‘Lakat Kamo Ngan Manhimo Kamo hin mga Tinon-an, Bawtismohan Hira’

“Busa, lakat kamo, ngan manhimo kamo hin mga tinon-an ha ngatanan nga mga nasud ngan pamaptisan hira . . . , pagtutdui hira han pagbantay han ngatanan nga mga bagay, nga akon iginsugo ha iyo.”—MATEO 28:19, 20.

 1. Ano nga desisyon an ginhimo han nasud han Israel ha ubos han Bukid Sinai?

 MGA 3,500 ka tuig na an naglabay, an ngatanan nga katawohan ha usa nga nasud nagsaad ha Dios. An mga Israelita nga nagkatirok ha ubos han Bukid Sinai, dayag nga nagpahayag: “An ngatanan nga iginyakan ni Jehova amon bubuhaton.” Tikang hito nga takna, an Israel nagin katawohan nga dedikado ha Dios, an iya “kalugaringon” nga panag-iya. (Eksodo 19:5, 8; 24:3) Naglaom hira nga ira makakarawat an iya panalipod ngan magkikinabuhi ha waray kataposan ha tuna nga “nag-aawas hin gatas ngan hin dugos.”—Lebitiko 20:24.

 2. Ano nga relasyon ha Dios an mapapahimulosan han mga tawo yana?

² Kondi, sugad han iginpahayag ni Asap, an mga Israelita ‘waray magtuman han tugon han Dios; ngan diniri ha paglakat ha iya balaud.’ (Salmo 78:10) Napakyas hira ha pagbuhat han iginsaad han ira mga kaapoy-apoyan ngadto kan Jehova. Ha kataposan, nawara han nasud iton espesyal nga relasyon ha Dios. (Eklesiastes 5:4; Mateo 23:37, 38) Salit, iginbalhin han Dios an iya atensyon ngada “ha mga Hentil, ha pagkuha tikang ha ira hin nasud tungod ha iya ngaran.” (Buhat 15:14) Ngan hinin kataposan nga mga adlaw, iya gintitirok “an kadam-an nga mga tawo, nga waray tawo nga sadang makaihap, tikang ha tagsa-tagsa nga nasud ngan ha ngatanan nga mga panon, ngan mga katawohan ngan mga yinaknan,” nga malipayon nga nasiring: “An kaluwasan iya han aton Dios nga nalingkod ha hadianon nga lingkuranan, ngan han Kordero.”—Pahayag 7:9, 10.

 3. Ano an kinahanglan buhaton han usa basi magkaada personal nga relasyon ha Dios?

³ Basi makaupod hadton nagpapahimulos hiton presyoso nga relasyon ha Dios, an usa kinahanglan magdedikar ngadto kan Jehova ngan dayag nga  simbolohan ito pinaagi han bawtismo ha tubig. Pagsugot ini ha direkta nga sugo ni Jesus ha iya mga disipulo: “Busa, lakat kamo, ngan manhimo kamo hin mga tinon-an ha ngatanan nga mga nasud ngan pamaptisan hira ha ngaran han Amay, han Anak, ngan han Espiritu Santo. Pagtutdui hira han pagbantay han ngatanan nga mga bagay, nga akon iginsugo ha iyo.” (Mateo 28:19, 20) An mga Israelita namati kan Moises samtang binabasa “an basahon han kauyonan.” (Eksodo 24:3, 7, 8) Tungod hini, ira hinsabtan an ira mga obligasyon kan Jehova. Sugad man yana, importante an husto nga kahibaro ha kaburut-on han Dios nga aada ha iya Pulong, an Biblia, antes an usa magpabawtismo.

 4. Ano an kinahanglan buhaton han usa basi magin kwalipikado ha bawtismo? (Iupod an kahon ha igbaw.)

⁴ Matin-aw, karuyag ni Jesus nga an iya mga disipulo magkaada marig-on nga pundasyon han ira pagtoo antes hira magpabawtismo. Iya ginsugo an iya mga sumurunod nga diri la lumakat ngan manhimo hin mga disipulo kondi tutdoan liwat hira ‘ha pagtuman han ngatanan nga mga butang nga iya iginsugo.’ (Mateo 7:24, 25; Efeso 3:17-19) Kon sugad, adton kwalipikado ha bawtismo kasagaran nga nag-aram na ha Biblia ha sulod hin mga bulan o usa o duha ka tuig pa ngani, basi makahimo hira hin husto nga desisyon nga ginhunahuna hin maopay. Ha bawtismo mismo, an mga babawtismohan nabaton hin oo ha duha nga importante nga pakiana. Tungod kay pinabug-atan ni Jesus nga ‘an aton Oo, sadang mangahulogan hin Oo, an aton Diri, Diri,’ mabulig ito ha aton ngatanan nga repasuhon hin maopay an kahulogan hinin duha nga pakiana ha bawtismo.—Mateo 5:37, NW.

