“Malipayon Adton Mahunahunaon han Ira Espirituwal nga Panginahanglan”

KON namata an mga tamsi ha aga, agsob nga nahuni ito hin madaliay ngan katapos nalupad na ha pamiling hin pagkaon. Ha gab-i, nabalik hira ha ira mga ginhahapunan, nahuni na liwat hin madaliay, ngan nakaturog. Ha partikular nga mga panahon nagkukugod hira, nagbubunay, ngan nagpapadaku han ira mga piso. An iba nga mga hayop nasunod gihapon ha pariho nga hinbabaroan na nga pamaagi.

Iba kita nga mga tawo. Oo, kita nakaon, nakaturog, ngan nanganganak, kondi kadam-an ha aton an diri kontento hito la nga mga butang. Karuyag naton hibaroan kon kay ano nga naeksister kita. Namimiling kita hin katuyoan ha aton kinabuhi. Naghihingyap liwat kita hin paglaom para ha tidaraon. Inin mas hilarom nga mga panginahanglan nagtutudlok ha usa nga kalidad nga kanan tawo la—espirituwalidad, o an panginahanglan ngan kapasidad para han espirituwal nga mga butang.

Ginhimo ha Dagway han Dios

An Biblia nagsasaysay han hinungdan han natural nga panginahanglan han tawo para han espirituwalidad, nasiring: “An Dios naghimo han tawo ha iya kalugaringon nga ladawan, ha ladawan han Dios ginhimo hiya: lalaki ngan babaye ginhimo niya hira.” (Genesis 1:27) An pagpormaha ha aton “ha ladawan han Dios” nangangahulogan nga bisan kon namantsahan kita han sala ngan pagkadiri-hingpit, may-ada kita abilidad ha pagpakita han pipira nga mga kalidad han Dios. (Roma 5:12) Pananglitan, mahimo kita magin mahilig ha panhimo hin mga butang. May-ada liwat kita igo nga kinaadman, pag-abat hin hustisya, ngan abilidad ha pagpakita hin nagsasakripisyo ha kalugaringon nga gugma para ha usa kag usa. Dugang pa, mahimo naton pamalandungon an naglabay ngan planuhon an tidaraon.—Proberbios 4:7; Eklesiastes 3:1, 11; Mika 6:8; Juan 13:34; 1 Juan 4:8.

An aton kapasidad ha pagkaada hin espirituwalidad matin-aw nga nakikita ha aton natural nga hingyap ha pagsingba ha Dios. Kon diri naton matagbaw ha husto nga paagi an panginahanglan nga magkaada mas maopay nga relasyon ha Maglalarang, diri naton mabibilngan an totoo ngan nagpapadayon  nga kalipay. “Malipayon adton mahunahunaon han ira espirituwal nga panginahanglan,” nagsiring hi Jesus. (Mateo 5:3, NW) Kondi, kinahanglan magin mabinantayon kita ha pagtagbaw hito nga panginahanglan pinaagi hin espirituwal nga kamatuoran—mga kamatuoran mahitungod ha Dios, han iya mga suruklan, ngan han iya katuyoan para ha katawohan. Diin naton mabibilngan an espirituwal nga kamatuoran? Ha Biblia.

“An Imo Pulong Amo an Kamatuoran”

Hi apostol Pablo nagsurat: “An ngatanan nga mga Baraan nga Surat nga ginpakaaghat han Dios may kapulsanan man ha pagtututdoan, ha pagbadlong, ha pagsaway, ha panutdoan nga ha katadongan.” (2 Timoteo 3:16) An mga pulong ni Pablo nauyon ha mga pulong ni Jesus, nga nagsiring ha pag-ampo ha Dios: “An imo pulong amo an kamatuoran.” Yana, kinikilala naton ito nga Pulong sugad nga an Baraan nga Biblia, ngan maaramon para ha aton nga usisahon kon an aton mga gintotoohan ngan mga suruklan nauyon hito.—Juan 17:17.

