Hirani na an Kalibotan nga Waray Kakablas

AN MGA retrato han Paraiso, sugad han aada ha kobre hini nga magasin, naruruyagan gud han mga tawo nga nagkikinabuhi ha kakablas. Totoo an usa nga paraiso ha siyahan nga tawhanon nga mag-asawa, hira Adan ngan Eva. Naukoy hira hadto ha hardin han Eden. (Genesis 2:7-23) Bisan kon nawara ito nga Paraiso, an pagtoo ha usa nga paraiso ha tidaraon—ha bag-o nga kalibotan nga waray na kakablas—diri la usa nga inop. Marig-on nga iginbasar ito ha mga saad nga aada ha Biblia.

Tagda an iginsaad ni Jesu-Kristo ha ultimo nga adlaw han iya kinabuhi ha tuna. An usa han mga magburuhat hin maraot nga namatay kaupod ni Jesus nagpakita hin pagtoo ha abilidad han Dios ha pagsulbad han mga problema han mga tawo. Hiya nagsiring: “Jesus panumdoma ako, kon ikaw makadto ha imo ginhadian.” Ipinapakita hini nga mga pulong nga natoo an magburuhat hin maraot nga magmamando hi Jesus sugad nga Hadi ngan an mga patay pagbabanhawon. Hi Jesus binaton: “Ha pagkamatuod nasiring ako ha imo yana nga adlaw, makakaupod ko ikaw ha Paraiso.”—Lukas 23:42, 43; NW.

Ha paghisgot mahitungod hadton maukoy ha Paraiso, an Biblia nasiring: “Hira magtutukod hin mga balay ngan maukoy hini; ngan hira magtatanom hin mga urubasan, ngan makaon han mga bunga hini.” (Isaias 65:21) Oo, “hira an tagsa-tagsa nga tawo malingkod ha sirong han iya balagon han ubas ngan ha sirong han iya kahoy nga igera; ngan waray bisan hin-o nga maghahadlok ha ira: kay an baba ni Jehova han mga kasundalohan nagyakan hini.”—Mika 4:4.

Kondi, kay ano nga tinutugotan an kakablas nga umiksister yana? Ano nga bulig an iginhahatag han Dios ha kablas nga mga tawo? San-o gud ba matatapos an kakablas?

Kay Ano nga Tinutugotan an Kakablas?

An Paraiso nga ginbutangan kanda Adan ngan Eva nawara sugad nga resulta han pagrebelde nga gintikangan han usa nga maraot nga anghel, hi Satanas nga Yawa. Pinaagi ha paggamit hin halas sugad nga iya paragyakan, ginsulay ni Satanas hi Eva ha pagtalapas han balaud han Dios nga diri kaunon an bunga han usa ka partikular nga kahoy. Iya ginlimbongan hiya nga tumoo nga an pagin bulag ha Dios maghahatag ha iya hin mas maopay nga kinabuhi. Han gintagan ni Eva hi Adan han igindidiri nga bunga, kinaon liwat hiya, hito nga paagi iginsasalikway niya an Dios tungod han iya asawa.—Genesis 3:1-6; 1 Timoteo 2:14.

Husto la nga an rebelyoso nga mag-asawa ginpagawas ha Paraiso, ngan tikang hito nga panahon padayon, kinahanglan hira mangalimbasog hinduro basi mabuhi. Tubtob yana, tinutugotan ni Jehova hi Satanas nga magmando ha makasasala nga mga tawo, ngan tungod hito nagin matin-aw na an mga resulta han pagtalapas ha Dios. Pinapamatud-an han kasaysayan nga an mga tawo diri makakapahinabo hin Paraiso ha tuna. (Jeremias 10:23) Lugod, an pagin bulag ha Dios nagriresulta hin nakakadaot nga mga problema, upod na an kakablas.—Eklesiastes 8:9.

 Kondi, an mga pobre diri ginpapabay-an nga waray mahihimo dinhi hini nga kalibotan nga puno hin problema. An giniyahan nga Pulong han Dios, an Biblia, nagsusulod hin maopay nga giya para ha ira.

