Ano an Iginpapahayag han Imo Pag-ampo Mahitungod ha Imo?
Ano an Iginpapahayag han Imo Pag-ampo Mahitungod ha Imo?
“O ikaw nga nabati hin pag-ampo, . . . ha imo makanhi an ngatanan nga unod.”—SAL. 65:2.
1, 2. Kay ano nga may pagsarig nga makakag-ampo an mga surugoon ni Jehova ha iya?
PINAMAMATIAN pirme ni Jehova an mga pag-ampo han iya magtinumanon nga surugoon. Oo, makakasarig kita nga namamati gud hiya. Bisan kon minilyon nga mga Saksi ni Jehova an durungan nga mag-ampo ha Iya, durungan nga mapapamatian ito ngatanan.
2 Tungod kay nasarig hi salmista David nga pinamatian han Dios an iya mga pakimalooy, nagkanta hiya: “O ikaw nga nabati hin pag-ampo, . . . ha imo makanhi an ngatanan nga unod.” (Sal. 65:2) Ginbaton an mga pag-ampo ni David tungod kay maunungon hiya nga magsiringba ni Jehova. Sadang naton pakianhan an aton kalugaringon: ‘An akon ba mga pangamuyo nagpapakita nga nasarig ako kan Jehova ngan an putli nga pagsingba amo an pinakaimportante ha akon? Ano an iginpapahayag han akon mga pag-ampo mahitungod ha akon?’
Mapainubsanon nga Mag-ampo kan Jehova
3, 4. (a) Ano an sadang magin disposisyon naton kon nag-aampo ha Dios? (b) Ano an sadang naton buhaton kon naguguol kita tungod han seryoso nga sala?
3 Kon karuyag naton nga batunon an aton mga pag-ampo, kinahanglan mapainubsanon nga mag-ampo kita ha Dios. (Sal. 138:6) Sadang naton hangyoon hi Jehova nga usisahon kita, sugad han ginsiring ni David: “Pagsusiha ako, O Dios, ngan hibaroi an akon kasingkasing: Suraya ako, ngan hibaroi an akon mga hunahuna; ngan kitaa kon may-ada ba ha akon in maraot nga agian, ngan igsulsog ako dida han agian nga waray kataposan.” (Sal. 139:23, 24) Diri la kita mag-ampo kondi sadang liwat naton sundon an pag-usisa han Dios ngan an sagdon han iya Pulong. Magigiyahan kita ni Jehova ha “agian nga waray kataposan,” ngan mabubuligan kita nga magpadayon ha dalan ngadto ha kinabuhi nga waray kataposan.
4 Ano man kon naguguol kita ha paghinunahuna han seryoso nga sala? (Basaha an Salmo 32:1-5.) An pagpinugong nga diri igsumat an sala nakakapaluya ha aton sugad la nga nauuga an kahoy ha panahon han katpaso tungod han duro nga kapaso. Tungod han sala ni David, nawara an iya kalipay ngan nagkasakit. Kondi nakagaan gud han iya kaguol an pagsumat ha Dios han iya sala! Hunahunaa an kalipay ni David han inabat niya nga an “iya pagsupak ginpasaylo” ni Jehova. Nakakagaan han kaguol an pagsumat han sala ha Dios, ngan nakakabulig liwat an mga tigurang nga mahibalik an espirituwal nga kahimsog han tawo nga nakasala.—Prob. 28:13; Jak. 5:13-16.
Mangamuyo Ngan Magpasalamat ha Dios
5. Ano an kahulogan han pangamuyo kan Jehova?
5 Kon may-ada nakakapabaraka ha aton, sadang naton sundon an sagdon ni Pablo: ‘Diri kamo mabaraka hin bisan ano nga bagay; kondi ha ngatanan nga bagay tungod ha pag-ampo ngan pangamuyo upod an pagpasalamat ipahibaro niyo ha atubangan han Dios an iyo mga pinangangaro.’ (Fil. 4:6) An “pangamuyo” amo an “mapainubsanon nga pakimalooy.” Sadang kita mangamuyo kan Jehova para han bulig ngan giya labi na durante han peligro o pagtimaraot.
6, 7. Ano pa an sadang pasalamatan naton ha aton mga pag-ampo?
