Pahimulusi an Gimaopayi nga Edukasyon!

GINKIKILALA han Biblia hi Jehova nga Dios sugad nga an Maglalarang han ngatanan nga mga butang, upod na han mga tawo. (Genesis 1:27; Pahayag 4:11) Sugad nga an Gihitaasi nga Instruktor, iya gin-edukar an siyahan nga tawhanon nga mag-asawa, hira Adan ngan Eva, ngan igin-andam hira para ha kinabuhi ha matahom nga hardin han Eden. Katuyoan niya nga padayon nga edukaron ngan atamanon hira tubtob ha waray kataposan. (Genesis 1:28, 29; 2:15-17; Isaias 30:20, 21) Hunahunaa la ito nga kabubuwason!

Kondi, makasurubo nga waray pabilhi han siyahan nga mag-asawa an ngatanan. Tungod han ira pagin matinalapason an mga tawo nagtikang madaot ha moral ngan ha pisikal. (Genesis 3:17-19; Roma 5:12) May kalabotan hadton nabuhi mga pipira la ka henerasyon katapos larangon an tawo, an Biblia nasiring: “Hi Jehova kinita nga an karaotan han tawo daku ha tuna, ngan an ngatanan nga panhunahuna han pamurubuot han iya kasingkasing amo gud la maraot ha kadayonan.”—Genesis 6:5.

Haros 4,500 ka tuig na an naglabay tikang han sumiring hi Jehova nga an tawo pirme nakahilig ha karaotan, ngan an kahimtang han katawohan mas maraot na gud yana kay ha bisan kakan-o pa man. Damu an nagbubuwa nga waray awod, nangangawat, o nan-aatake ha iba. Nag-uuswag an mga problema kada adlaw, samtang nagtitikahamubo an pagtagad ha igkasi-tawo. Diri ba aada ha totoo nga krisis an kadam-an han personal nga mga relasyon, upod na adton ha sulod han mga pamilya? Kondi, waray baratunon an Dios mahitungod han presente nga mga kahimtang, ngan waray man liwat hiya umundang ha pagtagad ha mga problema yana. Hi Jehova interesado pirme ha kaopayan han tawo, ngan andam hiya ha pag-edukar han mga naglalaom ha iya para hin giya basi magkaada malipayon nga kinabuhi. Mga 2,000 ka tuig na an naglabay, iya ginpakanhi ha tuna an iya Anak, hi Jesu-Kristo, ngan iginpakita an Iya interes ha pag-edukar ha mga tawo nga naruruyag nga maglampos ha ira kinabuhi. Nagbilin hi Jesus hin susbaranan para han hingpit nga edukasyon tungod kay gintutdoan hiya han Gihitaasi nga Instruktor ha sulod hin diri maihap nga mga katuigan.

Totoo nga Kristianidad—Usa nga Edukasyon

Gintikangan ni Jesu-Kristo an totoo nga Kristianidad, usa nga paagi han pagkinabuhi nga iginbasar ha gugma. Dida hito, an ngatanan nga mga ginhuhunahuna ngan mga buhat kinahanglan ipahiuyon ha kaburut-on han Dios, basi mapasidunggan ngan madayaw an iya ngaran. (Mateo 22:37-39; Hebreo 10:7) An naggiya han mga katutdoan ni Jesus mahitungod hini nga paagi han pagkinabuhi amo an iya Amay, hi Jehova. Ha Juan 8:29, aton mababasa an mahitungod han suporta nga nakarawat ni Jesus tikang ha Dios: “An nagpakanhi ha akon, upod ha akon, waray ako niya bayai nga nag-usahan la ako; kay ako nagbubuhat gihapon han iya naruruyagan.” Oo, ginbuligan ngan ginsuportahan hi Jesus han iya Amay durante han iya bug-os nga ministeryo. Waray atubanga han siyahan nga mga sumurunod ni Jesus an mga kakurian ha kinabuhi nga waray giya. Gin-edukar hira ni Jehova pinaagi han iya Anak. An ira pagsunod ha mga katutdoan ngan susbaranan ni Jesus nakahimo ha ira nga magin mas maopay nga mga tawo. Totoo liwat ito may kalabotan ha iya mga disipulo yana.—Kitaa an kahon nga “An Impluwensya ni Jesus Ngan han Iya mga Katutdoan,” ha pahina 6.

