An Ginhuhunahuna han Iba Mahitungod ha Aton—Importante ba Ito?

HAROS ngatanan naruruyag nga dayawon. An mga komplimento nakakalipay ha aton, tungod hito naabat kita nga may nahihimo kita. Kon gin-uuyonan kita, mahimo pa ngani kita maruyag ha pagpauswag han aton pagbuhat. Kabaliktaran gud an aton aabaton kon aton ginhuhunahuna nga may mga tawo nga diri nauyon ha aton. An matugnaw nga pagtagad o kritiko nga mga pulong mahimo makadaot ha aton. An ginhuhunahuna han iba mahitungod ha aton mahimo magkaada daku nga epekto ha aton paghunahuna ha aton kalugaringon.

Sayop an pagbalewaray han panhunahuna han iba ha aton. Ha pagkatinuod, makakapahimulos kita kon tutugotan naton an iba nga usisahon an aton panggawi. Kon basado ha hitaas nga mga prinsipyo ha moral, an mga opinyon han iba mahimo magin mapulsanon, nga nagpapagios ha aton nga magin matadong. (1 Korinto 10:31-33) Kondi, agsob nga an opinyon han publiko diri gud makatadunganon. Hunahunaa an nabaliko nga ideya mahitungod kan Jesu-Kristo han punoan nga mga saserdote ngan han iba han “hira nagsinggit, ngan nasiring: Igraysang hiya ha krus, igraysang hiya ha krus!” (Lukas 23:13, 21-25) An mga punto de bista nga basado ha palso nga impormasyon o naimpluwensyahan hin kaawa o sayop nga panhunahuna bangin kinahanglan balewarayon la. Salit, kinahanglan kita magkaada maopay nga pagturutimbang ngan gumios ha maaramon nga paagi ha mga opinyon han iba.

Kan Kanay Opinyon an Importante?

Karuyag naton an pag-uyon hadton duok ha aton ha totoo nga pagsingba. Upod hini an tumuroo nga mga membro han pamilya ngan an aton Kristiano nga kabugtoan. (Roma 15:2; Kolosas 3:18-21) An gugma ngan pagtahod han mga igkasi-tumuroo ngan an “pagbalyoay hin pagdasig” butnga nira importante gud ha aton. (Roma 1:11, 12, NW) ‘Ha pagpaubos ha hunahuna, gin-iisip naton an iba nga maoroopay pa ha aton.’ (Filipos 2:2-4) Dugang pa, ginhihingyap ngan ginpapabilhan naton an pag-uyon han mga tawo nga nangunguna ha aton—an mga tigurang ha kongregasyon.—Hebreo 13:17.

Hiringyapon liwat an “maopay nga bantog tikang ha mga aadto ha gowa.” (1 Timoteo 3:7) Makapadasig gud kon an diri-tumuroo nga mga paryente, mga katrabaho, ngan mga amyaw natahod ha aton! Ngan diri ba nangangalimbasog kita ha paghatag hin maopay nga impresyon ha mga tawo nga aton nasasangyawan basi karawaton nira an mensahe han Ginhadian? An aton pagkaada reputasyon ha komunidad sugad nga limpyo ha moral, matadong, ngan tangkod nga mga tawo nakakahatag hin kadayawan ha Dios. (1 Pedro 2:12) Kondi, diri gud naton maikukompromiso an mga prinsipyo ha Biblia basi makuha an pag-uyon han iba; diri man liwat kita mahimo gumios sugad nga mga salingkapaw basi ira maruyagan. Kinahanglan naton kilalahon nga imposible an maruyagan han ngatanan. Hi Jesus nagsiring: “Kon kamo kanan kalibotan, an kalibotan maghigugma unta han iya kalugaringon; kondi kay diri kamo kanan kalibotan, kondi ginpili ko kamo tikang ha kalibotan, tungod hini an kalibotan nagdudumot ha iyo.” (Juan 15:19) May mahihimo ba kita basi makarawat an pagtahod han mga tawo nga nakontra ha aton?

