Mga Bana, Subara an Pagkaulo ni Kristo
Mga Bana, Subara an Pagkaulo ni Kristo
“An ulo han ngatanan nga mga tawo amo hi Kristo.”—1 KORINTO 11:3.
1, 2. (a) Paonan-o hibabaroan nga malampuson an usa nga bana? (b) Kay ano nga importante nga kilalahon nga an Dios an nagpatikang han pag-asawa?
PAONAN-O mo hibabaroan nga malampuson an usa nga bana? Pinaagi ba han iya mental o pisikal nga mga abilidad? Pinaagi han iya abilidad nga kumita hin damu nga kwarta? O labi na pinaagi han iya mahigugmaon ngan buotan nga pagtrato ha iya asawa ngan mga anak? May kalabotan ha ikatulo nga basihan, damu nga bana an kulang gud hini, tungod kay naiimpluwensyahan hira han espiritu han kalibotan ngan han mga suruklan han tawo. Kay ano? Kasagaran na tungod kay diri nira kinikilala ngan inaaplikar an giya han Nagpatikang han pag-asawa—an Usa nga ‘naghimo hin babaye tikang ha gusok nga iya ginkuha tikang ha lalaki, ngan gindara ha lalaki.’—Genesis 2:21-24.
2 Pinamatud-an ni Jesu-Kristo ini nga asoy han Biblia kon paonan-o gintikangan han Dios an pag-asawa, nasiring ha mga kritiko ha iya panahon: “Waray ba niyo mabasa, nga an nagbuhat ha ira ha tinikangan, ginbuhat hira nga lalaki ug babaye. Ngan siniring: Tungod hini an tawo babayaan an amay niya ngan an iroy niya, ngan tumampo ha iya asawa; ngan an duha magigin usa nga unod? Busa hira diri na duha, kondi usa la nga unod. Busa kon ano an gintig-ob han Dios [ha pag-asawa], diri pagbulagon han tawo.” (Mateo 19:4-6) Salit an yawi ha malampuson nga pag-asawa amo an pagkilala nga an Dios an nagpatikang han pag-asawa ngan an kalamposan hito nadepende ha pag-aplikar han instruksyon ha Pulong han Dios, an Biblia.
Usa nga Yawi ha Kalamposan han Bana
3, 4. (a) Kay ano nga maaram gud hi Jesus mahitungod han pag-asawa? (b) Hin-o an simboliko nga asawa ni Jesus, ngan paonan-o sadang tratuhon han mga bana an ira mga asawa?
3 An usa nga bulig ha kalamposan han bana amo an pag-aram ha ginsiring ni Jesus ngan pagsubad ha Iya ginbuhat. Hilarom an iya kahibaro mahitungod hini nga topiko, tungod kay presente hiya han ginlarang an siyahan nga mag-asawa ngan han ginkasal hira. Hi Jehova nga Dios nagsiring ha iya: “Paghimoon naton an tawo ha aton ladawan, ngan ha aton panagway.” (Genesis 1:26) Oo, kaistorya han Dios an Usa nga Iya ginlarang antes han bisan hin-o o bisan ano nga butang ngan ‘dida ha iya hirani, sugad hin labaw nga magburuhat.’ (Proberbios 8:22-30) Ini nga Usa amo “an siyahan nga natawo han ngatanan nga mga binuhat.” Hiya “an tinikangan han mga binuhat han Dios,” nga naeksister na antes pa han paglarang han pisikal nga uniberso.—Kolosas 1:15; Pahayag 3:14.
4 Hi Jesus tinatawag nga “an Karnero han Dios,” ngan simboliko nga iginhuhulagway hiya sugad nga bana. Usa nga anghel an nagsiring: “Kumadi ka, pakikitaon ko ikaw han karaslon nga babaye, an asawa han Kordero.” (Juan 1:29; Pahayag 21:9) Hin-o, kon sugad, ito nga pakakasalan, o asawa? “An asawa han Kordero” ginkukompwesto han matinumanon nga dinihogan-han-espiritu nga mga sumurunod ni Kristo, nga makakaupod niya ha iya langitnon nga pagmando. (Pahayag 14:1, 3) Salit, an paagi han pagtrato ni Jesus ha iya mga disipulo han kaupod niya hira dinhi ha tuna naghahatag hin susbaranan para ha mga bana kon paonan-o tratuhon an ira mga asawa.