An usa nga makatirigamnan nga bahin han totoo nga Kristianidad nag-uupod han edukasyon nga nakakaapekto han hunahuna ngan kasingkasing basi bag-ohon an mga tawo tikang ha sulod. (Efeso 4:23, 24) Ha pag-unabi hin usa la nga ehemplo,  tagda an igintutdo ni Jesus mahitungod ha pagin maunungon ha padis: “Iyo hinbatian han mga kadaan nga nasiring: Diri ka manlibog. Kondi ako nasiring ha iyo, nga an ngatanan nga nasiplat ha babaye ha pagkaipa ha iya makakapanlibog na ha iya dida ha iya kasingkasing.” (Mateo 5:27, 28) Pinaagi hini nga mga pulong, gintututdoan ni Jesus an iya mga disipulo nga an kasingkasing sadang tipigan nga limpyo ngan an diri angayan nga mga panhunahuna ngan mga hingyap, bisan kon waray pa buhata, mahimo magkaada seryoso nga mga resulta. Diri ba totoo nga an maraot nga mga panhunahuna mahimo magtugway ha mga buhat nga nakakapasina ha Dios ngan nakakasakit ha iba?

Tungod hito, an Biblia nagsasagdon: “Diri kamo angay umuyon hini nga panahon: Kondi magbalhin kamo tungod ha pagbag-o ha iyo mga hunahuna, basi niyo kasayoran kon ano an maopay ngan karuruyagon ngan hingpit nga kaburut-on han Dios.” (Roma 12:2) ‘Posible gud ba nga mabag-o an panhunahuna pinaagi han edukasyon?’ bangin ka magpakiana. An pagbag-o han panhunahuna nag-uupod han pagtugway hito ha iba nga direksyon pinaagi ha pagpuno hito hin mga prinsipyo ngan instruksyon nga iginhahatag han Pulong han Dios. Mabubuhat ini pinaagi ha pagkarawat hin edukasyon nga igintatagana han Dios pinaagi han iya Pulong.

Naaghat nga Magbag-o

“An pulong han Dios buhi, ngan maabtik.” (Hebreo 4:12) Gamhanan nga nakakaimpluwensya pa gihapon ito ha mga indibiduwal, tungod hito napapamatud-an nga diri ito nadadaan. Mahimo ito makahatag ha tawo han determinasyon ha pagbag-o han iya pagkinabuhi, pagkarawat han totoo nga Kristianidad, ngan pagin mas maopay nga tawo. An masunod nga mga ehemplo nag-iilustrar han bili han edukasyon may kalabotan ha Biblia.

Hi Emilia, nga gin-unabi ha nauna nga artikulo, nagsiring: “An akon personal nga pangalimbasog la diri igo basi mapauswag an kahimtang ha amon panimalay. Han magtikang ako pag-aram han Biblia upod han mga Saksi ni Jehova, nasantop ko nga may-ada paglaom ngan nagtikang ako pagbag-o han akon disposisyon. Nahibaro ako nga magin mas pasensyoso ngan magkontrol han akon kasina. Inabot an panahon, nag-aram liwat an akon bana upod ha akon. Diri masayon para ha iya nga umundang ha pag-ininom, kondi nahimo niya ito. Tungod hini nagin maopay an kahimtang han amon pag-asawa. Yana, malipayon kami nga mga Kristiano ngan amon iginpapasilsil ha amon mga anak an maopay nga mga prinsipyo han Biblia.”—Deuteronomio 6:7.