“Diri Kamo Mangarit”

Han nakikiistorya hi Jesus ha damu hinduro nga mamarati upod na an damu nga mga pobre, hiya nagsiring: “Kitaa an katamsihan ha langit, nga waray magsabwag, bisan pagbari, bisan pagtirok ha buhos; ngan an iyo Amay, nga aadto ha langit nagpapakaon ha ira. Diri ba kamo maromahal pa ha ira? . . . Busa diri kamo mangarit, nga masiring: Ano an aton kakaunon, o ano an aton iinumon, o ano an aton igpapanapton? Kay an mga Hentil nanmimiling han ngatanan hini nga mga butang; kay an iyo Amay nga langitnon, maaram nga kamo nagkikinahanglan hini ngatanan. Kondi pamilnga niyo siyahan an ginhadian han Dios, ngan an iya katadongan; ngan ngatanan ini nga mga butang mahidudugang ha iyo.”—Mateo 6:26-33.

An pobre nga tawo diri kinahanglan mangawat. (Proberbios 6:30, 31) Makarawat hiya hin tagana kon iya unahon an Dios ha iya kinabuhi. Tagda an kahimtang ni Tukiso, usa nga lalaki nga taga-Lesotho, ha sur nga Aprika. Han 1998, usa nga grupo han kasundalohan tikang ha iba nga nasud an kinadto ha Lesotho basi paundangon an pagrebelde kontra ha gobyerno. Sugad nga resulta hito nga girra, ginpangawatan an mga tindahan, nawad-an hin mga trabaho an mga tawo, ngan nagkaada duro nga mga kagutom.

Hi Tukiso naukoy ha pinakapobre nga bahin han kapital. Damu han iya mga amyaw an nangawat ha mga tindahan basi mabuhi. Pagbalik ni Tukiso ha iya balay nga usa la an kwarto, nakita niya nga hi Maseiso, an babaye nga iya kalungon, may damu nga pagkaon nga iya ginkawat. “Igawas ini,” nagsiring hi Tukiso, nga nagsasaysay nga an pangawat supak ha balaud han Dios. Sinunod hi Maseiso. Ginpakaraot hira han ira mga amyaw ngan pinanguha an kinawat nga pagkaon.

Nagkaada sugad hini nga disposisyon hi Tukiso tungod han iya hinbaroan ha iya pag-aram han Biblia ha mga Saksi ni Jehova. An iya ba pagsunod ha balaud han Dios nagresulta hin kagutom? Waray. Paglabay hin pipira ka panahon, an mga tigurang ha kongregasyon han mga Saksi ni Jehova nga tinatambongan ni Tukiso nakipagkomunikar ha iya ngan gindad-an hiya hin pagkaon. Ha pagkamatuod, an mga Saksi ni Jehova ha kahirani ha Aprika del Sur nagpadara hin sobra duha ka tonilada nga mga epektos para ha ira Kristiano nga kabugtoan ha Lesotho. Nabantad hi Maseiso han pagkamasinugtanon ni Tukiso ha Dios ngan han mahigugmaon nga bulig han kongregasyon. Hiya liwat nagtikang ha pag-aram han Biblia. Ha urhi, legal nga nagpakasal hira ngan tungod hito nagin kwalipikado nga mabawtismohan sugad nga mga Saksi ni Jehova. Matinumanon nga nag-aalagad pa gihapon hira ha Dios.

Napaid hi Jehova nga Dios ha mga pobre. (Kitaa an kahon nga may ulohan nga “Paonan-o Gintatagad han Dios an mga Pobre?”) Mahigugmaon nga  naghimo hiya hin mga kahikayan basi mabuligan an iba nga pariho kanda Tukiso ngan Maseiso nga mahibaro hin dugang pa mahitungod ha iya. Ngan ha iya Pulong, nagtagana hiya hin praktikal nga sagdon para ha adlaw-adlaw nga pagkinabuhi.

