“An Kampilan ni Jehova Ngan ni Gideon”!

AN MGA kaaway sugad kadamu han duron, ngan ira gindaot an mga kaumhan. Nahitabo ito durante han panahon han nagmando an mga hukom ha Israel, ngan nawarayan na paglaom an mga Israelita. Ha sulod hin pito ka tuig, ha kada pagturok han iginsabwag nga binhi, an naninikas nga mga grupo nga Midianitanhon, Amalekanhon, ngan mga taga-Sinirangan nga sakay hin mga kamelyo, nasulong ha tuna. An mga hayop han mga tikasan nagsarang ha pagpamiling hin sabsaban, ngan ira ginpapanabsab an ngatanan nga mga tanom. Kondi an mga tawo ha Israel waray mga asno o baka nga lalaki o kakarnerohan. Duro gud an matalumpiguson nga pagmando han Midian salit an ginhimo na la han mga Israelita amo an pagtago han ira mga butang ha mga bukid, lungib, ngan lugar nga makuri makadtoan.

Kay ano nga sugad hito an kahimtang? An apostata nga Israel nag-aalagad ha palso nga mga dios. Tungod hito, ginpabay-an hira ni Jehova nga sakupon han mga parapanalumpigos. Han waray na makailob an mga anak ni Israel, ira gintawag hi Jehova para hin bulig. Mamamati ba hiya? Ano an maitututdo ha aton han nahitabo ha Israel?—Hukom 6:1-6.

Maikmat nga Parauma o “Makusganon Ngan Tawo nga Maisog”?

Kasagaran nga gin-gigiok han Israelita nga mga parauma an trigo nga ginagamit an lalaki nga baka ngan maso ha mahangin nga lugar ha gawas basi igpalid han hangin an upa ngan mahibilin an lugas. Kondi an sugad nga proseso abat hinduro tungod han peligro nga hikit-an han mga tikasan nga determinado ha pagdaot han tuna. Salit, hi Gideon naggiok hin trigo ha purug-anan han ubas—posible nga usa ka daku nga gin-atupan nga balalong nga inukit tikang ha bato—nga diri nakikita han mga Midianitanhon. (Hukom 6:11) Didto an lugas puydi lapduson hin talagudti la nga gamit an gutiay nga kahoy. Hito nga mga kahimtang, ginagamit ni Gideon kon ano la an aada.

Handurawa la an kahipausa ni Gideon han an anghel ni Jehova nagpakita ha iya ngan nagsiring: “Hi Jehova upod ha imo, ikaw nga makusganon ngan tawo nga maisog.” (Hukom 6:12) Sugad nga naggigiok hin lugas ha purug-anan hin ubas ha tago nga lugar, sigurado nga hi Gideon diri naabat nga maisog hiya. Kondi, ito nga mga pulong nagpapakita nga natapod an Dios nga mahimo magin maisog nga lider hi Gideon ha Israel. Bisan pa hito, hiya mismo nagkikinahanglan nga makombinse.

Han ginsugo hi Gideon ni Jehova nga “[luwason] an Israel tikang ha kamot han Midian,” hi Gideon mapainubsanon nga nagsiring: “O, Ginoo, ano an akon igluluwas han Israel? Kitaa, an akon panimalay amo an gikakablasi ha Manases, ngan ako an gigugutiayi ha balay han akon amay.” An mabinantayon nga hi Gideon naghangyo hin usa nga tigaman nga magsisiguro nga uupdan hiya han Dios ha pagpirde han Midian, ngan andam hi Jehova nga tagbawon an makatadunganon nga panginahanglan ni Gideon hin pagpasarig. Salit naghatag hi Gideon hin regalo nga pagkaon ha iya anghel nga bisita, ngan inulbo an kalayo tikang ha bato, ngan ginlamoy an halad. Han napakalma na ni Jehova an kahadlok ni Gideon, nagtukod hi Gideon hin halaran dida hito nga lugar.—Hukom 6:12-24.

‘Tuguti hi Baal nga Legal nga Magdepensa’

An gidadakui nga problema han Israel diri an panalumpigos han mga Midianitanhon. Ito amo an kauripon ha pagsingba kan Baal. Hi Jehova “maabugho nga Dios,” ngan waray makakasingba ha iya ha paagi nga kinakarawat niya samtang nagsisingba ha iba nga mga dios. (Eksodo 34:14) Tungod hito, ginsugo ni Jehova hi Gideon nga bungkagon an halaran han iya amay para kan Baal ngan utdon an sagrado nga poste. Nahadlok hi Gideon han reaksyon han iya amay ngan han iba kon buhaton niya ito durante han adlaw, salit ginios hiya ha gab-i, ha bulig han napulo nga surugoon.