Pagbasol Ngan Dedikasyon

 5. Ano nga duha nga importante nga pitad an pinabubug-atan han siyahan nga pakiana ha bawtismo?

⁵ An siyahan nga pakiana ha bawtismo nagpapakiana ha kandidato kon nagbasol na ba hiya ha iya daan nga pagkinabuhi ngan nagdedikar na han iya kinabuhi ngadto kan Jehova ha pagbuhat han iya kaburut-on. Pinabubug-atan hini nga pakiana an duha nga importante nga pitad nga kinahanglan buhaton antes han bawtismo, amo an pagbasol ngan dedikasyon.

6, 7. (a) Kay ano nga an pagbasol ginkikinahanglan ha ngatanan nga kandidato ha bawtismo? (b) Ano nga mga pagbag-o an kinahanglan himoon katapos magbasol an usa?

⁶ Kay ano nga an usa ka tawo kinahanglan magbasol antes hiya magpabawtismo? Hi apostol Pablo nagsaysay: “Han una nga panahon nag-ukoy man kita ngatanan upod ha ira ha kairiphon han aton mga unod.” (Efeso 2:3) Antes naton nakarawat an husto nga kahibaro mahitungod han kaburut-on han Dios, nagkinabuhi kita uyon ha kalibotan, sumala ha mga prinsipyo ngan mga suruklan hito. An aton pagkinabuhi kontrolado han dios hini nga sistema, hi Satanas. (2 Korinto 4:4) Kondi, katapos naton hibaroan an kaburut-on han Dios, nagdesisyon kita nga magkinabuhi ‘diri na uyon ha mga kairiphon han mga tawo, kondi uyon ha kaburut-on han Dios.’—1 Pedro 4:2.

⁷ Inin bag-o nga paagi han pagkinabuhi naghahatag hin damu nga balos. Labaw ha ngatanan, an usa magkakaada hin presyoso nga relasyon kan Jehova, nga iginpariho ni David ha imbitasyon nga pagsulod ha “tolda” ngan “baraan nga bukid” han Dios—usa ka daku hinduro nga pribilehiyo. (Salmo 15:1, NW) Makatadunganon la nga hi Jehova diri mag-iimbitar hin bisan hin-o la kondi adto la nga “naglalakat hin hingpit, ngan nagbubuhat  han katadongan, ngan nagyayakan hin kamatuoran ha [ira] kasingkasing.” (Salmo 15:2) Tungod han aton magkalainlain nga mga kahimtang antes naton nahibaroan an kamatuoran, an pagbuhat uyon hini nga mga kinahanglanon bangin mangahulogan nga kinahanglan maghimo kita hin mga pagbag-o—ha paggawi ngan ha personalidad. (1 Korinto 6:9-11; Kolosas 3:5-10) An motibo han sugad nga mga pagbag-o amo an pagbasol—kasubo hinduro ha aton daan nga pagkinabuhi ngan marig-on nga determinasyon nga lipayon hi Jehova. Nagriresulta ini ha bug-os nga pagbag-o—binabayaan an hakugnon, kalibotanon nga paagi han pagkinabuhi ngan pagpadayon ha pagkinabuhi nga nakakalipay ha Dios.—Buhat 3:19.

 8. Paonan-o naton ginhihimo an aton dedikasyon, ngan ano an kalabotan hito ha bawtismo?

⁸ An ikaduha nga bahin han siyahan nga pakiana ha bawtismo nagpapakiana ha mga kandidato kon igindedikar na ba nira an ira kalugaringon ngadto kan Jehova ha pagbuhat han iya kaburut-on. Importante nga pitad an dedikasyon antes han bawtismo. Ginhihimo ito ha pag-ampo, iginpapahayag naton an aton kinasingkasing nga hingyap nga ihatag an aton kinabuhi kan Jehova pinaagi kan Kristo. (Roma 14:7, 8; 2 Korinto 5:15) Salit hi Jehova nagigin aton Agaron ngan Tag-iya, ngan pariho kan Jesus nalilipay kita ha pagbuhat han kaburut-on han Dios. (Salmo 40:8; Efeso 6:6) Inin sinsero nga saad ngadto kan Jehova ginhihimo hin makausa la. Kondi, tungod kay ginhihimo naton an aton dedikasyon ha pribado, an pagpahayag ha publiko ha adlaw han bawtismo nagpapahibaro ha ngatanan nga naghimo kita hinin seryoso nga dedikasyon ngadto ha aton langitnon nga Amay.—Roma 10:10.

