Hi Jehova Diri Gud Mabaya ha Imo

NAIEKSPERYENSYAHAN han mga Kristiano ha Judea hito nga panahon an mabangis nga pagkontra, ngan kinahanglan nira atohan an materyalistiko nga panlantaw han mga tawo nga nakapalibot ha ira. Basi dasigon hira, ginkotar ni apostol Pablo an mga pulong ni Jehova ha mga Israelita samtang tisulod hira ha Tuna nga Iginsaad. Hi Pablo nagsurat: “Diri ko gud ikaw [ibibilin], ngan diri ko gud ikaw babayaan.” (Hebreo 13:5; Deuteronomio 31:6) Ini nga saad waray ruhaduha nga nagparig-on han siyahan-siglo nga Hebreo nga mga Kristiano.

Ito nga saad sadang magparig-on liwat ha aton basi maatubang an mga kabaraka nga resulta han pagkinabuhi ha “magpakalilisang nga mga panahon” nga makuri pakibagayan. (2 Timoteo 3:1) Kon nasarig kita kan Jehova ngan nagios uyon hito, iya kita bubuligan bisan ha pinakamakuri nga mga kahimtang. Basi makita kon paonan-o mahimo gumios hi Jehova uyon hini nga saad, aton paghisgotan an ehemplo han tigda nga kawad-i hin panginabuhi han usa.

Pag-atubang han Diri Linalaoman

Nagtitikadamu an waray trabaho ha bug-os nga kalibotan. Sumala ha usa nga magasin ha Polandia, an kawaray trabaho gintatagad nga “usa han pinakamakuri nga mga problema han sosiedad ngan ekonomiya.” An industriyalisado nga mga nasud apektado liwat. Pananglitan, bisan ha mga membro han Organization for Economic Cooperation and Development, han 2004 an waray trabaho “nagdamu ha sobra 32 milyon, mas damu kay han durante han Daku nga Depresyon han dekada han 1930.” Ha Polandia, an Central Statistical Office naglista hin tulo ka milyon nga waray trabaho han Disyembre 2003, nga “nagkompwesto han 18 porsyento han mga tawo nga aada ha edad nga mahimo na magtrabaho.” An usa nga surok nagsiring nga an kadamu han waray trabaho nga Aprikano ha Aprika del Sur inabot hin 47.8 porsyento han 2002!

An tigda nga kawad-i hin trabaho ngan diri linalaoman nga mga panangtang tarhog gud ha damu, upod na ha mga surugoon ni Jehova. “An panahon ngan an higayon [“diri-linalaoman nga mga hitabo,” NW] nahinanabo ha ira ngatanan.” (Eklesiastes 9:11) Bangin masiring liwat naton an ginsiring ni salmista David: “An mga kakurian han akon kasingkasing nagdudugang.” (Salmo 25:17) Malalamposan mo ba an sugad nga diri maopay nga mga kahimtang? Mahimo ito makaapekto han imo emosyonal, espirituwal, ngan materyal nga kaopayan. Kon waray ka trabaho, makakagkinabuhi ka pa ba sugad han imo naglabay?

Paglampos han Kaguol ha Emosyon

“An kawad-i hin trabaho mas nakakapasubo ha kalalakin-an,” tungod kay nahiaraan na nga hunahunaon hira sugad nga paratagana han materyal  nga panginahanglan han pamilya, nagsaysay an sikologo nga hi Janusz Wietrzyński. Hiya nagsiring nga an kawad-i hin trabaho makakaaghat ha lalaki nga “magpabag-o-bag-o an emosyon,” tikang ha kasina ngadto ha pag-abat hin kawaray mahihimo. An usa nga amay nga gintangtang ha trabaho bangin mawarayan pagpabili ha kalugaringon ngan magtikang “makig-inaway ha iya pamilya.”

