“An Akon Tambulig Natikang Kan Jehova”

Mga Pamilya nga Ginpaparig-on han Kahibaro Mahitungod ha Dios

AN “Berlin nga Pader.” Ito an tawag han usa nga mag-asawa nga taga-Argentina ha aktuwal nga pader nga ira gintukod basi bahinon an ira balay! May-ada hira diri-nasusulbad nga mga pagkasumpaki; nangangalas hira ha usa kag usa.

Makasurubo, diri la ito nga mag-asawa an may-ada sugad nga kahimtang. Damu nga mga pamilya an nadadaot tungod han away, pagkadiri-maunungon, ngan han pagkamadarahog mismo. Makasurubo ini, tungod kay an pamilya usa nga institusyon nga gin-establisar han Dios mismo. (Genesis 1:27, 28; 2:23, 24) Ini nga regalo han Dios usa nga maopay gud nga kahimtang para ha pagpakita hin hilarom nga gugma. (Rut 1:9) Pinaagi ha pagtuman han mga obligasyon nga hatag han Dios ha ira, an mga membro han pamilya makakapasidungog kan Jehova ngan magigin surok han kalipay ha usa kag usa. a

Tungod kay an Dios an nag-establisar han kahikayan han pamilya, kinahanglan tugotan naton an iya panlantaw nga makaimpluwensya han aton pagsabot ha kon paonan-o sadang gumios an mga pamilya. An iya Pulong nagtatagana hin damu nga praktikal nga sagdon nga gindisenyo basi buligan an mga pamilya nga maglampos, labi na kon nabangon an mga problema. May kalabotan ha bahin han mga bana, an Biblia nasiring: “An mga asawa nga kalalakin-an kinahanglan man nga mahigugma ha ira mga asawa nga babaye sugad ha ira mga kalugaringon nga lawas.” Kon gintutuman han bana ini nga ginkikinahanglan ha iya, usa nga kalipay para ha iya asawa nga magkaada hilarom nga ‘pagtahod ha iya asawa nga lalaki.’—Efeso 5:25-29, 33.

May kalabotan ha relasyon butnga han mga kag-anak ngan han ira mga anak, hi apostol Pablo nagsurat: “Mga amay, diri niyo pag-aghaton ha kasina an iyo mga anak: kondi aghata hira ha pagturon-an ngan paglaygay han Ginoo.” (Efeso 6:4) Sugad nga resulta, ini nakakahimo hin mahigugmaon nga kahimtang ha pamilya, salit nagigin mas masayon para ha mga anak nga sundon an ira mga kag-anak.—Efeso 6:1.

An gin-unabi na nga mga punto mga ehemplo han maopay nga sagdon han Biblia may kalabotan ha kinabuhi han pamilya. Pinaagi ha pag-aplikar han mga prinsipyo han Dios, damu an nakakaeksperyensya hin kalipay ha panimalay. Pananglitan, tagda an mag-asawa nga taga-Argentina nga gin-unabi ha tinikangan. Katapos nira pag-adman an Biblia kaupod han mga Saksi ni Jehova ha sulod hin tulo ka bulan, hira nga duha nagtikang ha pag-aplikar han maaramon nga sagdon hito may kalabotan ha pag-asawa. Nangalimbasog gud hira ha pagpauswag han ira komunikasyon, ha pagin matinagaron ha mga panginahanglan han usa kag usa, ngan ha pagin mapinasayloon. (Proberbios 15:22; 1 Pedro 3:7; 4:8) Nahibaro hira ha pagkontrol han ira kasina ngan ha pagtawag ha Dios para hin bulig kon baga hin diri na ito mapupugngan. (Kolosas 3:19) Waray pag-iha, ginkuha na an “Berlin nga Pader”!

Mapaparig-on han Dios an Usa nga Pamilya

An kahibaro ngan pag-aplikar han mga suruklan han Dios makakaparig-on ha pamilya nga malamposan an mga pag-ipit. Importante ini, tungod kay igintagna nga an kahikayan han pamilya makakaeksperyensya hin duro nga pag-atake ha aton panahon. Igintagna ni Pablo an presente nga kadaot han moralidad ngan han sosiedad han tawo. Hiya nagsiring nga “ha kataposan nga mga adlaw” magigin kalyap an pagkadiri-maunungon, kawaray “gugma nga kinaiya,” ngan pagin matinalapason ha mga kag-anak, bisan hadton may-ada “dagway ha pagtahod ha Dios.”—2 Timoteo 3:1-5; NW.

