Padayon nga Maglakat Sugad han Paglakat ni Jesu-Kristo

‘An nasiring nga hiya nagpapabilin [ha Dios], kinahanglan maglakat sugad han paglakat ni [Jesus].’—1 JUAN 2:6.

1, 2. Ano an nahiuupod ha pagkita hin maopay kan Jesus?

 “DALAGANON ta ha mapailubon an rumba nga ibinutang ha aton atubangan,” nagsurat hi apostol Pablo, “nga maghangad [“samtang aton ginkikita hin maopay,” NW] ngadto kan Jesus nga amo an tinikangan [“Punoan nga Ahente,” NW] ngan Maghiringpit han aton pagtoo.” (Hebreo 12:1, 2) Basi masunod an matinumanon nga pagkinabuhi kinahanglan aton kitaon hin maopay hi Jesu-Kristo.

² An pulong ha orihinal-nga-yinaknan para han “ginkikita hin maopay,” sugad han ginamit ha Kristiano Griego nga Kasuratan, nangangahulogan hin “pagsentro han atensyon han usa nga waray nakakaulang,” “diri pagkita ha usa nga butang basi makita an usa pa,” “pagsentro han pagkita ha.” An usa nga reperensya nasiring: “Ha takna nga an atensyon han Griego nga paradalagan ha estadyum mawara dida ha rumba ngan ha tumong han iya pagdalagan hin malaksi, ngan mahingadto ito ha damu nga nagkikita, maghihinay an iya pagdalagan. Sugad man hito an mahitatabo ha usa nga Kristiano.” An mga ulang makakapugong han aton espirituwal nga pag-uswag. Kinahanglan kitaon naton hin maopay hi Jesu-Kristo. Ngan ano an aton ginkikita ha Punoan nga Ahente? An Griego nga termino nga iginhubad nga “punoan nga ahente” nangangahulogan hin “punoan nga lider, usa nga nangunguna ha bisan ano, ngan hito nga paagi nagpapakita hiya hin susbaranan.” An pagkita hin maopay kan Jesus nagkikinahanglan hin pagsunod ha iya susbaranan.

3, 4. (a) Basi makaglakat sugad han paglakat ni Jesu-Kristo, ano an kinahanglan naton buhaton? (b) Ano nga mga pakiana an takos han aton atensyon?

³ ‘An nasiring nga hiya nagpapabilin [ha Dios], kinahanglan maglakat sugad han paglakat ni [Jesus],’ siring han Biblia. (1 Juan 2:6) Kinahanglan magpabilin kita nga kahiusa han Dios pinaagi han pagtuman han mga sugo ni Jesus sugad han iya pagtuman han mga sugo han iya Amay.—Juan 15:10.

⁴ Salit, an paglakat sugad han paglakat ni Jesus nagkikinahanglan nga aton hiya kitaon hin maopay sugad nga Punoan nga Lider ngan sundon naton hin maopay an iya mga pitad. An importante nga mga pakiana nga angay tagdon may kalabotan hini amo an: Paonan-o hi Kristo nangunguna ha aton yana? Paonan-o sadang makaapekto ha aton an pagsubad ha iya paagi han paglakat? Ano an mga kapulsanan han pagsunod ha susbaranan nga ipinakita ni Jesu-Kristo?

Kon Paonan-o Nangunguna hi Kristo ha Iya mga Sumurunod

 5. Antes hiya sumaka ngadto ha langit, ano an iginsaad ni Jesus ha iya mga sumurunod?

⁵ Antes sumaka ngadto ha langit, an binanhaw nga hi Jesu-Kristo nagpakita ha iya mga disipulo ngan gintagan hira hin importante nga buruhaton. Hiya nagsiring: “Busa, lakat kamo, ngan manhimo kamo hin mga tinon-an ha ngatanan nga mga nasud.” Hito nga okasyon an Punoan nga Lider nagsaad  liwat nga makakaupod niya hira samtang ira gintutuman ini nga toka, nasiring: “Kitaa, ako upod ha iyo ha ngatanan nga mga adlaw tubtob ha kataposan han kalibotan.” (Mateo 28:19, 20) Paonan-o hi Jesu-Kristo kaupod han iya mga sumurunod hini nga panahon han kataposan han sistema han mga butang?