Usa nga Maopay nga Tagana

An mga Saksi ni Jehova nangangalimbasog pirme nga subaron an pagtagad han Dios ha mga pobre. (Galasia 2:10) Agsob nga kon naabot an kalamidad ha usa nga nasud ngan naaapektohan an totoo nga mga Kristiano, hinihimo an mga kahikayan basi maihatag an kinahanglanon nga bulig. Labaw nga importante, an mga Saksi nagpapakita hin pagtagad ha espirituwal nga mga panginahanglan han ngatanan, pati na an mga pobre. (Mateo 9:36-38) Durante han naglabay nga 60 ka tuig, yinukot nga binansay nga mga ministro an nagboluntaryo ha pag-alagad sugad nga mga misyonero ha langyaw nga mga nasud. Pananglitan, usa nga misyonero nga mag-asawa nga taga-Finland, nga pinaagi ha pag-aram han Sesotho nga yinaknan nakahimo ha pagtutdo kanda Tukiso ngan Maseiso nga magin disipulo ni Jesus. (Mateo 28:19, 20) Ha sugad nga pagmisyonero nga buruhaton, agsob nga nahiuupod an pagbaya ha komportable nga kinabuhi ha bahandianon nga nasud ngan pagbalhin ngadto ha pobre nga lugar.

An pangawat basi mabuhi diri usa nga alternatibo nga pamaagi para ha totoo nga mga Kristiano. Lugod, natoo hira ha abilidad ni Jehova nga Dios ha pagtagana. (Hebreo 13:5, 6) Usa nga paagi nga nagtatagana hi Jehova para ha iya katawohan amo an pinaagi han bug-os-kalibotan nga organisasyon han iya mga magsiringba, nga napaid ha usa kag usa.

An usa pa nga paagi nga binubuligan ni Jehova an mga pobre amo an paghatag ha ira hin praktikal nga sagdon mahitungod han adlaw-adlaw nga pagkinabuhi. Pananglitan, an Biblia nagsusugo: “An kawatan diri na mangawat: kondi lugod magbuhat,  magbuhat ha iya mga kamot ha maopay nga bagay, basi nga may niya ihatag ha mga kablas.” (Efeso 4:28) Damu nga waray trabaho nga mga tawo an nakahimo hin mga trabaho para ha ira kalugaringon, ngan nagbubuhat hira hin magkuri nga mga trabaho, sugad han pagtanom ngan pag-ataman hin hardin han mga utanon. Binubuligan liwat han Biblia an mga pobre nga makatirok hin kwarta pinaagi ha pagtutdo ha ira nga maglikay ha magraot nga mga bisyo, sugad han pag-abuso ha de-alkohol nga mga irinmon.—Efeso 5:18.

Usa nga Kalibotan nga Waray Kakablas—San-o?

Ipinapakita han Biblia nga nagkikinabuhi na kita ha “kataposan nga mga adlaw” han pagmando ni Satanas. (2 Timoteo 3:1) Diri na maiha, susugoon ni Jehova nga Dios hi Jesu-Kristo ha paghukom ha katawohan. Ano an mahitatabo hito nga panahon? Iginhatag ni Jesus an baton ha usa han iya mga ilustrasyon. Hiya nagsiring: “Kon an Anak han tawo kumanhi ha iya himaya, ngan an ngatanan nga mga anghel upod ha iya, niyan hiya malingkod ha lingkoran nga hadianon han iya himaya. Ngan ha iya atubangan pagtitirukon an ngatanan nga mga nasud, ngan iya pagbuburublagon hira sugad han usa nga paramangno ginlalain an karnero tikang ha mga kanding.”—Mateo 25:31-33.

An mga karnero hini nga ilustrasyon amo adton nagpapasakop ha pagkahadi ni Jesus. Iginpariho hira ni Jesus ha mga karnero tungod kay ginsusunod nira hiya sugad nga ira Magbarantay. (Juan 10:16) Inin sugad-karnero nga mga tawo makarawat hin kinabuhi ilarom han hingpit nga pagmando ni Jesus. Magigin malipayon ito nga kinabuhi ha bag-o nga kalibotan nga waray kakablas. An sugad-kanding nga mga tawo, nga nagdudumiri ha pagmando ni Jesus, bubungkagon ha waray kataposan.—Mateo 25:46.

Tatapuson han Ginhadian han Dios an karaotan. Niyan mawawara na an kakablas. Lugod, an tuna pag-uukyan hin mga tawo nga nahigugma ngan napaid ha usa kag usa. An pagin posible han sugad nga bag-o nga kalibotan makikita ha mahigugmaon nga internasyonal nga pagminagburugto han mga Saksi ni Jehova, kay hi Jesus nagsiring: “Tungod hini an ngatanan makilala, nga kamo akon mga tinon-an, kon kamo maghigugmaanay an usa kag usa.”—Juan 13:35.

[Kahon/Mga Retrato ha pahina 6, 7]

PAONAN-O GINTATAGAD HAN DIOS AN MGA POBRE?

