“O Nahigugma Gud Ako ha Imo Balaud!”

AN Salmo 119 usa nga kanta mahitungod han mga pagbati han nagkomposo hito ha giniyahan nga mensahe, o pulong han Dios. An salmista nagkakanta: “An imo pulong akon iginmalamay ha akon kasingkasing.” “Maglilipay ako ngahaw ha imo mga kasugoanan.” “An akon kalag naruruba ha paghingyap tungod han imo mga sugo ha ngatanan nga panahon.” “An imo liwat mga pagpamatuod [“pahinumdom,”NW] amo an akon kalipay.” “Naghingyap ako han imo mga turumanon.” “Maglilipay ako ngahaw dida ha imo mga sugo, nga akon ginhigugma.” “Mamamalandong ako ha imo mga kasugoanan.” “O nahigugma gud ako ha imo balaud! Amo ito an akon pamalandong ha bug-os nga adlaw.”—Salmo 119:11, 16, 20, 24, 40, 47, 48, 97.

Kinasingkasing gud an pagpasalamat han salmista ha iginpahayag nga pulong han Dios! Sugad ba hito an imo inaabat mahitungod han mensahe han Pulong han Dios, an Biblia? Karuyag mo ba mapatubo an sugad nga pagkaruyag para hito? Kon amo, kinahanglan mapatubo mo anay an batasan han regular nga pagbasa han Biblia, adlaw-adlaw kon posible. Hi Jesu-Kristo nagsiring: “Diri la an tinapay an nakakabuhi han tawo, kondi an ngatanan nga pulong, nga nagowa ha baba han Dios.” (Mateo 4:4) Ikaduha, sadang pamalandungon mo an imo binabasa. An pagpamalandong ha kamatuoran mahitungod ha Dios, han iya mga kalidad, kaburut-on, ngan katuyoan makakabulig ha imo nga mas apresyaron an Biblia. (Salmo 143:5) Ngan pinakaimportante, iaplikar an maopay nga sagdon hito ha adlaw-adlaw nga pagkinabuhi.—Lukas 11:28; Juan 13:17.

Paonan-o ka magpapahimulos han pagpatubo hin pagkaruyag ha ginsisiring han Biblia? “Bulahan adton mga nagtitipig han [kanan Dios] mga pagpamatuod [“pahinumdom,” NW],” siring han Salmo 119:2. An mga pahinumdom ha Biblia mabulig ha imo nga malamposan an mga problema ha kinabuhi. (Salmo 1:1-3) Magkakaada ka kinaadman, hilarom nga pamurubuot, ngan pagsabot, nga mabulig ha imo nga ‘did-an an imo mga tiil ha magraot nga dalan.’ (Salmo 119:98-101) An paghibaro ha kamatuoran mahitungod ha Dios ngan han iya katuyoan para ha tuna makakahimo han imo kinabuhi nga mas may katuyoan ngan mas maghahatag hin kahayag ha imo paglaom ha tidaraon.—Isaias 45:18; Juan 17:3; Pahayag 21:3, 4.

Interesado gud an mga Saksi ni Jehova ha pagbulig ha iba nga mas mahibaro ha Biblia ngan mapatubo an gugma ha mensahe hito. Kinasingkasing nga gindadasig ka namon nga karawaton an tanyag.