Istorya han Kinabuhi

Malipayon ha Akon Nahihimo Para ha Bug-os-Kalibotan nga Pagtutdo han Biblia

IGINSUMAT NI ANNA MATHEAKIS

Nasusunog an barko. Kon malunod iton 171-metros an kahilaba nga barko, madadara ako hito ngadto ha ubos ngan malulumos ako. Natatarantar nga linangoy ako basi maluwas, nangangalimbasog nga malamposan an dagku nga mga balud. An amo la nga paagi ha pagpabilin nga nalutaw amo an pagkapot hin maopay ha “life jacket” nga sul-ot han usa pa nga babaye. Nag-ampo ako ha Dios para hin kusog ngan kaisog. Ito la an akon mahihimo.

NAHITABO ito han tuig 1971, ngan tibalik ako ha akon ikatulo nga toka ha pagmisyonero, ha Italya. Hito nga kalunod, nawara ha akon an haros ngatanan nga akon tinatag-iya. Kondi waray ko mawara an mga pinakaimportante—an akon kinabuhi, an mahigugmaon nga Kristiano nga kabugtoan, ngan an pribilehiyo ha pag-alagad kan Jehova. Tungod hito nga pag-alagad nahingadto na ako ha tulo nga kontinente, ngan an kalunod han barko usa la han diri-mahingangalimtan nga mga panhitabo ha akon kinabuhi.

Natawo ako han 1922. Hito nga panahon an akon pamilya naukoy ha Rām Allāh, mga disisais kilometros ha norte han Jerusalem. An akon mga kag-anak tikang ha isla han Kreta, kondi nagdaku hi Tatay ha Nasaret. Ako an puto ha lima nga anak, tulo nga lalaki ngan duha nga babaye. Nasubo hinduro an amon pamilya ha kamatay han akon bugto nga lalaki nga ikaduha tikang ha magurang, nga nalumos ha Salog Jordan samtang may eskursyon an eskwelahan. Katapos hini nga trahedya nadiri na hi Nanay umukoy ha Rām Allāh, ngan binalhin kami ngadto ha Atenas, Gresya, han tres anyos ako.

Hinbatian han Akon Pamilya an Kamatuoran han Biblia

Waray pag-iha tikang han umabot kami ha Gresya, an amon gimagurangi nga lalaki, hi Nikos, nga  22 anyos hito nga panahon, nakaistorya han mga Estudyante han Biblia, sugad han pagkilala ha mga Saksi ni Jehova hito nga panahon. An paghibaro mahitungod han Biblia naghatag ha iya hin daku gud nga kalipay ngan hin duro nga kadasig para ha Kristiano nga ministeryo. Tungod hini nasina hinduro hi Tatay, ngan iya ginpaiwas hi Nikos. Kondi, kon nabiyahe hi Tatay ngadto ha Palestina, inuupdan namon ni Nanay ngan han akon bugto nga babaye hi Nikos ngadto ha Kristiano nga mga katirok. Matin-aw nga nahinunumdoman ko pa gihapon hi Nanay nga malipayon nga nag-iistorya mahitungod han iya mga hinbatian dida hito nga mga katirok. Kondi waray pag-iha katapos hito, nagkasakit hiya hin kanser ngan namatay ha edad nga 42. Durante hiton makuri nga panahon, an akon magurang nga babaye, hi Ariadne, mahigugmaon nga nagdumara han amon pamilya. Bisan kon batan-on pa hiya, nagin sugad hin nanay ko hiya ha sulod hin damu ka mga tuig.

Pirme ako igin-upod ni Tatay ha Orthodox Church kon nakadto hiya ha Atenas, ngan han namatay na hiya, padayon nga nasingba ako, bisan kon talagsa na la. Tungod kay naobserbahan ko nga an mga tawo nga natambong ha singbahan diri nagkikinabuhi uyon ha paagi nga karuyag han Dios, ha urhi inundang ako pagsiningba.

Han namatay hi Tatay, nagkaada ako permanente nga trabaho ha departamento may kalabotan ha kwarta. Kondi, an akon bugto nga lalaki bug-os nga naggamit na han iya kinabuhi ha pagsangyaw han Ginhadian nga buruhaton, ngan nag-alagad hiya ha sulod hin damu ka tuig ha Gresya. Han 1934 binalhin hiya ngadto ha Cyprus. Hito nga panahon, waray bawtismado nga mga Saksi ni Jehova dida hito nga isla, salit nakapribilehiyo hiya nga ipadayon an pagsangyaw nga buruhaton didto. Han nakaasawa hiya, an iya asawa nga hi Galatia nag-alagad liwat sugad nga bug-os-panahon nga ministro ha sulod hin damu ka mga tuig. a Agsob kami padad-an ni Nikos hin basado ha Biblia nga mga libro ngan magasin, kondi haros diri gud namon inaabrihan ito. Nagpabilin hiya ha Cyprus tubtob han mamatay hiya.