An Biblia naghuhulagway han Maglalarang han katawohan sugad nga an “nahatag hin karan-on ha mga ginugutom.” (Salmo 146:7) Nagsusulod ito hin sobra usa ka gatos nga bersikulo nga nagpapatin-aw han pagtagad han Dios ha mga pobre.

Pananglitan, han iginhatag ni Jehova an iya Balaud ha kadaan nga nasud han Israel, iya ginsugo an mga parauma nga Israelita nga diri ubuson pag-ani an mga tanom nga aada ha ligid han ira mga uma. Kinahanglan diri nira kuhaon an nanhibilin nga bunga pinaagi ha pag-ani utro ha puno han olibo o ha balagon han ubas ha ikaduha nga higayon. Ini nga mga balaud usa ka mahigugmaon nga tagana para ha mga langyawanon, ilo, balo, ngan iba pa nga nag-aantos hin kakurian.—Lebitiko 19:9, 10; Deuteronomio 24:19-21.

Dugang pa, ginsugo han Dios an mga Israelita: “Diri niyo paghatagan hin kagol-anan an bisan hin-o nga balo nga babaye, o ilo nga bata. Kon iyo hira paghatagan hin kagol-anan, ngan magsinggit hira ngadi ha akon; pamamatian ko gud an ira singgit; ngan an akon kasina magpapaso, ngan papatayon ko kamo hin kampilan; ngan an iyo mga asawa magkakababalo, ngan an iyo kabataan magkakaiilo.” (Eksodo 22:22-24) Makasurubo nga gintalapas ito han damu nga bahandianon nga mga Israelita. Tungod hini ngan han iba pa nga sayop nga mga buhat, gintagan ni Jehova nga Dios an mga Israelita hin magkalainlain nga mga pahamangno pinaagi han iya mga propeta. (Isaias 10:1, 2; Jeremias 5:28; Amos 4:1-3) Ha kataposan, ginpahinabo ni Jehova nga sakupon han mga Asiryahanon ngan ha urhi han mga Babilonyahanon an teritoryo han Israel. Damu nga mga Israelita an ginpatay, ngan an mga nakatalwas gindara nga bihag ngadto ha langyaw nga mga tuna.

Iginpakita han hinigugma nga Anak han Dios, hi Jesu-Kristo, an mahigugmaon nga pagtagad han iya Amay ha mga pobre. Ha pagsaysay han katuyoan han ministeryo ni Jesus, hiya nagsiring: “An espiritu han Ginoo aadi ha akon; kay iya ako ginhirogan ha pagwali han mag-opay nga mga sumat ha mga makalolooy [“mga pobre,” NW].” (Lukas 4:18) Diri ini nangangahulogan nga ha mga pobre la iginsentro ni Jesus an iya ministeryo. Mahigugmaon nga iya ginbuligan liwat an riko nga mga tawo. Kondi, samtang ginbubuhat ito ni Jesus, agsob nga iginpapahayag niya an iya pagtagad ha mga pobre. Pananglitan, ginsagdonan niya an usa nga bahandianon nga magmarando: “Ibaligya an ngatanan nga aada ha imo, ngan pagbahin-bahina ha mga kablas, ngan ikaw mamay manggad ha langit; ngan kadi, ngan sumunod ha akon.”—Lukas 14:1, 12-14; 18:18, 22; 19:1-10.

Napaid gud hi Jehova nga Dios ngan an iya Anak ha mga pobre. (Markos 12:41-44; Jakobo 2:1-6) Ha pagpakita han pagpaid ni Jehova ha mga pobre, iya tinitipigan ha iya handumanan an minilyon nga mga pobre nga nagkamatay na. Hira ngatanan babanhawon ha bag-o nga kalibotan nga waray kakablas.—Buhat 24:15.

[Mga Retrato]

Ipinapakita han internasyonal nga pagminagburugto han mga Saksi ni Jehova nga posible an bag-o nga kalibotan

[Retrato ha pahina 5]

Hira Tukiso ngan Maseiso upod han misyonero nga nagdumara han pag-aram han Biblia kan Tukiso

[Retrato ha pahina 5]

Hi Maseiso ha purtahan han iya balay upod han misyonera nga nagdumara han pag-aram han Biblia ha iya