6, 7. Paonan-o hi Jesus nangunguna ha aton pinaagi han baraan nga espiritu?

⁶ “An maglilipay [“parabulig,” NW], an espiritu santo, nga pakakanhion han Amay ha akon ngaran,” siring ni Jesus, “pagtututdoan kamo niya ha ngatanan nga mga bagay, ngan magpapahinumdom ha iyo han ngatanan nga mga bagay, nga akon iginsumat ha iyo.” (Juan 14:26) An baraan nga espiritu, nga iginpadara ha ngaran ni Jesus, naggigiya ngan nagpaparig-on ha aton yana. Naglalamrag ito ha aton ha espirituwal ngan nabulig ha aton nga masabtan “bisan pa an mga higlarom nga mga bagay han Dios.” (1 Korinto 2:10) Dugang pa, an diosnon nga mga kalidad nga “gugma, kalipay, pakigdait, pagkamailob, pagkamalolooyon, pagkamaopay, pagkamatinoohon, pagkaaghop, paggahum ha kalugaringon” amo an mga “bunga han espiritu.” (Galasia 5:22, 23) Pinaagi han bulig han baraan nga espiritu, mapapatubo naton ini nga mga kalidad.

⁷ Samtang gin-aadman naton an Kasuratan ngan nangangalimbasog nga iaplikar an aton hinbabaroan, an espiritu ni Jehova nabulig ha aton nga magtubo ha kinaadman, sarabotan, pagsabot, kahibaro, kasubayan, ngan katakos ha pagtirotimbang. (Proberbios 2:1-11) An baraan nga espiritu nabulig liwat ha aton nga magpailob ha mga pagsulay ngan mga pagsari. (1 Korinto 10:13; 2 Korinto 4:7; Filipos 4:13) An mga Kristiano ginsasagda nga ‘maglinis hira tikang ha ngatanan nga mga hugaw han unod ngan han espiritu, ngan paghingpiton an pagkaputli.’ (2 Korinto 7:1) Mahimo gud ba kita magkinabuhi uyon ha ginkikinahanglan han Dios ha pagkabaraan, o kaputli, nga waray bulig han baraan nga espiritu? An usa han mga instrumento nga ginagamit ni Jesus ha pagpanguna ha aton yana amo an baraan nga espiritu, nga an awtoridad ha paggamit hito iginhatag ni Jehova nga Dios ha iya Anak.—Mateo 28:18.

8, 9. Paonan-o ginagamit ni Kristo “an matinumanon ngan maaramon nga uripon” ha pagpanguna?

⁸ Tagda an usa pa nga instrumento ni Kristo ha pagpanguna ha kongregasyon yana. Ha pagkomento mahitungod han iya presensya ngan han kataposan han sistema han mga butang, hi Jesus nagsiring: “Hin-o gud an matinumanon ngan maaramon nga uripon nga gintaporan han iya agaron ha iya mga surugoon han panimalay, ha paghatag ha ira han ira pagkaon ha husto nga panahon? Malipayon ito nga uripon kon ha pag-abot han iya agaron hiagian hiya nga nagbubuhat hin sugad. Matuod ako nasiring ha iyo, Iya tataporan hiya han ngatanan nga iya mga panag-iya.”—Mateo 24:3, 45-47, NW.

⁹ An “agaron” amo hi Jesu-Kristo. An “uripon” amo an grupo han dinihogan nga mga Kristiano dinhi ha tuna. Ini nga uripon nga klase gintaporan ha pagmangno han tunan-on nga mga butang ni Jesus ngan ha pagtagana hin napapanahon nga espirituwal nga pagkaon. Usa ka gutiay nga grupo han kwalipikado nga mga paramangno tikang ha grupo han “matinumanon ngan maaramon nga uripon” an nagkukompwesto han Nagmamando nga Lawas, nga nag-aalagad sugad nga representante han uripon nga klase. Hira an naggigiya han bug-os-kalibotan nga pagsangyaw-han-Ginhadian nga buruhaton ngan paghatag han espirituwal nga pagkaon ha husto nga panahon. Salit ginpapangunahan ni Kristo an kongregasyon pinaagi han dinihogan-han-espiritu nga “matinumanon ngan maaramon nga uripon” ngan han Nagmamando nga Lawas hito.

