Hin-o an Imo Ginsusugot—An Dios o an mga Tawo?

“Kinahanglan sugton namon an Dios sugad nga magmarando imbes nga an mga tawo.”—BUHAT 5:29, NW.

 1. (a) Ano an tema nga teksto para hini nga pag-aram? (b) Kay ano nga ginpriso an mga apostol?

 AN MGA hukom han hitaas nga hukmanan han mga Judio nasisina hinduro. Nawawara an mga priso. Mga apostol hira ni Jesu-Kristo, an tawo nga ginsentensyahan han hitaas nga hukmanan hin kamatayon mga pipira ka semana na an naglabay. Yana an hukmanan andam na ha pag-atubang ha iya pinakaduok nga mga sumurunod. Kondi han an mga gwardya nagpakadto ha prisohan basi dad-on hira ngadto ha hukmanan, hinkit-an nira nga waray sulod an ira mga selda, bisan kon ginkandadohan an mga purtahan. Hinbaroan dayon han mga gwardya nga an mga apostol nakadto na ha templo ha Jerusalem, waray-kahadlok nga nagtututdo ha mga tawo mahitungod kan Jesu-Kristo—an buruhaton mismo nga tungod hito gin-aresto hira! An mga gwardya nagpakadto dayon ha templo, iginbalik an mga apostol ha prisohan, ngan gindara hira ngadto ha hukmanan.—Buhat 5:17-27.

 2. Ano an iginsugo han anghel ha mga apostol nga buhaton?

² Ginpagawas han anghel an mga apostol tikang ha prisohan. Pagtalwas ba ini ha ira tikang ha dugang nga persikusyon? Diri. Ginpagawas hira basi an mga umurukoy ha Jerusalem makabati han maopay nga sumat mahitungod kan Jesu-Kristo. An anghel nagsugo ha mga apostol nga magpadayon hira ha “pagyakan ha katawohan han ngatanan nga mga pulong hini nga kinabuhi.” (Buhat 5:19, 20) Salit han pag-abot han mga gwardya ha  templo, ira nakita nga an mga apostol masinugtanon nga nagbubuhat hito nga sugo.

3, 4. (a) Han gindid-an ha pagsangyaw, paonan-o binaton hira Pedro ngan Juan? (b) Paonan-o binaton an iba nga mga apostol?

³ Duha hiton determinado nga mga parasangyaw, hira apostol Pedro ngan Juan, an nahingadto na hadto ha hukmanan, han istrikto hinduro nga ginpahinumdom hira ni Jose Kaipas, an punoan nga hukom. Hiya nagsiring: “Amon kamo ginpinahan gud, nga diri manutdo hini nga ngaran [ni Jesus]. Ngan kitaa, iyo ginpuno an Jerusalem han iyo ipinanutdo.” (Buhat 5:28) Diri na unta sadang mahipausa hi Kaipas han hinkit-an niya utro hira Pedro ngan Juan ha hukmanan. Han gindid-an ha pagsangyaw ha siyahan nga higayon, an duha nga apostol binaton: “Paghukman niyo, kon matadong ba ha atubangan han Dios, an mamati anay ha iyo san-o [“imbes nga,” NW] ha Dios. Kay diri kami makakahimo, kon diri an pagyakan han mga bagay nga amon hinkit-an ngan hinbatian.” Pariho han kadaan nga propeta nga hi Jeremias, hira Pedro ngan Juan diri makakaundang ha pagtuman han sugo ha ira nga magsangyaw.—Buhat 4:18-20; Jeremias 20:9.

⁴ Yana, diri la hira Pedro ngan Juan kondi an ngatanan nga apostol—upod na an bag-o la nga pinili nga hi Matias—nagkaada higayon nga ipahayag ha publiko an ira desisyon may kalabotan ha sugo han hukmanan. (Buhat 1:21-26) Han gindid-an ha pagsangyaw, hira liwat maisugon nga binaton: “Kinahanglan sugton namon an Dios sugad nga magmarando imbes nga an mga tawo.”—Buhat 5:29, NW.

An Dios Sugad nga Magmarando Kontra ha Tawo Sugad nga Magmarando

5, 6. Kay ano nga waray sumugot an mga apostol ha sugo han hukmanan?