9, 10. (a) Ano an ginkikinahanglan ha pagbuhat han kaburut-on han Dios? (b) Paonan-o kinilala bisan han Nazi nga mga opisyal an aton dedikasyon?

⁹ Ano an ginkikinahanglan ha aton ha pagsunod han susbaranan ni Jesus ha pagbuhat han kaburut-on han Dios? Hi Jesus nagsiring ha iya mga disipulo: “Kon may tawo nga buot magsunod ha akon, maglirong ha iya la ngahaw, ngan pas-anon an iya krus [“pasakitan nga kahoy,” NW], ngan [padayon] nga sumunod ha akon.” (Mateo 16:24) Dinhi espisipiko nga iya iginsaysay an tulo nga butang nga kinahanglan buhaton naton. Siyahan, kita ‘naglilirong’ han aton kalugaringon. Ha iba nga mga pulong, iginsasalikway naton an aton hakugnon, diri-hingpit nga mga hilig ngan kinakarawat an sagdon ngan giya han Dios. Ikaduha, aton ‘ginpapas-an an aton pasakitan nga kahoy.’ Ha panahon ni Jesus, an pasakitan nga kahoy usa nga simbolo han kaarawdan ngan pag-antos. Sugad nga mga Kristiano, kinakarawat naton nga usahay nag-aantos kita tungod han maopay nga sumat. (2 Timoteo 1:8) Bisan kon an kalibotan bangin magtamay o magpasipara ha aton, pariho kan Kristo aton ‘gintatamay an kaalo,’ malipayon tungod kay maaram nga napapalipay naton an Dios. (Hebreo 12:2) Ha kataposan, “padayon” nga aton ginsusunod hi Jesus.—Salmo 73:26; 119:44, NW; 145:2.

¹⁰ Makalilipay, bisan an iba nga mga parakontra nakakasabot han kahulogan han dedikasyon nga ginhihimo han mga Saksi ni Jehova ngadto ha Dios nga esklusibo nga mag-aalagad ha iya. Pananglitan, ha Buchenwald nga kampo konsentrasyon han Nazi Alemanya, an mga Saksi nga nagdumiri ha pagsalikway han ira pagtoo gin-obligar pagpirma ha masunod nga inimprinta nga pahayag: “Ako usa pa gihapon nga maunungon nga Estudyante han Biblia ngan diri ko gud tatalapason an akon ipinanumpa kan Jehova.” Iginpapahayag hini hin matin-aw an disposisyon han ngatanan nga dedikado, matinumanon nga mga surugoon han Dios!—Buhat 5:32.

Nakikilala Sugad nga Usa han mga Saksi ni Jehova

11. Ano nga pribilehiyo an nakakarawat han usa nga nagpapabawtismo?

¹¹ An ikaduha nga pakiana nagpapakiana ha  kandidato, siyahan ha ngatanan, kon nasasabtan ba niya nga an iya bawtismo nagpapakilala ha iya ha publiko sugad nga usa han mga Saksi ni Jehova. Katapos mabawtismohan, nagigin ordinado nga ministro hiya nga nagdadara han ngaran ni Jehova. Daku gud ini nga pribilehiyo ngan usa ka seryoso nga responsabilidad. An usa nga bawtismado may-ada liwat paglaom han dayon nga kaluwasan, kon magpapabilin hiya nga matinumanon kan Jehova.—Mateo 24:13.

12. Ano an kaupod nga obligasyon han kadungganan ha pagdara han ngaran ni Jehova?

¹² Oo, daku hinduro nga kadungganan an pagdara han ngaran han makagarahum-ha-ngatanan nga Dios, hi Jehova. Hi propeta Mika nagsiring: “An ngatanan nga katawohan naglalakat an tagsa-tagsa ha ngaran han iya dios; ngan kita maglalakat ha ngaran ni Jehova nga aton Dios ha kagihaponan.” (Mika 4:5) Kondi, may-ada kaupod nga obligasyon ini nga kadungganan. Kinahanglan mangalimbasog kita nga magkinabuhi ha paagi nga nagpapasidungog han ngaran nga gindadara naton. Sugad han iginpahinumdom ni Pablo ha mga Kristiano ha Roma, kon an usa diri nagbubuhat han iya iginsasangyaw, ‘napapasipara,’ o nawawad-an hin dungog an ngaran han Dios.—Roma 2:21-24.

