Mga Pakiana Tikang ha mga Magbarasa

Ha Deuteronomio 14:21 (NW) mababasa: “Ayaw kamo pagkaon hin bisan ano nga lawas nga patay na.” Nasumpaki ba ito ha Lebitiko 11:40 (NW), nga mababasa: “Hiya nga nakaon hin bisan ano nga bahin han patay nga lawas hito magbubunak han iya mga bado, ngan magigin mahugaw hiya tubtob ha gab-i”?

Diri nagkakasumpaki inin duha nga bersikulo. An siyahan nga teksto nag-uutro han pagdiri ha pagkaon hin hayop nga hin-agian nga patay na, bangin usa nga ginpatay hin ihalas nga mga mananap. (Eksodo 22:31; Lebitiko 22:8) An ikaduha nga teksto nagsasaysay kon ano an mahimo buhaton han Israelita kon natalapas niya ito nga pagdiri, bangin ha diri tinuyo nga paagi.

An kamatuoran nga may-ada igindiri han Balaud waray mangahulogan nga diri gud ito igbabalewaray ha bisan san-o. Pananglitan, may-ada mga balaud kontra ha pangawat, pagpatay, pagtestigo hin buwa, ngan iba pa. Ha pariho nga panahon, may-ada mga sirot ha pagtalapas hito nga mga balaud han Dios. An sugad nga mga sirot nagparig-on han mga balaud ngan nagpakita han pagkaseryoso gud hito.

An usa nga tawo nga nakatalapas han pagdiri ha pagkaon han unod han hayop nga hin-agian nga patay na magigin mahugaw ha paniplatan ni Jehova ngan kinahanglan umagi ha husto nga proseso para ha paglimpyo. Kon mapakyas hiya ha paglimpyo han iya kalugaringon ha husto nga paagi, hiya kinahanglan ‘magdara han iya karat-an.’—Lebitiko 17:15, 16.