Mga Pakiana Tikang ha mga Magbarasa

An Biblia diri naghihisgot mahitungod han pag-toast, salit kay ano nga an mga Saksi ni Jehova naglilikay ha pakigbahin hito?

An pag-toast hin baso han alaksiw (o iba nga irinmon nga de-alkohol) maiha na hinduro ngan kalyap nga tradisyon, bisan kon magkaiba-iba an paagi ha pagbuhat hito ha kada lugar. Usahay ginduduot han mga nagtu-toast an ira baso ha baso han iba. An tawo nga nagtatanyag hin pag-toast kasagaran nga naghahangyo o naghihingyap para ha usa hin kalipay, maopay nga kahimsog, hilawig nga kinabuhi, o iba nga sugad hito. An iba nga nakikig-toast mahimo magpahayag hin pag-uyon o mag-alsa han ira baso ngan uminom hin alaksiw. Para ha damu, baga ini hin diri nakakadaot nga kustomre o usa la ini nga maopay nga pamatasan, kondi may-ada mag-opay nga hinungdan kon kay ano nga diri nakikig-toast an mga Saksi ni Jehova.

Diri ito tungod kay an mga Kristiano diri naghahandom nga an usa magkaada kalipay ngan maopay nga kahimsog. Ha usa nga surat ha mga kongregasyon, an nagmamando nga lawas han siyahan nga siglo nagtapos pinaagi hin mga pulong nga mahimo hubaron hin “magmaopay unta an imo kahimsog,” “maghingaopay ka unta,” o “magin maopay unta an imo kahimtang.” (Buhat 15:29) Ngan an pipira nga totoo nga magsiringba nagsiring ha tawhanon nga mga hadi: “Itugot nga an akon ginoo . . . mabuhi ha kadayonan” o “Itugot unta nga an hadi mabuhi ha kadayonan.”—1 Hadi 1:31; Nehemia 2:3.

Kondi, ano an gintikangan han kustomre nga pag-toast? Ginkotar han Watchtower nga Enero 1, 1968, an The Encyclopædia Britannica (1910), Tomo 13, pahina 121: “An kustomre ha pag-inom basi magkaada maopay nga kahimsog an iba posible gud nga tikang ha kadaan nga relihiyoso nga seremonya ha pag-inom sugad nga halad ha mga dios ngan ha mga patay. Durante han pangaon, an mga Griego ngan Romano naghuhuwad hin mga halad nga irinmon para ha ira mga dios, ngan ha pangaon durante han seremonya para ha ira ngan ha mga patay.” An ensayklopidya nagdugang: “Ini nga mga kustomre han pag-inom sugad nga usa nga klase hin halad may kalabotan gud ha pag-inom para ha kahimsog han buhi nga mga tawo.”

Ito pa ba an gintotoohan yana? An 1995 International Handbook on Alcohol and Culture nasiring: “[An pag-toast] bangin usa nga diri relihiyoso nga tradisyon diin an sagrado nga likido iginhahalad ha mga dios: dugo o alaksiw sugad nga kabalyo hin usa nga hangyo, usa nga pag-ampo nga ginsumaryo ha mga pulong nga ‘hilawig nga kinabuhi!’ o ‘para ha imo kahimsog!’”

Oo, an kamatuoran nga an butang, disenyo, o buhat nagtikang o may kapariho ha kadaan nga palso nga relihiyon diri pirme nagpapasabot nga igindidiri ito ha totoo nga magsiringba. Tagda an prutas nga granada. An usa nga kilala nga ensayklopidya nasiring: “An granada baga liwat hin gin-gamit sugad nga baraan nga simbolo han pagano nga mga relihiyon.” Bisan pa hito, ginpabutangan han Dios hin inulang tikang ha mga granada an sidsid han bado han hitaas nga saserdote, ngan mga granada an nakadekorasyon ha tumbaga nga mga poste han templo ni Salomon. (Eksodo 28:33; 2 Hadi 25:17) Dugang pa, an singsing ha kasal hadto may-ada relihiyoso nga kahulogan. Kondi, kadam-an han mga tawo yana an diri na maaram hito. Para ha ira, usa la ito nga ebidensya nga inasaw-an na an usa.

