Rut 1:14-17; 4:9-13) Ini nga duha nga diri-Israelita nga kababayin-an nagpadayon ha ‘pagbantay sumala ha pulong han Dios’ ngan nagkaada talagsahon nga pribilehiyo nga magin kaapoy-apoyan ni Jesu-Kristo.—Mateo 1:1, 4-6.

 7. Paonan-o hi Daniel ngan an tulo pa nga Hebreohanon nga mga batan-on nagpakita hin maopay nga susbaranan ha pagpabilin nga limpyo ha espirituwal?

⁷ “An panhunahuna han kanan tawo kasingkasing maraot tikang ha iya kabata,” kondi mahimo sundon han mga batan-on an limpyo nga dalan, bisan dinhi hinin maraot nga kalibotan nga kontrolado ni Satanas. (Genesis 8:21; 1 Juan 5:19) Sugad nga mga bihag ha Babilonya, hi Daniel ngan an tulo nga Hebreohanon nga mga batan-on nagpadayon ha ‘pagbantay sumala ha pulong han Dios.’ Pananglitan, waray nira hugawi an ira kalugaringon pinaagi han ‘kanan hadi magrasa’ nga pagkaon. (Daniel 1:6-10) An mga Babilonyahanon kinaon hin maghugaw nga mga hayop, nga igindiri han Mosaiko nga Balaud. (Lebitiko 11:1-31; 20:24-26) Diri nira pirme ginpapaagas an dugo kon nag-iihaw hin mga hayop, ngan an ira pagkaon hin karne nga waray paagasa an dugo nagtalapas ha balaud han Dios ha dugo. (Genesis 9:3, 4) Diri urusahon nga an upat nga Hebreohanon waray kumaon han magrasa nga pagkaon han hadi! Ito nga mga batan-on nga nagsugot ha Dios nagpabilin nga limpyo ha espirituwal ngan hito nga paagi nagpakita hin maopay nga susbaranan.

 An Pulong han Dios Usa nga Bulig ha Pagkamatinumanon

 8. Ano nga disposisyon ngan kahibaro an kinahanglan naton basi masabtan ngan maiaplikar naton an balaud han Dios?

⁸ An paghigugma ha pulong han Dios importante nga bahin basi magpabilin kita nga matinumanon kan Jehova. (Salmo 119:17-24) Kon pariho kita ha giniyahan nga salmista, aton hihingyapon nga masabtan an “urusahon nga mga bagay” han balaud han Dios. Aton padayon nga ‘hihingyapon an mga sugo ni Jehova’ ngan ipapakita an ‘kalipay ha iya’ mga pahinumdom. (Salmo 119:18, 20, 24) Kon nagin dedikado kita ngadto kan Jehova bisan ha halipot la nga panahon, kita ba ‘nagtinguha han espirituhanon nga gatas nga waray limbong’ tikang ha pulong? (1 Pedro 2:1, 2) Kinahanglan masabtan naton an basihan nga mga katutdoan han Biblia basi mas masabtan ngan maiaplikar naton an balaud han Dios.

 9. Paonan-o kita magios kon nagkakasumpaki an balaud han Dios ngan an ginkikinahanglan han mga tawo?

⁹ Bangin hinigugma gud naton an mga pahinumdom han Dios, kondi kumusta man kon an “mga prinsipe” nagyayakan kontra ha aton tungod ha usa nga hinungdan? (Salmo 119:23, 24) Yana nga panahon, an mga tawo nga may awtoridad nangangalimbasog pagpirit ha aton nga tagdon nga mas importante an mga balaud han tawo kay ha balaud han Dios. Kon nagkakasumpaki an mga ginkikinahanglan han tawo ngan an kaburut-on han Dios, ano an aton bubuhaton? An aton gugma ha pulong han Dios mabulig ha aton nga magpabilin nga matinumanon kan Jehova. Pariho han ginpersigir nga mga apostol ni Jesu-Kristo, kita masiring: “Kinahanglan sugton namon an Dios sugad nga magmarando imbes nga an mga tawo.”—Buhat 5:29, NW.