10. Ano an sadang nga magin paggawi naton ha mga tigurang, ngan kay ano?

¹⁰ An usa pa nga pagpakita han pagpanguna ni Kristo amo an “hatag ha mga tawo [“mga regalo nga kalalakin-an,” NW]”—an Kristiano nga mga tigurang, o mga paramangno. Tinagan hira hin pribilehiyo “ha paghingpit ha mga baraan, ha buhat ha pagkaministro, ha pagparig-on han lawas ni Kristo.” (Efeso 4:8, 11, 12) Mahitungod ha ira, an Hebreo 13:7 nasiring: “Hinumdumi niyo an iyo mga magmarando, an mga tawo nga nagsumat ha iyo han pulong han Dios; pamurubuoton niyo an kataposan han ira mga panggawi, magsubad kamo ha ira pagtoo.” An mga tigurang an nangunguna ha kongregasyon. Tungod kay ginsusubad nira hi Kristo Jesus, an ira pagtoo nagigin takos subaron. (1 Korinto 11:1) Maipapakita naton an aton pagpasalamat ha kahikayan ha pagkaada hin mga tigurang  pinaagi han pagin masinugtanon ngan mapinasakupon ha “mga regalo nga kalalakin-an.”—Hebreo 13:17.

11. Pinaagi han ano ginpapangunahan ni Kristo an iya mga sumurunod yana, ngan ano an nahiuupod han paglakat sugad han iya paglakat?

¹¹ Oo, hi Jesu-Kristo an nangunguna ha iya mga sumurunod yana pinaagi han baraan nga espiritu, han “matinumanon ngan maaramon nga uripon,” ngan han mga tigurang ha kongregasyon. Basi makaglakat sugad han paglakat ni Kristo, kinahanglan masabtan naton an iya paagi han pagpanguna ngan magpasakop kita hito. Nagkikinahanglan liwat ito nga subaron naton an iya paagi han paglakat. “Tungod hini mga gintawag kamo,” nagsurat hi apostol Pedro, “kay hi Kristo nag-antos man tungod ha iyo, nga gintagan kamo hin susbaranan, basi kamo magsunod ha iya mga pitad.” (1 Pedro 2:21) Ha ano nga paagi sadang makaapekto ha aton an pagsunod han hingpit nga susbaranan ni Jesus?

Magin Makatadunganon Kon Ginagamit an Awtoridad

12. Ano nga bahin han susbaranan ni Kristo an labi nga makapainteres ha mga tigurang ha kongregasyon?

¹² Bisan kon nakarawat ni Jesus an diri matupngan nga awtoridad tikang ha iya Amay, makatadunganon hiya ha paagi han iya paggamit hito. An ngatanan ha kongregasyon—labi na an mga paramangno—sadang nira ‘ipahayag an kaaghop [“pagkamakatadunganon,” NW] ha ngatanan nga mga tawo.’ (Filipos 4:5; 1 Timoteo 3:2, 3) Tungod kay an mga tigurang may-ada pipira nga awtoridad ha kongregasyon, importante nga sundon nira an mga pitad ni Kristo ha paggamit hito.

13, 14. Ha ano nga paagi masusubad han mga tigurang hi Kristo samtang gindadasig nira an iba nga mag-alagad ha Dios?

¹³ Gintagad ni Jesus an mga limitasyon han iya mga disipulo. Waray hiya magkinahanglan ha ira hin sobra han ira maihahatag. (Juan 16:12) Diri ginpipirit nga gindasig ni Jesus an iya mga sumurunod nga ‘manalinguha gud’ ha pagbuhat han kaburut-on han Dios. (Lukas 13:24) Iya ginbuhat ini pinaagi han pagpanguna ngan pagpagios han ira mga kasingkasing. Ha sugad man nga paagi, an Kristiano nga mga tigurang yana diri nagtatarhog ha iba nga mag-alagad ha Dios pinaagi han pagpakaalo. Lugod, ira gindadasig hira nga mag-alagad kan Jehova tungod ha gugma ha iya ngan kan Jesus, sugad man ha ira igkasi-tawo.—Mateo 22:37-39.