⁵ An mga apostol masinugtanon-ha-balaud nga mga tawo nga malalaoman la nga diri magtatalapas ha sugo han hukmanan. Kondi, mationan-o man kagamhanan an usa nga tawo, waray hiya awtoridad ha pagsugo ha iba nga diri sugton an usa han mga sugo han Dios. Hi Jehova amo “an Gihitaasi ha bawbaw han tuna.” (Salmo 83:18) Diri la kay hiya ‘an Hukom han bug-os nga tuna’ kondi hiya liwat an Supremo nga Humaratag-hin-balaud, ngan an Hadi ha kadayonan. Bisan ano nga sugo han hukmanan nga nangangalimbasog ha pagtalapas ha usa han mga sugo han Dios, sayop sumala ha panhunahuna han Dios.—Genesis 18:25; Isaias 33:22.

⁶ Ini nga kamatuoran kinilala han pipira han gimaopayi nga mga eksperto ha balaud. Pananglitan, an bantogan nga hukom nga taga-Inglatera han ika-18 ka siglo nga hi William Blackstone nagsurat nga waray balaud han tawo nga sadang tugotan nga kumontra ha “balaud han pahayag” nga makikita ha Biblia. Salit, gintalapas han Sanhedrin an totoo nga awtoridad han gindid-an hito an mga apostol ha pagsangyaw. An mga apostol diri gud makakahimo pagsugot hito nga sugo.

 7. Kay ano nga an pagsangyaw nga buruhaton nakapasina ha punoan nga mga saserdote?

⁷ An determinasyon han mga apostol nga magpadayon ha pagsangyaw nakapasina ha punoan nga mga saserdote. Mga Saduseo an iba nga mga saserdote, upod na hi Kaipas mismo, nga diri natoo ha pagkabanhaw. (Buhat 4:1, 2; 5:17) Kondi an mga apostol nagpadayon ha panumat nga hi Jesus ginbanhaw tikang ha mga patay. Dugang pa, an iba han punoan nga mga saserdote nangalimbasog gud nga uyonan hira han Romano nga mga awtoridad. Ha pagbista kan Jesus, han gintagan hin higayon nga karawaton hi Jesus sugad nga ira hadi, an punoan nga mga saserdote nagdumiri gud ngan nagsinggit: “Waray namon hadi, kondi hi Cesar.” (Juan 19:15) a Diri la kay ginpamatud-an han mga apostol nga hi Jesus ginbanhaw kondi igintutdo liwat nira nga gawas han ngaran ni Jesus, “waray iba nga ngaran ha ilarom han langit, nga ihinatag ha mga tawo, nga sadang ta kaluwasan.” (Buhat 2:36; 4:12) Han an katawohan nagtikang maglaom ha binanhaw nga hi Jesus sugad nga ira Lider, an mga saserdote nahadlok, kay bangin umabot an mga Romano ngan mawad-an an Judio nga mga lider ‘han ira lugar ngan han ira nasud.’—Juan 11:48.

 8. Ano nga maaramon nga sagdon an iginhatag ni Gamaliel ha Sanhedrin?

⁸ Makuri an tidaraon para ha mga apostol ni Jesu-Kristo. An mga hukom han Sanhedrin determinado  nga patayon hira. (Buhat 5:33) Kondi, nahitabo an diri-ginlalaoman nga pagbag-o. Hi Gamaliel, nga eksperto ha Balaud, tinindog ngan nagpahamangno ha iya mga kaupod nga diri magdagmit ha paggios. Maaramon nga nagsiring hiya: “Kon ini nga sagdon, o ini nga buhat, tikang ha mga tawo, maguguba; kondi kon ini tikang ha Dios, diri kamo makakahimo pagguba hini.” Katapos, hi Gamaliel nagdugang hin usa pa nga importante nga punto: “Bangin la kamo nakikig-away kontra ha Dios.”—Buhat 5:34, 38, 39.

 9. Ano an nagpapamatuod nga an buruhaton han mga apostol tinuod nga tikang ha Dios?

⁹ Diri linalaoman, kinarawat han hukmanan an sagdon ni Gamaliel. “Pinanawag [han Sanhedrin] ngada ha ira an mga apostol, ngan ha katapos nira panhampaka, ira ginpinahan hira, nga diri magyakan ha ngaran ni Jesus, ngan pinapanlakat hira.” Kondi, waray gud mahadlok, determinado an mga apostol nga sugton an sugo han anghel nga magsangyaw. Salit, katapos nira makagawas, “adlaw-adlaw waray hira ukoy ha panutdo, ngan pagwali, nga hi Jesus amo an Kristo, didto ha templo ngan ha ira balay.” (Buhat 5:40, 42) Ginbendisyonan ni Jehova an ira mga pangalimbasog. Ha ano nga sukol? “An pulong han Dios tinubo; ngan an kadamu han mga tinon-an nagdugang gud ha Jerusalem.” Ha pagkamatuod, ‘daku nga kadam-an han mga saserdote an sinugot ha pagtoo.’ (Buhat 6:7) Sigurado nga nakadaot gud ito ha punoan nga mga saserdote! Nagtikadamu an ebidensya: An buruhaton han mga apostol tinuod nga tikang ha Dios!

