Hi Daniel Ngan an Iya Badge ha Kombensyon

GINSAWAY ni Jesus an nagpapakamatadong-ha-kalugaringon nga mga lider han relihiyon nga nasina han hinkit-an nira an kabataan nga kalalakin-an nga nagdadayaw ha Dios ha kadaygan. Angayan nga hi Jesus nagpakiana ha ira: “Waray ba niyo mabasa: Ha baba han mga kabataan ngan han mga nanunuso may-ada ka hingpit nga pagdayaw?”—Mateo 21:15, 16.

An sais-anyos nga hi Daniel, nga kaupod han kongregasyon nga Ruso an yinaknan ha Alemanya, nagpapamatuod nga an kabataan nagdadayaw pa gihapon kan Jehova. Kaupod han iya nanay ngan bugto, tinambong hiya ha kombensyon han mga Saksi ni Jehova ha Duisburg. Ini an ira siyahan nga higayon ha pagtambong ha sugad kadaku nga kombensyon. Diri hira pamilyar ha ngatanan: hotel, damu hinduro nga mamarati, tulo ka adlaw nga pagliningkod, bawtismo, sugad man an drama. Ngan kumusta hi Daniel? Susbaranan an iya paggawi.

Han Lunes katapos han kombensyon ha balay, temprano nga binuhat hi Daniel basi umiskwela. Kondi ano an aada pa ha iya dyaket? An badge nga nagpapakilala nga hiya usa nga delegado ha kombensyon! Ginsidngan hiya han iya nanay: “Tapos na an kombensyon. Puydi mo na hukason an imo badge.” Kondi hi Daniel nagsiring: “Karuyag ko nga makita han ngatanan kon diin ako kinadto ngan kon ano an akon hinbaroan.” Salit ha bug-os nga adlaw ha eskwelahan, iginpaparayaw niya an iya badge. Han ginpakianhan hiya han iya maestra mahitungod hito, iya iginhulagway an programa han kombensyon.

Ha pagbuhat hito, ginsusunod ni Daniel an susbaranan han yinukot nga kabataan ha paglabay han mga siglo nga nagdadayaw kan Jehova ha kadaygan.