¹⁴ Waray abusoha ni Jesus an awtoridad nga igintapod ha iya pinaagi han pagkontrol ha kinabuhi han mga tawo. Waray hiya maghimo hin diri-madadangat nga mga suruklan o maghatag hin damu hinduro nga mga surundon. An iya paagi amo an pagpagios ha iba pinaagi han pagtugkad han ira mga kasingkasing pinaagi han mga prinsipyo ha luyo han mga balaud nga iginhatag pinaagi kan Moises. (Mateo 5:27, 28) Ha pagsubad kan Jesu-Kristo, an mga tigurang naglilikay ha paghimo hin kalugaringon nga mga surundon o diri nira iginpipirit an ira kalugaringon nga mga opinyon. May kalabotan ha pamado ngan pag-ayos o pagpahalibway ngan kaliawan, nangangalimbasog an mga tigurang nga matugkad an mga kasingkasing, ginagamit an diosnon nga mga prinsipyo, sugad hadton iginsasaysay ha Mika 6:8; 1 Korinto 10:31-33; ngan 1 Timoteo 2:9, 10.

Magin Mapinairon Ngan Mapinasayloon

15. Ano an nagin reaksyon ni Jesus ha mga kapakyasan han iya mga disipulo?

¹⁵ Hi Kristo nagbilin hin susbaranan nga sadang sundon naton ha paagi han iya pagtagad ha mga kapakyasan ngan mga sayop han iya mga disipulo. Tagda an duha nga hitabo durante han iya ultimo nga gab-i dinhi ha tuna sugad nga tawo. Han pag-abot ni Jesus ha Getsemani, iya “igin-upod hi Pedro, ngan hi Jakobo, ngan hi Juan” ngan ginsidngan hira nga magpadayon ha “pag-agma.” Ngan ‘ha uruunhan, kinulob hiya ha tuna, ngan nag-ampo.’ Han iya pagbalik, iya “hin-agian hira, nga nangangaturog.” Ano an nagin reaksyon ni Jesus?  Hiya nagsiring: “Matuod, an espiritu andam, kondi an unod maluya.” (Markos 14:32-38) Imbes nga sawayon hinduro hira Pedro, Jakobo, ngan Juan, hiya nagpahayag hin pagpaid! Hiton nga gab-i mismo, makatulo nga iginlirong ni Pedro hi Jesus. (Markos 14:66-72) Paonan-o gintrato ni Jesus hi Pedro katapos hito? ‘An Ginoo nabanhaw, ngan nagpakita kan Simon [Pedro].’ (Lukas 24:34) “Hiya nagpakita kan Kepas,” siring han Biblia, “ngan ha napulo kag duha.” (1 Korinto 15:5) Imbes nga masina, ginpasaylo ni Jesus an mabinasulon nga apostol ngan ginparig-on hiya. Ha urhi, igintapod ni Jesus kan Pedro an daku nga mga responsabilidad.—Buhat 2:14; 8:14-17; 10:44, 45.

16. Paonan-o kita makakaglakat sugad han paglakat ni Jesus kon an aton mga igkasi-tumuroo nakakapasubo ha aton o nakakasala ha aton?

¹⁶ Kon an aton mga igkasi-tumuroo nakakapasubo ha aton o nakakasala ha aton tungod han tawhanon nga pagkadiri-hingpit, diri ba sadang kita magin mapinairon ngan mapinasayloon liwat sugad kan Jesus? Ginsagda ni Pedro an iya mga igkasi-tumuroo: “Magkaurosa kamo ngatanan ha hunahuna, mga malolooyon, mga mahigugmaon sugad ha magburugto, mga mapuanguron, mga mapainubsanon; diri niyo pagbalosan an maraot hin maraot, o an pasipara hin pasipara; kondi lugod an pagbendisyon.” (1 Pedro 3:8, 9) Kumusta man kon an iba nga tawo diri nagtatrato ha aton sugad han pagtrato ni Jesus, nadiri nga magin mapinairon o mapinasayloon? Bisan pa hito, kinahanglan mangalimbasog kita nga subaron hi Jesus ngan gumawi sugad han iya paggawi.—1 Juan 3:16.

