Importante nga mga Punto ha mga Surat ni Juan Ngan ni Judas
An Pulong ni Jehova Buhi
Importante nga mga Punto ha mga Surat ni Juan Ngan ni Judas
AN TULO nga surat ni Juan, nga posible iginsurat han 98 K.P. ha Efeso, kaupod han ultimo nga mga libro nga nagkukompwesto han Kasuratan. An siyahan ngan an ikaduha nga surat nag-aaghat ha mga Kristiano nga padayon nga maglakat ha kalamrag ngan umato ha apostasya. Ha ikatulo, diri la kay gin-aghat ni Juan an mga Kristiano nga maglakat uyon ha kamatuoran kondi gin-aghat liwat niya hira nga magkooperar.
Han mga 65 K.P., han nakadto ha Palestina hi Judas, an bugto-ha-iroy ni Jesus, nagsurat hiya ha mga igkasi-Kristiano basi pahamangnoan hira mahitungod han magraot nga tawo nga nakasulod ha kongregasyon, ngan nagsagdon hiya kon paonan-o aatohan an magraot nga impluwensya. An pagtagad ha mensahe han tulo nga surat ni Juan ngan han surat ni Judas makakabulig ha aton nga magpabilin nga marig-on ha pagtoo bisan pa han kakurian.—Heb. 4:12.
PADAYON NGA MAGLAKAT HA KALAMRAG NGAN UYON HA GUGMA NGAN PAGTOO
An siyahan nga surat ni Juan nga para ha mga kahiusa ni Kristo, may maopay nga sagdon ha pagbulig ha mga Kristiano nga maatohan an apostasya ngan magpabilin nga marig-on ha kamatuoran ngan katadongan. Ginpabug-atan niya nga kinahanglan padayon nga maglakat ha kalamrag ngan uyon ha gugma ngan pagtoo.
“Kon maglakat kita ha kalamragan, sugad nga aada man [an Dios] ha kalamragan, may-ada ta pagkaangbitan ha usa kag usa,” nagsurat hi Juan. Ngan tungod kay an Dios amo an Burabod han gugma, an apostol nasiring: “Maghigugmaanay kita [ha] usa kag usa.” Tungod kay an “gugma han Dios” nagpapagios ha aton nga ‘tumanon an iya mga sugo,’ nadadaog naton an kalibotan pinaagi han “aton pagtoo” kan Jehova nga Dios, ha iya Pulong, ngan ha iya Anak.—1 Juan 1:7; 4:7; 5:3, 4.
Baton ha Pakiana Mahitungod ha Kasuratan:
2:2; 4:10—Paonan-o hi Jesus nagin nagpapahiuli nga “halad”? An pagpahiuli nangangahulogan hin pagtagbaw. Iginhatag ni Jesus an iya kinabuhi sugad nga nagpapahiuli nga halad nga pinaagi hito, iya gintagbaw o gintuman an kinahanglanon ha hingpit nga hustisya. Pinaagi hito nga halad, an Dios mahimo malooy ngan magpasaylo han sala hadton natoo kan Jesus.—Juan 3:16; Roma 6:23.
2:7, 8—Ano an “daan” ngan “bag-o nga sugo” nga ginhihisgotan ni Juan? Ginhihisgotan ni Juan an sugo may kalabotan ha may pagsakripisyo ha kalugaringon nga gugma ha kabugtoan. (Juan 13:34) Gintawag niya ito nga “daan” tungod kay iginsugo ito ni Jesus sobra 60 ka tuig na an naglabay antes iginsurat ni Juan an iya siyahan nga giniyahan han Dios nga surat. Salit, an mga tumuroo may-ada na hito “tikang ha tinikangan” han ira pagin Kristiano. “Bag-o” liwat ito tungod kay labaw pa ito ha ‘paghigugma ha igkasi-tawo sugad ha kalugaringon’ ngan nagkikinahanglan hin may pagsakripisyo ha kalugaringon nga gugma.—Leb. 19:18; Juan 15:12, 13.
3:2—Ano an “waray pa igpahayag” ha dinihogan nga mga Kristiano, ngan hin-o an ira makikita “sugad nga amo hiya”? Waray pa igpahayag ha ira kon ano an ira magigin hitsura kon banhawon hira nga may espirituhanon nga mga lawas. (Fil. 3:20, 21) Kondi, maaram hira nga “kon magpahayag na [an Dios], hinunugad [hira] ha iya; kay makikita [nira] hiya sugad nga amo hiya,” nangangahulogan nga ha “Espiritu.”—2 Kor. 3:17, 18.
