Nakasala Ka ba ha Baraan nga Espiritu?
Nakasala Ka ba ha Baraan nga Espiritu?
‘May-ada sala nga makamaratay.’—1 JUAN 5:16.
1, 2. Paonan-o kita nahibaro nga posible an pakasala ha baraan nga espiritu han Dios?
“NAHUHUNAHUNA ko pirme nga nakasala ako ha baraan nga espiritu.” Ito an iginsurat han usa nga babaye ha Alemanya, bisan kon nag-aalagad hiya ha Dios. Mahimo gud ba makasala an usa nga Kristiano ha baraan nga espiritu, o aktibo nga pwersa han Dios?
2 Oo, posible an pakasala ha baraan nga espiritu ni Jehova. “An ngatanan nga sala ngan pasipara, igpapasaylo ha mga tawo, kondi an pasipara kontra ha espiritu, diri igpapasaylo.” (Mateo 12:31) Ginpapahamangnoan kita: “Kon magpakasala kita hin tinuyo katapos ta makakarawat han kinaadman ha kamatuoran, waray na nabilin nga halad tungod ha mga sala. Kondi an usa nga makaharadlok nga paghulat ha paghukom.” (Hebreo 10:26, 27) Ngan hi apostol Juan nagsurat: ‘May-ada sala nga makamaratay.’ (1 Juan 5:16) Kondi an usa ba nga nakasala amo an magsisiguro kon hiya ba ‘nakasala hin makamaratay’?
An Pagbasol Nagriresulta hin Pagpasaylo
3. Ano an posible gud kon duro nga nasusubo kita tungod ha aton pakasala?
3 Hi Jehova la an Hukom han mga magpakasasala. Oo, kita ngatanan may-ada gud baratunon ha iya, ngan ginbubuhat niya pirme an husto. (Genesis 18:25; Roma 14:12) Hi Jehova an nagdidesisyon kon kita ba nakasala hin diri-mapapasaylo, ngan hiya an makakakuha han iya espiritu tikang ha aton. (Salmo 51:11) Kondi, kon duro nga nasusubo kita tungod ha aton pakasala, posible gud nga kita tinuod nga nagbabasol. Kondi, ano an tinuod nga pagbasol?
4. (a) Ano an kahulogan han pagbasol? (b) Kay ano nga nakakaliaw gud an Salmo 103:10-14?
4 An pagbasol nangangahulogan nga ginbabag-o naton an aton panhunahuna ha naglabay o tinuyo nga pakasala. Nangangahulogan ito nga nasusubo kita ngan naundang ha pakasala. Kon nakahimo kita hin daku nga sala kondi ginbuhat na naton an kinahanglanon nga mga paagi ha pagpakita nga nagbabasol gud kita, maliliaw kita han mga pulong han salmista: ‘Waray ni Jehova pagbuhata ha aton an sumala han aton mga sala, bisan pa waray bumalos sumala han aton mga karat-an. Kay sugad nga an langit mas hitaas han tuna, amo man kadaku an iya mahigugmaon nga kalooy ha ira nga nahadlok ha iya. Sugad nga hirayo an sinirangan han katundan, sugad hin kahirayo an pagpahimulag ha aton han aton mga pagsupak. Sugad hin usa nga amay nga malolooyon ha iya mga anak, hi Jehova malolooyon hadton mga nahadlok ha iya. Kay hiya nakilala han aton panlawas; nahinunumdom hiya nga mga tapotapo kita.’—Salmo 103:10-14.
5, 6. Ihatag an nangunguna nga punto han 1 Juan 3:19-22, ngan isaysay an kahulogan han mga pulong han apostol.