5. Para kan kanay usa nga susbaranan hi Jesus?
5 Oo, iginhuhulagway hi Jesus ha Biblia sugad nga susbaranan para ha ngatanan nga iya sumurunod, sugad han aton mababasa: “Hi Kristo nag-antos man tungod ha iyo, nga gintagan kamo hin susbaranan, basi kamo magsunod ha iya mga pagpitad.” (1 Pedro 2:21) Kondi, susbaranan hiya labi na para ha kalalakin-an. An Biblia nasiring: “An ulo han ngatanan nga mga tawo amo hi Kristo; ngan an ulo han babaye amo an lalaki; ngan an ulo ni Kristo amo an Dios.” (1 Korinto 11:3) Tungod kay hi Kristo an ulo han lalaki, kinahanglan subaron hiya han mga bana. Salit, an prinsipyo han pagkaulo kinahanglan iaplikar basi magmalampuson ngan magmalipayon an pamilya. Basi mahimo ini, kinahanglan tratuhon han mga bana an ira mga asawa ha mahigugmaon nga paagi sugad han pagtrato ni Jesus ha iya simboliko nga asawa, an iya dinihogan nga mga sumurunod.
Kon Paonan-o Aatubangon an mga Problema ha Pag-asawa
6. Paonan-o sadang tratuhon han mga bana an ira mga asawa?
6 Ha masamok nga kalibotan yana, kinahanglan subaron labi na han mga bana an susbaranan ni Jesus ha pagpailob, gugma, ngan karig-on ha pagsunod ha matadong nga mga prinsipyo. (2 Timoteo 3:1-5) Mahitungod han susbaranan nga iginhatag ni Jesus, aton mababasa ha Biblia: “Kamo mga asawa nga kalalakin-an, mag-ukoy kamo upod ha iyo mga asawa sugad ha kinaadman.” (1 Pedro 3:7) Oo, kinahanglan gamiton han mga bana an kinaadman ha pag-atubang ha mga problema ha pag-asawa, sugad han pag-atubang ni Jesus ha mga kakurian. Nag-antos hiya hin mas makuri nga mga pagsari kay ha bisan hin-o nga tawo, kondi maaram hiya nga hi Satanas, an iya mga demonyo, ngan inin maraot nga kalibotan an hinungdan hito. (Juan 14:30; Efeso 6:12) Hi Jesus waray gud mahipausa han inatubang hiya hin mga pagsari, salit an mga mag-asawa diri liwat sadang mahipausa kon nakakaeksperyensya hin “kagol-anan ha [ira] unod.” An Biblia nagpapahamangno nga adton nag-aasawa makakalaom ha pagkaada han sugad nga kagol-anan.—1 Korinto 7:28.
7, 8. (a) Ano an nahiuupod ha pagtrato ha mga asawa uyon ha kinaadman? (b) Kay ano nga takos pasidunggan an mga asawa?
7 Siring han Biblia, sadang tratuhon han mga bana an ira mga asawa ‘sugad ha kinaadman, nga naghahatag hin dungog ha babaye, sugad hin ngadto ha maluroluya nga surudlan.’ (1 Pedro 3:7) Imbes nga magin dominante ha iya asawa, sugad han igintagna han Biblia nga kasagaran nga pagbubuhaton han kalalakin-an, an bana nga karuyag magkaada han pag-uyon han Dios magpapasidungog ha iya. (Genesis 3:16) Sadang niya tratuhon hiya sugad nga presyoso nga panag-iya, diri gud ginagamit an iya pagin mas makusog ha pisikal ha pagpasakit ha iya. Lugod, iya tatagdon an pagbati han iya asawa, pirme nga gintatrato hiya nga may pagtahod ngan dignidad.
