An Biblia Makakabulig ha Imo nga Makabiling hin Kalipay

BISAN kon an Biblia diri medikal nga libro, nagkukomento gud ito mahitungod han epekto han mga emosyon—positibo o negatibo—ha mental ngan pisikal nga kahimsog han usa ka tawo. “An malipayon nga kasingkasing maopay nga tambal,” siring han Biblia, “kondi an masurub-on nga espiritu nakakapamara han mga tul-an.” Dugang pa, aton mababasa: ‘Kon ikaw mahiraptay ha adlaw ha kakurian, an imo kusog gutiay.’ (Proberbios 17:22; 24:10) An mga pagbati hin kahulop mahimo makaubos han aton kusog, salit nanluluya kita ngan hirani ha peligro, kondi waray hingyap nga magbag-o o mamiling hin bulig.

An kahulop mahimo liwat makaapekto ha espirituwalidad han usa ka tawo. An mga tawo nga naabat nga waray hira pulos agsob nga naabat nga diri gud hira makakaeksperyensya hin maopay nga relasyon ha Dios ngan uuyonan niya. Hi Simone, nga gin-unabi ha nauna nga artikulo, nagruhaduha nga hiya “an klase han tawo nga uuyonan han Dios.” Kondi, kon usisahon naton an Pulong han Dios, an Biblia, mahibabaroan naton nga gintatagad han Dios hin maopay adton nangangalimbasog ha pagpalipay ha iya.

Nagtatagad Gud an Dios

An Biblia nagsusumat ha aton nga “hi Jehova hirani hadton may masinakitnon nga kasingkasing, ngan nagluluwas hiya hadton mga mabinasulon an espiritu.” An Dios diri nagtatamay hin “kasingkasing nga bungkag ngan dugmok,” kondi nagsasaad hiya “ha pagpaabtik han espiritu han mapainubsanon, ngan ha pagpaabtik han kasingkasing” han mga tawo nga gindudugmok.—Salmo 34:18 ; 51:17, NW; Isaias 57:15.

 Ha usa nga okasyon nakita han Anak han Dios, hi Jesus, nga kinahanglan isaysay ha iya mga disipulo an kamatuoran nga nakikita han Dios an maopay ha Iya mga surugoon. Ha usa nga ilustrasyon, iya iginsaysay nga nakikita han Dios kon an usa nga maya nahuhulog ha tuna—usa nga butang nga huhunahunaon han kadam-an nga mga tawo nga diri sugad kaimportante. Iya liwat ginpabug-atan nga maaram an Dios han gigugutiayi nga detalye mahitungod han mga tawo, bisan han kadamu han mga buhok ha ira ulo. Gintapos ni Jesus an iya ilustrasyon pinaagi ha pagsiring: “Busa, diri kamo mahadlok; maromahal pa kamo han damu nga mga katamsihan.” (Mateo 10:29-31) a Iginpapasabot ni Jesus nga bisan kon ano an mahimo abaton han mga indibiduwal mahitungod han ira kalugaringon, an mga tawo nga may pagtoo birilhon gud ha paniplatan han Dios. Ha pagkamatuod, ginpapahinumdoman kita ni apostol Pedro nga “an Dios waray ginpasulabi han mga tawo; kondi tikang ha ngatanan nga mga nasud hiya nga nahadlok ha iya, ngan nagbubuhat hin matadong, naruruyagan niya.”—Buhat 10:34, 35.

Tipigi an Timbang nga Panhunahuna

Ginsasagda kita han Pulong han Dios nga patuboon an pagin timbang ha paagi nga aton ginhuhunahuna an aton kalugaringon. Ilarom ha paggiya han Dios, hi apostol Pablo nagsurat: “Nasiring ako, tungod han grasya nga ihinatag ha akon, ha tagsa-tagsa ha iyo, nga diri maghunahuna hin hitaas ha iya kalugaringon nga labaw han igo niya paghunahunaon; kondi paghunahuna hin malinaw, sumala ha taraksan ha pagtoo, nga ginbahin-bahin han Dios ha tagsa-tagsa.”—Roma 12:3.