Makatadunganon an pag-ikmat ni Gideon, tungod kay han mahibaro an mga magsiringba ni Baal  hito nga lugar han iya “kawaray pagtahod,” nagpirit hira nga patayon hiya. Kondi, pinaagi han diri-mabari nga lohika, nangatadongan an amay ni Gideon nga hi Joas ha mga tawo nga kon Dios hi Baal, madidepensahan niya an iya kalugaringon. Dida hito, angayan nga gintawag ni Joas an iya anak nga Jerubaal, nga nangangahulogan hin “Tuguti hi Baal nga Legal nga Depensahan an Iya Kalugaringon.”—Hukom 6:25-32, footnote ha NW.

Ginbibendisyonan pirme han Dios an iya katawohan ha maisugon nga pagdapig ha totoo nga pagsingba. Han an mga Midianitanhon ngan an ira mga kaalyado sumulong utro ha teritoryo han mga Israelita, “an espiritu ni Jehova kinmada kan Gideon.” (Hukom 6:34) Ilarom han impluwensya han espiritu, o aktibo nga pwersa han Dios, nagtirok hi Gideon hin mga kasundalohan tikang ha mga tribo ni Manases, Aser, Sabulon, ngan Neptali.—Hukom 6:35.

Pag-andam ha Pagbuhat

Bisan kon hito nga panahon 32,000 an kasundalohan ni Gideon, nangaro hiya hin tigaman ha Dios. Kon an barahibo hin karnero ha salog nga giriokan mahulos hin tun-og samtang nagpapabilin nga mamara an tuna, magpapasabot ini nga luluwason han Dios an Israel pinaagi ha iya. Ginbuhat ni Jehova ini nga milagro, ngan nangaro hi Gideon ngan kinarawat hin kompirmasyon han ginbaliskad an tigaman—mahulos nga tuna ngan mamara nga barahibo hin karnero. Sobra la ba an pag-inikmat ni Gideon? Matin-aw nga diri, tungod kay gintuman ni Jehova an iya hangyo para hin pagpasarig. (Hukom 6:36-40) Diri kita naglalaom hin sugad nga mga milagro yana. Kondi, makakakarawat kita hin giya ngan pagpasarig ni Jehova tikang ha iya Pulong.

Yana, an Dios nagsiring nga damu hinduro an kasundalohan ni Gideon. Kon magdaog hira pinaagi hiton daku nga pwersa, bangin manhambog an mga Israelita nga naluwas nira an ira kalugaringon. Kondi kinahanglan nga hi Jehova an kumarawat han kadayawan para han tiarabot nga kadaogan. Ano an solusyon? Kinahanglan iaplikar ni Gideon an usa nga kahikayan han Mosaiko nga Balaud pinaagi ha pag-aghat han mga hadlukon nga diri na la umapi. Dida hito, 22,000 han iya kasundalohan an inatras, ngan 10,000 na la an nahibilin.—Deuteronomio 20:8; Hukom 7:2, 3.

Para ha Dios, damu pa gihapon ito nga kasundalohan. Ginsugo hi Gideon nga pakadtoon hira ha salog. An Judio nga historyador nga hi Josephus nasiring nga ginsugo han Dios hi Gideon nga pabaktason an iya kasundalohan ngadto ha usa nga salog durante han pinakamasirak nga bahin han adlaw. Anoman an kahimtang, gin-obserbahan ni Gideon kon paonan-o uminom an kasundalohan. Tulo ka gatos la an sinarok hin tubig pinaagi han usa nga kamot ngan ginlaklak ito samtang nagbabantay para hin posible nga pagsulong han mga kaaway. An 300 la nga mabinantayon an maupod kan Gideon. (Hukom 7:4-8) Handurawa nga aada ka ha ira kahimtang. Tungod kay 135,000 an kadamu han imo mga kaaway, sigurado nga maghuhunahuna ka nga magdadaog ka gud la pinaagi han gahum ni Jehova, diri han imo kalugaringon!

Gin-aghat han Dios hi Gideon nga mag-upod hin usa nga kabulig ngan espiyahan an kampo han Midian. Samtang nakadto, hinbatian ni Gideon an usa nga lalaki nga nagsusumat hin inop ha iya kaupod nga waray pag-alang ha pag-interpretar nga determinado an Dios nga itubyan an Midian ha kamot ni Gideon. Ini an pagdasig nga kinahanglan gud hibatian ni Gideon. Sigurado hiya nga ihahatag ni  Jehova ha iya ngan ha iya 300 nga katawohan an kadaogan ha mga Midianitanhon.—Hukom 7:9-15.

Taktika ha Pakig-away

An 300 ginbahin ha tulo ka grupo nga tag-100 nga sundalo. An kada tawo gintagan hin usa nga budyong ngan usa nga daku nga tibod nga waray sulod. Usa nga sulo an igintago ha tibod. An siyahan nga sugo ni Gideon amo ini: ‘Tan-awa ako, ngan buhata an akon bubuhaton. Kon huypon ko an trumpeta, huypa man niyo an iyo trumpeta ngan guliat An kampilan ni Jehova ngan ni Gideon.’—Hukom 7:16-18, 20.