Unaha an mga Interes han Ginhadian

17. Ano an nagpapakita nga gin-una ni Jesus ha iya kinabuhi an pagbuhat han kaburut-on han Dios?

¹⁷ May-ada usa pa nga paagi nga kinahanglan maglakat kita sugad han paglakat ni Jesus. An pagpahayag han maopay nga sumat han Ginhadian han Dios amo an pinakaimportante ha kinabuhi ni Jesus. Katapos magsangyaw ha Samaritana nga babaye hirani ha syudad han Sikar ha Samaria, hi Jesus nagsiring ha iya mga disipulo: “An akon karan-on amo an pagbuhat han kaburut-on han nagpakanhi ha akon, ngan paghuman han iya buhat.” (Juan 4:34) An pagbuhat han kaburut-on han iya Amay nagparig-on kan Jesus; sugad ito hin masustansya, makapatagbaw, ngan makarepresko nga pagkaon ha iya. An pagsubad ba kan Jesus pinaagi han pagpabilin nga nakasentro an aton atensyon ha pagbuhat han kaburut-on han Dios magriresulta hin diri gud mapulsanon ngan makapatagbaw nga kinabuhi?

18. Ano nga mga bendisyon an resulta han pagdasig ha mga anak nga sumulod ha bug-os-panahon nga pag-alagad?

¹⁸ Kon gindadasig han mga kag-anak an ira mga anak nga sumulod ha bug-os-panahon nga pag-alagad, damu nga mga bendisyon an makakarawat nira sugad man han ira mga anak. An usa nga amay han magkaruha nga lalaki nagdasig ha ira tikang pa ha pagkabata nga magin tumong nira an pagpayunir. Han makatapos han ira sekular nga edukasyon, an magkaruha nagin mga payunir. Ha pamalandong han kalipay nga iya naeksperyensyahan sugad nga resulta, ini nga amay nagsurat: “An amon mga anak nga lalaki waray magpakyas ha amon. Mapasalamaton nga makakasiring kami, ‘An mga kabataan panurundon tikang kan Jehova.’ ” (Salmo 127:3) Ngan paonan-o nagpapahimulos an mga anak han pagpadayon ha bug-os-panahon nga pag-alagad? An usa nga iroy han lima nga anak nasiring: “An pagpayunir nakabulig ha ngatanan nga akon mga anak nga mapatubo an mas duok gud nga relasyon kan Jehova, nagpauswag han ira mga batasan ha personal nga pag-aram, nakabulig ha ira nga mahibaro kon paonan-o gagamiton hin maaramon an ira panahon, ngan nakabulig ha ira nga mahibaro nga unahon ha ira kinabuhi an espirituwal nga mga butang. Bisan kon hira ngatanan kinahanglan maghimo hin damu nga mga pagbag-o, waray usa ha ira an nagbasol ha dalan nga ira ginpili nga sundon.”

19. Ano nga mga plano para ha tidaraon an maaramon nga sadang hunahunaon han mga batan-on?

 ¹⁹ Mga batan-on, ano an iyo mga plano para ha tidaraon? Nangangalimbasog ba kamo nga magin maabtik ha pipira nga karera? O nangangalimbasog ba kamo para ha karera ha bug-os-panahon nga pag-alagad? “Tan-awa niyo hin maopay kon mationan-o iton iyo panggawi, diri sugad ha mga diri maaram, kondi sugad ha mga maaram,” nagsagdon hi Pablo, “pagpahimulosan an oras, kay an mga adlaw magraot.” Hiya nasiring pa: “Busa ayaw kamo pagkawaray himurulsan, kondi hibaroan niyo kon ano an kaburut-on han Ginoo.”—Efeso 5:15-17.

