Mga Pakiana Tikang ha mga Magbarasa

Kon an usa nga tawo ginsisinamok han mga demonyo, ano an iya mahimo buhaton basi makatalwas tikang hito?

Ipinapakita han Pulong han Dios nga adton nag-aantos tungod han mga pag-atake han mga demonyo mahimo makatalwas tikang ha sugad nga pagsinamoka. Importante an pag-ampo ha sugad nga katalwasan. (Markos 9:25-29) Kondi an usa nga ginsisinamok han mga demonyo bangin kinahanglan may buhaton pa. An mga hitabo may kalabotan ha siyahan-siglo nga mga Kristiano nag-iilustrar kon ano pa an bangin kinahanglan buhaton.

Antes hira magin sumurunod ni Kristo, may mga indibiduwal ha kadaan nga Efeso nga nahidabi ha demonismo. Kondi, han nagdesisyon na hira ha pag-alagad ha Dios, an “mga nagbuhat han pagkatamyawan . . . nagdara han ira mga basahon hin tirig-ob, ngan [ginsunog ito] ha atubangan han ngatanan.” (Buhat 19:19) Pinaagi ha pagsunoga han ira mga libro ha pagpanigo, adton bag-o nga mga tumuroo ha Efeso nagpakita hin susbaranan ha bisan hin-o nga naghihingyap nga makatalwas tikang ha mga pag-atake hin demonyo yana. Kinahanglan gud ilabog han sugad nga mga tawo an ngatanan nga may kalabotan ha espiritismo. Nag-uupod ini han mga libro, magasin, sine, impormasyon tikang ha elektroniko nga mga surok, musika nga may kalabotan ha espiritismo, sugad man han mga anting-anting o iba nga mga butang nga ginsusul-ot sugad nga “proteksyon” o nakakaw-ing ha espiritistiko nga mga buhat.—Deuteronomio 7:25, 26; 1 Korinto 10:21.

Pipira ka tuig katapos sunugon hito nga mga Kristiano ha Efeso an ira mga libro ha mahika, hi apostol Pablo nagsurat: “An aton pakig-away . . . kontra ha mga espirituhanon nga kasundalohan han kamaraotan.” (Efeso 6:12) Hi Pablo nagsagda ha mga Kristiano: “Magsul-ot kamo han bug-os nga hinganiban han Dios, basi nga mahimo kamo pag-atubang kontra ha mga limbong han yawa.” (Efeso 6:11) Ito nga sagdon aplikado pa gihapon. Kinahanglan parig-unon han mga Kristiano an ira espirituwal nga mga depensa basi mapanalipdan an ira kalugaringon tikang ha magraot nga mga espiritu. “Labaw ha ngatanan,” marig-on nga nagsiring hi Pablo, “kuhaa niyo an pagtoo nga iyo kalasag, nga dida hito sadang kamo makapalong ha ngatanan nga mga pana nga naglalaga han maraot.” (Efeso 6:16) Napaparig-on han usa ka tawo an iya pagtoo pinaagi ha pag-aram ha Biblia. (Roma 10:17; Kolosas 2:6, 7) Salit, an regular nga pag-aram ha Biblia nabulig ha aton nga makapatubo hin pagtoo nga nagigin depensa kontra ha impluwensya han magraot nga mga espiritu.—Salmo 91:4; 1 Juan 5:5.

Kinahanglan buhaton han mga Kristiano ha Efeso an usa pa nga importante nga pitad. Hi Pablo nagsiring ha ira: “Ha bug-os nga pag-ampo ngan pakimalooy, mag-ampo kamo ha ngatanan nga panahon ha espiritu.” (Efeso 6:18) Oo, an kinasingkasing nga pag-ampo para han proteksyon ni Jehova importante gud para hadton naruruyag makatalwas tikang ha mga pag-atake han demonyo yana. (Proberbios 18:10; Mateo 6:13; 1 Juan 5:18, 19) An Biblia angayan nga nasiring: “Busa magpasakop kamo ha Dios; kondi tigia niyo an yawa, ngan mapalagiw hiya ha iyo.”—Jakobo 4:7.

Bisan kon an gin-aatake hin demonyo kinahanglan mag-inampoon gud hin sinsero para han katalwasan, an iba nga totoo nga mga Kristiano mahimo liwat mag-ampo para ha tawo nga naghihingyap gud ha pag-alagad kan Jehova ngan sinsero nga nangangalimbasog ha pag-ato ha magraot nga mga espiritu. Mahimo hira maghangyo ha Dios nga an usa nga ginsisinamok han mga demonyo magkaada espirituwal nga kusog ha pag-ato han mga pag-atake han mga demonyo. Tungod kay an Pulong han Dios nasiring nga an “pag-ampo han matadong nga tawo may daku nga kapulsanan,” sigurado nga an mga pag-ampo han mga surugoon han Dios magigin mapulsanon gud ha mga ginsasamok han mga demonyo nga nangangalimbasog hinduro ha ‘pagtigi ha Yawa.’—Jakobo 5:16.

[Retrato ha pahina 31]

Ginsunog han mga tumuroo ha Efeso an ira mga libro ha mahika