Barsilyay—Tawo nga Maaram han Iya mga Limitasyon

‘KAY ano nga magigin luran ako ha imo?’ An 80 anyos nga lagas nga lalaki nga hi Barsilyay an nagsiring hini kan Hadi David. An Biblia nasiring nga “hiya usa nga daku nga pagkatawo”; waray ruhaduha tungod han iya bahandi. (2 Samuel 19:32, 35) Nag-ukoy hiya ha tuna han Galaad, usa nga kabukiran ha este han Salog Jordan.—2 Samuel 17:27; 19:31.

Ano an kahimtang han ginsiring ni Barsilyay ito nga mga pulong kan David? Kay ano nga nagyakan hiya hito?

Pagrebelde ha Hadi

Namimilegro hi David. Gin-agaw han iya anak nga hi Absalon an trono katapos ‘kawaton an kasingkasing han mga tawo ha Israel.’ Matin-aw nga dadauton gud ni Absalon an ngatanan nga maunungon ha iya amay. Salit binaya hi David ngan an iya mga surugoon ha Jerusalem. (2 Samuel 15:6, 13, 14) Han inabot hira ha Mahanaim, usa nga lugar ha este han Jordan, ginbuligan hira ni Barsilyay.

Damu an iginhatag ni Barsilyay ngan duha pa nga kalalakin-an, hira Sobi, ngan Makir, kan David. Ipinakita hinin maunungon nga mga tawo nga hinsasabtan nira an iya kakurian han hira nagsiring mahitungod ha iya ngan ha iya katawohan: “An katawohan pinan-gugutom, ngan pinan-gugul-an, ngan pinan-ngunguhaw, didto ha kamingawan.” Ginbuhat nira an ngatanan nga ira mahihimo ha pagtagbaw hito nga panginahanglan pinaagi ha pagsuplay kanda David  hin mga higdaan, trigo, sebada, harina, sinanlag nga lugas, dagku nga balatong, lentihas, dugos, mantikilya, karnero, ngan iba pa.—2 Samuel 17:27-29.

Peligroso an pagbulig kan David. Imposible nga diri dauton ni Absalon an bisan hin-o nga masuporta ha legal nga hadi. Salit, ha pagin maunungon ni Barsilyay kan David, maisugon hiya.

Nagbag-o an Kahimtang

Waray pag-iha katapos hito, nag-away an rebelde nga kasundalohan ni Absalon ngan kasundalohan ni David ha kagurangan han Epraim, nga bangin nahimumutang hirani han Mahanaim. Napirde an kasundalohan ni Absalon, “ngan may daku nga pamatay didto hadto nga adlaw.” Bisan kon nangalimbasog hi Absalon nga makapalagiw, waray pag-iha ginpatay la gihapon hiya.—2 Samuel 18:7-15.

Makausa pa, waray na liwat nasupak ha paghadi ni David. Diri na kinahanglan magkinabuhi pa an iya mga sumurunod sugad nga mga puga. Dugang pa, tungod han ira pagin maunungon kan David, nakarawat nira an iya pagtahod ngan pagpasalamat.

Han tibalik na hi David ha Jerusalem, “hi Barsilyay an Galaadnon linmugsong tikang ha Rohelim; ngan hiya tinmabok han Jordan upod han hadi, ha pagdul-ong ha iya ha tabok han Jordan.” Hito nga kahimtang, gin-imbitar ni David hi Barsilyay: “Kadi ka upod ha akon, kay pag-aagakon ko ikaw upod ha akon ha Jerusalem.”—2 Samuel 19:15, 31, 33.

Waray ruhaduha nga gin-apresyar gud ni David an bulig ni Barsilyay. Kondi, baga hin diri ito nagpapasabot nga karuyag la niya balosan an iya utang nga kaburut-on pinaagi ha pagtagana hin materyal nga mga butang. Diri kinahanglan ni Barsilyay ito nga klase hin bulig tungod kay riko hiya. Bangin karuyag ni David makaupod hiya ha palasyo tungod han iya mag-opay nga kalidad. An pagkaada permanente nga bahin ha palasyo usa nga dungog, ngan maghahatag ito kan Barsilyay hin higayon nga makabenepisyo ha pagin sangkay han hadi.