8 Kay ano nga sadang pasidunggan han mga bana an ira mga asawa? An Biblia nabaton: “Sugad nga iyo mga igkasi-manurunod han grasya han kinabuhi, ha tinutuyo nga an iyo mga pag-ampo mawaray kaulangan.” (1 Pedro 3:7) Kinahanglan masabtan han mga bana nga diri gintatagad ni Jehova nga mas birilhon an pagsingba han lalaki kay ha pagsingba han babaye. An kababayin-an nga gintatagad nga takos han pag-uyon han Dios makarawat upod han kalalakin-an han pariho nga balos nga kinabuhi nga waray kataposan—damu an magkikinabuhi pa ngani ha langit, diin didto “waray lalaki ngan babaye.” (Galasia 3:28) Salit kinahanglan hinumdoman han mga bana nga an usa nagigin presyoso ha Dios tungod han iya pagkamatinumanon, diri tungod han pagin lalaki o babaye, bana o asawa, o bisan bata.—1 Korinto 4:2.
9. (a) Sumala kan Pedro, kay ano nga sadang pasidunggan han mga bana an ira mga asawa? (b) Paonan-o ginpasidunggan ni Jesus an kababayin-an?
9 An panginahanglan nga tratuhon han bana an iya asawa nga may kadungganan pinabubug-atan han kataposan nga ginsiring ni apostol Pedro, “nga an iyo mga pag-ampo mawaray kaulangan.” Peligroso gud an sugad nga kaulangan! Mahimo pa ngani ito magresulta nga maulang an mga pag-ampo han bana, sugad han nahitabo ha iba nga mapasibay-on nga mga surugoon han Dios ha naglabay. (Pagtangis 3:43, 44) Maaramon para ha Kristiano nga kalalakin-an—inasaw-an ngan nagpaplano mag-asawa—nga pag-adman an dungganon nga pagtrato ni Jesus ha kababayin-an. Iya ginkarawat hira ha grupo nga inupod ha iya ha ministeryo, ngan iya gintrato hira nga may pagkabuotan ngan pagtahod. Ha usa nga okasyon, kababayin-an pa ngani an siyahan nga ginsumatan ni Jesus han makatirigamnan nga kamatuoran, ginsugo hira nga sumatan an kalalakin-an mahitungod hito!—Mateo 28:1, 8-10; Lukas 8:1-3.
Susbaranan Labi Na Para ha mga Bana
10, 11. (a) Kay ano nga kinahanglan pag-adman labi na han mga bana an susbaranan ni Jesus? (b) Paonan-o sadang ipakita han mga bana an gugma ha ira mga asawa?
10 Sugad han iginsaysay na, iginpapariho han Biblia an relasyon han bana ha iya asawa ha relasyon ni Kristo ha iya “asawa,” nga amo an iya kongregasyon han dinihogan nga mga sumurunod. An Biblia nasiring: “An asawa nga lalaki amo an ulo han asawa nga babaye, sugad man nga hi Kristo amo iton ulo han singbahan.” (Efeso 5:23) Ini nga mga pulong sadang makaaghat ha mga bana nga usisahon an klase han pagkaulo, o pagpanguna, nga ipinakita ni Jesus ha iya mga sumurunod. Pinaagi la hini nga pag-usisa masusunod hin maopay han mga bana an susbaranan ni Jesus ngan maihahatag ha ira mga asawa an giya, gugma, ngan pagtagad, sugad han ginbuhat ni Jesus para ha iya kongregasyon.
11 “Mga asawa nga kalalakin-an, higugmaa niyo an iyo mga asawa nga kababayin-an,” nagsasagda an Biblia ha mga Kristiano, “sugad man nga hi Kristo naghigugma ha singbahan ngan igintubyan an iya kalugaringon tungod hito.” (Efeso 5:25) Ha nauna nga kapitulo han Efeso, “an singbahan” o kongregasyon tinatawag nga “lawas ni Kristo.” Inin simboliko nga lawas may-ada damu nga bahin nga kalalakin-an ngan kababayin-an, nga an ngatanan nabulig ha lawas nga gumios hin maopay. Syempre, hi Jesus amo “an ulo han lawas, han singbahan.”—Efeso 4:12; Kolosas 1:18; 1 Korinto 12:12, 13, 27.