Paghimo han Kamatuoran han Biblia nga Akon Kalugaringon

Han 1940, hi George Douras, usa nga madasigon nga Saksi ha Atenas ngan sangkay ni Nikos, binisita ha amon ngan gin-imbitar kami nga umapi ha gutiay nga grupo nga nag-aaram han Biblia didto ha iya balay. Malipayon nga ginkarawat namon an imbitasyon. Waray pag-iha, iginsusumat na namon ha iba an amon hinbabaroan. An paghibaro han ginsisiring han Biblia nagpagios ha akon ngan ha akon magurang nga babaye nga idedikar an amon kinabuhi ngadto kan Jehova. Nabawtismohan hi Ariadne han 1942, ngan ako han 1943.

Han natapos an Girra ha Kalibotan II, gin-imbitar kami ni Nikos nga kumadto ha Cyprus, salit han 1945 binalhin kami ngadto ha Nicosia. Diri pariho ha Gresya, waray ulang an pagsangyaw nga buruhaton ha Cyprus. Nakigbahin kami diri la ha pagbalay-balay nga ministeryo kondi ha pagsangyaw ha kakalsadahan liwat.

Paglabay hin duha ka tuig, kinahanglan bumalik hi Ariadne ha Gresya. Didto nakilala niya an iya nagin bana, usa nga igkasi-magsiringba ni Jehova, salit nagpabilin hiya ha Atenas. Waray pag-iha, gindasig ako han akon bayaw ngan han akon bugto nga bumalik ha Gresya ngan sumulod ha bug-os-panahon nga pagministeryo ha Atenas. Tungod kay maiha ko na nga tumong an pagpayunir, binalik ako ha Atenas, diin mas daku an panginahanglan.

Naabrihan an Bag-o nga mga Ganghaan han Higayon

Han Nobyembre 1, 1947, nagpayunir ako, nga nagamit hin 150 ka oras kada bulan ha pagsangyaw nga buruhaton. Haluag hinduro an teritoryo han amon kongregasyon, ngan kinahanglan ko magbinaktas hin hirayo. Bisan pa hito, nagpahimulos ako hin damu nga mga bendisyon. Agsob nga gindadakop han mga polis an bisan hin-o nga mga Saksi nga ira nakikita nga nakikigbahin ha pagsangyaw o  natambong ha Kristiano nga mga katirok, salit waray pag-iha naaresto ako.

Gin-akusahan ako hin pangumbirte, usa nga seryoso nga pagtalapas han balaud hito nga panahon. Ginsentensyahan ako hin duha ka bulan nga kaprisohan ha Averof Women’s Prison ha Atenas. Priso na didto an usa pa nga babaye nga Saksi, ngan bisan pa han pagin priso, kami nga duha nagkaada makalilipay ngan makapadasig nga Kristiano nga pagkaupod. Han natapos ko an akon sentensya, malipayon nga nagpadayon ako ha pagpayunir. Damu hadton gindumarahan ko hin pag-aram ha Biblia hito nga panahon an matinumanon pa gihapon nga mga surugoon ni Jehova, ngan naghahatag ito ha akon hin daku nga kalipay.

Han 1949, kinarawat ako hin imbitasyon ha pagtambong ha ika-16 nga klase han Watchtower Bible School of Gilead ha Estados Unidos, diin ginbabansay an bug-os-panahon nga mga surugoon para ha pagmisyonero nga buruhaton. Nalipay kami han akon mga paryente. Nagplano ako pagtambong ha usa nga internasyonal nga kombensyon ha New York City ha katpaso han 1950 ngan katapos hito, pag-eskwela ha Gilead.