6 Kondi, kon mag-aampo kita kon may-ada la ginkikinahanglan, ano an igpapahayag hito mahitungod han aton motibo? Hi Pablo nagsiring nga sadang isumat naton an aton mga pangamuyo ha Dios “upod an pagpasalamat.” May-ada gud kita hinungdan nga igpahayag an aton mga pagbati sugad la kan David nga nagsiring: “Imo, O Jehova, an pagkadungganan, ngan an gahum, ngan an himaya, ngan an pagdaog, ngan an pagkaharangdon: kay an ngatanan nga aada ha kalangitan ngan aada ha tuna imo; imo an ginhadian, O Jehova, ngan ikaw ginpahitaas sugad nga pangulo labaw ha ngatanan . . . Dios namon, nagpapasalamat kami ha imo, ngan nagdadayaw han imo mahimayaon nga ngaran.”—1 Kron. 29:11-13.
7 Nagpasalamat hi Jesus ha Dios para han pagkaon, tinapay ngan alaksiw nga gin-gamit ha Panihapon han Ginoo. (Mat. 15:36; Mar. 14:22, 23) Dugang pa ha pagpasalamat para han pagkaon, sadang kita ‘magpasalamat kan Jehova’ ha “iya urusahon nga mga buhat ha mga anak han mga tawo,” ha iya “magtadong nga mga sugo,” ngan ha iya pulong, o mensahe, nga aada ha Biblia.—Sal. 107:15;119:62, 105.
Pag-ampo Para ha Iba
8, 9. Kay ano nga sadang naton ig-ampo an mga igkasi-Kristiano?
8 Sigurado nga nag-aampo kita para ha aton kalugaringon, kondi kinahanglan mag-ampo liwat kita para ha iba—bisan ha diri naton kilala nga mga Kristiano. Bisan kon diri kilala ni apostol Pablo an ngatanan nga tumuroo ha Kolosas, hiya nagsurat: “Nagpapasalamat kami ha Dios nga Amay han aton Ginoo Jesu-Kristo, nga nag-aampo kami ha gihapon tungod ha iyo, nga hinbatian namon [an] nahitutungod han iyo pagtoo kan Kristo Jesus, ngan han iyo gugma ha ngatanan nga mga baraan.” (Kol. 1:3, 4) Nag-ampo liwat hi Pablo para ha mga Kristiano ha Tesalonika. (2 Tes. 1:11, 12) An sugad hito nga pag-ampo nagsusumat hin damu mahitungod ha aton ngan ha aton pagtagad ha aton kabugtoan ha pagtoo.
9 An aton mga pag-ampo para ha dinihogan nga mga Kristiano ngan ha ira mga kaupod nga ‘iba nga karnero’ nagpapakita han aton pagtagad ha organisasyon han Dios. (Juan 10:16) Ginhangyo ni Pablo an mga igkasi-tumuroo nga mag-ampo ‘nga ihatag unta ha iya an katadongan hin pamulong ha pagpahayag han tinago han maopay nga sumat.’ (Efe. 6:17-20) Nag-aampo ba kita para ha iba nga mga Kristiano ha sugad nga paagi?
10. Ano an epekto ha aton han pag-ampo para ha iba?
10 An pag-ampo para ha iba mahimo magbag-o han aton pagtagad ha ira. Kon igin-aampo naton an tawo nga aton nadidirian, posible nga mabag-o an aton pagtagad ha iya. (1 Juan 4:20, 21) An sugad hini nga pag-ampo nagpaparig-on ngan nag-aaghat hin pagkaurosa ha aton kabugtoan. Dugang pa, an sugad nga pag-ampo nagpapakita nga may-ada kita sugad-Kristo nga gugma. (Juan 13:34, 35) Ito nga kalidad bahin han bunga han espiritu han Dios. Nag-aampo ba kita para han baraan nga espiritu ngan naghahangyo kan Jehova nga buligan kita nga ipakita an bunga hito nga amo an gugma, kalipay, pakigdait, pagpailob, kalooy, pagkamaopay, pagtoo, ngan pagpugong ha kalugaringon? (Luk. 11:13; Gal. 5:22, 23) Kon amo, an aton mga pulong ngan buhat magpapakita nga naglalakat ngan nagkikinabuhi kita uyon ha espiritu.—Basaha an Galasia 5:16, 25.