An pagpangalimbasog ha pagpalipay ha Dios makakabulig nga maatohan an sugad nga nakakadaot nga mga epekto ha pamilya. Naobserbahan han damu nga mga pamilya nga ginkikinahanglan an usa nga solusyon tikang ha Dios basi mabuligan hira nga malamposan an damu han mga ayat nga ira inaatubang. Kon hingyap han mga membro han pamilya nga matipigan an maopay nga relasyon ha Dios, labaw ha ngatanan kinahanglan nira iaplikar an mga prinsipyo ha Biblia ngan masantop nga “kon hi Jehova diri magtutukod han balay, kawang la magbubuhat an mga magtitindog hito.” (Salmo 127:1) Naieksperyensyahan an gidadakui nga kalamposan ha pagpauswag han kalipay ha sulod han pamilya pinaagi ha pag-una han Dios ha kinabuhi hito.—Efeso 3:14, 15.

Ha Hawaii, hinbaroan han usa nga lalaki nga an ngaran hi Dennis nga totoo gud ito. Bisan kon nag-aangkon hiya nga Kristiano, an nakakasakit nga mga pulong ngan mga araway amo an paagi han iya pagkinabuhi. Katapos magserbisyo ha militar, nagin mas agresibo ngan mapungtanon pa gud hiya. “Pirme ako may kaaway,” nahinumdoman niya. “Waray ako labot ha kon ano an mahitabo ha akon, ngan diri ako nahahadlok mamatay. An nakakasakit nga mga pulong ngan pakiaway nagpadayon. An akon asawa, nga usa han mga Saksi ni Jehova, nagdasig ha akon nga pag-adman an Biblia.”

Ginkontra ni Dennis an mga pangalimbasog han iya asawa. Kondi, an Kristiano nga panggawi han iya asawa nagpalukmay han iya negatibo nga disposisyon. Ha urhi, tinambong hi Dennis ha usa nga Kristiano nga katirok upod han iya asawa ngan mga anak. Katapos hito, gintikangan an pagdumara hin pag-aram ha Biblia kan Dennis, ngan nag-uswag hiya. Iya ginbayaan an iya 28 ka tuig na nga bisyo nga pagsigarilyo ngan inundang na ha pakig-upod ha kasangkayan nga nagbubuhat han ngatanan nga mga butang nga iya ginpapangalimbasogan nga bayaan. Mapasalamaton hi Dennis kan Jehova, ngan hiya nagkomento: “Nagin mas maopay an kinabuhi han akon pamilya. Natambong kami ha mga katirok ngan nagbubuhat ha ministeryo sugad nga pamilya. An akon duha nga anak diri na nahahadlok ha akon, tungod kay maaram na ako pagkontrol han akon kasina ngan diri na ako nagamit hin nakakasakit nga mga pulong. Nakakag-istorya na kami ngan naruruyag ha pagkaada mga paghisgot mahitungod han Biblia. Kon waray ako mag-aram han Biblia, waray na unta ako yana; masayon man gud ako masina.”

Magigin malipayon an mga pamilya kon nangangalimbasog gud hira nga buhaton an kaburut-on ni Jehova. Ipinapakita han mga eksperyensya nga bisan kon usa la nga membro han pamilya an nag-aaplikar han mga prinsipyo han Biblia, mas maopay an mga kahimtang kay ha kon waray gud nag-aaplikar hito. An paghimo hin Kristiano nga panimalay makuri nga trabaho, nga nagkikinahanglan hin kaabtik ngan panahon. Kondi an mga membro han sugad nga mga pamilya makakasarig nga palalampuson ni Jehova an ira mga pangalimbasog. Makakauyon hira ha mga pulong han salmista: “An akon tambulig natikang kan Jehova.”—Salmo 121:2.

[Footnote]

 [Blurb ha pahina 9]

Ha Dios “an ngatanan nga mga panimalay ha langit ngan ha tuna ginngaranan.”—EFESO 3:15

[Kahon ha pahina 8]

GINPAPABILHAN GUD NI JEHOVA AN KAHIKAYAN HAN PAMILYA

“An Dios nagbendisyon ha ira: ngan an Dios nagsiring ha ira: magmabungahon kamo ngan magdamu ngan pun-on niyo an tuna.”—Genesis 1:28.

“Bulahan an tagsa-tagsa nga nahadlok kan Jehova . . . An imo asawa masusugad hin mabinungahon nga balagon, ha gisasag-uri han imo balay.”—Salmo 128:1, 3.