Han umabot ako ha Estados Unidos, nakapribilehiyo ako ha pagtrabaho sugad nga housekeeper ha sulod hin pipira ka bulan ha sentro nga opisina han mga Saksi ni Jehova ha kalibotan didto ha New York City. Didto, an palibot malimpyo, makaruruyag, ngan makapadasig, ngan napapalibotan ako hin malipayon nga kabugtoan. Nalilipay ako pirme kon nahinunumdoman ko an unom ka bulan nga akon gin-gamit didto. Katapos, panahon na ha pagtambong ha Gilead School, diin madagmit nga linabay an lima ka bulan han detalyado gud nga pag-aram ngan han mga instruksyon. Nasantop namon nga mga estudyante an pagkapresyoso gud ngan pagkamakaruruyag han kahibaro mahitungod han Kasuratan, ngan nakadugang ito han amon kalipay ngan han amon hingyap ha pagsumat ha iba han naghahatag-kinabuhi nga kahibaro mahitungod han kamatuoran.

An Akon Siyahan nga Toka Sugad nga Misyonero

Ha Gilead School, gintugotan kami nga pumili han amon makakaupod antes namon karawaton an amon mga toka sugad nga mga misyonero. Hi Ruth Hemmig (Bosshard na yana), usa nga maopay hinduro nga bugto, an akon nakaupod. Nalipay kami hinduro ni Ruth han nakarawat namon an amon toka ha Istanbul, Turkey—ha butnga han Asia ngan Europa! Maaram kami nga waray pa tagi hin legal nga awtorisasyon an pagsangyaw nga buruhaton dida hito nga nasud, kondi sigurado kami nga bubuligan kami ni Jehova.

An Istanbul maanyag nga internasyonal nga syudad. Didto, nakita namon an mga tindahan nga puno hin mga baligya ngan mga tawo, an magkalainlain nga magrasa hinduro nga pagkaon tikang ha bug-os nga kalibotan, an makapainteres nga mga museo, an makaruruyag nga mga residensya, ngan an pirme maopay hinduro pagkit-on nga mga tinukod ha ligid han dagat. Labaw nga importante, nakabiling kami hin sinsero nga mga tawo didto nga naruyag ha paghibaro mahitungod ha Dios. An gutiay nga grupo han mga Saksi ha Istanbul kadak-an nga ginkompwesto hin mga Armeniano, Griego, ngan Judio. Kondi, may-ada iba pa nga mga nasyonalidad, ngan mapulsanon an pagin pamilyar ha magkadirodilain nga mga yinaknan, upod na an Turko. Nalipay gud kami ha pakiistorya ha mga tawo nga iba-iba an mga nasyonalidad nga uhaw ha kamatuoran. Damu ha ira an padayon nga matinumanon nga nag-aalagad kan Jehova.

Makasurubo nga waray na hi Ruth hatagi hin permiso ha pagpadayon ha pag-ukoy didto, ngan naobligar hiya ha pagbaya ha nasud. Nagpapadayon hiya ha iya bug-os-panahon nga pag-alagad ha Switzerland. Bisan pa han paglabay hinin damu nga katuigan, ginmimingaw pa gihapon ako ha iya makalilipay ngan makapadasig nga pakig-upod.

Pagbalhin Ngadto ha Iba nga Bahin han Kalibotan

Han 1963, waray na ako hatagi hin permiso nga umukoy pa ha Turkey. Makuri an pagbaya ha mga  igkasi-Kristiano nga nakita ko nga nag-uuswag ha espirituwal samtang nangangalimbasog nga malamposan an damu nga mga kakurian. Basi lipayon ako, may-pagkabuotan nga ginpamasahian ako han akon mga paryente ngadto ha New York City basi makatambong ha usa nga kombensyon didto. Hito nga panahon waray ko pa makarawat an akon sunod nga toka.

Katapos han kombensyon, igintoka ako ha Lima, Peru. Tikang ha New York dineretso ako ngadto ha akon bag-o nga toka, upod han batan-on nga bugto nga babaye nga akon magigin kaupod. Nahibaro ako ha pagyakan hin Kinatsila ngan nag-ukoy ha balay para ha mga misyonero nga nahimumutang ha igbaw han sanga nga opisina han mga Saksi ni Jehova. Makalilipay hinduro an pagsangyaw didto ngan an pakigkilala ha kabugtoan hito nga lugar.

Usa Pa nga Toka, Usa Pa nga Yinaknan

Paglabay han panahon, an akon mga paryente ha Gresya nagtikang na ha pakaeksperyensya han mga epekto han kalagas ngan nagtitikaluya nga kahimsog. Waray gud nira ako dasiga nga umundang ha bug-os-panahon nga pag-alagad ngan bumalik ha ginsisiring nga normal nga kinabuhi basi makabulig ha ira. Kondi, katapos han duro nga pagpamalandong ngan pag-ampo, nasantop ko nga mas maopay nga mag-alagad ako ha lugar nga mas hirani ha akon pamilya. Mahigugmaon nga inuyon an kabugtoan ha sanga nga opisina ngan igintoka nira ako ha Italya, ngan nagboluntaryo an akon mga paryente ha pagbayad han akon mga gastos ha pagbalhin. Ha pagkamatuod, daku ngay-an an panginahanglan hin mga ebanghelisador ha Italya.