Sigurado nga diri naton karuyag hunahunaon hin sobra an aton kalugaringon tubtob ha punto nga nagigin hambog na kita; diri man liwat naton karuyag minuson an aton kalugaringon ngan maghunahuna nga waray kita pulos. Lugod, sadang naton magin tumong nga kultibaron an makatadunganon nga paghunahuna ha aton kalugaringon, panhunahuna nga nagtatagad han aton mga abilidad sugad man han aton mga limitasyon. Iginpahayag ito han usa nga Kristiano nga babaye ha sugad hini nga paagi: “Diri ako maraot nga tawo; diri man liwat ako maopay hinduro nga tawo. May-ada ako maopay ngan diri-maopay nga mga kalidad, sugad man an ngatanan.”

Syempre, diri masayon an pagkaada timbang nga panhunahuna. Bangin magkinahanglan hin daku nga pangalimbasog basi mawara an sobra ka negatibo nga paghunahuna ha aton kalugaringon nga bangin napatubo naton ha paglabay han damu ka tuig. Kondi, ha bulig han Dios mababag-o naton an aton personalidad sugad man an aton panlantaw ha kinabuhi. Ha pagkamatuod, ini an gin-aaghat han Pulong han Dios nga aton buhaton. Aton mababasa: “Iyo bayaan an kadaanan niyo nga panggawi, an daan nga tawo, nga nagtutubo ha pagkadunot sumala ha kaipa han panlimbong; [kondi] pagbag-ohon kamo ha espiritu han iyo paghunahuna, ngan isul-ot an bag-o nga tawo, nga ginbuhat sugad ha Dios ha katadongan, ngan kaputli han kamatuoran.”—Efeso 4:22-24.

Pinaagi ha pangalimbasog nga bag-ohon ‘an espiritu han aton paghunahuna,’ karuyag sidngon, an nangunguna nga hilig han aton hunahuna, mababag-o naton an aton personalidad tikang ha pagin sobra ka negatibo ngadto ha pagin positibo. Nasantop ni Lena, nga gin-unabi ha nauna nga artikulo, nga tubtob nga diri niya wawad-on an paghunahuna nga waray  makakaghigugma o makakabulig ha iya, waray magbabag-o o makakagbag-o han iya mga pagbati mahitungod han iya kalugaringon. Ano nga praktikal nga sagdon ha Biblia an nakabulig kan Lena, Simone, ngan ha iba pa basi makagbag-o?

Mga Prinsipyo ha Biblia nga Nakakabulig ha Pagpauswag han Kalipay

“Ibutang an imo dinara ha bawbaw ni Jehova, ngan ikaw iya kabubuligan.” (Salmo 55:22) Siyahan, an pag-ampo makakabulig ha aton nga makabiling hin totoo nga kalipay. Hi Simone nasiring: “Ha kada panahon nga nahuhulop ako, nag-aampo ako kan Jehova ngan nangangaro han iya bulig. Ha ngatanan nga kahimtang, inaabat ko an iya kusog ngan giya.” Kon ginsasagda kita han salmista nga ibutang an aton dinara kan Jehova, sugad hin iya ginpapahinumdom kita nga hi Jehova diri la nagtatagad ha aton kondi iya liwat kita ginhuhunahuna sugad nga mga indibiduwal nga takos han iya bulig ngan suporta. Ha gab-i han Paskua 33 K.P., nasubo an mga disipulo ni Jesus ha iya ginsiring mahitungod han iya tiarabot nga pagbaya. Ginsagda hira ni Jesus nga mag-ampo ha Amay, ngan katapos hiya nagdugang: “Pangamuyo kamo, ngan kamo makakarawat, basi an iyo kalipayan mahingpit.”—Juan 16:23, 24.