Pagkarawat han Pagtahod han mga Nakontra

“Kamo pagdudumtan han ngatanan nga mga tawo tungod han akon ngaran,” nagpahamangno ni Jesus, “kondi an magpadayon tubtob ha kataposan, ini amo an maluluwas.” (Mateo 10:22) Ini nga pagdumot usahay nagriresulta hin maraot hinduro nga  mga akusasyon. An may gindadapigan nga mga opisyal han gobyerno mahimo magtawag ha aton sugad nga “paraaghat hin pagrebelde” o “subersibo.” An prangka nga mga parakontra mahimo mag-akusar ha aton nga magsamok nga sekta nga kinahanglan ibando. (Buhat 28:22) Usahay inin palso nga mga akusasyon mahimo atohan. Paonan-o? Pinaagi ha pagsunod han sagdon ni apostol Pedro: “Mag-andam kamo gihapon ha pagbaton, nga may kaaghop ngan pagtahod, ha ngatanan nga mga tawo nga mapakiana ha iyo, kon ano an katungdanan han pagtoo nga aada ha iyo.” (1 Pedro 3:15) Dugang pa, sadang naton gamiton an “maopay nga pulong, nga diri sadang mabadlong; basi nga an nakontra ha [aton], maawod, nga waray hiya bisan usa nga maraot nga bagay nga igsisiring mahitungod ha aton.”—Tito 2:8.

Samtang nangangalimbasog kita nga limpyohan an aton reputasyon tikang ha pagpasipara, diri kita sadang mahulop o manluya hinduro kon diri makatadunganon nga ginpapakaraot kita. Hi Jesus, an hingpit nga Anak han Dios, gin-akusahan hin pagpasipara, pag-aghat hin pagrebelde, ngan espiritismo pa ngani. (Mateo 9:3; Markos 3:22; Juan 19:12) Hi Pablo ginpakaalohan. (1 Korinto 4:13) Ginbalewaray ni Jesus ngan ni Pablo an sugad nga kritisismo ngan nagpadayon nga okupado ha ira buruhaton. (Mateo 15:14) Maaram hira nga diri gud nira makakarawat an pag-uyon han ira mga kaaway, tungod kay “an bug-os nga kalibotan kanan [yawa].” (1 Juan 5:19) Yana, naatubang kita ha pariho nga pagpasipara. Diri kita sadang mahadlok kon an nangangalas nga mga parakontra nagpapasarang hin mga buwa mahitungod ha aton.—Mateo 5:11.

Mga Opinyon nga Importante Gud

Magkaiba-iba gud an panhunahuna han mga tawo mahitungod ha aton, depende ha ira mga motibo ngan ha ira hinbatian mahitungod ha aton. Gindadayaw ngan ginpapasidunggan kita han pipira, ginpapakaraot ngan ginkakangalasan han iba. Kondi, samtang ginigiyahan kita han mga prinsipyo ha Biblia, may-ada gud kita hinungdan nga magin malipayon ngan mamurayawon.

Hi apostol Pablo nagsurat: “An ngatanan nga mga Baraan nga Surat nga ginpakaaghat han Dios may kapulsanan man ha pagtututdoan, ha pagbadlong, ha pagsaway, ha panutdoan nga ha katadongan: Basi nga an tawo han Dios mahingpit, ngan maandam tungod ha ngatanan nga maopay nga buhat.” (2 Timoteo 3:16, 17) Nakakarawat naton an pag-uyon ni Jehova nga Dios ngan han iya Anak, hi Jesu-Kristo, pinaagi ha maapresyaron nga pagkarawat han Pulong han Dios sugad nga aton giya ha ngatanan nga mga butang. Tutal, an mga opinyon ni Jehova ngan han iya Anak amo an pinakaimportante. An ira ginhuhunahuna mahitungod ha aton nagpapakita han aton totoo nga bili. Ha kataposan, an aton kinabuhi nadepende ha ira pag-uyon.—Juan 5:27; Jakobo 1:12.

[Blurb ha pahina 30]

“Naaawod ako kon gindadayaw ako, tungod kay sekreto nga ginhihingyap ko ito.”—PARASIDAY NGA TAGA-INDIA NGA HI RABINDRANATH TAGORE

[Mga Retrato ha pahina 31]

Importante an mga opinyon han aton mga igkasi-tumuroo

[Ginkuhaan han Retrato ha pahina 30]

Culver Pictures