5:5-8—Paonan-o nagtitestigo an tubig, dugo, ngan espiritu nga “hi Jesus amo an Anak han Dios”? An tubig usa nga testigo tungod kay han ginbawtismohan hi Jesus ha tubig, iginpahayag mismo ni Jehova an Iya pag-uyon ha iya sugad nga Iya Anak. (Mat. 3:17) An dugo, o kinabuhi ni Jesus, nga iginhalad sugad nga “lukat ha ngatanan,” nagpapakita liwat nga hi Jesus amo an Anak han Dios. (1 Tim. 2:5, 6) Ngan an baraan nga espiritu nagtestigo nga hi Jesus an Anak han Dios han kinunsad ito ha iya han iya bawtismo, nga tungod hito ‘naglibot hiya ha pagbuhat han maopay, ngan nanambal han ngatanan nga ginsasakit han Yawa.’—Juan 1:29-34; Buh. 10:38.
Mga Leksyon Para ha Aton:
2:9-11; 3:15. Kon tugotan han usa nga Kristiano an bisan ano o bisan hin-o nga magbungkag han iya gugma ha kabugtoan, naglalakat hiya ha espirituwal nga kasisidman, nga diri maaram kon makain hiya.
PADAYON NGA ‘MAGLAKAT HA KAMATUORAN’
Gintikangan ni Juan an iya ikaduha nga surat ha pagsiring: “An ansiano ngadto ha pinili nga babaye ngan ha iya mga anak.” Nagpahayag hiya hin kalipay ha pakakita nga an iba han “mga anak [han babaye] . . . nagkakalakat ha kamatuoran.”—2 Juan 1, 4.
Katapos magdasig ha pagkultibar han gugma, hi Juan nagsurat: “Ini amo an gugma, nga manggawi kita sumala ha iya mga sugo.” Nagpahamangno liwat hiya mahitungod han ‘paralimbong ngan antikristo.’—2 Juan 5-7.
Baton ha Pakiana Mahitungod ha Kasuratan:
1, 13—Hin-o an “pinili nga babaye”? Mahimo nga gin-uunabi ni Juan an usa nga babaye nga gintawag nga Kyria, an Griego nga pulong para ha “babaye.” O bangin nagamit hiya hin simboliko nga pulong ha pagtawag hin partikular nga kongregasyon basi mawurok an mga nakontra. Kon kongregasyon an gin-uunabi, an iya mga anak amo an mga membro han kongregasyon ngan an “mga anak han [iya] bugto” amo an mga membro han iba nga kongregasyon.
7—Ha ano nga paagi nga an mga paralimbong “waray pagtug-an” nga nagpakatawo hi Jesus? An mga paralimbong diri nagtutug-an han pagpakatawo ni Jesus. Posible nga iginninigar nira nga nabuhi hiya o iginsasalikway nira nga gindihogan hiya han baraan nga espiritu.
Mga Leksyon Para ha Aton:
2, 4. An aton paghibaro han “kamatuoran”—an bug-os nga katutdoan han Kristiano nga nagin bahin han Biblia—ngan an pagsunod hito, importante para ha aton kaluwasan.—3 Juan 3, 4.
8-11. Kon diri naton karuyag nga mawara “an grasya, an kalooy, an paghidait tikang ha Dios nga Amay, ngan tikang kan Jesu-Kristo,” ngan an mahigugmaon nga pakig-upod han mga igkasi-tumuroo, kinahanglan ‘mangnoan’ naton an aton espirituwalidad ngan isalikway adton “waray pagpadayon ha pagturon-an ni Kristo.”—2 Juan 3.
MAGIN ‘IGKASI-MAGBURUHAT HAN KAMATUORAN’
An ikatulo nga surat ni Juan, para ha iya sangkay nga hi Gayo. “Waray ko na kalipay nga labaw hini, ha pamati nga an akon mga anak nanggagawi ha kamatuoran,” nagsurat hiya.—3 Juan 4.
Ginkumendasyonan ni Juan hi Gayo ha paghimo hin “matinumanon nga buhat” ha pagbulig ha nabisita nga kabugtoan. “Kinahanglan nga . . . kita magkarawat hin sugad nga mga tawo, basi nga magkaburublig kita hin sugad nga pagbuhat han kamatuoran,” nasiring an apostol.—3 Juan 5-8.
Baton ha Pakiana Mahitungod ha Kasuratan:
11—Kay ano nga an iba nagbubuhat hin maraot? An iba diri nakilala ha Dios ngan diri naapresyar han iya mga kalidad tungod kay waray hira pagpabili han kamatuoran. Tungod kay diri nira hiya nakikita ha ira literal nga mga mata, nagios hira nga sugad hin diri hiya nakita ha ira.—Esek. 9:9.