An 300 nga Israelita nga mga girriro waray aringasa nga kinadto ha ligid han kampo han mga kaaway. Mga alas dyes na adto ha gab-i—katapos gud la han pagbalyo han gwardya. Baga hin ini na an angayan nga takna ha pagsulong, tungod kay maiha-iha pa antes mahiara ha kasisidman an mga mata han bag-o nga mga gwardya.

Nakalasan gud yana an mga Midianitanhon! Tigda nga nawara an kamingaw ha pagbuonga han 300 nga tibod, paghuypa han 300 nga budyong, ngan ha pagguliat han 300 nga kalalakin-an. Tungod kay nakalasan, labi na ha guliat nga “An kampilan ni Jehova ngan ni Gideon,” nan-gugliat liwat an mga Midianitanhon, nga nakadugang ha aringasa. Hito nga kasamok, diri na nira makilala kon hin-o an kaaway. Nagpabilin nga natindog an 300 ha ira nakatoka nga dapit samtang ginpapahinabo han Dios nga an ira mga kaaway magparaptayay ha usa kag usa pinaagi han ira kalugaringon nga mga espada. Nagkasaramok an kampo, imposible an pagpalagiw, ngan an pagpirde han nabibilin pa nga mga kaaway diin nahiupod an makuri nga paglinanat, permanente nga nagtapos han tarhog han Midian. Ha kataposan, natapos an maiha ngan matalumpiguson nga pagsakop.—Hukom 7:19-25; 8:10-12, 28.

Bisan katapos hini nga kadaogan, mapainubsanon hi Gideon. Han an mga Epraimitanhon, nga matin-aw nga inabat hin kainsulto nga waray hira ig-api ha pakig-away, nagsari nga makig-away ha iya, malumo nga binaton hiya. An iya malumo nga baton nagwara han ira kasina ngan nagpakalma ha ira.—Hukom 8:1-3; Proberbios 15:1.

Yana nga may-ada na kamurayawan, gin-aghat han mga Israelita hi Gideon nga magin ira hadi. Pagsulay gud ito! Kondi nagdumiri hi Gideon. Waray niya hingalimti kon hin-o an nagdaog kontra ha Midian. “Diri ako maghahadi ha iyo, ngan diri man an akon anak maghahadi ha iyo,” nagsiring hiya. “Hi Jehova an maghahadi ha iyo.”—Hukom 8:23.

Kondi, tungod kay diri hingpit, an pagdesisyon ni Gideon diri pirme maopay. Tungod han usa nga waray igsumat nga hinungdan, ginhimo niya nga epod an mga dinag-an han girra ngan iginparayaw ito ha iya syudad. An rekord nasiring nga an bug-os nga Israel “nagbuhat hin malaw-ay” ngada ha epod. Ginsingba nira ito, ngan nagin bitik ito bisan kan Gideon ngan ha iya panimalay. Kondi, waray hiya magin bug-os nga parasingba hin dios-dios, tungod kay ginkilala hiya han Kasuratan nga usa ka tawo nga may pagtoo kan Jehova.—Hukom 8:27; Hebreo 11:32-34.

Mga Leksyon Para ha Aton

An istorya ni Gideon nagtatagana hin mga leksyon nga nagpapahamangno ngan nagdadasig. Nagpapahamangno ito ha aton nga kon kuhaon ni Jehova ha aton an iya espiritu ngan pag-uyon tungod han aton matinalapason nga panggawi, an aton espirituwal nga kahimtang magigin pariho han kanan nagkukuri hinduro nga mga umurukoy han usa nga nasud nga nadaot han mga duron. Nagkikinabuhi kita ha makuri hinduro nga mga panahon ngan diri sadang mahingalimot nga an bendisyon ni Jehova an “nakakahimo nga bahandianon; ngan waray niya [igindudugang nga] kasubo hini.” (Proberbios 10:22) Naieksperyensyahan naton an bendisyon han Dios tungod kay ‘nag-aalagad kita ha iya ha hingpit nga kasingkasing ngan ha matinguhaon nga hunahuna.’ Kay kon diri, isasalikway kita niya.—1 Kronikas 28:9.

Makakakuha kita hin pagdasig tikang ha asoy mahitungod kan Gideon, tungod kay nagpapamatuod ito nga maluluwas ni Jehova an iya katawohan tikang ha bisan ano nga peligro, bisan pinaagi han paggamit hadton baga hin maluya ngan waray mahihimo. An pagpirdeha ni Gideon ngan han iya 300 nga kalalakin-an ha 135,000 nga Midianitanhon usa nga ebidensya han waray tubtoban nga gahum han Dios. Bangin mahingada kita ha makuri hinduro nga mga kahimtang ngan baga hin damu hinduro an aton mga kaaway. Kondi, an asoy han Biblia mahitungod kan Gideon nag-aaghat ha aton nga sumarig kan Jehova, nga magbibendisyon ngan magluluwas ha ngatanan nga nagbubuhat hin pagtoo ha Iya.