11. Kay ano nga masisiring mo nga husto an paghangyo ha iba nga mag-ampo para ha aton?
11 Kon hibaroan naton nga an aton mga anak nasusulay nga mangopya ha eksamin ha eskwelahan, sadang naton ig-ampo hira ngan buligan pinaagi han Kasuratan basi gumawi hira hin tangkod ngan diri magbuhat hin bisan ano nga sayop. Ginsidngan ni Pablo an mga Kristiano ha Korinto: “Nag-aampo kami ha Dios nga diri kamo magbuhat hin maraot.” (2 Kor. 13:7) An sugad nga mapainubsanon nga pag-ampo nakakapalipay kan Jehova ngan nagsusumat hin maopay mahitungod ha aton. (Basaha an Proberbios 15:8.) Mahimo naton hangyoon an iba nga mag-ampo para ha aton, sugad la han ginbuhat ni apostol Pablo. Nagsurat hiya: ‘Mag-ampo kamo tungod ha amon: kay nasarig kami nga may-ada namon maopay nga konsensya, nga nagtitinguha kami ha paggawi hin maopay ha ngatanan nga mga butang.’—Heb. 13:18.
Iba Pa nga Iginpapahayag han Aton mga Pag-ampo
12. Ano an sadang magin importante nga mga bahin han aton pag-ampo?
12 Ipinapakita ba han aton mga pag-ampo nga malipayon ngan madasigon kita nga mga Saksi ni Jehova? An aton ba mga pangamuyo nakasentro gud ha pagsunod ha kaburut-on han Dios, pagsangyaw han mensahe han Ginhadian, pagbindikar han pagkasoberano ni Jehova, ngan pagbaraan han iya ngaran? Sadang ini magin importante nga mga bahin han aton mga pag-ampo, sugad han ipinakita han modelo nga pag-ampo ni Jesus, nga nagtitikang ha mga pulong: “Amay namon, nga aada ka ha langit, gindadayaw an imo ngaran; Kumanhi an imo ginhadian. Matuman an imo pagburut-an, sugad ha langit, amo man ha tuna.”—Mat. 6:9, 10.
13, 14. Ano an iginpapahayag han aton pag-ampo mahitungod ha aton?
13 An aton mga pag-ampo ha Dios nagpapahayag han aton motibo, interes, ngan hingyap. Maaram hi Jehova kon ano nga klase kita hin tawo. An Proberbios 17:3 nasiring: “An urayan nga daba para han salapi, ngan an hudno para han bulawan; Kondi hi Jehova nagsasari han mga kasingkasing.” Nakikita han Dios kon ano an aada ha aton kasingkasing. (1 Sam. 16:7) Maaram hiya kon ano an inaabat naton mahitungod ha aton mga katirok, ministeryo, ngan espirituwal nga kabugtoan. Maaram hi Jehova kon ano an aton ginhuhunahuna mahitungod han “kabugtoan” ni Kristo. (Mat. 25:40) Maaram hiya kon ginhihingyap gud naton an aton igin-aampo o kon gin-uutro-utro la an aton ginsisiring. Hi Jesus nagsiring: “Ha pag-ampo, diri kamo gumamit han waray pulos nga uli-uli, sugad han binuhat han mga Hentil; kay hira [sayop nga] naghuhunahuna, nga hira pamamatian tungod han ira damu nga yakan.”—Mat. 6:7.
14 An aton mga pulong ha pag-ampo nagpapahayag liwat nga nasarig gud kita ha Dios. “Ikaw [Jehova] . . . an akon arayopan, usa nga marig-on nga torre kontra ha akon mga kaaway. Maukoy ako dida ha imo tabernakulo hin waray kataposan: Maayop ako dida ha ilarom han imo mga pako,” siring ni David. (Sal. 61:3, 4) Kon simboliko nga ‘ginbubuklad han Dios an iya payag ha igbaw naton,’ nagkakaada kita hin seguridad ngan panalipod. (Pah. 7:15) Nakakaliaw gud an pagdaop kan Jehova ha pag-ampo nga may pagsarig nga dapig hiya ha aton ha anoman nga pagsari han aton pagtoo!—Basaha an Salmo 118:5-9.
15, 16. An pag-ampo mahimo makabulig ha aton nga masabtan an ano mahitungod han aton hingyap para han pribilehiyo ha pag-alagad?
