“Matinumanon nga Saksi Didto ha Langit”

AN MGA parasiday ngan parasurat hin kanta maiha na nga nagdadayaw han bulan tungod han kaanyag hito. Pananglitan, usa nga giniyahan han Dios nga kanta an naghihisgot mahitungod hin babaye nga “maanyag sugad han bulan.” (Kanta ni Salomon 6:10) Gintawag liwat han usa nga salmista an bulan nga “matinumanon nga saksi didto ha langit.” (Salmo 89:37) Ano an iginpapasabot hini mahitungod han bulan?

An bulan diri napapakyas paglibot ha tuna kada 27.3 ka adlaw. Salit, an pagkamatinumanon han bulan mahimo magpasabot han pagkamasasarigan hito. Kondi, bangin nahunahuna han salmista an mas hilarom gud nga kahulogan hito. Tinawag niya an bulan nga “matinumanon nga saksi” ha matagnaon nga kanta mahitungod han Ginhadian nga igintutdo ni Jesus ha iya mga sumurunod nga ig-ampo.—Mateo 6:9, 10.

Sobra 3,000 ka tuig na an naglabay, hi Jehova nga Dios naghimo hin kauyonan ha Ginhadian kan Hadi David ha kadaan nga Israel. (2 Samuel 7:12-16) An katuyoan hito nga kauyonan amo an pagtagana hin legal nga katungod kan Jesu-Kristo, sugad nga manurunod ni David, ha pagtag-iya han trono ha kadayonan. (Isaias 9:7; Lukas 1:32, 33) Ha pag-unabi han trono han manurunod ni David, an salmista nagkanta: “Magpapadayon ito hin waray kataposan sugad han bulan; ngan sugad han matinumanon nga saksi didto ha langit.”—Salmo 89:36, 37.

Salit, an ‘suga nga naghahadi ha gab-i’—an bulan—angayan nga nagpapahinumdom han pagkapermanente han pagmando ni Kristo. (Genesis 1:16) Mahitungod han iya Ginhadian, an Daniel 7:14 nasiring: “An iya kagamhanan amo an kagamhanan nga waray kataposan, nga diri mawawara, ngan an iya ginhadian adto nga diri magugunaw.” An bulan usa nga saksi nga nagpapahinumdom ha aton hito nga Ginhadian ngan han mga bendisyon nga ihahatag hito ha katawohan.

[Ginkuhaan han Retrato ha pahina 32]

Bulan: Retrato han NASA