An Lukat Naghihimaya han Pagkamatadong han Dios

KATAPOS han pagrebelde nira Adan ngan Eva, iginpahayag ni Jehova an iya katuyoan ha pagbangon hin usa nga Binhi nga sasamaran ha tikod. (Genesis 3:15) Natuman ini han ginpatay han mga kaaway han Dios hi Jesu-Kristo ha pasakitan nga kahoy. (Galasia 3:13, 16) Waray sala hi Jesus, tungod kay milagroso nga iginpanamkon hiya ha tagoangkan han usa nga birhen pinaagi han gahum han baraan nga espiritu. Salit, an iya iginbubo nga dugo mahimo magamit sugad nga an bayad nga lukat ha paghatag hin kagawasan ha mga tawo, nga nakapanunod han sala ngan kamatayon tikang kan Adan.—Roma 5:12, 19.

Waray makakapugong ha makagarahum-ha-ngatanan nga Dios, hi Jehova, ha pagtuman han iya mga katuyoan. Salit, katapos mahulog an tawo ha sala, ha panlantaw ni Jehova, sugad hin nabayaran na an lukat ngan mahimo hiya makig-upod hadton nagbubuhat hin pagtoo ha katumanan han iya mga saad. Tungod hini nagin posible para ha makasasala nga mga katulinan ni Adan, sugad kanda Enok, Noe, ngan Abraham, nga makalakat upod han Dios ngan magin sangkay pa ngani Niya nga diri nadadaot an Iya pagkabaraan.—Genesis 5:24; 6:9; Jakobo 2:23.

An pipira nga mga indibiduwal nga may pagtoo kan Jehova nakahimo hin seryoso nga mga sala. Usa nga ehemplo hi Hadi David. ‘Kay ano,’ bangin ka magpakiana, ‘nga nagpadayon hi Jehova ha pagbendisyon kan Hadi David katapos hiya makabuhat hin pag-adulteryo kan Bat-seba ngan katapos niya pahinaboon an kamatayon han bana ni Bat-seba nga hi Uria?’ An usa nga importante nga hinungdan amo an totoo nga pagbasol ngan pagtoo ni David. (2 Samuel 11:1-17; 12:1-14) Basado ha tidaraon nga halad ni Jesu-Kristo, mahimo mapasaylo han Dios an mga sala han mabinasulon nga hi David ngan matipigan gihapon an Iya hustisya ngan pagkamatadong. (Salmo 32:1, 2) Sugad nga ebidensya hini, iginsasaysay han Biblia kon ano an pinakamaopay nga nahimo han lukat ni Jesus, nga amo an “pagpakita han [kanan Dios] katadongan ha pagpasaylo han mga sala nga nanhiuna,” ngan “hini nga panahon.”—Roma 3:25, 26.

Oo, nakakarawat han katawohan an dagku nga mga kapulsanan tungod han bili han dugo ni Jesus. Tungod han lukat, an mabinasulon nga mga makasasala nga tawo mahimo magpahimulos hin duok nga relasyon ha Dios. Dugang pa, an lukat nag-aabri han dalan para ha pagkabanhaw han mga patay ha bag-o nga kalibotan han Dios.  Mahiuupod hito an matinumanon nga mga surugoon han Dios nga namatay antes ibayad ni Jesus an lukat ngan bisan an damu nga namatay nga waray sarabotan ngan waray magsingba ha Iya. An Biblia nasiring: “May pagkabanhaw han mga minatay han mga magtadong ngan diri man magtadong.” (Buhat 24:15) Hito nga panahon, basado ha lukat tatagan ni Jehova an ngatanan nga masinugtanon nga katawohan hin waray kataposan nga kinabuhi. (Juan 3:36) Hi Jesus mismo nagsaysay: “An Dios naghigugma gud han kalibotan, nga iya iginhatag an iya bugtong nga Anak, basi nga an ngatanan nga natoo ha iya, diri mawara, kondi mamay kinabuhi nga waray kataposan.” (Juan 3:16) Ini ngatanan nga mga kapulsanan makakarawat han katawohan tungod han tagana han Dios nga halad lukat.

Kondi, an makatirigamnan nga bahin mahitungod han lukat diri amo an mga kapulsanan nga aton nakakarawat tikang hito. An mas importante amo an nahihimo han lukat ni Kristo para ha ngaran ni Jehova. Ginpapamatud-an hito nga hi Jehova usa nga Dios nga may hingpit nga hustisya nga mahimo makig-upod ha makasasala nga mga tawo ngan makapabilin la gihapon nga putli ngan baraan. Kon waray magin katuyoan han Dios an pagtagana han lukat, waray unta tulin ni Adan—bisan hira Enok, Noe, ngan Abraham—an makakalakat upod kan Jehova o mahimo magin sangkay niya. Nasantop ini han salmista ngan hiya nagsurat: “Kon imo panginanoon, O Jehova, an mga karat-an, O Ginoo, hin-o pa an matindog?” (Salmo 130:3) Sadang kita magin mapasalamaton gud kan Jehova tungod han iya pagpadara han iya hinigugma nga Anak nganhi ha tuna ngan kan Jesus tungod han iya pagin disidido ha paghatag han iya kinabuhi sugad nga lukat para ha aton!—Markos 10:45.