Kinaburut-on nga Iginhahatag Nira an Ira Kalugaringon

‘AN IMO katawohan naghahalad ngahaw han ira kalugaringon ha maopay nga kaburut-on.’ (Salmo 110:3) Ito nga mga pulong may-ada espesyal nga kahulogan ha 46 nga estudyante han ika-118 nga klase han Watchtower Bible School of Gilead. Paonan-o hira nangandam ha pagtambong hini nga eskwelahan, nga nagbabansay han posible magin mga misyonero ha pagserbi han espirituwal nga mga panginahanglan han mga tawo ha langyaw nga mga nasud? Hira Mike ngan Stacie, nga mga membro han ika-118 nga klase, nagsaysay: “An amon desisyon nga magkinabuhi hin simple nakabulig ha amon nga maminos-minosan an mga butang nga makakapasimang ngan matipigan nga siyahan ha amon kinabuhi an espirituwal nga mga butang. Determinado kami nga diri tugotan nga ulangan han amon kalamposan ha negosyo an espirituwal nga mga tumong.” Pariho kanda Mike ngan Stacie, an iba nga mga estudyante hini nga klase kinaburut-on nga naghatag han ira kalugaringon ngan nag-aalagad na yana sugad nga mga parasamwak han Ginhadian ha upat nga kontinente.

Han Sabado, Marso 12, 2005, an 6,843 nga presente matin-aw nga nalipay ha pagpamati ha programa han gradwasyon. Hi Theodore Jaracz, usa nga membro han Nagmamando nga Lawas han mga Saksi ni Jehova, an nagin tsirman. Katapos han mapaso nga pag-abiabi ha mga bisita tikang ha 28 nga nasud, iginsentro niya an iya paghisgot ha bili han edukasyon han Biblia. Ginkotar han mamumulong hi William Lyon Phelps, usa nga Amerikano nga edukador, ngan nagsiring: “An ngatanan nga may-ada hilarom hinduro nga kahibaro mahitungod han Biblia mahimo gud tawagon nga edukado.” Bisan kon an sekular nga edukasyon mahimo magin mapulsanon, mas labaw gud hito an edukasyon han Biblia. Binubuligan hito an mga tawo nga makakuha hin kahibaro mahitungod ha Dios, nga nagtutugway ha kinabuhi nga waray kataposan. (Juan 17:3) Ginkumendasyonan ni Bugto Jaracz an mga naggradwar tungod han ira pagin disidido nga mas makigbahin ha bug-os-globo nga programa ha pagtutdo mahitungod han Biblia nga gindudumara ha sobra 98,000 nga kongregasyon han mga Saksi ni Jehova ha bug-os nga kalibotan.

Napapanahon nga Pagdasig Para ha mga Naggradwar

Katapos han siyahan nga pahayag han tsirman, hi William Samuelson naghisgot han ulohan “Kon Paonan-o Ka Magigin Pariho han Marampag nga Puno nga Olibo ha Balay han Dios,” nga iginbasar ha Salmo 52:8. Iya iginpatin-aw nga an puno nga olibo ginagamit han Biblia sugad nga simbolo han pagkamabungahon, kahusay, ngan dignidad. (Jeremias 11:16) Ha paghatag han kaparihoan han mga estudyante ha mga puno han olibo, an mamumulong nagsiring: “Tatagdon kamo ni Jehova nga mahusay ngan may dignidad samtang matinumanon nga gintutuman niyo an iyo buruhaton nga pagsangyaw han Ginhadian ha iyo mga toka sugad nga misyonero.” Sugad la nga an puno nga olibo nanginginahanglan hin damu hinduro nga mga gamot basi diri mamatay ha taghuraw, kinahanglan parig-unon han mga estudyante an ira espirituwal nga mga gamot basi  mailob an kawaray-pagtagad, pagkontra, o iba pa nga mga kakurian nga bangin atubangon nira ha pag-alagad ha langyaw nga nasud.—Mateo 13:21; Kolosas 2:6, 7.