An edukasyon nga igintatagana han totoo nga Kristianidad mahimo makahatag hin kagawasan ha usa ka tawo tikang ha mga bisyo ngan ha imoral nga estilo han pagkinabuhi. Naeksperyensyahan ni Manuel a nga totoo ini. Ha edad nga 13, linayas hiya ha ira balay ngan nagtikang gumamit hin marijuana. Inabot an panahon, naggamit hiya hin heroin. Nakighilawas hiya ha kalalakin-an ngan kababayin-an sugad nga kabalyo para hin urukyan ngan kwarta. Usahay, ginsuportahan liwat ni Manuel an iya kalugaringon pinaagi ha pagpanikas. Haros pirme hiya impluwensyado han droga hadto. Tungod  han iya madarahog nga panggawi, pirme hiya napipriso. Makausa, napriso hiya hin upat ka tuig, ngan didto nahidabi hiya ha ilegal nga pamaligya hin mga armas. Han makaasawa hi Manuel, padayon nga gin-ani niya an mga resulta han iya mga buhat. Hiya nagsiring: “Ha kataposan, inukoy na la kami ha balayan hin manok. Nahinunumdoman ko pa an akon asawa nga nagluluto ha baldosa nga sug-angan. Waray gud kasigurohan an amon kahimtang, salit gindasig han akon kalugaringon nga pamilya an akon asawa nga bumaya ha akon.”

Ano an nakagbag-o han iya kinabuhi? Hi Manuel binaton: “Usa nga kakilala an binisita ha amon balay ngan nag-istorya mahitungod han Biblia. Ginkarawat ko an iya mga pagbisita basi la ipakita ha iya nga diri naeksister an Dios nga interesado ha mga tawo. Ginhunahuna ko an akon kalugaringon sugad nga buhi nga ebidensya hito. Nahipausa ako nga pasensyoso ngan matinalahuron an Saksi, salit inuyon ako ha pagtambong ha mga katirok ha Kingdom Hall. Bisan kon an iba didto nakilala ha akon, makisangkayon nga nakiistorya hira ha akon. Ginpaabat nira ako nga sugad hin usa ako ha ira. Naliaw gud ako hini. Naaghat ako tubtob ha punto nga nagdesisyon ako nga bayaan an droga basi magkaada regular ngan desente nga trabaho. Upat ka bulan tikang han akon pagtikang ha pag-aram han Biblia, nagin kwalipikado ako ha pag-upod ha pagsangyaw nga buruhaton, ngan upat ka bulan katapos hito, nabawtismohan ako sugad nga usa han mga Saksi ni Jehova.”

Ano an kahulogan han totoo nga Kristianidad para kan Manuel ngan ha iya pamilya? “Kon waray an edukasyon tikang ha Biblia, sigurado nga maiha na ako nga patay. Nahibalik ha akon an akon pamilya tungod han paagi han pagkinabuhi nga igintutdo ni Jesus. Diri kinahanglan maeksperyensyahan han akon duha nga anak an akon naeksperyensyahan sugad nga batan-on. Malipayon ngan mapasalamaton gud ako kan Jehova tungod han akon maopay nga relasyon yana ha akon asawa. An pipira han akon mga kakilala hadto nalipay ha akon nahimo ngan nagsiring nga an akon pagkinabuhi yana amo an gimaopayi.”

Dugang pa ha pagin limpyo ha moral, an Kristiano nga paagi han pagkinabuhi nagkikinahanglan nga magin limpyo kita ha pisikal. Hinsabtan  ito ni John nga nag-uukoy ha pobre hinduro nga lugar ha Aprika del Sur. Hiya nagsaysay: “Usahay, an amon anak nga babaye diri nakarigo ha sulod hin usa ka semana, ngan waray la ito ha amon.” An iya asawa nagsiring liwat nga mahugaw hinduro an ira balay. Kondi pinaagi han Kristiano nga edukasyon, nag-uswag an kahimtang. Inundang hi John ha pakig-upod ha grupo han mga kawatan hin awto ngan nagtikang paghatag hin dugang nga atensyon ha iya pamilya. “Hinbaroan namon nga sugad nga mga Kristiano, sadang namon tipigan nga limpyo an amon lawas ngan mga bado. Karuyag ko an mga pulong ha 1 Pedro 1:16, nga nagsasagdon ha aton nga magin baraan tungod kay hi Jehova nga Dios baraan. Yana nangangalimbasog liwat kami nga hapsayon an amon simple la nga balay.”