An mga Kaaway han Dios Diri Maglalampos

10. Tikang ha tawhanon nga panhunahuna, kay ano nga bangin inabat hin seguridad hi Kaipas ha iya katungdanan, kondi kay ano nga sayop an iya pagsarig?

¹⁰ Han siyahan nga siglo, an Judio nga hitaas nga mga saserdote ginpili han Romano nga mga awtoridad. Hi Valerio Gratus an nagbutang han riko nga hi Jose Kaipas ha iya katungdanan, ngan mas maiha nga nagpabilin hiya hito nga katungdanan kay ha damu nga mga saserdote nga nahiuna ha iya. Sigurado nga ginhunahuna ni Kaipas nga nakarawat niya ito nga katungdanan tungod han iya kaabtik sugad nga diplomatiko ngan han iya pagin personal nga sangkay ni Pilato imbes han paghilabot han Dios. Ha anoman nga kahimtang, an iya pagsarig ha mga tawo napamatud-an nga sayop. Tulo la ka tuig katapos umatubang an mga apostol ha Sanhedrin, nawara an pag-uyon han Romano nga  mga awtoridad kan Kaipas ngan gintangtang hiya ha iya katungdanan sugad nga hitaas nga saserdote.

11. Ano nga kataposan an inabot kan Ponsio Pilato ngan ha Judio nga sistema han mga butang, ngan ano nga konklusyon an masisiring mo tikang hini?

¹¹ An sugo nga paiwason hi Kaipas ha iya katungdanan nagtikang ha mas labaw kan Pilato, hi Lucio Vitellius, an gobernador ha Sirya, ngan an duok nga sangkay ni Kaipas nga hi Pilato waray makapugong hito. Ha pagkamatuod, usa la ka tuig katapos han katangtang ni Kaipas ha katungdanan, hi Pilato mismo gintangtang ha katungdanan ngan ginpabalik ngadto ha Roma basi batunon an seryoso nga mga akusasyon. Mahitungod han Judio nga mga lider nga sinarig kan Cesar, ginkuha han mga Romano ‘an ira lugar ngan an ira nasud.’ Nahitabo ini han tuig 70 K.P. han bug-os nga ginbungkag han Romano nga kasundalohan an syudad han Jerusalem, upod na an templo ngan an katirokan han Sanhedrin. Natuman gud an mga pulong han salmista hini nga kahimtang: “Ayaw niyo ibutang an iyo pagsarig ha mga prinsipe, bisan ngani dida ha anak han tawo, ha kan kanay waray pagbulig”!—Juan 11:48; Salmo 146:3.

12. Paonan-o pinamamatud-an han kahimtang ni Jesus nga makinaadmananon nga buhat an pagkamasinugtanon ha Dios?

¹² Ha kabaliktaran, ginpili han Dios an binanhaw nga hi Jesu-Kristo sugad nga Hitaas nga Saserdote ha daku nga espirituwal nga templo. Waray tawo nga makaka-kansela hito nga pagpili. Tinuod, “an iya [Jesus] pagkasaserdote waray pagkabalhin.” (Hebreo 2:9; 7:17, 24; 9:11) Ginpili liwat han Dios hi Jesus sugad nga Hukom ha mga buhi ngan ha mga patay. (1 Pedro 4:5) Hito nga katungdanan, hi Jesus may-ada katungod kon hi Jose Kaipas ba ngan hi Ponsio Pilato may-ada paglaom ha tidaraon nga kinabuhi.—Mateo 23:33; Buhat 24:15.

Waray-kahadlok nga mga Parasangyaw han Ginhadian Yana

13. Ha moderno nga mga panahon, ano nga buruhaton an nagtikang ha mga tawo, ngan ano nga buruhaton an nagtikang ha Dios? Paonan-o ka nahibaro?