12. Paonan-o ipinakita ni Jesus an gugma ha iya simboliko nga lawas?
12 Ipinakita ni Jesus an gugma ha iya simboliko nga lawas, “an singbahan,” labi na pinaagi han mahigugmaon nga pagmangno han kaopayan hadton magigin mga bahin hito. Pananglitan, han nakapoy an iya mga disipulo, hiya nagsiring: “Kadi kamo . . . ha usa nga lugar nga mamingaw, ngan mamahuway kamo hin madaliay.” (Markos 6:31) Ha paghulagway han buruhaton ni Jesus pipira na la ka oras antes hiya patayon, usa han iya mga apostol an nagsurat: “Kay ginhigugma niya an mga iya kalugaringon [an mga bahin han iya simboliko nga lawas] . . . , ginhigugma niya hira tubtob ha kataposan.” (Juan 13:1) Pagkamaopay nga susbaranan an ipinakita ni Jesus kon paonan-o sadang tratuhon han mga bana an ira mga asawa!
13. Ano an sagdon ha mga bana may kalabotan ha kon paonan-o hihigugmaon an ira mga asawa?
13 Ha padayon nga paggamit han susbaranan nga ipinakita ni Jesus para ha mga bana, hi apostol Pablo nagsagdon ha ira: “An mga asawa nga kalalakin-an kinahanglan man nga mahigugma ha ira mga asawa nga babaye sugad ha ira mga kalugaringon nga lawas. An nahigugma ha iya asawa nga babaye nahigugma man ha iya ngahaw. Kay bisan san-o waray tawo nga nangalas ha iya kalugaringon nga unod; kondi nga gin-aataman ngan ginmamangnoan niya ito sugad man nga hi Kristo ha singbahan.” Hi Pablo nagdugang: “An tagsa-tagsa ha iyo maghigugma ha iya kalugaringon nga asawa sugad ha iya ngahaw.”—Efeso 5:28, 29, 33.
14. Paonan-o gintatrato han bana an iya diri-hingpit nga pisikal nga lawas, ngan ano an ipinapakita hini mahitungod han angayan nga pagtrato niya ha iya asawa?
14 Hunahunaa an mga pulong ni Pablo. Tutuyoon ba han tuhay nga tawo nga pasakitan an iya kalugaringon nga lawas? Kon nahipakdol hiya, hinahampak ba niya an iya tudlo ha tiil tungod kay nahipakdol hiya pinaagi hito? Syempre diri! Ginpapakaalohan ba han bana an iya kalugaringon ha atubangan han iya kasangkayan o igintsitsismis an iya mga sayop? Diri! Kay ano man nga iya pakakarauton an iya asawa, o pasasakitan ha pisikal, kon hiya nagsasayop? Sadang tagdon han mga bana diri la an ira kalugaringon nga kaopayan kondi an kaopayan liwat han ira mga asawa.—1 Korinto 10:24; 13:5.
15. (a) Ano an ginbuhat ni Jesus han an iya mga disipulo nagpakita hin tawhanon nga kaluyahan? (b) Ano nga mga leksyon an mahibabaroan tikang ha iya susbaranan?
15 Tagda kon paonan-o ipinakita ni Jesus an iya pagtagad ha iya mga disipulo ha gab-i antes hiya mamatay, han nagpakita hira hin tawhanon nga kaluyahan. Bisan pa han iya pauroutro nga hangyo nga hira mag-ampo, tulo ka beses nga nanhingaturog hira ha hardin han Getsemani. Tigda nga ginpalibotan hira hin armado nga kalalakin-an. Hi Jesus nagpakiana ha kalalakin-an: “Hin-o an iyo pinamimiling?” Han hira binaton: “Hi Jesus nga Nasaretnon,” hiya nagsiring: “Amo ako.” Tungod kay maaram nga ‘oras na’ han iya kamatayon, hiya nagsiring: “Kon iyo ako ginpipinamiling, tuguti ini hira hin pagkalakat.” Gintatagad pirme ni Jesus an kaopayan han iya mga disipulo—nga bahin han iya simboliko nga asawa—ngan naghimo hiya hin paagi nga makapalagiw hira. Pinaagi han pag-aram kon paonan-o gintrato ni Jesus an iya mga disipulo, hibabaroan han mga bana an damu nga prinsipyo nga maiaaplikar nira kon paonan-o sadang tratuhon an ira mga asawa.—Juan 18:1-9; Markos 14:34-37, 41.
