Sobra ba Kadamu an Kahibaro Para ha Aton?

Usa nga mag-asawa nga misyonero nga nangangalingkod ha baybayon ha Weste nga Aprika an nagkikinita ha mapawa nga bulan. “Mationan-o kadamu an hinbabaroan na han tawo mahitungod han bulan, ngan mationan-o pa kadamu an angay hibaroan mahitungod hito?” siring han bana.

An asawa binaton: “Handurawa nga mahimo naton obserbahan an kalibotan nga nalabay ha paagi nga pariho han aton pag-obserba ha bulan—mationan-o na kadamu an kahibaro han mga tawo, ngan mationan-o pa kadamu an angay hibaroan? Ngan hunahunaa la! Diri la kay an kalibotan nalibot ha adlaw kondi an aton bug-os nga solar nga sistema nagkikiwa liwat. Nangangahulogan ini nga posible nga diri na gud kita mahinganhi utro hinin eksakto nga dapit ha uniberso. Ha pagkamatuod, maaram la kita han aton presente nga hinmumutangan ha kawanangan kon aton gintatagad an adlaw ngan mga bitoon. Damu hinduro an aton kahibaro mahitungod han pipira nga mga butang, kondi makakasiring kita nga diri ngani kita maaram kon hain kita!”

ITO nga mga punto naghihisgot han pipira nga importante nga mga kamatuoran. Baga hin damu hinduro an angay hibaroan. Syempre, an tagsa ha aton nahibabaro hin bag-o nga mga butang kada adlaw. Kondi, mationan-o man kadamu an aton hinbabaroan, baga hin diri naton akos hibaroan an ngatanan nga karuyag naton hibaroan ha kalaksi han paghibaro nga karuyag naton.

Totoo, dugang pa ha abilidad ha paghibaro hin bag-o nga impormasyon, an kapasidad ha pagtipig hin kahibaro nag-uswag na gud. An natitipigan nga kahibaro han katawohan nagdamu na gud pinaagi han teknolohiya. An mga hard disk han kompyuter may-ada na yana daku hinduro nga mga kapasidad salit kinahanglan maghimo hin bag-o nga mga termino ha matematika basi may maitawag hito. An simple nga CD-ROM nakakatipig hin damu hinduro nga impormasyon; an kapasidad hito gintatawag sugad nga 680 ka megabyte o sobra pa. An ordinaryo nga DVD nakakatipig hin impormasyon nga haros pito ka pilo hito, ngan nagkakaada na pipira nga may-ada mas daku pa ngani nga kapasidad.

An mga paagi han moderno nga tawo ha pagkomunikar hin impormasyon haros diri naton masabtan. An mga rotary press malaksi hinduro nga naandar, ngan nag-iimprinta hin mga peryodiko, magasin, ngan libro. Para ha usa nga nagamit han Internet, an waray kataposan nga kadamu hin impormasyon makukuha dayon pinaagi hin usa la ka pindot han mouse. Hini ngan ha damu iba pa nga mga paagi, an pagpasarang hin impormasyon mas nagtitikalaksi kay han akos hibaroan han bisan hin-o. Ini nga kadamu han impormasyon usahay iginpariho ha dagat, nga haluag hinduro salit kinahanglan kita mahibaro ha paglangoy dida hito, siring pa, kondi mangalimbasog nga diri ito inumon. Tungod han pagkadamu hinduro han kahibaro napipiritan kita nga magin mapili.

 Usa pa nga hinungdan ha pagin mapili amo nga damu nga impormasyon nga masayon makuha an diri pirme mapulsanon. Ha pagkamatuod, an pipira hito maraot pa ngani, diri angay hibaroan. Hinumdumi nga an kahibaro nagtutudlok ha impormasyon—maopay man o maraot, mapulsanon o diri. Mas nakakagupong pa gud kay an pipira nga mga butang nga gintatagad han damu sugad nga mga kamatuoran diri gud husto. Damu na hinduro ka beses nga napamatud-an ha urhi nga sayop ngay-an an mga pulong bisan hadton tinatahod pa ngani nga mga awtoridad! Pananglitan, hunahunaa an mahitungod han eskriba han kadaan nga Efeso, nga sigurado nga ginhunahuna han mga tawo didto sugad nga makinaadmananon nga opisyal. Hiya nagsiring: “Hin-o ba nga tawo iton aadto, nga diri nakilala, nga an bungto han mga Efesohanon amo an magbarantay han templo han daku nga Diana, ngan han ladawan nga nahulog tikang kan Jupiter [“langit,” NW]?” (Buhat 19:35, 36) Bisan kon baga hin usa ini nga butang nga hinbabaroan han ngatanan—diri-karuhaduhaan pa ngani, siring han damu—diri totoo nga an ladawan nahulog tikang ha langit. May maopay nga hinungdan nga an Baraan nga Biblia nagpapahamangno ha mga Kristiano nga magbantay kontra hiton “buwa nga gintawag nga kaaram.”—1 Timoteo 6:20.

Usa nga marig-on nga hinungdan ha pagin mapili mahitungod han kahibaro amo nga an aton presente nga kinabuhi halipot gud la. Anoman an imo pangidaron, waray ruhaduha nga damu nga mga klase hin kahibaro an karuyag mo usisahon, kondi nasasantop mo nga diri ka na mabubuhi hin sugad kaiha basi mausisa ito.

Mababag-o pa ba ini nga importante nga problema? Posible ba magkaada hin usa nga kanataran han kahibaro nga magpapahilawig gud han kinabuhi, bisan tubtob ha waray kataposan? Posible ba nga naeksister na an sugad hito nga kahibaro? Kon amo, mahibabaroan ba ito han ngatanan? Maabot ba an adlaw nga an ngatanan nga kahibaro masusugad han aton ginlalaoman—an kamatuoran? An mag-asawa nga misyonero nga ginhisgotan ha tinikangan nakabiling hin makapatagbaw nga mga baton hito nga mga pakiana, ngan mahimo mo liwat ito mabilngan. Alayon basaha an sunod nga artikulo, nga maghahatag ha imo han paglaom nga makakuha hin kahibaro ha waray kataposan.