“May-ada mas daku nga kalipay ha paghatag kay ha pagkarawat.” (Buhat 20:35, NW) Sugad han igintutdo ni Jesus, an paghatag usa nga yawi ha pakabiling hin totoo nga kalipay ha kinabuhi. An pag-aplikar hini nga kamatuoran han Biblia nabulig ha aton ha pagsentro han aton atensyon ha mga panginahanglan han iba imbes nga ha mga kakulangan naton. Kon nabulig kita ha iba ngan nakikita an ira mapinasalamaton nga reaksyon, napapauswag naton an aton pagtagad ha aton kalugaringon. Kombinsido hi Lena nga an regular nga pag-istorya ha iba mahitungod han maopay nga sumat tikang ha Biblia nakakabulig ha iya ha duha nga paagi. “Siyahan, naghahatag ito ha akon han klase han kalipay ngan katagbaw nga ginhisgotan ni Jesus,” siring niya. “Ikaduha, nakarawat ako hin damu nga maopay nga reaksyon tikang ha iba, nga nakakabulig ha akon nga makabiling hin kalipay.” Pinaagi han hura nga paghatag han aton kalugaringon, maieksperyensyahan naton an pagkatotoo han Proberbios 11:25: “Hiya nga nagbabaribi hiya man pagbabaribihan.”

“An ngatanan nga adlaw han mga sinakit maraot; kondi hiya nga malipayon an kasingkasing may-ada dayoday nga piyesta.” (Proberbios 15:15) Kita ngatanan makakapili ha kon paonan-o naton tatagdon an aton kalugaringon ngan an aton mga kahimtang. Mahimo kita magin pariho ha usa nga negatibo an pagkita ha ngatanan ngan nasasakit, o mahimo naton pilion nga maghunahuna hin positibo, magin “malipayon an kasingkasing,” ngan magin malipayon nga sugad hin aadto kita ha usa nga piyesta. Hi Simone nasiring: “Nangangalimbasog ako nga magpabilin nga positibo tubtob nga posible. Pirme ako sagipo ha personal nga pag-aram ngan ha ministeryo, ngan nagpapadayon ako ha pag-ampo. Nangangalimbasog liwat ako nga makig-upod ha mga tawo nga positibo an panhunahuna, ngan nangangalimbasog ako ha pagbulig ha iba.” An sugad nga disposisyon han kasingkasing nagriresulta hin totoo nga kalipay, sugad han igin-aaghat ha aton han Biblia: “Pagkalipay kamo kan Jehova, ngan paghimaya kamo nga mga magtadong; ngan guliat hin kalipay, kamo ngatanan nga matadong [an] kasingkasing.”—Salmo 32:11.

“An sangkay nahigugma ha ngatanan nga panahon; ngan an usa nga bugto natawo para ha kakurian.” (Proberbios 17:17) An pagsumat ha usa nga hinigugma o ha nasasarigan  nga magsaragdon makakabulig ha aton nga atubangon an negatibo nga mga pagbati ngan kuhaon ito antes ito makadaot ha aton. An pakiistorya ha iba makakabulig ha aton nga makita an mga butang ha timbang ngan positibo nga paagi. “Daku an naibubulig han pag-istorya han akon mga inaabat,” siring ni Simone. “Kinahanglan may masumatan ka han imo inaabat. Agsob nga igo na an pagsumat la han imo inaabat ha iba.” An pagbuhat hito mabulig ha imo nga maeksperyensyahan an pagkatotoo han proberbio nga nasiring: “An kabug-at ha kasingkasing han tawo nakakapaguko hini; kondi an maopay nga pulong nakakalipay hini.”—Proberbios 12:25.

Kon Ano an Imo Mahihimo

Ginhisgotan naton an pipira la han damu nga mag-opay ngan praktikal nga mga prinsipyo tikang ha Biblia nga makakabulig ha aton nga malamposan an negatibo nga mga pagbati ngan makabiling hin totoo nga kalipay. Kon usa ka hadton nakikig-away ha mga pagbati han pagin may kakulangan, gindadasig ka namon nga usisahon hin mas maopay an Pulong han Dios, an Biblia. Hibaroi an pagkultibar hin reyalistiko ngan timbang nga pagbati mahitungod han imo kalugaringon ngan han imo relasyon ha Dios. Sinsero nga naglalaom kami nga pinaagi han giya han Pulong han Dios, makakabiling ka hin totoo nga kalipay ha ngatanan nga imo binubuhat.

[Footnote]

[Retrato ha pahina 7]

An pag-aplikar han mga prinsipyo han Biblia nagpapauswag han kalipay