Mga Pakiana Tikang ha mga Magbarasa

Kay ano nga nagsurat hi Pablo mahitungod ha Kristiano nga asawa: “Matitipigan hiya nga talwas pinaagi ha pagpanganak”?—1 Timoteo 2:15, NW.

Ano an iginpapakita han konteksto hini nga bersikulo mahitungod han iginpasabot ni Pablo? Ilarom han paggiya han baraan nga espiritu, nagsasagdon hiya mahitungod han bahin han Kristiano nga babaye ha kongregasyon. Hiya nagsurat: “An mga babaye magpakaopay ha ira ha mga kaangayan nga panapton, mahadong ngan maligdong; diri nga may tinalonay nga buhok, ngan bulawan, o mutya, o mahal nga panapton; kondi, pinaagi ha mga maopay nga buhat (sugad ha nahiaangay ha mga babaye nga nagsusunod ngan nagtatahod ha Dios).” (1 Timoteo 2:9, 10) Ginsasagda ni Pablo an iya Kristiano nga kabugtoan nga kababayin-an nga magin maligdong, magin timbang ha pagpili hin mga rayandayan ha kalugaringon, ngan “magpakaopay” pinaagi han maopay nga mga buhat.

Katapos, iginsaysay ni Pablo an kahikayan han pagkaulo ha kongregasyon, nasiring: “Diri ako natugot nga an babaye magtutdo, bisan nga paggahum ha lalaki, kondi nga magmamingaw.” (1 Timoteo 2:12; 1 Korinto 11:3) Iya iginsaysay an basihan para hini nga kahikayan pinaagi ha pagpakita nga hi Adan waray malimbongi ni Satanas, kondi hi Eva ‘nalimbongan ngan nahulog ngadto ha pagtalapas.’ Paonan-o mapapanalipdan an usa nga Kristiano nga babaye kontra ha sala ni Eva? Hi Pablo binaton: “Kondi, matitipigan hiya nga talwas pinaagi han pagpanganak, kon magpabilin hira ha pagtoo ngan gugma ngan pagkabaraan upod an maopay nga panhunahuna.” (1 Timoteo 2:14, 15, NW) Ano an iginpasabot ni Pablo hini nga mga pulong?

An pipira nga mga parahubad baga hin nagpapasabot nga basi maluwas an usa nga babaye, kinahanglan magpanganak hiya. Pananglitan, an Maopay nga Sumat nga Biblia nasiring: “Matatalwas an babaye pinaagi hin kamay-ada anak.” Kondi, diri husto ini nga pag-interpretar ha mga pulong ni Pablo. Damu nga mga teksto an nagpapakita nga basi maluwas, an usa ka tawo kinahanglan kumilala kan Jehova, tumoo kan Jesus, ngan magbuhat hin pagtoo, nga ipinapakita ito nga pagtoo pinaagi hin mga buhat. (Juan 17:3; Buhat 16:30, 31; Roma 10:10; Jakobo 2:26) Dugang pa, waray ipasabot ni Pablo nga igin-gagarantiya an talwas nga panganak ha matinoohon nga kababayin-an. Nakatalwas an kababayin-an ha pagpanganak, matinoohon man hira o diri. Ngan makasurubo, an iba namamatay ha pagpanganak, matinoohon man hira o diri.—Genesis 35:16-18.

An dugang nga sagdon ni Pablo mahitungod ha kababayin-an ha urhi dinhi hini mismo nga surat nabulig ha aton nga hisabtan an iya iginpasabot. Iya ginpahamangnoan an pipira nga mas bata nga mga balo nga ‘mga hubya, nagpipinanungbalay; ngan diri la mga hubya, kondi maglibak ngan maglabot, nga magyákan ha mga bagay nga diri angay pagyaknon.’ Ano an sagdon ni Pablo? Hiya nagpadayon: “Busa, buot ko nga an mga batan-on nga mga balo papangasawa, manganganak, magmangno ha panimalay, ngan nga diri maghatag hin katigayonan ha kaaway hin paglibak.”—1 Timoteo 5:13, 14.

Ginpabug-atan ni Pablo an positibo nga bahin han kababayin-an ha kahikayan han pamilya. Kon okupado ha mga buruhaton sugad han ‘pagpanganak ngan pagmangno ha panimalay,’ an usa nga babaye nga nagpapadayon “ha pagtoo ngan gugma ngan pagkaputli nga may pagkaligdong” diri mahihilig ha mga panggawi nga diri makaparig-on. An iya espirituwalidad matitipigan, o “maluluwas.” (1 Timoteo 2:15) An pagbuhat hini mabulig ha damu nga batan-on nga kababayin-an nga malikyan an mga lit-ag ni Satanas.

An mga pulong ni Pablo kan Timoteo nagpapahinumdom ha aton ngatanan, kalalakin-an ngan kababayin-an, nga magin okupado ha mapulsanon nga paagi. An Pulong han Dios nagsasagdon ha ngatanan nga mga Kristiano: “Tan-awa niyo hin maopay kon mationan-o iton iyo panggawi, diri sugad ha mga diri maaram, kondi sugad ha mga maaram.”—Efeso 5:15.