Magin Maunungon

20, 21. Ha ano nga paagi nga hi Jesus maunungon, ngan paonan-o naton masusubad an iya pagkamaunungon?

²⁰ Basi makaglakat sugad han paglakat ni Jesus, kinahanglan subaron naton an iya pagkamaunungon. Mahitungod han pagkamaunungon ni Jesus, an Biblia nasiring: “[Bisan kon naeksister] hiya, ha dagway han Dios, waray niya pag-isipa an hinugad ha Dios, butang nga aragawon, kondi gin-ula niya an iya kalugaringon, nga nagpariho hin dagway han uripon, kay ginhimo nga ladawan han mga tawo; ngan nga sugad na hiya ha bayhon han tawo, nagpaubos hiya ha iya ngahaw, nga nagmasinugtanon tubtob ha kamatayon, oo, an kamatayon ha krus.” Maunungon nga sinuportahan ni Jesus an pagkasoberano ni Jehova pinaagi han pagpasakop ha kaburut-on han Dios para ha iya. Nagmasinugtanon hiya tubtob ha pag-antos hin kamatayon ha pasakitan nga kahoy. Kinahanglan aton ‘karawaton ini nga paghunahuna’ ngan maunungon nga magpasakop ha pagbuhat han kaburut-on han Dios.—Filipos 2:5-8.

²¹ Ipinakita liwat ni Jesus an pagkamaunungon ha iya matinumanon nga mga apostol. Bisan pa han ira mga kaluyahan ngan pagkadiri-hingpit, ginhigugma hira ni Jesus “tubtob ha kataposan.” (Juan 13:1) Ha sugad man nga paagi, diri naton sadang tugotan nga an pagkadiri-hingpit han aton kabugtoan magin hinungdan han aton pagin mapakarauton.

Sunda an Susbaranan nga Ipinakita ni Jesus

22, 23. Ano an mga kapulsanan han pagsunod ha susbaranan nga ipinakita ni Jesus?

²² Syempre, sugad nga diri-hingpit nga mga tawo, diri kita makakaglakat hin eksakto gud ha mga pitad han aton hingpit nga Susbaranan. Kondi, mahimo kita mangalimbasog ha pagsunod hin maopay han iya mga pitad. Basi mahimo naton ito kinahanglan nasabot ngan nagpapasakop kita ha paagi han paggiya ni Kristo ngan magpabilin dida ha susbaranan nga iya ipinakita.

²³ An pagin mga parasubad kan Kristo nagriresulta hin damu nga mga bendisyon. An aton kinabuhi nagigin mas may-katuyoan ngan makapatagbaw tungod kay nakasentro kita ha pagbuhat han kaburut-on han Dios imbes han aton kalugaringon nga kaburut-on. (Juan 5:30; 6:38) May-ada kita limpyo nga konsensya. An aton paagi han paglakat nagigin maopay nga susbaranan. Gindasig ni Jesus an ngatanan nga nagbubuhat ngan binubug-atan nga dumaop ha iya ngan magkaada karepresko para han ira mga kalag. (Mateo 11:28-30) Kon ginsusunod naton an susbaranan ni Jesus, makakaparepresko liwat kita ha iba pinaagi han aton pakig-upod ha ira. Salit, padayon nga maglakat kita sugad han paglakat ni Jesus.

Nahinunumdoman Mo Ba?

• Paonan-o ginpapangunahan ni Kristo an iya mga sumurunod yana?

• Paonan-o masusunod han mga tigurang an pagpanguna ni Kristo ha paggamit han ira hatag-han-Dios nga awtoridad?

• Paonan-o naton masusubad hi Jesus may kalabotan ha pagtagad han mga kasaypanan han iba?

• Paonan-o uunahon han mga batan-on an mga interes han Ginhadian?

[Mga Pakiana]

[Retrato ha pahina 23]

An Kristiano nga mga tigurang nabulig ha aton nga sundon an pagpanguna ni Kristo

[Mga Retrato ha pahina 24, 25]

Mga batan-on, ano an iyo ginpaplano basi magkaada hin makapatagbaw nga Kristiano nga kinabuhi?