10, 11. Iilustrar kon paonan-o kita makakagtipig han integridad ngadto kan Jehova ilarom han pinakamakuri nga mga kahimtang.

¹⁰ Mahimo kita magpabilin nga matinumanon kan Jehova bisan ilarom han pinakamakuri nga mga kahimtang. (Salmo 119:25-32) Kon karuyag naton maglampos ha pagtipig han aton integridad ngadto ha Dios, kinahanglan magin disidido kita nga matutdoan ngan mag-ampo hin sinsero para han iya instruksyon. Kinahanglan pilion liwat naton “an dalan han kamatinumanon.”—Salmo 119:26, 30.

¹¹ Hi Hesekia, nga bangin amo an nagsurat han Salmo 119, nagpili han “dalan han kamatinumanon.” Iya ginbuhat ito bisan pa kon napalibotan hiya han palso nga mga magsiringba ngan bangin gintamay pa han mga membro han mga opisyal han palasyo. Posible gud nga an ‘iya kalag diri nakakaturog tungod ha kaguol’ tungod han sugad nga mga kahimtang. (Salmo 119:28, NW) Kondi hi Hesekia sinarig ha Dios, nagin maopay nga hadi, ngan nagbuhat hadton “matadong ha mga mata ni Jehova.” (2 Hadi 18:1-5) Pinaagi han pagsarig ha Dios, kita liwat mahimo makailob han mga pagsari sugad nga mga magtiripig han integridad.—Jakobo 1:5-8.

An Pulong ni Jehova Naghahatag hin Kaisog

12. Paonan-o naton maiaaplikar ha kalugaringon an Salmo 119:36, 37?

¹² An pagsunod ha giya han pulong han Dios naghahatag  ha aton hin kaisog nga ginkikinahanglan ha paglampos han mga kakurian ha kinabuhi. (Salmo 119:33-40) Mapainubsanon nga gintitinguha naton an instruksyon ni Jehova basi matuman naton an iya balaud ‘ha bug-os nga kasingkasing.’ (Salmo 119:33, 34) Pariho han salmista, naghahangyo kita ha Dios: “Ikiling an akon kasingkasing ngadto ha imo mga pahinumdom, ngan diri ha mga ganansya,” o “diri makatadunganon nga ganansya.” (Salmo 119:36, NW) Pariho kan apostol Pablo, kita ‘nagawi hin [tangkod] ha ngatanan nga mga butang.’ (Hebreo 13:18) Kon karuyag han agaron nga buhaton naton an usa nga butang ha diri-tangkod nga paagi, nagtitirok kita hin kaisog basi padayon nga makasunod ha mga giya han Dios—ngan pirme ginbibendisyonan ni Jehova an sugad nga buhat. Ha pagkamatuod, nabulig hiya ha aton nga mapugngan an ngatanan nga maraot nga mga hingyap. Salit kinahanglan mag-ampo kita: “Birika an akon mga mata tikang ha pagkinita ha [“waray kapulsanan,” NW].” (Salmo 119:37) Diri gud kita maruruyag nga hunahunaon nga hiringyapon an bisan ano nga waray-pulos nga butang nga kinangangalasan han Dios. (Salmo 97:10) Magpapagios ito ha aton nga likyan labi na an pornograpiya ngan mga buhat ha espiritismo.—1 Korinto 6:9, 10; Pahayag 21:8.

13. Paonan-o an ginpersigir nga mga disipulo ni Jesus nagkaada han kaisog nga ginkinahanglan ha pagpamatuod nga waray kahadlok?

¹³ An husto nga kahibaro ha pulong han Dios naghahatag ha aton hin kompyansa ha pagsangyaw hin maisugon. (Salmo 119:41-48) Ngan ginkikinahanglan gud naton an kaisog ha ‘pagbaton hadton nagyuyubit ha aton.’ (Salmo 119:42) Usahay, bangin nagigin pariho kita ha ginpersigir nga mga disipulo ni Jesus, nga nag-ampo: “[Jehova], . . . hatagi an imo mga uripon, nga igyakan nira an imo pulong ha waray kahadlok.” Ano an resulta? “Hira ngatanan napuno han espiritu santo, ngan hira nagyakan han pulong han Dios ha waray kahadlok.” An Soberano nga Ginoo naghahatag liwat ha aton hin kaisog ha pagyakan han iya pulong ha waray kahadlok.—Buhat 4:24-31.