Makausa pa, kinahanglan ko mag-aram hin bag-o nga yinaknan—an Italyano nga yinaknan. An akon siyahan nga toka amo an ha syudad han Foggia. Ha urhi, iginbalhin ako ha Naples, diin mas daku an panginahanglan. Ha Posilipo an akon teritoryo, usa han pinakamaopay pagkit-on nga mga lugar han Naples. Haluag hinduro ito nga lugar, ngan may-ada usa la nga magwarali han Ginhadian. Naruyagan ko hinduro an akon buruhaton, ngan ginbuligan ako ni Jehova nga makagtikang hin damu nga mga pag-aram ha Biblia. Inabot an panahon nga naorganisa an daku nga kongregasyon dida hito nga lugar.

Kaupod han siyahan nga nadumarahan ko hin pag-aram ha Biblia hito nga lugar amo an usa nga iroy ngan an iya upat nga anak. Hiya ngan an iya duha nga anak nga kababayin-an mga Saksi ni Jehova pa gihapon. Nagdumara liwat ako hin pag-aram ha usa nga mag-asawa nga may-ada gutiay nga anak nga babaye. Nag-uswag an bug-os nga pamilya ha kamatuoran ngan ginsimbolohan an ira dedikasyon pinaagi han bawtismo ha tubig. Yana, an anak nakaasawa na hin matinumanon nga surugoon ni Jehova, ngan hira nga duha madasigon nga nag-aalagad ha Dios. Samtang nagdudumara hin pag-aram ha Biblia ha usa nga daku nga pamilya, nadayaw ko an gahum han Pulong han Dios. Han ginbasa namon an pipira nga mga teksto nga nagpapakita nga diri inuuyonan han Dios an pagsingba pinaagi han mga imahen, waray na ngani hulata pa han iroy nga matapos an pag-aram. Iya dayon ginlabog an ngatanan nga mga imahen ha iya balay!

Ha mga Peligro ha Dagat

Ha akon pabalik-balik nga pagbiyahe ha Italya ngan Gresya, pirme barko an akon sinasakyan. Kasagaran nga maopay hinduro an biyahe. Kondi naiiba an usa nga biyahe, ha katpaso han 1971. Nagbibiyahe ako tipabalik ha Italya nga sakay ha barko nga Heleanna. Temprano ha aga han Agosto 28, nagkaada sunog ha kusina han barko. Nagsarang an kalayo salit natarantar an mga pasahero. Nagkadidismayo an kababayin-an, nananangis an kabataan, ngan nagrireklamo ngan nagsisinggit hin mga panarhog an kalalakin-an. Nagdadlagan an mga tawo ngadto ha mga lifeboat ha tagsa nga ligid han barko. Kondi, kulang an mga life jacket, ngan guba an mekanismo nga nag-uubos han mga lifeboat ngadto ha dagat. Waray ako life jacket, kondi nagtitikadaku na an kalayo, salit an pinakamaaramon na la nga himoon amo an paglukso ngadto ha dagat.

Han nakadto na ako ha tubig, nakakita ako hin babaye nga naka-life jacket nga naglulutaw-lutaw ha  akon hirani. Baga hin diri hiya maaram lumangoy, salit ginbunlot ko hiya ha iya butkon basi maihirayo hiya ha tikalunod nga barko. Nagtitikamabalod na an dagat, ngan nakapoy ako hinduro tungod ha duro nga pagpangalimbasog nga diri malunod. Baga hin waray na paglaom an kahimtang, kondi padayon nga nagpinanginyupo ako kan Jehova para hin kaisog, ngan nakahatag ini hin kusog ha akon. Diri ko malikyan an paghinumdom han kalunod nga naeksperyensyahan ni apostol Pablo.—Buhat, kapitulo 27.