An Gugma ni Jesus Diri kay Iginbasar la ha Emosyon
16. Ano an inabat ni Jesus mahitungod kan Marta, kondi paonan-o niya gintadong hiya?
16 An Biblia nasiring: “Hi Jesus naghigugma kan Marta, ngan han iya bugto nga babaye, ngan kan Lasaro,” nga agsob nga nag-abiabi ha iya ha ira balay. (Juan 11:5) Kondi, hi Jesus waray mag-alang pagsagdon kan Marta han iginhatag niya an sobra nga atensyon ha pag-andam hin pagkaon, salit gutiay na la an iya panahon ha pagkarawat hin espirituwal nga instruksyon tikang kan Jesus. Hiya nagsiring: “Marta, Marta, nasasakit ka, ngan nalilisang tungod han kadam-an nga mga bagay. Kondi usa [la] nga bagay nga kinahanglan.” (Lukas 10:41, 42) Sigurado, tungod kay maaram hi Marta nga hinigugma hiya ni Jesus, nagin masayon para ha iya nga karawaton an iya sagdon. Ha sugad man nga paagi, sadang tratuhon han mga bana an ira mga asawa ha buotan, mahigugmaon nga paagi, ginagamit an pinili hin maopay nga mga pulong. Kondi, kon kinahanglan an pagtadong, angayan an prangka nga pagsagdon sugad han ginbuhat ni Jesus.
17, 18. (a) Paonan-o ginsaway ni Pedro hi Jesus, ngan kay ano nga kinahanglan tadungon hi Pedro? (b) Ano an responsabilidad han bana?
17 Ha lain nga okasyon, iginsaysay ni Jesus ha iya mga apostol nga kinahanglan kumadto hiya ha Jerusalem, diin pagtitimarauton hiya han ‘mga katigurangan ngan mga punoan han mga saserdote ngan han mga eskriba, ngan papatayon, ngan ha ikatulo ka adlaw mababanhaw.’ Dida hini gindara ni Pedro hi Jesus ha ligid ngan ginsaway hiya, nasiring: “Ipahirayo ha imo Ginoo; diri mahimo ini ha imo.” Matin-aw, naapektohan an panhunahuna ni Pedro han iya pagin emosyonal. Ginkinahanglan an pagtadong. Salit hi Jesus nagsiring ha iya: “Iwas ha akon atubangan Satanas: usa ka nga hiparakdolan nakon, kay waray ka makapaghunahuna han mga bagay han Dios, kondi han mga bagay han tawo.”—Mateo 16:21-23.
18 Iginsaysay pa la ni Jesus an kaburut-on han Dios—nga hiya mag-aantos hin damu nga butang ngan papatayon. (Salmo 16:10; Isaias 53:12) Salit sayop hi Pedro ha pagsaway kan Jesus. Oo, ginkinahanglan ni Pedro an marig-on nga pagtadong, sugad la nga ginkikinahanglan liwat naton ito usahay. Sugad nga ulo han pamilya, an bana may-ada awtoridad ngan responsabilidad nga tadungon an iya mga kapamilya, upod na an iya asawa. Bisan kon bangin ginkikinahanglan an karig-on, ini nga pagtadong sadang ihatag ha buotan, mahigugmaon nga paagi. Salit sugad la nga ginbuligan ni Jesus hi Pedro nga tagdon an mga butang ha husto nga paagi, usahay bangin kinahanglan buhaton liwat ito han mga bana ha ira mga asawa. Pananglitan, bangin kinahanglan ipatin-aw han bana ha buotan nga paagi kon kay ano nga ginkikinahanglan an pipira nga pagbag-o kon an pamado han iya asawa o paggamit hin mga alahas o kosmetiko diri na nauyon ha desente nga susbaranan nga iginrirekomenda ha Kasuratan.—1 Pedro 3:3-5.