5 Nakakaliaw liwat an mga pulong ni apostol Juan: “Tungod hini hibabaroan ta nga kanan kamatuoran kita, ngan parig-unon ta an aton kasingkasing ha iya atubangan; kay kon an aton kasingkasing maghukom hin sirot ha aton, an Dios daku pa ha aton kasingkasing, ngan maaram ha ngatanan nga mga bagay. Mga hinigugma, kon an aton kasingkasing diri maghukom hin sirot ha aton, may-ada ta pagsarig [“kagawasan ha pagyakan,” NW] ha Dios: Ngan kakarawaton ta tikang ha iya an ngatanan nga aton pangaroon, kay gintuman ta an iya mga sugo ngan ginbuhat ta an mga bagay nga mag-opay ha iya atubangan.”—1 Juan 3:19-22.
6 ‘Hinbabaroan ta nga kanan kamatuoran’ kita tungod kay ipinapakita naton an minagburugto nga gugma ngan diri nababatasan an pakasala. (Salmo 119:11) Kon inaabat naton nga ginhuhukman kita tungod han pipira nga hinungdan, sadang hinumdoman naton nga “an Dios daku pa ha aton kasingkasing, ngan maaram ha ngatanan nga mga bagay.” Ipinapakita ni Jehova an kalooy ha aton tungod kay maaram hiya han aton “putli nga paghigugma ha mga kabugtoan,” han aton pakig-away ha sala, ngan han aton mga pangalimbasog ha pagbuhat han iya kaburut-on. (1 Pedro 1:22) An aton kasingkasing ‘diri maghuhukom hin sirot ha aton’ kon nasarig kita kan Jehova, nahigugma ha kabugtoan, ngan diri nagbubuhat hin tinuyo nga sala. Magkakaada kita “kagawasan ha pagyakan” ha Dios pinaagi han pag-ampo, ngan babatunon niya kita tungod kay ginbubuhat naton an iya mga sugo.
Hira Nakasala ha Espiritu
7. Ha ano nakadepende kon an sala mapapasaylo o diri?
7 Ano nga mga sala an diri mapapasaylo? Basi mabaton ini nga pakiana, aton paghisgotan an pipira nga ehemplo ha Biblia. Sadang makaliaw ini ha aton kon mabinasulon kita kondi nasusubo pa gihapon hinduro tungod han aton seryoso nga mga sala. An pagsiguro kon an aton mga sala mapapasaylo o diri, nadepende diri la ha klase han sala nga nabuhat han usa; nadepende liwat ito ha motibo, ha kahimtang han kasingkasing, ngan kon mationan-o gud gintuyo an pakasala.
8. Paonan-o an iba nga Judio nga mga lider han relihiyon ha siyahan nga siglo nakasala ha baraan nga espiritu?
8 An Judio nga mga lider han relihiyon ha siyahan nga siglo nga nakontra gud kan Jesu-Kristo nakasala ha baraan nga espiritu. Nakita nira nga an espiritu han Dios nagios kan Jesus samtang nagbubuhat hiya hin mga milagro nga nagpapasidungog kan Jehova. Kondi, ini nga mga kaaway ni Kristo nagsiring nga an iya gahum nagtikang kan Satanas nga Yawa. Sumala kan Jesus, adton nagpasipara ha baraan nga espiritu han Dios nakakasala hin diri mapapasaylo dinhi “hini nga panahon, bisan [ha] tidaraon.”—Mateo 12:22-32.
9. Ano an pagpasipara, ngan ano an ginsiring ni Jesus mahitungod hito?
9 An pagpasipara nag-uupod hin nagpapakaraot, nakakadaot, o nakakasakit nga mga pulong. Tungod kay tikang ha Dios an baraan nga espiritu, an pagyakan kontra hito pariho hin pagyakan kontra kan Jehova. Diri-mapapasaylo an pagyakan hin sugad nga klase hin mga pulong. An hitabo nga nagin hinungdan han pag-unabi ni Jesus han sugad nga sala nagpapakita nga ginhihisgotan niya adton tinuyo nga nakontra ha paggios han baraan nga espiritu han Dios. Tungod kay nakita han mga Pariseo nga nagios an espiritu ni Jehova kan Jesus kondi nagsiring hira nga ini nga gahum nagtikang ha Yawa, nakasala hira hin pagpasipara ha espiritu. Salit, hi Jesus nagsiring: “Bisan hin-o nga magpasipara kontra ha espiritu santo, diri gud mahiaagom hin pasaylo, kondi nga makakasala hiya han sala nga waray kataposan.”—Markos 3:20-29.