14—Hin-o an gin-uunabi nga “kasangkayan”? An termino nga “kasangkayan” dinhi diri la kay adton duok nga magsarangkay. Gin-gamit ini ni Juan ha paghisgot han mga igkasi-tumuroo ha kabug-osan.
Mga Leksyon Para ha Aton:
4. An kabugtoan nga hamtong ha espirituwal nalilipay kon an mas batan-on nga mga membro han kongregasyon “nanggagawi ha kamatuoran.” Ngan duro gud an kalipay han mga kag-anak kon naglalampos hira ha pagbulig ha ira mga anak nga magin mahunahunaon ha espirituwal!
5-8. An iba hadton maduruto nga nagbubuhat tungod han ira gugma ha kabugtoan ngan kan Jehova amo an mga nagbibiyahe nga paramangno, misyonero, nagbuboluntaryo ha Bethel, ngan payunir. Angay subaron an ira pagtoo, ngan takos hira han aton mahigugmaon nga suporta.
9-12. Sadang naton subaron an susbaranan han matinumanon nga hi Demetrio imbes nga an malibak ngan parapakaraot nga hi Diotrepes.
“MAGPADAYON KAMO HA GUGMA HAN DIOS”
Iginhulagway ni Judas adton nakasulod ha kongregasyon sugad nga “mga magngurutob, magsurumbong, nga nanggagawi sugad ha ira mga kairiphon.” “An ira mga baba nagyayakan [hin] higtaas nga mga pulong, nga nagpapasulabi ha mga tawo tungod hin kapulsanan.”—Jud. 4, 16.
Paonan-o an mga Kristiano makakaato ha magraot nga impluwensya? “Mga hinigugma, hinumdumi niyo an mga pulong nga ipinamulong na han mga apostol han aton Ginoo Jesu-Kristo,” nagsurat hi Judas. Hiya nadugang: “Magpadayon kamo ha gugma han Dios.”—Jud. 17-21.
Baton ha Pakiana Mahitungod ha Kasuratan:
3, 4—Kay ano nga gin-aghat ni Judas an mga Kristiano nga ‘makig-away gud tungod ha pagtoo’? Tungod kay nakasulod ha kongregasyon an diri-magtadong. ‘Ginbalyoan nira an grasya han Dios hin kalaw-ayan.’
20, 21—Paonan-o kita ‘makakagpadayon ha gugma han Dios’? Mahihimo naton ini ha tulo nga paagi: (1) pagparig-on han aton “baraan gud nga pagtoo” pinaagi han maduruto nga pag-aram ha Pulong han Dios ngan madasigon nga pakigbahin ha pagsangyaw; (2) pag-ampo nga may baraan nga espiritu, o uyon ha giya hito; ngan (3) pagtoo ha halad lukat ni Jesu-Kristo nga tungod hito nagin posible an kinabuhi nga waray kataposan.—Juan 3:16, 36.
Mga Leksyon Para ha Aton:
5-7. Matatalwas ba an magraot ha paghukom ni Jehova? Imposible ito sumala ha tulo nga ehemplo nga iginsurat ni Judas ha pagpahamangno ha aton.
8-10. Sadang naton sundon an susbaranan ni Miguel nga arkanghel ngan tahuron adton gintagan han Dios hin awtoridad.
12. Peligroso ha aton pagtoo an salingkapaw nga gugma han mga apostata sugad la nga peligroso ha mga barko o paralangoy an mga bato o bahura nga natatago ha ilarom han tubig. Baga hin mahinatagon an palso nga magturutdo, kondi pariho hira hin dampog nga waray tubig tungod kay diri nira ginpapabilhan an espirituwal nga mga butang. Waray bunga hira pariho hin patay nga kahoy ha ikatarapos han katrakdag. Bubungkagon hira sugad hin nagkatutumba nga kahoy. Salit, maaramon nga likyan gud naton hira.
22, 23. An tinuod nga mga Kristiano nangangalas ha maraot. Ha pangalimbasog nga maluwas “an iba nga mga nagruruhaduha” tikang ha sugad-kalayo nga dayon nga kabungkagan, ginbubuligan hira ha espirituwal han mga hamtong ha kongregasyon, labi na han pinili nga mga paramangno.
[Mga Retrato ha pahina 28]
Nagtestigo an tubig, espiritu, ngan dugo nga “hi Jesus amo an Anak han Dios”