14. Ano an nabulig ha aton ha maisugon nga pagsangyaw, sugad han ginbuhat ni Pablo?

¹⁴ Magkakaada kita han kaisog nga ginkikinahanglan ha pagpamatuod nga waray kahadlok ha kaawod kon aton hinigugma an “pulong han kamatuoran” ngan ‘tipigan an balaud han Dios hin dayoday.’ (Salmo 119:43, 44) An maduruto nga pag-aram ha sinurat nga Pulong han Dios nagsasangkap ha aton ha ‘pagyakan mahitungod han iya mga [“pahinumdom,” NW] ha atubangan han mga hadi.’ (Salmo 119:46) An pag-ampo ngan an espiritu ni Jehova mabulig liwat ha aton ha pagyakan han husto ha maopay nga paagi. (Mateo 10:16-20; Kolosas 4:6) Hi Pablo maisugon nga nagyakan mahitungod han mga pahinumdom han Dios ha mga magmarando ha siyahan nga siglo. Pananglitan, ginsangyawan niya hi Gobernador Felix han Roma, nga ‘namati ha iya mahitungod han pagtoo kan Jesu-Kristo.’ (Buhat 24:24, 25) Nagpamatuod liwat hi Pablo kan Gobernador Pesto ngan kan Hadi Agripa. (Buhat 25:22–26:32) Pinaagi han bulig ni Jehova, kita liwat mahimo magin maisugon nga mga saksi, nga diri gud ‘ikinaaawod an maopay nga sumat.’—Roma 1:16.

An Pulong han Dios Naghahatag ha Aton hin Pagliaw

15. Paonan-o an Pulong han Dios makakaliaw ha aton kon an iba nagtatamay ha aton?

¹⁵ An Pulong han Dios naghahatag hin masasarigan nga pagliaw. (Salmo 119:49-56) May mga panahon nga nagkikinahanglan gud kita hin pagliaw. Bisan kon maisugon nga nagyayakan kita sugad nga mga Saksi ni Jehova, “an mga palabilabihon”—adton nagios hin mapahitas-on ngadto ha Dios—usahay ‘nagyuyubit hin ura-ura gud ha aton.’ (Salmo 119:51) Kondi, samtang nag-aampo, bangin mahinumdoman naton an positibo nga mga butang nga ginsiring ha Pulong han Dios, ngan salit kita ‘naliliaw ha aton ngahaw.’ (Salmo 119:52) Ha aton mga pangamuyo, bangin mahinumdoman naton an usa nga balaud o prinsipyo ha Kasuratan nga naghahatag ha aton hin pagliaw ngan kaisog nga ginkikinahanglan ha makuri nga kahimtang.

16. Ano an diri ginbubuhat han mga surugoon han Dios bisan pa han persikusyon?

¹⁶ An mapahitas-on nga nagtamay ha salmista amo an mga Israelita—mga membro han usa nga nasud nga dedikado ngadto ha Dios. Makaarawod gud! Kondi, diri kita magsubad ha ira, lugod kinahanglan magin determinado kita nga diri gud bumulag ha balaud han Dios. (Salmo 119:51) Han nakaeksperyensya han persikusyon han mga Nazi ngan ha mga pagtrato nga pariho hito ha naglabay nga mga katuigan, yinukot nga mga surugoon han Dios an waray bumulag tikang ha mga balaud ngan mga prinsipyo dida ha Pulong han Dios. (Juan 15:18-21) Ngan diri mabug-at an pagsugot kan Jehova, tungod kay an iya mga regulasyon pariho han mga karantahon nga nakakaliaw ha aton.—Salmo 119:54; 1 Juan 5:3.