10. Kay ano nga gintawag ni Jesus hi Judas nga “anak han pagkawara”?
10 Tagda liwat an kahimtang ni Judas Iskariote. Naglimbong hiya, ginkakawat an kwarta ha kahon nga igintapod ha iya. (Juan 12:5, 6) Ha urhi kinadto hi Judas ha Judio nga mga magmarando ngan nagtraydor kan Jesus para ha 30 ka bug-os nga salapi. Oo, nakonsensya hi Judas katapos hito, kondi waray gud hiya magbasol han iya tinuyo nga pakasala. Sugad nga resulta, hi Judas diri takos ha pagkabanhaw. Salit tinawag hiya ni Jesus nga “anak han pagkawara.”—Juan 17:12; Mateo 26:14-16.
Waray Hira Makasala ha Espiritu
11-13. Paonan-o nakasala hi Hadi David may kalabotan kan Batseba, ngan ano nga pagliaw an makakarawat naton tikang ha pagtratar han Dios ha ira?
11 Usahay, an mga Kristiano nga nagsumat na han ira daku nga sala ngan nakakarawat na hin espirituwal nga bulig tikang ha mga tigurang ha kongregasyon bangin nasusubo pa gihapon tungod ha kabaraka ha ira naglabay nga mga pagtalapas ha balaud han Dios. (Jakobo 5:14) Kon sugad hini an inaabat naton, posible gud nga magpapahimulos kita ha paghisgot ha ginsisiring han Kasuratan mahitungod ha mga ginpasaylo ha ira mga sala.
12 Hi Hadi David nakasala hinduro may kalabotan kan Batseba nga asawa ni Uria. Han nakita niya tikang ha igbaw han atop inin mahusay nga babaye nga nakarigo, nagpasugo hiya nga dad-on an babaye ngadto ha iya palasyo ngan nakighilawas ha iya. Han ginsumatan hi David nga burod an babaye, nagplano hiya nga an bana hito nga hi Uria kumaturog upod niya basi maitago an pag-adulteryo. Han napakyas ito nga plano, naghimo hin paagi an hadi basi mamatay hi Uria ha girra. Katapos hito, hi Batseba nagin asawa ni David ngan nag-anak kondi namatay an bata.—2 Samuel 11:1-27.
13 Gintagad ni Jehova an kahimtang ni David ngan Batseba. Ginpasaylo han Dios hi David, matin-aw nga gintagad an iya pagbasol ngan an kauyonan ha Ginhadian nga ginhimo ha iya. (2 Samuel 7:11-16; 12:7-14) Sigurado nga hi Batseba may-ada mabinasulon nga disposisyon, tungod kay nakapribilehiyo hiya nga magin iroy ni Hadi Salomon ngan kaapoy-apoyan ni Jesu-Kristo. (Mateo 1:1, 6, 16) Kon nakakasala kita, maopay nga hinumdoman naton nga natitigamnan ni Jehova an aton mabinasulon nga disposisyon.
14. Paonan-o ipinapakita ha kahimtang ni Hadi Manases kon mationan-o kamapinasayloon an Dios?
14 Nakita liwat ha nahitabo kan Hadi Manases han Juda kon mationan-o kamapinasayloon hi Jehova. Ginbuhat niya an maraot ha paniplatan ni Jehova. Naghimo hiya hin mga halaran para kan Baal, nagsingba “han ngatanan nga binuhat ha langit,” ngan nagtukod pa ngani hin mga halaran para ha palso nga mga dios ha duha nga ruwang han templo. Iya ginsunog an iya mga anak, igin-aghat an espiritismo, ngan gindasig an mga umurukoy han Juda ngan Jerusalem nga ‘magbuhat hin labi pa hin kamaraot kay han ginbuhat han mga nasud nga kan Jehova gin-gunaw ha atubangan han mga anak ni Israel.’ An mga pahamangno han mga propeta han Dios waray niya pamatia. Ha kataposan, ginbihag hi Manases han hadi han Asirya. Samtang bihag, nagbasol hiya ngan mapainubsanon nga nag-inampo ha Dios, ngan ginpasaylo hiya ngan iginbalik ha pagkahadi ha Jerusalem, diin sinuportahan niya an totoo nga pagsingba.—2 Kronikas 33:2-17.