Kondi, kumusta man an paggamit hin alaksiw may kalabotan ha relihiyoso nga mga buhat? Pananglitan, ha usa ka higayon an katawohan ni Sikem nga nagsisingba kan Baal “[kinadto] ha balay han ira dios-dios, ngan nangaon ngan nag-inom, ngan nanhimaraot kan Abimelek,” an anak ni Gideon. (Hukom 9:22-28) Ha imo paghunahuna may-ada ba usa nga maunungon kan Jehova nga makikigbahin hito nga pag-inom, bangin mangaro hin gahum ha palso nga dios kontra kan Abimelek? Ha paghulagway han usa nga panahon  diin damu ha Israel an nagrebelde kan Jehova, hi Amos nagsiring: “Hira mahigda ha ligid han tagsa nga halaran . . . ngan ha balay han ira Dios hira nainom han alaksiw nira hadton minultahan.” (Amos 2:8) Makikigbahin ba hito an totoo nga mga magsiringba pinaagi ha paghuwad han irinmon sugad nga halad ha mga dios o pag-inom la may kalabotan hito? (Jeremias 7:18) O mag-aalsa ba an totoo nga magsiringba hin baso han alaksiw ngan maghahangyo hin giya han usa nga dios o maopay nga tidaraon para ha iya?

Makapainteres nga usahay an mga magsiringba ni Jehova nag-aalsa han ira mga kamot ngan naghahangyo hin maopay nga panhitabo. Ira inaalsa an ira mga kamot ngadto ha totoo nga Dios. Aton mababasa: “Tinmindog hi Salomon ha atubangan han halaran ni Jehova . . . ngan duphon an iya mga kamot tipakadto ha langit; ngan sinmiring hiya: O Jehova, an Dios ha Israel, waray lain nga Dios nga sugad ha imo . . . pamatian mo ha langit an imo urukyan nga lugar; ngan kon ikaw makabati, pasayloa.” (1 Hadi 8:22, 23, 30) Ha pariho nga paagi, “ginbulahan ni Esra hi Jehova . . . ngan an ngatanan nga mga tawo nagbaton: Amen, Amen, nga pinangangalsa an ira mga kamot: ngan ira dinuko an ira mga ulo, ngan nagsingba kan Jehova.” (Nehemia 8:6; 1 Timoteo 2:8) Matin-aw nga ito nga mga maunungon diri nag-aalsa han ira mga kamot para hin bendisyon tikang ha usa nga dios han swerte.—Isaias 65:11.

Damu han nakikig-toast yana an bangin diri naghuhunahuna nga naghahangyo hira hin baton o bendisyon tikang ha dios, kondi diri liwat nira maisaysay kon kay ano nga ira igin-aalsa an mga baso hin alaksiw. Kondi, an kamatuoran nga diri nira ginhuhunahuna hin maopay ito, diri hinungdan nga puydi na subaron han totoo nga mga Kristiano an ira mga buhat.

Maaram an kadam-an nga ha iba liwat nga butang, an mga Saksi ni Jehova naglilikay ha mga buhat nga ginhihimo han kadam-an. Pananglitan, damu an nasaludo ha mga simbolo, o mga bandera han nasud; diri nira ginhuhunahuna ini sugad nga mga buhat han pagsingba. Diri nanginginlabot an totoo nga mga Kristiano ha sugad nga mga buhat, kondi diri hira nakikigbahin hito. Tungod kay maaram kon san-o hihimoon ito, damu nga Saksi an nagios hin maaramon basi diri makasakit ha iba. Ha bisan ano nga kahimtang, determinado hira nga diri maghimo hin nasyonalistiko nga mga buhat, nga diri uyon ha Biblia. (Eksodo 20:4, 5; 1 Juan 5:21) An pag-toast yana nga panahon bangin diri hunahunaon han damu sugad nga relihiyoso nga buhat. Ha gihapon, may-ada husto nga mga rason kon kay ano nga an mga Kristiano diri nakikig-toast, tungod kay may-ada ito relihiyoso nga gintikangan ngan bisan yana mahimo hunahunaon sugad hin pangaro hin bendisyon ha ‘langit,’ nga baga hin nangangaro hin bulig ha pwersa nga labaw ha tawo.—Eksodo 23:2.