Hi John E. Barr, usa han tulo nga membro han Nagmamando nga Lawas nga nakigbahin ha programa, naghisgot mahitungod han tema nga “Kamo an Asin han Tuna.” (Mateo 5:13) Iya ginpabug-atan nga sugad la nga an literal nga asin nagpipreserba han pagkaon, ha sugad man nga paagi an pagsangyaw han mga misyonero mahitungod han Ginhadian han Dios magkakaada nagluluwas-han-kinabuhi nga epekto ngada hadton namamati, nga nagpapanalipod ha ira tikang ha kadaot ha moral ngan ha espirituwal. Katapos, ha kinag-anak nga tono, ginsagda ni Bugto Barr an mga naggradwar nga “makigmurayaw” ha iba. (Markos 9:50) “Kultibara an mga bunga han espiritu, ngan siguroha nga an iyo paggawi ngan pagyakan pirme nga makaruruyag ngan mapinairon,” nagsagdon an mamumulong.

“Magpabilin nga Nakasakay ha Barko ha Hilarom nga Katubigan” an tema nga ginpatin-aw ni Wallace Liverance, usa han mga instruktor ha Gilead. Sugad la nga an barko nga nagbibiyahe ha hilarom nga katubigan makakagbiyahe ngadto ha husto nga direksyon, ha sugad man nga paagi an pagsabot ha “higlarom nga mga bagay han Dios”—mga kamatuoran mahitungod han katuyoan han Dios ngan kon paonan-o ito tutumanon—makakabulig ha usa nga mag-uswag ha espirituwal. (1 Korinto 2:10) An pagpabilin la ha hamabaw nga espirituwal nga katubigan pinaagi ha pagin kontento ha “siyahan nga pag-aradman han Dios” nag-uulang han aton pag-uswag ngan mahimo pa ngani magpadaku han posibilidad nga ‘malunod an aton pagtoo.’ (Hebreo 5:12, 13; 1 Timoteo 1:19) “Hinaot an ‘pagkahilarom han kamanggaran han kinaadman ngan hibabroan han Dios’ makabulig ha iyo ha mga toka niyo sugad nga mga misyonero,” nagtapos hi Bugto Liverance.—Roma 11:33.

Hi Mark Noumair, usa pa nga instruktor ha Gilead, nagpahayag mahitungod han tema nga “Magkikinabuhi Ka ba Uyon ha Imo Panurundon?” Ha sulod hin sobra 60 ka tuig, an Watchtower Bible School of Gilead nagkaada na kredibilidad ngan ekselente nga reputasyon tungod han ‘damu hinduro nga maopay nga pagtestigo’ nga iginhatag han mga naggradwar ha eskwelahan. (Genesis 31:48) Ini nga panurundon han Gilead iginpasa na ha mga estudyante han ika-118 nga klase. Gindasig ni Bugto Noumair an mga estudyante nga subaron an kadaan nga mga Tekoitanhon ha panahon ni Nehemia ngan mapainubsanon nga magkooperar ha lokal nga kongregasyon ngan ha mga igkasi-misyonero. Ginsagdonan hira nga likyan an disposisyon han mapahitas-on nga “mga noble” nga ginhisgotan ni Nehemia ngan magin andam lugod ha pagbuhat nga waray-aringasa nga diri nangangalimbasog nga magin sikat.—Nehemia 3:5.

Nakakagtutdo nga mga Eksperyensya Ngan mga Interbyu

An ulohan han sunod nga bahin ha programa amo an “An Pulong han Dios Padayon nga Tinubo.” (Buhat 6:7) Ha paggiya han instruktor ha Gilead nga hi Lawrence Bowen, iginpasundayag han mga estudyante an ira aktuwal nga mga naeksperyensyahan ha ministeryo ha kanataran samtang hira naeskwela. Nakita ha mga eksperyensya nga iginpasamwak han mga estudyante an Pulong han Dios nga may kadasig ngan hura nga ginbendisyonan ni Jehova an ira mga pangalimbasog.

Hi Richard Ashe nag-interbyu hin mga membro han pamilya han Bethel nga an trabaho may-ada gud kalabotan ha eskwelahan. An ira mga komento naghatag hin ideya mahitungod han kooperasyon han pamilya han Bethel basi buligan an mga estudyante han Gilead nga makapahimulos gud ha ira pag-eskwela. Katapos, gin-interbyu ni Geoffrey Jackson an pipira nga nauna nga mga naggradwar ha Gilead. Ginpabug-atan nira an damu nga mga higayon han mga misyonero ha pagdayaw ngan pagpasidungog kan Jehova. An usa nagkomento: “Inoobserbahan han mga tawo an ngatanan nga imo ginbubuhat sugad nga misyonero. Hira namamati, nagkikita, ngan nahinunumdom.” Salit, an mga estudyante gindasig nga magin mahunahunaon ha pagpakita hin maopay nga susbaranan ha ngatanan nga panahon. Inin maopay nga sagdon sigurado nga magigin birilhon hinduro ha tiarabot nga mga adlaw.