15. Ano nga hitabo ha kinabuhi ni apostol Pedro an nagpapakita nga hi Jehova “damu gud” ka beses nga nagpapasaylo?
15 Paglabay hin mga siglo, hi apostol Pedro nakahimo hin daku nga sala tungod han paglirong kan Jesus. (Markos 14:30, 66-72) Kondi, “damu gud” ka beses nga ginpasaylo ni Jehova hi Pedro. (Isaias 55:7) Kay ano? Tungod kay hi Pedro totoo nga mabinasulon. (Lukas 22:62) Matin-aw an ebidensya han pagpasaylo han Dios paglabay hin 50 ka adlaw han tinagan hi Pedro hin espesyal nga pribilehiyo ha pagpamatuod hin maisugon mahitungod kan Jesus, ha adlaw han Pentekostes. (Buhat 2:14-36) Diri ba an Dios magpapasaylo liwat ha tinuod nga nagbabasol nga mga Kristiano yana? “Kon imo panginanoon, O Jehova, an mga karat-an, O Ginoo, hin-o pa an matindog?” nagkanta an salmista, “kondi aada ha imo an pagpasaylo.”—Salmo 130:3, 4.
Pag-iban han Kabaraka Tungod ha Pakasala
16. Ha ano nga mga hinungdan nagpapasaylo an Dios?
16 An gin-unabi na nga mga ehemplo makakabulig ha pag-iban han aton kabaraka tungod ha pakasala ha baraan nga espiritu. Ipinapakita hito nga hi Jehova nagpapasaylo gud ha mabinasulon nga magpakasasala. Pinakaimportante an sinsero nga pag-ampo ha Dios. Kon nakasala kita, mahimo kita manginyupo nga pasayloon kita pinaagi han halad lukat ni Jesus, han kalooy ni Jehova, tungod han aton napanunod nga pagkadiri-hingpit, ngan han aton matinumanon nga pag-alagad. Tungod han diri-takos nga pagkabuotan ni Jehova, makakaaro kita hin pasaylo, nasarig nga ihahatag ito.—Efeso 1:7.
17. Ano an sadang buhaton kon nakasala kita ngan nagkikinahanglan hin espirituwal nga bulig?
17 Ano man kon nakasala kita kondi diri kita nakakag-ampo tungod kay an aton sala nagpapaluya ha aton ha espirituwal? May kalabotan hini, an disipulo nga hi Jakobo nagsurat: “Tawagon niya an mga ansiano han singbahan, ngan mag-ampo hira tungod ha iya, nga paghirogan hiya hin lana ha ngaran han Ginoo: Ngan an pag-ampo han pagtoo makakaluwas ha masakit, ngan an Ginoo magbabanhaw ha iya; ngan kon makasala hiya, pagpapasayloon hiya.”—Jakobo 5:14, 15.
18. Kay ano nga an sala han usa bisan kon ginpaiwas hiya ha kongregasyon diri nangangahulogan nga diri na mapapasaylo?
18 Bisan kon hito nga panahon an nagbuhat hin sayop diri-mabinasulon ngan ginpaiwas hiya ha kongregasyon, diri nangangahulogan nga an iya sala diri na mapapasaylo. Mahitungod han ginpaiwas nga dinihogan nga nagbuhat hin sayop ha Korinto, hi Pablo nagsurat: “Igo na ini nga sirot ha usa nga tikang ha kadam-an; ha lain nga kaagi pasayloa ngan lipaya lugod hiya niyo, bangin malumos hiya tungod ha iya duro nga kabidoan.” (2 Korinto 2:6-8; 1 Korinto 5:1-5) Kondi, basi maipahiuli an maopay nga relasyon kan Jehova, kinahanglan karawaton han mga nakasala an basado-ha-Biblia nga espirituwal nga bulig han mga tigurang ngan tinuod nga magbasol. Hira kinahanglan ‘magbuhat han mga bunga nga takos han paghinulsol.’—Lukas 3:8.