Mapulsanon Gud nga Magin Mapailubon an mga Bana
19, 20. (a) Ano nga problema an nahitabo ha mga apostol ni Jesus, ngan paonan-o ginsulbad ito ni Jesus? (b) Mationan-o kamalampuson an mga pangalimbasog ni Jesus?
19 Kon may-ada problema nga nagkikinahanglan hin atensyon, diri sadang laoman pirme han mga bana nga an ira sinsero nga mga pangalimbasog ha pagtadong hito maglalampos dayon. Nagkinahanglan hin padayon nga pangalimbasog hi Jesus ha pagtadong han mga disposisyon han iya mga apostol. Pananglitan, nahitabo ha ira an pagpalabaw-labaw nga nakita utro ha ikatarapos han ministeryo ni Jesus. Naglantugi hira kon hin-o an baga hin pinakalabaw ha ira. (Markos 9:33-37; 10:35-45) Waray pag-iha katapos han ikaduha han sugad nga mga okasyon, naghikay hi Jesus nga isaurog ha pribado an iya ultimo nga Paskua upod hira. Hito nga okasyon, waray usa ha ira an nag-una ha pagbuhat han kustomre nga ubos nga trabaho nga paghimsaw han tapotapuhon nga mga tiil han iba. Ginbuhat ito ni Jesus. Katapos, hiya nagsiring: “Akon kamo tinagan hin susbaranan.”—Juan 13:2-15.
20 An mga bana nga nagpapakita hin mapainubsanon nga disposisyon sugad kan Jesus posible nga magkakaada han kooperasyon ngan suporta han ira mga asawa. Kondi ginkikinahanglan an pagpailob. Ha urhi hiton mismo nga gab-i han Paskua, an mga apostol naglantugi na liwat kon hin-o ha ira an baga hin pinakalabaw. (Lukas 22:24) An mga pagbag-o ha disposisyon ngan paggawi agsob nga nagkikinahanglan hin panahon ngan hinay-hinay ito. Kondi, makaruruyag gud kon nagkakaada positibo nga mga resulta, sugad han nahitabo ha mga apostol!
21. Kon naatubang ha mga problema yana, ginsasagda an mga bana nga hinumdoman ngan buhaton an ano?
21 Yana, an pag-asawa naatubang ha mas makuri nga mga problema kay ha kakan-o pa man. Damu an diri na seryoso ha ira mga panaad ha pag-asawa. Salit, mga bana, pamalandonga an gintikangan han pag-asawa. Hinumdumi nga an pag-asawa gintuyo ngan gintikangan han aton mahigugmaon nga Dios, hi Jehova. Iya igintagana an iya Anak, hi Jesus, diri la sugad nga aton Manunubos—aton Manluluwas—kondi sugad nga susbaranan liwat nga sadang subaron han mga bana.—Mateo 20:28; Juan 3:29; 1 Pedro 2:21.
Paonan-o Mo Babatunon?
• Kay ano nga importante nga kilalahon naton an gintikangan han pag-asawa?
• Ha ano nga mga paagi gin-aaghat an mga bana nga higugmaon an ira mga asawa?
• Ano nga mga ehemplo han pagtrato ni Jesus ha iya mga disipulo an nag-iilustrar kon paonan-o sadang ipakita han bana an sugad-Kristo nga pagkaulo?
[Mga Pakiana]
[Retrato ha pahina 14]
Kay ano nga sadang pag-adman han mga bana an mga ehemplo kon paonan-o gintrato ni Jesus an kababayin-an?
[Retrato ha pahina 15]
Han nakapoy an mga disipulo ni Jesus, ipinakita niya an konsiderasyon
[Retrato ha pahina 16]
Sadang sagdonan han mga bana an ira mga asawa pinaagi han buotan, pinili hin maopay nga mga pulong