Hi Adam, usa nga Kristiano nga amay nga may-ada duha nga anak, nagsaysay kon ano an iya gin-abat han nawad-an hiya hin trabaho: “Madagmit ako maurit; an ngatanan nakakapaaringit ha akon. Bisan ha gab-i, an akon mga inop mahitungod gud la ha trabaho ngan kon paonan-o ako makakagtagana para ha akon mga anak ngan ha akon asawa, nga diri linalaoman nga natangtang liwat.” Han hira Ryszard ngan Mariola, mag-asawa nga may usa nga anak, nawad-an han ira ginkakakitaan, may-ada hira daku nga utang ha bangko. An asawa nagsiring: “Hito nga panahon, pirme ako nagpuproblema, sugad hin ginsisinidngan ako han akon konsensya nga sayop nga nangutang ako. Pirme ko ginhuhunahuna nga sala ko adto ngatanan.” Kon naatubang kita hin sugad nga mga kahimtang, bangin masayon kita masina, mabaraka, o maaringit ngan an aton emosyon mahimo magpaluya gud ha aton. Kondi, paonan-o naton makukontrol an negatibo nga mga emosyon nga bangin naton abaton?

An Biblia naghahatag hin epektibo nga sagdon kon paonan-o matitipigan an positibo nga disposisyon. “Diri kamo magkabaraka hin bisan ano nga bagay,” nagsagdon hi apostol Pablo, “kondi ha ngatanan nga bagay tungod ha pag-ampo ngan pangamuyo upod an pagpasalamat ipahibaro niyo ha atubangan han Dios an iyo mga pinangangaro. Ngan an kamurayawan han Dios, nga labaw ha ngatanan nga hibabroan, magbabantay ha iyo mga kasingkasing ngan ha iyo mga hunahuna kan Kristo Jesus.” (Filipos 4:6, 7) An pakiistorya kan Jehova ha pag-ampo maghahatag ha aton han “kamurayawan han Dios,” an kalmado nga disposisyon han hunahuna nga iginbasar ha aton pagtoo ha iya. An asawa ni Adam, hi Irena, nagsiring: “Ha amon mga pag-ampo, ginsusumatan namon hi Jehova mahitungod han amon kahimtang ngan kon paonan-o namon mas pasisimplihon pa an amon kinabuhi. An akon bana, nga kasagaran madagmit makabiling hin mga hinungdan nga mabaraka, nagtikang umabat nga magkakaada gud solusyon.”

Kon diri linalaoman nga mawad-an ka hin trabaho, makakahigayon ka ha pag-aplikar han sagdon ni Jesu-Kristo ha Sermon ha Bukid: “Diri kamo mangarit ha iyo kinabuhi kon ano an iyo kakaunon, o kon ano an iyo iinumon; bisan tungod ha iyo lawas kon ano an iyo igsusul-ot. . . . Kondi pamilnga niyo siyahan an ginhadian han Dios, ngan an iya katadongan; ngan ngatanan ini nga mga butang mahidudugang ha iyo.” (Mateo 6:25, 33) Gin-aplikar nira Ryszard ngan Mariola ini nga sagdon ha paglampos han ira mga emosyon. “Pirme ako ginliliaw han akon bana ngan iya ginpapabug-atan nga diri kami pababay-an ni Jehova,” siring ni Mariola. An iya bana nagdugang: “Pinaagi han amon padayon nga magkausa nga mga pag-ampo, nagin mas duok kami ha Dios ngan ha kada tagsa, ngan naghatag ito ha amon han ginkikinahanglan nga pagliaw.”

An baraan nga espiritu han Dios mabulig liwat ha aton ha pag-atubang han problema. An pagpugong ha kalugaringon, nga maiaaghat han baraan nga espiritu, makakabulig ha aton ha pagtipig han aton kalugaringon ngan han aton mga emosyon nga magpabilin nga kalmado. (Galasia 5:22, 23) Bangin diri ito masayon, kondi posible ito, tungod kay nagsaad hi Jesus nga “an . . . Amay nga langitnon, . . . mahatag han espiritu santo ha mga nangangaro ha iya.”—Lukas 11:13; 1 Juan 5:14, 15.