Pagkamapainubsanon Ngan Pagin Reyalistiko

May kalabotan ha imbitasyon ni Hadi David, hi Barsilyay nagsiring: “Pipira an mga adlaw han mga tuig han akon kinabuhi, nga ako maupod ha hadi ngadto ha Jerusalem? Ako yana nga adlaw kawaloan na ka tuig an panuigon: Makakagsumat pa ba ako han kalainan han maopay ngan han maraot? Makakahimo ba an imo surugoon pagtilaw kon ano [an] akon kakaunon o kon ano [an] akon iinumon? Makakahimo pa ba ako pagbati han tingog han magkantahon nga kalalakin-an ngan han magkantahon nga kababayin-an?” (2 Samuel 19:34, 35) Hito nga paagi, matinalahuron nga waray karawata ni Barsilyay an imbitasyon ngan maopay nga pribilehiyo. Kondi, kay ano?

Usa nga hinungdan han desisyon ni Barsilyay bangin an iya kalagas ngan an mga limitasyon tungod hito. Bangin inabat niya nga diri na mag-iiha an iya kinabuhi. (Salmo 90:10) Iya ginbuhat an iya mahihimo ha pagbulig kan David, kondi maaram liwat hiya han mga limitasyon han iya kalagas. Waray niya tuguti an dungog ngan pagin tanyag nga makapugong ha iya nga reyalistiko nga usisahon an iya kapasidad. Diri pariho han ambisyoso nga hi Absalon, maaramon nga nagpaubos hiya.—Proberbios 11:2.

Usa pa nga hinungdan han desisyon ni Barsilyay bangin an iya hingyap nga diri makaulang an iya limitasyon ha buruhaton han pinili han Dios nga hadi. Hiya nagpakiana: “Kay ano nga an imo surugoon magigin luran pa han akon ginoo an hadi?” (2 Samuel 19:35) Bisan kon nasuporta pa  gihapon hiya kan David, posible nga natoo hiya nga mas epektibo nga matutuman an mga toka hin mas bata. Bangin an iya iginpapasabot amo an iya anak, hiya nagsiring: “Kitaa, an imo surugoon nga hi Kimaam; paupda hiya han akon ginoo an hadi; ngan buhata ha iya han sugad han maopay ha imo.” Imbes nga masina, ginkarawat ni David an suhestyon. Ha pagkamatuod, antes tumabok ha Jordan, “an hadi hinmarok kan Barsilyay, ngan ginbendisyonan hiya.”—2 Samuel 19:37-39.

Ginkikinahanglan an Pagin Makatadunganon

Ginpapabug-atan han asoy mahitungod kan Barsilyay an panginahanglan nga magin timbang. Ha usa nga bahin, diri naton sadang baribaran an pribilehiyo ha pag-alagad o diri mangalimbasog nga magkaada hito tungod la kay karuyag naton an mahimyang nga kinabuhi o naabat kita nga diri kita takos ha pagpas-an hito nga responsabilidad. Mapupun-an han Dios an bahin diin maluya kita kon nasarig kita nga tatagan kita niya hin kusog ngan kinaadman.—Filipos 4:13; Jakobo 4:17; 1 Pedro 4:11.

Ha luyo nga bahin, kinahanglan naton kilalahon an aton mga limitasyon. Pananglitan, usa nga Kristiano an okupado na hinduro ha espirituwal nga buruhaton. Nasasantop niya nga kon makarawat pa hiya hin dugang nga pribilehiyo, maibubutang na niya ha peligro an Kasuratanhon nga mga responsabilidad sugad ha pagtagana han mga kinahanglan han iya pamilya. Ha sugad nga kahimtang, diri ba pangirilal-an han iya pagin mapainubsanon ngan pagin makatadunganon an diri pagkarawat hin dugang nga pribelihiyo?—Filipos 4:5; 1 Timoteo 5:8.

Nagpakita hin maopay nga ehemplo hi Barsilyay, ngan kinahanglan pamalandungon naton ito. Hiya maunungon, maisugon, mahinatagon, ngan mapainubsanon. Labaw ha ngatanan, determinado hiya nga unahon an interes han Dios kay han iya kalugaringon.—Mateo 6:33.

[Mapa ha pahina 15]

(Para ha aktuwal nga format,  kitaa an publikasyon)

An otsenta-anyos nga hi Barsilyay nagbaktas hin hirayo basi buligan hi David

GALAAD

Rohelim

Sukot

Mahanaim

Salog Jordan

Gilgal

Jeriko

Jerusalem

EPRAIM

[Retrato ha pahina 13]

Kay ano nga waray karawata ni Barsilyay an tanyag ni David?