Samtang nakapot ha akon kaupod, nangalimbasog ako ha pagpabilin nga nalutaw bisan pa han mga balud ha sulod hin upat ka oras, nalangoy kon may-ada ako kusog ngan nagtatawag kan Jehova para hin bulig. Ha kataposan, nakakita ako hin tihirani nga gutiay nga sakayan. Gintalwas ako, kondi patay na an akon kaupod. Han umabot kami ha bungto han Bari, Italya, gindara ako ha usa nga ospital, diin gintambal ako. Kinahanglan magpabilin ako ha ospital ha sulod hin pipira ka adlaw, ngan damu nga mga Saksi an binisita ha akon, ngan may-pagkabuotan nga ira igintagana an ngatanan ko nga ginkinahanglan. An Kristiano nga gugma nga ira iginpakita gindayaw gud han iba nga nakadto ha ospital. b

Han nag-opay na gud ako, igintoka ako ha Roma. Ginhangyo ako nga magsangyaw ha komersyal nga teritoryo ha sentro han syudad, nga akon ginbuhat ha sulod hin lima ka tuig, ha bulig ni Jehova. Ha kabug-osan nga 20 ka tuig, nagkaada ako kalipay ha pagministeryo ha Italya, ngan ginhigugma ko an mga Italyano.

Pagbalik ha Lugar Diin Ako Nagtikang

Paglabay hin mga panahon, nagin masakiton hi Ariadne ngan an iya bana. Nahunahuna ko nga kon umukoy ako hin mas hirani ha ira, makakabayad ako hin gutiay han akon utang nga kaburut-on ha ngatanan nga ira mahigugmaon hinduro nga ginbuhat para ha akon. Kinakarawat ko gud nga makasurubo hinduro an pagbaya ha Italya. Kondi, tumugot an kabugtoan nga nagdudumara didto, ngan tikang han katpaso han 1985, nagpapayunir ako ha Atenas, diin nagtikang ako han bug-os-panahon nga pag-alagad tikang pa han 1947.

Nagsangyaw ako ha teritoryo nga igintoka ha amon kongregasyon, ngan naghangyo ako ha kabugtoan ha sanga nga opisina kon mahimo ba liwat ako magsangyaw ha komersyal nga teritoryo ha sentro han syudad. Ginbuhat ko ini ha sulod hin tulo ka tuig kaupod hin usa nga payunir. Nasangyawan namon hin bug-os an mga tawo nga talagsa la hiabotan ha ira balay.

Kondi, samtang nalabay an panahon, an akon hingyap ha pag-alagad permanente nga nagtitikaduro kondi an akon pisikal nga panlawas nagtitikaluya. Yana, patay na an akon bayaw. Hi Ariadne, nga sugad hin akon iroy, diri na nakakakita. May kalabotan man ha akon, an akon kahimsog maopay durante han mga tuig nga gin-gamit ko ha bug-os-panahon nga pag-alagad. Kondi, bag-o pa la, nahulog ako ha marmol nga hagdan ngan nabari an akon too nga butkon. Katapos, natumba ako ngan nabari an akon baliatang. Kinahanglan maoperahan ako ngan naghinigda la ha sulod hin maiha nga panahon. Yana diri na ako masayon makagios-gios. Nagamit ako hin tungkod ngan nakakagawas la kon may-ada ko kaupod. Bisan pa hito, nangangalimbasog gud ako, nga naglalaom nga magtitikaopay an akon kahimsog. An pakigbahin ha buruhaton nga pagtutdo han Biblia, bisan ha limitado nga paagi, padayon nga amo an nangunguna nga surok ko han kalipay ngan katagbaw.

Kon ginhihinumdom ko an malipayon nga mga tuig nga akon gin-gamit ha bug-os-panahon nga ministeryo, nagsasap-ay an akon kasingkasing hin pagpasalamat kan Jehova. Hiya ngan an tunan-on nga bahin han iya organisasyon padayon nga nagtatagana hin masasarigan nga giya ngan presyoso nga suporta, nga nakakabulig ha akon nga magamit hin bug-os an akon mga abilidad samtang akon ginagamit an akon kinabuhi ha pag-alagad ha iya. Kinasingkasing nga ginhihingyap ko nga parig-unon unta ako ni Jehova nga padayon nga makag-alagad ha iya. Malipayon ako ha akon gutiay nga nahihimo para ha bug-os-kalibotan nga buruhaton nga pagtutdo han Biblia nga iya ginigiyahan.—Malakias 3:10.

[Mga footnote]

[Retrato ha pahina 9]

Upod han akon bugto, hi Ariadne, ngan han iya bana, hi Michalis, han tikadto na ako ha Gilead

[Retrato ha pahina 10]

Igintoka kami ni Ruth Hemmig ngadto ha Istanbul, Turkey

[Retrato ha pahina 11]

Ha Italya, temprano han dekada han 1970

[Retrato ha pahina 12]

Yana, kaupod han akon bugto, hi Ariadne