 Ayaw Pabay-i an Imo Espirituwal nga mga Panginahanglan

Ha tinikangan, an diri linalaoman nga katangtang ha trabaho bangin makaaghat hin kabaraka bisan ha timbang gud an panhunahuna nga Kristiano, kondi diri naton sadang pabay-an an aton espirituwal nga mga panginahanglan. Tagda pananglitan an 40-anyos nga hi Moises, nga nabag-o an bug-os nga kinabuhi han nawara an iya hadianon nga katungdanan ngan kinahanglan magin magbarantay hiya hin mga karnero, usa nga trabaho nga ginmiminos han mga Ehiptohanon. (Genesis 46:34) Hi Moises kinahanglan magpahiuyon ha iya bag-o nga mga kahimtang. Han sumunod nga 40 ka tuig, iya gintugotan hi Jehova nga moldehon ngan andamon hiya para ha tiarabot nga bag-o nga mga toka. (Eksodo 2:11-22; Buhat 7:29, 30; Hebreo 11:24-26) Bisan pa han mga kakurian nga gin-atubang ni Moises, nakasentro hiya ha espirituwal nga mga butang, andam hiya ha pagkarawat han mga pagbansay ni Jehova. Hinaot diri gud naton tugotan an maraot nga mga kahimtang nga magin mas importante kay han aton espirituwal nga mga prinsipyo!

Bisan kon masakit gud an tigda nga kawad-i hin trabaho, maopay ito nga panahon ha pagparig-on han aton bugkos kan Jehova nga Dios ngan ha iya katawohan. Iton an gin-abat ni Adam, nga gin-unabi kanina. Hiya siniring: “Han nawad-an kami nga mag-asawa hin trabaho, waray gud namon mahunahuna an diri pagtambong ha Kristiano nga mga katirok o pag-iban han amon pakigbahin ha pag-ebanghelyo nga buruhaton. Ito nga disposisyon nagpanalipod ha amon tikang ha sobra nga kabaraka mahitungod han mahimo mahitabo ha tidaraon.” Sugad liwat hito an inabat ni Ryszard: “Kon diri tungod han mga katirok ngan han ministeryo, diri gud namon maaatubang an problema; sigurado nga maaapektohan gud kami han kabaraka. Nakakapagaan gud han hunahuna an espirituwal nga mga pag-uruistorya, tungod kay an sugad nga mga pakiistorya nagbibirik han amon atensyon ngada ha ira  mga panginahanglan ngan diri ha amon.”—Filipos 2:4.

Oo, imbes nga mabaraka mahitungod han trabaho, pangalimbasugi nga gamiton an dugang nga panahon para ha espirituwal nga mga buruhaton, sugad han personal nga pag-aram, pakigbahin ha mga buruhaton han kongregasyon, o pagpauswag han imo ministeryo. Imbes nga magkinabuhi nga waray ginhihimo, magkakaada ka damu nga ginhihimo ha buruhaton han Ginoo—nga maghahatag hin kalipay ha imo ngan ha bisan hin-o nga sinsero nga mga indibiduwal nga nakarawat han mensahe han Ginhadian nga imo ginsasangyaw.—1 Korinto 15:58.

Pagtagana han Materyal nga mga Panginahanglan han Imo Pamilya

Kondi, an espirituwal nga pagkaon diri magpapabusog ha nagugutom nga tiyan. Kinahanglan hinumdoman naton pirme an masunod nga prinsipyo: “Kon may-ada diri magpatigayon ha iya kalugaringon, labi na gud ha iya panimalay, naglirong na hiya han pagtoo, ngan mamaraot pa ha diri matinoohon.” (1 Timoteo 5:8) “Bisan kon an kabugtoan ha kongregasyon madagmit magtagana han amon pisikal nga mga panginahanglan,” siring ni Adam, “sugad nga mga Kristiano, may obligasyon kami nga mangalimbasog ha pagpamiling hin trabaho.” Makakalaom kita han bulig ni Jehova ngan han iya katawohan, kondi diri gud naton sadang hingalimtan nga kinahanglan kita an siyahan nga mangalimbasog ha pagpamiling hin trabaho.

