Nakikiistorya Ka ba ha Imo mga Hinigugma?

“MADAGMIT nga nagtitikaluya an aton abilidad ha pakiistorya ha mga hinigugma,” nasiring an Polityka, sinemana nga barasahon ha Polandia. Ha Estados Unidos, ginbabanabana nga an mga mag-asawa nag-iistorya ha makapadasig nga paagi ha sulod hin sais minutos la ha usa ka adlaw. Naghuhunahuna an pipira nga mga eksperto nga ini nga pagluya an hinungdan han katunga han ngatanan nga mga pagbulag ngan mga diborsyo.

Kumusta man an pag-iristorya butnga han mga ginikanan ngan mga anak? Kasagaran nga, “diri ito pag-iristorya, kondi nagigin imbistigasyon: Kumusta ha eskwelahan? Kumusta an iyo kasangkayan?” siring han report ha igbaw. “Tungod hini nga kahimtang, paonan-o mahibabaro an aton mga anak ha pagpatubo han mga relasyon may kalabotan ha emosyon?” nagpapakiana ito.

Tungod kay an mga kaabtik ha maopay nga komunikasyon diri mahimo madangat kon diri pangalimbasogan, paonan-o naton mapapauswag an aton abilidad ha pakiistorya? An Kristiano nga disipulo nga hi Jakobo naghatag ha aton hin importante nga sagdon: “An ngatanan nga mga tawo magmaabtik ha pagbati, mahinay ha pagyakan, mahinay ha kasina.” (Jakobo 1:19) Oo, basi magkaada makaparig-on nga pag-iristorya, kinahanglan mamati kita hin maopay ngan diri dayon sumagbang o maghimo hin abanse nga mga konklusyon. Likayi an pagpakaraot tungod kay magpupugong dayon ito han pag-iristorya. Dugang pa, ginamit ni Jesus an mataktika nga mga pakiana, diri basi mag-imbistigar, kondi basi hibaroan an aada ha kasingkasing han iya mamarati ngan basi maparig-on an bugkos ha butnga nira.—Proberbios 20:5; Mateo 16:13-17; 17:24-27.

Ha pag-aplikar han mag-opay nga mga prinsipyo han Biblia, pag-una ha pakiistorya ngan pakigkomunikar ha imo mga hinigugma. Mahimo ito magresulta hin mahigugmaon nga relasyon nga pabibilhan ha sulod hin damu ka tuig—ha bug-os nga kinabuhi pa ngani.