Pinaagi ha pagtanding han aton mga gintotoohan ha Pulong han Dios, aton ginsusubad an mga tawo ha kadaan nga Berea, nga nagsiguro nga an mga katutdoan ni Pablo nauyon ha Kasuratan. Imbes nga sawayon an mga taga-Berea, ginkumendasyonan hira ni Lukas tungod han ira disposisyon. Hira “nagkarawat han pulong hin bug-os nga kaabtik [“kaikag han hunahuna,” NW],” hiya nagsurat, “ngan ha adlaw-adlaw ira gin-usisa an Santos nga Surat, kon ini nga mga bagay amo an kamatuoran.” (Buhat 17:11) Tungod han nagkakasumpaki nga mga katutdoan may kalabotan ha relihiyon ngan moralidad nga kalyap yana, importante nga aton subaron an ehemplo han dungganon-an-panhunahuna nga mga taga-Berea.

An usa pa nga paagi ha pagkilala han espirituwal nga kamatuoran amo an pag-obserba kon paonan-o ito nakakaimpluwensya ha kinabuhi han mga tawo. (Mateo 7:17) Pananglitan, an pagkinabuhi uyon ha kamatuoran han Biblia sadang makahimo ha usa nga mas maopay nga bana, mas maopay nga amay, mas maopay nga asawa, o mas maopay nga iroy, nga tungod hito napapauswag an kalipayan han pamilya ngan an katagbaw han usa. “Malipayon adton namamati ha pulong han Dios ngan nagtutuman hito,” nagsiring hi Jesus.—Lukas 11:28, NW.

An mga pulong ni Jesus nagpapahinumdom ha aton han mga pulong han iya langitnon nga Amay, nga nagsiring ha kadaan nga mga Israelita: “Ako hi Jehova nga imo Dios, nga nagtututdo ha imo ha pagpahimulos, nga nagmamando ha imo han dalan nga imo paglalaktan. O nga ikaw namati unta han akon mga sugo! Dida hito an imo kamurayaw nasusugad hin usa nga salog, ngan an imo pagkamatadong nasusugad han mga balud ha dagat.” (Isaias 48:17, 18) An ngatanan nga nahigugma ha kaopayan ngan katadongan sigurado nga maaaghat han sugad nga mahigugmaon nga hangyo!

Karuyag han Pipira nga “Giritikgitikon an Ira mga Talinga”

Ginhimo han Dios iton kinasingkasing nga hangyo ha mga Israelita tungod kay nalilimbongan hira han mga buwa ha relihiyon. (Salmo 106:35-40) Kita liwat kinahanglan magin mabinantayon kontra ha mga kabuwaan. May kalabotan ha nag-aangkon nga mga Kristiano, hi Pablo nagsurat: “Maabot an panahon nga diri hira mag-aantos han putli nga pagturon-an; kondi, tungod ha ira magkatol nga mga talinga, magtitirok hira hin ira mga lugaringon nga magturutdo [“magtitirok hira hin mga magturutdo para ha ira kalugaringon basi giritikgitikon an ira mga talinga,” NW] nga magsusunod ha ira mga kalugaringon nga kaipa; ngan ira ipahirayo an ira mga talinga tikang ha kamatuoran.”—2 Timoteo 4:3, 4.

Gin-gigiritikgitik han mga lider han relihiyon an mga talinga han  mga tawo pinaagi ha pagkonsinter han mga buhat nga nagtatagbaw han sayop nga mga hingyap, sugad han pakighilawas han mga diri-kasal, homoseksuwalidad, ngan paghubog. Matin-aw nga nasiring an Biblia nga adton nauyon ha sugad nga mga butang ngan adton nagbubuhat hito “diri makakapanunod ha ginhadian han Dios.”—1 Korinto 6:9, 10; Roma 1:24-32.