13. Kay ano nga an dedikado nga mga surugoon ni Jehova may-ada responsabilidad nga magpamatuod mahitungod ha ira Dios?

¹³ Kon an tawo nagigin usa han mga Saksi ni Jehova, kinakarawat liwat niya an responsabilidad nga magpamatuod mahitungod han iya Dios. Gin-aghat ni Jehova an dedikado nga nasud han Israel nga magin iya mga saksi basi magpamatuod han iya waray-kataposan nga pagka-Dios. (Isaias 43:10-12, 21) Kondi an nasud napakyas ha pagtuman hini nga responsabilidad, ngan ha kataposan bug-os nga iginsalikway hira ni Jehova. Yana, usa ka daku nga kadungganan para ha totoo nga mga Kristiano an pagkaada pribilehiyo ha pagpamatuod mahitungod kan Jehova. Ginbubuhat naton ito tungod kay nahigugma kita ha iya ngan naghihingyap nga pagbaraanon an iya ngaran. Kinahanglan isumat naton ha iba an kamatuoran mahitungod ha aton langitnon nga Amay ngan han iya katuyoan. Inaabat naton an inabat ni apostol Pablo han hiya nagsiring: “Ini kinahanglan gud ha akon. Kay kairo ko kon diri ko igwali an maopay nga sumat”!—1 Korinto 9:16.

14, 15. (a) Paonan-o nabulig an organisasyon ni Jehova ha aton espirituwal nga pag-uswag? (b) Ano nga mga tagana an makakarawat naton ha pagbulig ha aton ha espirituwal?

¹⁴ An ikaduha nga pakiana nagpapahinumdom liwat ha kandidato han iya responsabilidad nga magkooperar ha giniyahan-han-espiritu nga organisasyon ni Jehova. Diri kita nag-uusahan ha pag-alagad ha Dios, ngan ginkikinahanglan naton an bulig, suporta, ngan pagdasig han bug-os nga katig-uban han “mga kabugtoan.” (1 Pedro 2:17; 1 Korinto 12:12, 13) An organisasyon han Dios may-ada importante nga bahin ha aton espirituwal nga pag-uswag. Naghahatag ito hin abunda nga mga publikasyon ha Biblia nga nabulig ha aton nga mag-uswag ha husto nga kahibaro, magbuhat hin maaramon kon naatubang kita ha mga problema, ngan magpatubo hin duok nga relasyon ha Dios. Pariho han iroy nga nagsisiguro nga an iya anak napapakaon hin maopay ngan namamangnoan, “an matinumanon ngan maaramon nga uripon” nagtatagana hin abunda nga napapanahon nga espirituwal nga pagkaon para han aton espirituwal nga kauswagan.—Mateo 24:45-47, NW; 1 Tesalonika 2:7, 8.

¹⁵ Ha sinemana nga mga katirok, nakakarawat han katawohan ni Jehova an ginkikinahanglan nga pagbansay ngan pagdasig basi magin matinumanon nga mga Saksi ni Jehova. (Hebreo 10:24, 25) An Teokratiko nga Eskwelahan ha Ministeryo nagtututdo ha aton ha pagyakan ha publiko, ngan an Katirok ha Pag-alagad nagbabansay ha aton ha epektibo nga pagpresenta han aton mensahe. Ha  aton mga katirok ngan pinaagi han aton personal nga pag-aram han mga publikasyon ha Biblia, nakikita naton an espiritu ni Jehova nga nagios, naggigiya ha iya organisasyon. Pinaagi hinin regular nga mga tagana, an Dios nagpapaalerto ha aton ha mga peligro, nagbabansay ha aton nga magin epektibo nga mga ministro, ngan nabulig ha aton nga magpabilin nga nagmamata ha espirituwal.—Salmo 19:7, 8, 11; 1 Tesalonika 5:6, 11; 1 Timoteo 4:13.