¹³ Ha aton panahon, sugad han ha siyahan nga siglo, damu an mga “nakikig-away kontra ha Dios.” (Buhat 5:39) Pananglitan, han an mga Saksi ni Jehova ha Alemanya nagdumiri ha pagsaludo kan Adolf Hitler sugad nga ira Lider, hi Hitler nagsumpa nga iya pupoohon hira. (Mateo 23:10) An iya organisasyon nga malampuson ha pamatay may-ada gud kapasidad para hito nga buruhaton. An mga Nazi naglampos gud ha pag-aresto ha yinukot nga mga Saksi ngan pagdara ha ira ngadto ha mga kampo nga prisohan. Naglampos pa ngani hira ha pagpatay ha pipira nga mga Saksi. Kondi an mga Nazi waray makabungkag han determinasyon han mga Saksi nga an Dios la an ira sisingbahon, ngan napakyas hira ha pagpoo han mga surugoon han Dios sugad nga grupo. An buruhaton hini nga mga Kristiano nagtikang ha Dios, diri ha tawo, ngan an buruhaton han Dios diri mabubungkag. Paglabay hin 60 ka tuig, an matinumanon nga mga nakatalwas ha mga kampo nga prisohan ni Hitler nag-aalagad pa gihapon kan Jehova ‘ha ira bug-os nga kasingkasing ngan kalag, ngan hunahuna,’ samtang hi Hitler ngan an iya Nazi nga organisasyon mga patay na ngan nahinunumdoman la tungod han maraot hinduro nga bantog.—Mateo 22:37.

14. (a) Ano nga mga pangalimbasog an ginhimo han mga parakontra ha pagpakaraot ha mga surugoon han Dios, ngan ano an mga resulta? (b) Ito ba nga mga pangalimbasog magriresulta hin nagpapadayon nga kadaot ha katawohan han Dios? (Hebreo 13:5, 6)

¹⁴ Ha mga tuig tikang han mga pangalimbasog han mga Nazi, an iba inupod ha pakig-away kontra kan Jehova ngan ha iya katawohan. Ha damu nga nasud ha Europa, an malimbong nga relihiyoso ngan politikal nga mga organisasyon nangalimbasog nga tawagon an mga Saksi ni Jehova nga usa nga ‘peligroso nga sekta,’ pariho nga akusasyon  kontra ha siyahan-siglo nga mga Kristiano. (Buhat 28:22) Ha pagkamatuod, kinikilala han Hukmanan han mga Katungod han Tawo ha Europa an mga Saksi ni Jehova sugad nga relihiyon, diri usa nga sekta. Sigurado nga ini nga mga parakontra maaram gud hito. Bisan pa hito, padayon nga ginpapakaraot nira an mga Saksi. Sugad nga direkta nga resulta hini nga sayop nga pagkilala, an iba hini nga mga Kristiano ginpaiwas ha ira trabaho. An kabataan nga mga Saksi gintarhog ha mga eskwelahan. Ginkansela han nahadlok nga mga tag-iya an mga kontrata para ha paggamit ha ira mga tinukod nga maiha na nga ginagamit han mga Saksi sugad nga mga katirokan. Ha pipira nga mga kaso, ginnigaran pa ngani han mga ahensya han gobyerno an mga indibiduwal han ira pagin tuminungnong tungod la kay mga Saksi ni Jehova hira! Kondi, an mga Saksi diri-napupugngan.

15, 16. Paonan-o ginios an mga Saksi ni Jehova ha Fransia ha pagkontra ha ira Kristiano nga buruhaton, ngan kay ano nga nagpapadayon hira ha pagsangyaw?

¹⁵ Ha Fransia, pananglitan, an mga tawo kasagaran nga makatadunganon ngan waray-dinadapigan. Kondi, may-ada pipira nga mga parakontra nga nasuporta ha mga balaud nga gintuyo ha pag-ulang han buruhaton han Ginhadian. Paonan-o ginios an mga Saksi ni Jehova didto? Mas madasigon pa gud hira ha pagsangyaw nga buruhaton yana kay ha naglabay ngan may-ada makalilipay nga mga resulta. (Jakobo 4:7) Aw, ha sulod hin unom la ka bulan, an kadamu han mga pag-aram ha Biblia ha balay nag-uswag hin urusahon nga 33 porsyento hito nga nasud! Sigurado nga nakapasina hinduro ito ha Yawa nga makita an mga tangkod-an-kasingkasing ha Fransia nga nakarawat han maopay nga sumat. (Pahayag 12:17) An aton mga igkasi-Kristiano ha Fransia nasarig nga an mga pulong ni propeta Isaias matutuman ha ira: “Waray hinganiban nga ginhitsura patok ha imo nga mauswag; ngan an tagsa-tagsa nga dila nga mabangon patok ha imo ha paghukom imo pagsasayupon.”—Isaias 54:17.

¹⁶ An mga Saksi ni Jehova diri nalilipay kon ginpipersigir. Kondi, sugad nga pagsugot ha sugo han Dios ha ngatanan nga mga Kristiano, diri hira makakahimo pag-undang ngan diri gud hira maundang ha pagyakan mahitungod han mga butang nga ira hinbatian. Nangangalimbasog hira nga magin mag-opay nga mga tuminungnong. Kondi, kon nagkakasumpaki an balaud han Dios ngan an balaud han tawo, kinahanglan sugton nira an Dios sugad nga magmarando.