19. Ano an makakabulig ha aton basi magpabilin nga “marig-on ha pagtoo”?
19 Ano an bangin hinungdan han aton pag-abat nga nakasala kita ha baraan nga espiritu? Bangin tungod han sobra nga paghinunahuna han maluya nga panlawas. Ha sugad nga kahimtang, bangin makabulig an pag-ampo ngan dugang nga pagpahuway. Diri naton sadang tugotan labi na hi Satanas nga magpaluya ha aton, basi umundang kita ha pag-alagad ha Dios. Tungod kay hi Jehova diri nalilipay ha kamatayon han maraot, sigurado nga diri hiya nalilipay nga mawara an bisan hin-o han iya mga surugoon. Salit kon nahahadlok kita tungod kay nakasala kita ha espiritu, sadang magpadayon kita ha pag-aram ha Pulong han Dios, upod na an nakakaliaw nga mga bahin han Salmos. Kinahanglan magpadayon kita ha pagtambong ha mga katirok han kongregasyon ngan makigbahin ha pagsangyaw han Ginhadian. Mabulig ito ha aton nga magin “marig-on ha pagtoo” ngan diri mabaraka ha posibilidad nga makasala hin diri-mapapasaylo.—Tito 2:2.
20. Ano nga pangatadongan an mahimo makabulig ha usa nga masabtan nga waray hiya makasala ha baraan nga espiritu?
20 An bisan hin-o nga nahahadlok nga nakasala hira ha baraan nga espiritu mahimo magpakiana ha ira kalugaringon: ‘Ginpasiparahan ko ba an baraan nga espiritu? Tungod kay nagbasol na ako han akon sala, ginbag-o ko na ba an akon hunahuna mahitungod han sugad nga pagbasol? Natoo ba ako ha pagpasaylo han Dios? Usa ba ako nga apostata nga nagsasalikway han espirituwal nga kahayag?’ Posible gud nga masantop nira nga waray hira magpasipara ha baraan nga espiritu han Dios, waray liwat hira magin apostata. Mabinasulon hira, ngan padayon nga natoo nga hi Jehova magpapasaylo ha ira. Kon amo, waray hira makasala ha baraan nga espiritu ni Jehova.
21. Ano nga mga pakiana an paghihisgotan ha masunod nga artikulo?
21 Daku gud nga bendisyon nga masiguro naton nga waray kita makasala ha baraan nga espiritu! Kondi, may kalabotan han baraan nga espiritu an mga pakiana nga paghihisgotan ha masunod nga artikulo. Pananglitan, mahimo naton pakianhan an aton kalugaringon: ‘Ginigiyahan gud ba ako han baraan nga espiritu han Dios? Nakikita ba ha akon pagkinabuhi an mga bunga hito?’
Ano an Imo Baton?
• Kay ano nga makakasiring kita nga posible an pakasala ha baraan nga espiritu?
• Ano an kahulogan han pagbasol?
• Hin-o an nakasala ha espiritu han nakanhi hi Jesus ha tuna?
• Paonan-o malalamposan an kabaraka tungod ha pakasala hin diri-mapapasaylo?
[Mga Pakiana]
[Retrato ha pahina 17]
Adton nagsiring nga hi Jesus nagbuhat hin mga milagro pinaagi han gahum ni Satanas nakasala ha baraan nga espiritu han Dios
[Retrato ha pahina 18]
Bisan kon iginlirong ni Pedro hi Jesus, waray hiya makasala hin diri-mapapasaylo