Waray ruhaduha, ginkikinahanglan an kaisog ha pagkinabuhi uyon ha mga suruklan han Biblia, labi na kon naatubang hin pagtamay, kondi mahihimo ito. Damu ha mga Saksi ni Jehova an mga indibiduwal nga hadto mga giyan ha droga, parahubog, nagbubuhat hin pornikasyon, maraugdaog, kawatan, ngan buwaon. Kondi, ira iginpasilsil ha ira kasingkasing an Pulong han Dios ngan pinaagi ha bulig han baraan nga espiritu naghimo hin mga pagbag-o ha ira kinabuhi basi ‘manggawi nga takos ha Ginoo.’ (Kolosas 1:9, 10; 1 Korinto 6:11) Tungod kay nakigmurayaw na ha Dios, nagkaada liwat hira hin kamurayawan ha hunahuna ngan hin totoo nga paglaom para ha tidaraon, sugad han aton mahibabaroan.

An Paglaom ha Ginhadian

An paglaom nga igintututdo han Biblia nga nagpapadayon nga kamurayawan para ha masinugtanon nga katawohan matutuman pinaagi han Ginhadian han Dios. “Kumanhi an imo ginhadian. Matuman an imo pagburut-an, sugad ha langit, amo man ha tuna,” siring ni Jesus ha iya modelo nga pag-ampo. (Mateo 6:10) Oo, an Ginhadian han Dios la an makakasiguro nga an kaburut-on han Dios matutuman ha tuna. Kay ano? Tungod kay ito nga langitnon nga Ginhadian—usa nga gobyerno ha pagdumara ni Jesu-Kristo—amo an paagi han Dios ha pagpahayag han Iya matadong nga pagkasoberano ha tuna.—Salmo 2:7-12; Daniel 7:13, 14.

Sugad nga Hadi hiton langitnon nga Ginhadian, tatagan ni Jesu-Kristo an masinugtanon nga mga tawo hin kagawasan tikang ha ngatanan nga klase hin pagkauripon, upod na an sugad hin nakakapot hinduro nga sala ni Adan ngan an iginpapanunod hito nga sakit ngan kamatayon. An Pahayag 21:3, 4 nasiring: “Kitaa, an payag han Dios aada ha mga tawo . . . Ngan pagpapahiron niya [Jehova nga Dios] an ngatanan nga luha tikang ha ira mga mata; ngan mawawaray na kamatayon; ngan mawawaray na an kabidoan, bisan pagtangis, bisan kasakit pa gud: kay an siyahan nga mga bagay nag-agi na.”

Magkakaada waray-kataposan nga kamurayawan ha bug-os nga tuna. Kay ano nga masisiguro naton ito? Iginpahayag an hinungdan ha Isaias 11:9, nga nasiring: “Diri hira [an mga sakop han Ginhadian] magdadaot o diri maggugunaw ha bug-os ko nga bukid nga baraan; kay an tuna mapupuno han hibaro ni Jehova, sugad nga an katubigan nagpupuno han  dagat.” Oo, an ngatanan nga tawo ha tuna magkakaada husto nga kahibaro mahitungod ha Dios ngan magigin masinugtanon ha iya. Ito ba nga paglaom nakakapalipay ha imo? Kon amo, yana na an panahon ha pagtikang ha pagkuha han presyoso nga ‘kahibaro ni Jehova.’

Mamamati Ka ba ha Mensahe han Ginhadian?

Pinaagi hito nga Ginhadian, pagwawad-on han Dios an epekto han ngatanan nga ginbuhat ni Satanas ngan tututdoan an mga tawo han Iya matadong nga mga paagi. Salit, diri urusahon nga an Ginhadian an pinakasentro han katutdoan ni Jesus. “Kinahanglan gud, nga akon igwali an maopay nga sumat han ginhadian han Dios,” nagsiring hiya, “kay tungod hini ako ginsugo.” (Lukas 4:43) Ginsugo ni Kristo an iya mga disipulo nga isumat ito nga mensahe ngadto ha iba. (Mateo 28:19, 20) “Ini nga maopay nga sumat han ginhadian,” nagtagna hiya, “igwawali ha bug-os nga kalibotan ha pagpamatuod ha ngatanan nga mga nasud; ngan niyan an kataposan maabot.” (Mateo 24:14) Hirani na gud ito nga kataposan. Salit, importante gud nga an tangkod-an-kasingkasing nga mga tawo mamati ha maopay nga sumat nga nagluluwas han kinabuhi!