Ano nga siyahan nga pangalimbasog an mahimo mo buhaton? “Ayaw paghinulata an Dios nga bumulig ha imo samtang waray ka ginhihimo ngan naglilinaom na la hin milagro,” nagsaysay hi Adam. “Kon namimiling ka hin trabaho, ayaw pag-alang ha pagpakilala han imo kalugaringon sugad nga usa han mga Saksi ni Jehova. Kasagaran nga ginpapabilhan ito han mga agaron.” Hi Ryszard nagsasagdon: “Pamakiana ha bisan hin-o nga imo kakilala mahitungod hin mga oportunidad ha trabaho, pirme mamakiana ha ahensya han trabaho, pagbasa hin mga adbertisment, sugad han ‘Wanted: Bantay hin baldado’; o, ‘Part-time: Paraglaba.’ Padayon nga mamiling! Ayaw pagpinili hinduro, bisan kon kinahanglan mo magtrabaho hin minos nga trabaho o hin trabaho nga waray mo hingyapa.”

Oo, “an Ginoo amo an [imo] paratambulig.” ‘Diri ka gud niya ibibilin, ngan diri ka gud niya babayaan.’ (Hebreo 13:5, 6) Diri ka sadang mabaraka hin sobra. Hi salmista David nagsurat: “Itubyan mo kan Jehova an imo agian; sarig liwat ha iya, ngan iya iton pagbubuhaton.” (Salmo 37:5) An ‘pagtubyan kan Jehova han aton agian’ nangangahulogan nga nasarig kita ha iya ngan nagbubuhat ha paagi nga iya naruruyagan, bisan kon an mga kahimtang bangin diri maopay para ha aton.

Nangalimbasog hira Adam ngan Irena nga masuportahan an ira kalugaringon pinaagi ha paglimpyo hin mga bintana ngan hagdanan ngan pinaagi ha pagin diri magasto kon namamalit. Regular liwat nga nanginginsayod hira ha ahensya han panarabahoan. “Pirme naabot an bulig ha panahon gud nga kinahanglan namon ito,” naobserbahan ni Irena. An iya bana nagdugang: “Pinaagi han amon mga naeksperyensyahan, hinbaroan namon nga an amon mga igin-aampo diri pirme uyon ha kaburut-on han Dios. Natutdoan kami hini nga sumarig ha iya kinaadman ngan diri gumios uyon ha amon kalugaringon nga pagsabot. Mas maopay nga kalmado nga hulaton an solusyon nga igtatagana han Dios.”—Jakobo 1:4.

Hira Ryszard ngan Mariola sinulod ha part-time nga mga trabaho kondi ha pariho nga panahon nagin sagipo ha pagsangyaw ha mga teritoryo diin mas daku an panginahanglan. “Nakakatrabaho kami ha mga takna nga waray na gud kami makakaon,” siring ni Ryszard. “Waray namon karawata an dagku-an-sweldo nga mga trabaho nga makakaulang han amon teokratiko nga mga responsabilidad. Mas karuyag namon nga maghulat kan Jehova.” Natoo hira nga ginmaniobra ni Jehova an mga panhitabo salit nakaplete hira hin barato hinduro nga apartment ngan ha urhi nakatrabaho hi Ryszard.

An kawad-i hin ginkakakitaan mahimo magin masakit hinduro, kondi kay ano nga diri ito hunahunaon sugad nga higayon basi personal nga maeksperyensyahan nga diri ka gud pababay-an ni Jehova? Hi Jehova nag-aataman ha imo. (1 Pedro 5:6, 7) Nagsaad hiya pinaagi kan propeta Isaias: “Ayaw kahulop, kay ako an imo Dios; ako magpaparig-on ha imo; oo, ako mabulig ha imo.” (Isaias 41:10) Ayaw gud tuguti an diri linalaoman nga panhitabo, upod na an kawad-i hin trabaho, nga makaparalisa ha imo. Buhata an ngatanan nga imo mahihimo, katapos itapod an ngatanan nga iba pa kan Jehova. Paghulat kan Jehova, bisan ‘ha hilom.’ (Pagtangis 3:26) Makakarawat mo an hura nga mga bendisyon.—Jeremias 17:7.

[Retrato ha pahina 9]

Gamita an panahon para ha espirituwal nga mga buruhaton

[Mga Retrato ha pahina 10]

Pagtoon ha diri pagginasto, ngan ayaw pagpinili hinduro kon namimiling ka hin trabaho