 Magin Mapasalamaton Tungod ha Pulong ni Jehova

17. An apresasyon ha pulong han Dios nagpapagios ha aton nga buhaton an ano?

¹⁷ Pinamamatud-an naton an aton pagpasalamat ha pulong han Dios pinaagi han pagkinabuhi uyon hito. (Salmo 119:57-64) An salmista nagsaad nga iya tutumanon ‘an mga pulong ni Jehova,’ ngan bisan ‘ha katutnga han gab-i nabangon hiya ha pagpasalamat ha Dios tungod han Iya magtadong nga mga sugo.’ Kon nahihigimata kita ha gab-i, maopay gud ito nga higayon nga magpasalamat kita ha Dios ha pag-ampo! (Salmo 119:57, 62) An aton apresasyon ha pulong han Dios nagpapagios ha aton nga tinguhaon an iya katutdoan ngan nagpapalipay ha aton sugad nga mga ‘kaupod hadton nahahadlok kan Jehova’—mga tawo nga matinalahuron nga nahahadlok ha Dios. (Salmo 119:63, 64) Waray na kita hiaagian nga mas maopay pa nga mga kaupod dinhi ha tuna!

18. Paonan-o binabaton ni Jehova an aton mga pag-ampo kon ‘an mga lubid han mga magraot igin-aalikos ha aton’?

¹⁸ Kon bug-os-kasingkasing nga nag-aampo kita ngan mapainubsanon nga naghahangyo kan Jehova nga tutdoan kita, aton ‘ginpapahumok an iya nawong’ nga ginhuhunahuna an pagpahimulos han iya pag-uyon. Kinahanglan mag-ampo kita labi na kon ‘an mga lubid han mga magraot igin-aalikos ha aton.’ (Salmo 119:58, 61) Mahihimo ni Jehova nga utdon an nakakapugong nga mga lubid han kaaway ngan hatagan kita hin kagawasan basi makagpadayon ha buruhaton nga pagsangyaw han Ginhadian ngan paghimo hin mga disipulo. (Mateo 24:14; 28:19, 20) Pauro-utro nga ipinapakita ini ha mga nasud diin igindidiri an aton buruhaton.

Magkaada Pagtoo ha Pulong han Dios

19, 20. Paonan-o magigin maopay an pag-antos hin kakurian?

¹⁹ An pagtoo ha Dios ngan ha iya pulong nabulig ha aton nga ilubon an kakurian ngan padayon nga buhaton an iya kaburut-on. (Salmo 119:65-72) Bisan kon an mga palabilabihon ‘naghimo-himo hin buwa patok ha iya,’ an salmista nagkanta: “Maopay ha akon nga ginpasakitan ako.” (Salmo 119:66, 69, 71) Paonan-o magigin maopay para ha bisan hin-o han mga surugoon ni Jehova nga mag-antos hin kakurian?

²⁰ Kon nag-aantos kita hin kakurian, sigurado nga sinsero nga nag-aampo kita ngadto kan Jehova, ngan tungod hito nagigin mas duok kita ha iya. Mahimo kita magkaada hin dugang nga panahon ha pag-aram ha sinurat nga Pulong han Dios ngan mas mangalimbasog pa gud ha pag-aplikar hito. Nagriresulta ini ha mas malipayon nga kinabuhi. Kondi kumusta man kon an aton reaksyon ha kakurian nagpapakita hin diri maopay nga mga batasan, sugad han pagkadiri-mapailubon ngan pagpahitaas? Pinaagi han sinsero nga pag-ampo ngan ha bulig han Pulong ngan espiritu han Dios, malalamposan naton an sugad nga mga kaluyahan ngan mas bug-os nga ‘maisusul-ot naton an bag-o nga pagkatawo.’ (Kolosas 3:9-14) Dugang pa, napaparig-on an aton pagtoo kon gin-iilob naton an kakurian. (1 Pedro 1:6, 7) Nakabulig kan Pablo an iya mga kakurian tungod kay pinaagi hito mas nagdepende hiya kan Jehova. (2 Korinto 1:8-10) Tinutugotan ba naton an pag-antos nga magkaada maopay nga epekto ha aton?