Hi Albert, nga gin-unabi ha nauna nga artikulo, nakabati han mensahe mahitungod han Ginhadian han magtikang mag-aram han Biblia kaupod han mga Saksi ni Jehova an iya asawa ngan anak nga lalaki. Ha tinikangan, nagruhaduha hi Albert. Ginhangyo pa ngani niya an usa nga klerigo ha ira lugar nga bisitahon an iya asawa ngan anak basi ibuhayhag an pagkapalso han mga Saksi. Kondi nadiri mahidabi an klerigo. Salit nagdesisyon hi Albert nga mamati la ha usa nga paghisgot mahitungod ha Biblia basi makita an bisan ano nga mga sayop ha mga katutdoan han mga Saksi. Katapos hin usa la nga sesyon, inapi hiya ha pag-aram, nga disidido nga mahibaro hin dugang pa. Ha urhi, iginsaysay niya kon kay ano nga nagbag-o an iya panhunahuna. “Ini an akon pirme ginbiniling hadto,” nagsiring hiya.

Ha kataposan, nagtikang matagbaw ni Albert an iya espirituwal nga panginahanglan, ngan waray gud niya pagbasuli ito. An kamatuoran han Biblia naghatag ha iya han iya ginpinamiling ha iya bug-os nga kinabuhi—an solusyon ha kawaray-hustisya ngan panlimbong nga nagkalyap ha sosiedad ngan usa nga paglaom para ha tidaraon. An kamatuoran han Biblia naghatag ha iya hin kamurayawan ha hunahuna. Natatagbaw ba an imo espirituwal nga panginahanglan? Kay ano nga diri anay basahon an mga pakiana nga nakalista ha kahon ha pahina 6? Kon karuyag mo hin dugang nga impormasyon, malilipay an mga Saksi ni Jehova ha pagbulig ha imo.

[Kahon/Mga Retrato ha pahina 6]

NATATAGBAW BA AN IMO ESPIRITUWAL NGA PANGINAHANGLAN?

Natatagbaw ka ba ha espirituwal nga pagkaon nga imo nakakarawat? Ginhahangyo ka namon nga basahon an masunod nga mga pakiana ngan i-tsek adton nababaton mo hin husto.

□ Hin-o an Dios, ngan ano an iya ngaran?

□ Hin-o hi Jesu-Kristo? Kay ano nga kinahanglan hiya mamatay? Paonan-o ka makakapahimulos ha iya kamatayon?

□ May-ada ba Yawa? Kon may-ada, ano an iya gintikangan?

□ Ano an nahitatabo ha aton kon kita namamatay?

□ Ano an katuyoan han Dios para ha tuna ngan ha katawohan?

□ Ano an Ginhadian han Dios?

□ Ano an mga suruklan han Dios ha moralidad?

□ Ha pamilya, ano an mga bahin nga igintoka han Dios ha bana ngan ha asawa? Ano an pipira nga mga prinsipyo han Biblia nga nagpapauswag han kalipayan han pamilya?

Kon diri ka sigurado ha mga baton ha bisan hain hini nga mga pakiana, mahimo ka maghangyo hin usa nga kopya han brosyur nga Ano an Ginkikinahanglan ha Aton han Dios? Ini nga brosyur, nga iginpublikar han mga Saksi ni Jehova ha haros 300 nga yinaknan, naghihisgot hin 16 nga basihan nga mga topiko ha Biblia ngan naghahatag hin Kasuratanhon nga baton ha ngatanan nga mga pakiana nga nakalista ha igbaw.

[Mga Retrato ha pahina 4]

Diri pariho ha mga hayop, an mga tawo may-ada espirituwal nga panginahanglan

[Retrato ha pahina 5]

“Magtitirok hira hin mga magturutdo para ha ira kalugaringon basi giritikgitikon an ira mga talinga.”—2 Timoteo 4:3, NW

[Retrato ha pahina 7]

Magkakaada waray kataposan nga kamurayawan pinaagi han Mesianiko nga Ginhadian han Dios