Diri Kamo Mahadlok ha Ira

17. (a) Kay ano nga diri sadang kahadlokan an aton mga kaaway? (b) Ano an sadang magin pagtagad naton ha mga persigidor?

¹⁷ Peligroso hinduro an kahimtang han aton mga kaaway. Nakikig-away hira kontra ha Dios. Salit, uyon ha sugo ni Jesus, imbes nga mahadlok ha ira, nag-aampo kita para hadton nagpipersigir ha aton. (Mateo 5:44) Nag-aampo kita nga kon an bisan hin-o nakontra ha Dios tungod ha kawaray-sarabotan, sugad kan Saulo han Tarsis, may pagkabuotan nga aabrihan ni Jehova an ira mga mata nga makita an kamatuoran. (2 Korinto 4:4) Hi Saulo nagin an Kristiano nga hi apostol Pablo ngan nag-antos hinduro ha mga kamot han mga awtoridad ha iya panahon. Ha gihapon, nagpadayon hiya ha pagpahinumdom ha mga igkasi-tumuroo nga “magpasakop hira ha mga punoan, ha mga magburuot, nga magmasinugtanon, ngan mag-andam hira ha ngatanan nga mag-opay nga buhat, nga diri magyakan hin maraot kontra ha bisan hin-o, nga diri makimasamok, magtalunoy, ha pagpakita han bug-os nga kaaghop ha ngatanan nga mga tawo.” (Tito 3:1, 2) An mga Saksi ni Jehova ha Fransia ngan ha bisan diin nangangalimbasog ha pagsunod hini nga sagdon.

18. (a) Ha ano nga mga paagi mahimo talwason ni Jehova an iya katawohan? (b) Ano an magigin ultimo nga resulta?

¹⁸ An Dios nagsiring kan propeta Jeremias: “Ako upod ha imo ha pagluwas ha imo.” (Jeremias 1:8)  Paonan-o kita luluwason ni Jehova tikang ha persikusyon yana? Bangin magpabangon hiya hin waray-dinadapigan nga hukom sugad kan Gamaliel. O bangin siguruhon niya nga an maraot o an nakontra nga opisyal diri-linalaoman nga saliwnan hin usa nga mas makatadunganon. Kondi, usahay, bangin tugotan ni Jehova nga magpadayon an persikusyon ha iya katawohan. (2 Timoteo 3:12) Kon tinutugotan han Dios nga persigiron kita, maghahatag hiya pirme ha aton hin kusog basi makailob ha persikusyon. (1 Korinto 10:13) Ngan anoman an itugot han Dios, sigurado kita ha ultimo nga resulta: Adton nakikig-away kontra ha katawohan han Dios nakikig-away kontra ha Dios, ngan an mga nakikig-away kontra ha Dios diri maglalampos.

19. Ano an tinuig nga teksto para ha 2006, ngan kay ano nga angayan ito?

¹⁹ Ginsumatan ni Jesus an iya mga disipulo nga magkakaada hira kagol-anan. (Juan 16:33) Tungod hini, an mga pulong ha Buhat 5:29 (NW) mas napapanahon gud yana: “Kinahanglan sugton namon an Dios sugad nga magmarando imbes nga an mga tawo.” Tungod hito nga hinungdan, ginpili inin makalilipay nga mga pulong sugad nga tinuig nga teksto han mga Saksi ni Jehova para ha 2006. Hinaot magin determinasyon naton durante han tiarabot nga tuig ngan ha kadayonan nga sugton naton an Dios sugad nga Magmarando anoman an mga resulta!

[Footnote]

Mababaton Mo Ba?

• Ano nga nakakadasig nga susbaranan an ipinakita han mga apostol para ha aton ha ira paagi han pag-atubang ha pagkontra?

• Kay ano nga sadang sugton naton pirme an Dios sugad nga magmarando imbes nga an mga tawo?

• An aton mga parakontra tinuod nga nakikig-away kontra kan kanay?

• Ano nga resulta an malalaoman naton para hadton nag-iilob han persikusyon?

[Mga Pakiana]

[Blurb ha pahina 23]

An tinuig nga teksto para ha 2006 amo an: “Kinahanglan sugton namon an Dios sugad nga magmarando imbes nga an mga tawo.”—Buhat 5:29, NW.

[Retrato ha pahina 19]

“Kinahanglan sugton namon an Dios sugad nga magmarando imbes nga an mga tawo”

[Retrato ha pahina 21]

Sinarig hi Kaipas ha mga tawo imbes nga ha Dios