Mabibilngan Mo an Gimaopayi nga Edukasyon

Diri talagsahon an mga eksperyensya nga gin-unabi na. Sugad nga resulta han edukasyon nga basado ha Biblia, yinukot nga mga tawo an nahibaro ha pagkinabuhi ha mas maopay nga paagi. Pinaagi ha pagin tangkod ngan maduruto, gin-aapresyar hira han ira mga agaron. Nagin maopay hira nga mga amyaw ngan mga sangkay, ngan interesado hira ha kaopayan han ira igkasi-tawo. Determinado hira nga likyan an mga bisyo ngan unudnon nga mga hilig, salit gin-aataman nira hin mas maopay an ira kahimsog ha pisikal, mental, ngan emosyonal. Imbes nga karagan an ira kwarta ha mga bisyo, ira ginagamit ito para ha ira kalugaringon nga kaopayan ngan ha kanan ira pamilya. (1 Korinto 6:9-11; Kolosas 3:18-23) Waray ruhaduha, an mga resulta han pag-aplikar han igintagana ni Jehova ha Biblia nagpapakita nga an pagkinabuhi uyon ha totoo nga Kristianidad amo an gimaopayi nga paagi han pagkinabuhi, nagtatagana ito han gimaopayi nga edukasyon. May kalabotan ha tawo nga nagkikinabuhi uyon ha mga balaud han Dios, an Biblia nasiring: “An ngatanan nga iya paghihimoon [mauswag].”—Salmo 1:3.

Makapadasig an paghibaro nga an Makagarahum-ha-ngatanan nga Dios, hi Jehova, andam ha pag-edukar ha aton. Hiya nasiring mahitungod han iya kalugaringon: “Ako hi Jehova nga imo Dios, nga nagtututdo ha imo ha pagpahimulos, nga nagmamando ha imo han dalan nga imo paglalaktan.” (Isaias 48:17) Oo, ipinapakita ni Jehova an dalan pinaagi han susbaranan ngan mga katutdoan han iya Anak, hi Jesu-Kristo. An iya mga katutdoan nagpauswag han kinabuhi han damu nga nakilala ha iya han nakanhi hiya ha tuna, ngan han damu pa nga iba nga nagkikinabuhi uyon ha iya mga katutdoan yana. Kay ano nga diri maghatag hin panahon basi mahibaro hin dugang pa mahitungod hini nga mga katutdoan? An mga Saksi ni Jehova ha iyo lugar malilipay ha pagbulig ha imo nga makarawat an sugad nga birilhon nga edukasyon.

[Footnote]

[Kahon/Retrato ha pahina 6]

An Impluwensya ni Jesus Ngan han Iya mga Katutdoan

Gin-gamit ni Sakeo an iya katungdanan sugad nga nangunguna nga parapanukot hin buhis basi magriko, pinaagi ha panikas ngan pangawat hin kwarta ha ordinaryo nga mga tawo. Kondi ginbag-o niya an paagi han iya pagkinabuhi pinaagi ha pag-aplikar han mga katutdoan ni Jesus.—Lukas 19:1-10.

Inundang hi Saulo han Tarso ha pagtimaraot ha mga Kristiano ngan nakombirte ha Kristianidad, ngan hiya nagin hi apostol Pablo.—Buhat 22:6-21; Filipos 3:4-9.

An pipira han mga Kristiano ha Korinto mga ‘makihihilawason, masingbahon ha mga dios-dios, mga manlilibog, mga babayin-on, mga kawatan, mga aw-anon, mga parahubog, mga mapakarauton, ngan mga maagawon’ hadto. Kondi, han hinbaroan nira an totoo nga Kristianidad, hira ‘ginlinisan, ginpakabaraan, ginpakamatadong ha ngaran han ira Ginoo Jesu-Kristo.’—1 Korinto 6:9-11.

[Retrato ha pahina 7]

Maipapakita han Biblia ha imo kon paonan-o maglalampos