Hi Stephen Lett, usa nga membro han Nagmamando nga Lawas, an ultimo nga nagpahayag ha ulohan nga “Lakat Sugad nga mga Paradara han ‘Buhi nga Tubig.’ ” (Juan 7:38) Hiya nagsiring nga ha sulod han naglabay nga lima ka bulan, nagpahimulos gud an mga estudyante pinaagi ha pag-inom han Pulong han Dios nga kamatuoran. Kondi ano an bubuhaton han bag-o nga mga misyonero ha impormasyon nga nakarawat? Ginsagda ni Bugto Lett an mga naggradwar nga isumat inin espirituwal nga katubigan ha ngatanan basi an iba magkaada ‘atabay  han tubig nga nagbuburabod [“basi maghatag,” NW] hin kinabuhi nga waray kataposan.’ (Juan 4:14) An mamumulong nagdugang: “Ayaw gud kahingalimot ha paghatag kan Jehova, ‘an burabod han buhi nga tubig,’ han kadungganan ngan himaya nga takos ha iya. Magin pasensyoso ha pagtutdo hadton ginawas ha inatake han huraw nga Babilonya nga Daku.” (Jeremias 2:13) Nagtapos hi Bugto Lett pinaagi ha pagdasig ha mga naggradwar nga malipayon nga subaron an espiritu ngan an nobya ngan padayon nga sumiring: “Kadi. Ngan an nakakabati, pasiringa hiya, Kadi. Ngan an inuuhaw, pakadia; an buot uminom, painma hiya han tubig han kinabuhi ha waray bayad.”—Pahayag 22:17.

Gintapos ni Bugto Jaracz an programa pinaagi ha pagbasa han mga pangumusta nga nakarawat tikang ha magkalainlain nga mga nasud. Ginsundan ini han pagbasa han surat han pagpasalamat han usa nga membro han naggradwar nga klase.

Andam ka ba ha pag-alagad ha lugar diin mas daku an panginahanglan? Kon oo, niyan magkaada espirituwal nga mga tumong, sugad han ginbuhat hinin naggradwar nga mga estudyante. Aniha an kalipay ngan katagbaw nga nabibilngan kon an tawo malipayon ngan kinaburut-on nga naghahatag han iya kalugaringon ha pag-alagad ha Dios—sugad nga misyonero man ha langyaw nga nasud o sugad nga ministro ha lugar nga mas hirani ha iya balay.

[Kahon ha pahina 13]

ESTADISTIKA HAN KLASE

Kadamu han nasud nga ginrepresentaran: 8

Kadamu han nasud nga gintokahan: 19

Kadamu han estudyante: 46

Aberids nga edad: 33.0

Aberids nga mga tuig ha kamatuoran: 16.5

Aberids nga mga tuig ha bug-os-panahon nga ministeryo: 12.9

[Retrato ha pahina 15]

Ika-118 nga Naggradwar nga Klase han Watchtower Bible School of Gilead

Ha lista ha ubos, an mga rumbay may numero tikang ha unahan tipaluyo, ngan an mga ngaran iginlista tikang ha wala tipatoo ha kada rumbay.

(1) Brockmeyer, A.; Moloney, S.; Symonds, N.; Lopez, Y.; Howard, C. (2) Jastrzebski, T.; Brown, D.; Hernandez, H.; Malagón, I.; Jones, A.; Connell, L. (3) Howard, J.; Lareau, E.; Shams, B.; Hayes, S.; Brown, O. (4) Burrell, J.; Hammer, M.; Mayer, A.; Kim, K.; Stanley, R.; Rainey, R. (5) Jastrzebski, P.; Zilavetz, K.; Ferris, S.; Torres, B.; Torres, F. (6) Connell, J.; Hernandez, R.; Moloney, M.; Malagón, J.; Shams, R.; Hayes, J. (7) Ferris, A.; Hammer, J.; Stanley, G.; Kim, C.; Symonds, S.; Lopez, D.; Burrell, D. (8) Brockmeyer, D.; Mayer, J.; Rainey, S.; Zilavetz, S.; Jones, R.; Lareau, J.