An Motibo han Desisyon nga Magpabawtismo

16. Ano an nagpapagios ha aton nga igdedikar an aton kalugaringon ngadto kan Jehova?

¹⁶ Salit, an duha nga pakiana ha bawtismo nagpapahinumdom ha mga kandidato han kahulogan han bawtismo ha tubig ngan han mga responsabilidad nga kaupod hito. Ano, kon sugad, an sadang magpagios ha ira nga magdesisyon ha pagpabawtismo? Nagigin bawtismado nga mga disipulo kita, diri tungod kay may-ada nagpirit ha aton, kondi tungod kay ‘gindara’ kita ni Jehova. (Juan 6:44) Tungod kay ‘an Dios gugma,’ nagmamando hiya ha uniberso pinaagi han gugma, diri pinaagi han pagpirit. (1 Juan 4:8) Nagigin duok kita kan Jehova tungod han iya mag-opay nga mga kalidad ngan han paagi han iya pagtratar ha aton. Iginhatag ni Jehova ha aton an iya bugtong nga Anak ngan nagtatanyag ha aton han gimaopayi nga tidaraon. (Juan 3:16) Tungod hito, napapagios kita ha paghalad ha iya—ha pagdedikar ha iya—han aton kinabuhi.—Proberbios 3:9; 2 Korinto 5:14, 15.

17. Igindedikar naton an aton kalugaringon diri tungod ha ano?

¹⁷ Aton igindedikar an aton kalugaringon, diri tungod ha usa nga hinungdan o buruhaton, kondi ngadto kan Jehova mismo. Magbabag-o an buruhaton nga iginhatag han Dios ha iya katawohan, kondi an ira dedikasyon ngadto ha iya nagpapabilin la gihapon. Pananglitan, an iya iginpabuhat kan Abraham naiiba gud ha iya iginpabuhat kan Jeremias. (Genesis 13:17, 18; Jeremias 1:6, 7) Kondi, gintuman nira an espisipiko nga buruhaton nga iginpabuhat han Dios ha ira tungod kay nahigugma hira kan Jehova ngan hingyap nira nga matinumanon nga buhaton an iya kaburut-on. Durante hini nga panahon han kataposan, an ngatanan nga bawtismado nga mga sumurunod ni Kristo nangangalimbasog ha pagbuhat han sugo ni Kristo nga isangyaw an maopay nga sumat han Ginhadian ngan manhimo hin mga disipulo. (Mateo 24:14; 28:19, 20) An kinasingkasing nga pagbuhat hito nga buruhaton usa ka maopay nga paagi ha pagpakita nga hinigugma naton an aton langitnon nga Amay ngan salit totoo gud nga dedikado kita ha iya.—1 Juan 5:3.

18, 19. (a) Ano an iginpapahayag naton ha publiko pinaagi han aton bawtismo? (b) Ano an paghihisgotan ha masunod nga artikulo?

¹⁸ Waray ruhaduha, an bawtismo nag-aabri han dalan ngadto ha damu nga mga bendisyon, kondi usa ka pitad ito nga sadang tagdon hin seryoso. (Lukas 14:26-33) Iginpapahayag hito an determinasyon nga mas importante ito kay ha bisan ano nga responsabilidad. (Lukas 9:62) Kon kita nagpapabawtismo, ha pagkamatuod iginpapahayag naton ha publiko: “Ini nga Dios amo an aton Dios ha waray kataposan. Hiya amo an aton paramando, bisan ngadto ha kamatayon.”—Salmo 48:14.

¹⁹ An masunod nga artikulo mag-uusisa han dugang pa nga mga pakiana nga mahimo bumangon may kalabotan ha bawtismo ha tubig. May-ada ba husto nga mga hinungdan an usa ka tawo nga diri magpabawtismo? Sadang ba makaulang an edad? Paonan-o an ngatanan makakahatag hin dignidad ha okasyon han bawtismo?

Maisasaysay Mo Ba?

• Kay ano nga an tagsa nga Kristiano kinahanglan magbasol antes han bawtismo?

• Ano an nahiuupod ha dedikasyon ha Dios?

• Ano nga mga responsabilidad an nahiuupod ha kadungganan han pagdara han ngaran ni Jehova?

• Ano an sadang magpagios ha aton nga magdesisyon ha pagpabawtismo?

[Mga Pakiana]

[Kahon/Retrato ha pahina 22]

An Duha nga Pakiana ha Bawtismo

Pinaagi han halad ni Jesu-Kristo, nagbasol ka na ba han imo mga sala ngan nagdedikar han imo kalugaringon ngadto kan Jehova ha pagbuhat han iya kaburut-on?

Nasasabtan mo ba nga an imo dedikasyon ngan bawtismo nagpapakilala ha imo sugad nga usa han mga Saksi ni Jehova nga nakikig-upod ha ginigiyahan-han-espiritu nga organisasyon han Dios?

[Retrato ha pahina 23]

An dedikasyon amo an seryoso nga saad ngadto kan Jehova ha pag-ampo

[Retrato ha pahina 25]

An aton pagsangyaw nga buruhaton nagpapakita han aton dedikasyon ha Dios