‘Usa han Gimaopayi nga mga Adlaw han Akon Kinabuhi’

“AN DEPRESYON amo an pinakaagsob ireport, ngan posible nga amo an pinakaimportante nga problema ha kahimsog ha hunahuna han mga batan-on,” siring han Beyondblue, usa nga ahensya nga ginpundohan han gobyerno ha Australia. An mga surbey nagsusumat nga mga 100,000 nga batan-on nga Australiano an nag-aantos hin depresyon kada tuig.

Apektado liwat han depresyon an Kristiano nga mga batan-on. Kondi, tungod han pagtoo kan Jehova, damu an nabuligan nga maatohan an nakakaguol nga mga pagbati ngan mahimo nga malampuson an ira pagkabatan-on. Ha pagbuhat hito, nagigin maopay an impresyon ha ira han iba. Paonan-o?

Tagda an eksperyensya han 18-anyos nga hi Claire. Hiya ngan an iya nanay kaapi han usa nga kongregasyon han mga Saksi ni Jehova ha Melbourne. Han ginbayaan han tatay ni Claire an pamilya, nagkaada hiya depresyon. Kondi, an iya pagtoo ha iya langitnon nga Amay, hi Jehova, nagpabilin nga marig-on. Usa ka adlaw, an doktor han pamilya, hi Lydia, binisita ha balay nira Claire basi usisahon an nanay ni Claire, nga masakit. Katapos, ha buotan nga paagi nagboluntaryo hiya nga imaneho hi Claire ngadto ha shopping center. Samtang nagbibiyahe hira, iya ginpakianhan hi Claire kon may-ada hiya uyab. Nagsaysay hi Claire nga sugad nga usa han mga Saksi ni Jehova, diri hiya nakikig-date ha kalalakin-an para la hin karisyohan. Nahipausa hini an doktora. Katapos iginsaysay ni Claire kon paonan-o nakabulig ha iya an Biblia ha paghimo hin maaramon nga mga desisyon ha kinabuhi. Ha kataposan, nagboluntaryo hiya nga dad-an an doktora hin usa nga publikasyon nga basado ha Biblia nga nakabulig gud ha iya. An libro may ulohan nga Questions Young People Ask—Answers That Work.

Paglabay hin tulo ka adlaw tikang nga makarawat niya an libro, gintawagan ni Lydia an nanay ni Claire basi sumatan hiya nga nalipay gud hiya ha pagbasa hito. Katapos naghangyo hiya hin unom pa nga mga libro para ha iya mga katrabaho. Han idul-ong ni Claire an mga libro, an doktora nagsumat nga naruyagan gud niya an relihiyon ni Claire. Nagtanyag hi Claire ha pag-aram han Biblia ha doktora, ngan ginkarawat ito niya.

Ha sulod hin pipira ka bulan, gindumara ni Claire an pag-aram durante han bakante nga oras han doktora ha udto. Katapos, ginpakianhan ni Lydia hi Claire kon mahimo ba hiya magpahayag ha usa nga seminar mahitungod han depresyon ha mga batan-on. Bisan kon nag-aalang, sinugot hi Claire. Sobra 60 nga tawo an tinambong ha seminar. Upat nga doktor ha hunahuna—ngatanan mga adulto—an nagpahayag ha mga mamarati. Katapos, turno na ni Claire nga magyakan. Iya ginpabug-atan kon mationan-o kaimportante para ha mga batan-on nga magkaada relasyon ha Dios. Iginsaysay niya nga nagtatagad gud hi Jehova nga Dios ha mga batan-on ngan nabulig ha ngatanan nga nadaraon ha iya para hin bulig ngan pagliaw. Dugang pa, iya iginpahayag an iya marig-on nga pagtoo nga ha diri maiha pagwawad-on ni Jehova an ngatanan nga klase hin sakit ha pisikal ngan ha hunahuna. (Isaias 33:24) Ano an resulta hinin maopay nga pagtestigo?

“Katapos han sesyon, damu an dinaop ha akon ha pagsumat ha akon nga nalipay gud hira ha pakabati hin batan-on nga nagyayakan mahitungod ha Dios,” nagsiring hi Claire. “Nakapahamutang ako hin 23 nga kopya han Young People Ask nga libro. Tulo nga kababayin-an nga mamarati an naghatag ha akon han numero han ira telepono. Usa hini nga kababayin-an an nag-aaram na yana han Biblia. Usa adto han gimaopayi nga mga adlaw han akon kinabuhi.”