Sarig Pirme kan Jehova

21. Ano an nahitatabo kon ginpapakaalohan han Dios an mga palabilabihon?

²¹ An pulong han Dios naghahatag ha aton hin maopay nga basihan ha pagsarig kan Jehova. (Salmo 119:73-80) Kon nasarig gud kita ha aton Maglalarang, waray kita rason nga maawod. Kondi, tungod han ginbubuhat han iba, ginkikinahanglan naton an pagliaw ngan bangin karuyag naton mag-ampo: ‘Ibutang unta ha kaalo an mga palabilabihon.’ (Salmo 119:76-78) Kon pakaalohan ni Jehova an sugad nga mga tawo, magriresulta ini ha kabuhayhag han ira magraot nga mga paagi ngan ha pagbaraan han iya ngaran. Makakasiguro kita nga an mga persigidor ha katawohan han Dios diri makarawat hin bisan ano. Pananglitan, waray gud hira makapoo ngan diri gud hira makakapoo ha mga Saksi ni Jehova,  nga bug-os-kasingkasing nga nasarig ha Dios.—Proberbios 3:5, 6.

22. Ha ano nga paagi nga an salmista ‘sugad hin anit nga surudlan hin alaksiw nga aada ha asó’?

²² An pulong han Dios nagpaparig-on han aton pagsarig ha iya kon kita ginpipersigir. (Salmo 119:81-88) Tungod kay an mga palabilabihon nagpipersigir ha salmista, inabat hiya nga ‘sugad hiya hin usa nga anit nga surudlan hin alaksiw nga aada ha asó.’ (Salmo 119:83, 86) Ha mga panahon han Biblia, an mga surudlan nga hinimo tikang ha anit han hayop ginamit nga surudlan hin tubig, alaksiw, ngan iba pa nga mga likido. Kon diri ginagamit, ini nga mga surudlan bangin kumupos kon isasang-at hirani ha kalayo ha kwarto nga maasó. Naabat ka ba ‘sugad hin anit nga surudlan hin alaksiw nga aada ha asó’ tungod han kakurian o persikusyon? Kon amo, sarig kan Jehova, ngan pag-ampo: “Pagmalabuhia ako sunod han imo mahigugmaon nga kalooy; salit pagbabantayan ko an pagpamatuod [“pahinumdom,” NW] han imo baba.”—Salmo 119:88.

23. Ano an aton ginhisgotan ha pagrepaso ha Salmo 119:1-88, ngan ano an mahimo naton igpakiana ha aton kalugaringon samtang ginpapamulat naton an pag-aram ha Salmo 119:89-176?

²³ An aton ginhisgotan ha siyahan nga katunga han Salmo 119 nagpapakita nga hi Jehova may-ada mahigugmaon nga pagkabuotan ha iya mga surugoon tungod kay nasarig hira ha iya pulong ngan nahigugma ha iya mga lagda, mga pahinumdom, mga kasugoanan, ngan mga balaud. (Salmo 119:16, 47, 64, 70, 77, 88) Nalilipay hiya nga adton debotado ha iya padayon nga nagbabantay sumala ha iya pulong. (Salmo 119:9, 17, 41, 42) Samtang ginpapamulat mo an pag-aram ha nahibibilin pa hinin makaparig-on nga salmo, mahimo mo pakianhan an imo kalugaringon, ‘Tinutugotan ko gud ba an pulong ni Jehova nga maglamrag ha akon dalan?’

[Footnote]

Paonan-o Mo Babatunon?

• Ha ano nadepende an totoo nga kalipayan?

• Paonan-o an pulong ni Jehova nagtitipig ha aton nga limpyo ha espirituwal?

• Ha ano nga mga paagi naghahatag ha aton an pulong han Dios hin kaisog ngan pagliaw?

• Kay ano nga sadang magkaada kita hin pagtoo kan Jehova ngan ha iya pulong?

[Mga Pakiana]

[Mga Retrato ha pahina 11]

Hi Rut, Rahab, ngan an Hebreohanon nga mga batan-on nga nadistyero ha Babilonya ‘nagpadayon ha pagbantay sumala ha pulong han Dios’

[Retrato ha pahina 12]

Hi Pablo maisugon nga ‘nagyakan mahitungod han mga pahinumdom han Dios ha atubangan han mga hadi