15 An sinsero nga pag-ampo kan Jehova mahitungod han aton motibo makakabulig ha aton nga masabtan gud ito. Pananglitan, an hinungdan ba han aton pagkadisidido ha pagmangno ha katawohan han Dios amo an mapainubsanon nga hingyap ha pagbulig ngan pagbuhat han mahihimo naton ha pagpauswag han buruhaton han Ginhadian? O karuyag naton “magpangulo” o ‘magpakaginoo’ pa ngani ha iba? Diri sadang magin sugad hito an katawohan ni Jehova. (Basaha an 3 Juan 9, 10; Lukas 22:24-27.) Kon sayop an aton hingyap, an tangkod nga pag-ampo kan Jehova nga Dios makakagbuhayhag hito ngan mabulig ha aton nga magbag-o antes ito makagamot hin marig-on.
16 An Kristiano nga mga asawa bangin naghihingyap gud nga an ira mga bana mag-alagad sugad nga ministeryal ngan bangin ha urhi sugad nga paramangno, o tigurang. Sadang magbuhat an mga asawa uyon ha ira personal nga pag-ampo pinaagi han pangalimbasog nga magpakita hin maopay nga susbaranan. Importante ini tungod kay an pagyakan ngan paggawi han asawa ngan anak nakakaapekto han pagtagad han kongregasyon ha ulo han pamilya.
Pagpanguna ha Publiko nga Pag-ampo
17. Kay ano nga maopay an pag-usahan kon nag-aampo kita hin pribado?
17 Hi Jesus agsob nga nabulag ha mga tawo basi mag-ampo hin pribado ha iya Amay. (Mat. 14:13; Luk. 5:16; 6:12) Usahay kinahanglan liwat kita mag-usahan. Kon kalmado nga nag-aampo kita ha mamingaw nga lugar, posible nga makahimo kita hin mga desisyon nga nakakapalipay kan Jehova ngan mabulig ha aton nga magpabilin nga marig-on ha aton pagsingba ha iya. Kondi, nag-ampo liwat hi Jesus ha publiko, ngan maopay nga aton paghisgotan kon paonan-o ini pagbubuhaton hin husto.
18. Ano an pipira nga butang nga sadang hinumdoman han mga bugto nga lalaki kon nangunguna han publiko nga pag-ampo?
18 Ha aton mga katirok, maunungon nga kalalakin-an an nangunguna han pag-ampo ha kongregasyon. (1 Tim. 2:8) Ha kataposan han pag-ampo, an mga igkasi-tumuroo sadang magsiring hin “amen,” nga nangangahulogan “matuman unta.” Kondi, kinahanglan nauyon hira han igin-ampo. Ha modelo nga pag-ampo ni Jesus, nagin mataktika hiya ha paggamit hin mga pulong. (Luk. 11:2-4) Dugang pa, waray niya idetalye an ngatanan nga panginahanglan o problema han tagsa han iya mga mamarati. An personal nga mga panginahanglan o problema angay unabihon ha pribado, diri ha publiko nga pag-ampo. Ngan kon ginpapadumara ha pag-ampo ha grupo, likyan naton an pag-unabi hin kompidensyal nga mga butang.
19. Ano nga paggawi an sadang naton ipakita durante han publiko nga pag-ampo?
19 Kon may-ada nagdudumara han pag-ampo ha kongregasyon, kinahanglan magpakita kita hin matinalahuron nga “kahadlok ha Dios.” (1 Ped. 2:17) May-ada husto nga panahon ngan lugar para ha pipira nga paggawi nga diri angayan ha Kristiano nga katirok. (Ekles. 3:1) Pananglitan, kon may-ada usa ha grupo nga nag-aaghat ha ngatanan nga magkaraw-ingay an mga butkon o magkarapotay durante han pag-ampo, bangin makapakdol ini o makadisturbo ha iba, ngan ha mga bisita nga diri Saksi. An mga mag-asawa mahimo mataktika nga magkapotay, kondi kon maghangkopay hira durante han pag-ampo, bangin mahipakdol adton makakakita. Bangin maghunahuna an nakakakita nga mas importante ha mag-asawa an ira romantiko nga mga pagbati kay ha pagdayaw kan Jehova. Salit, tungod han aton hilarom nga pagtahod ha Iya, aton ‘pagbuhaton an ngatanan ha himaya han Dios’ ngan likyan an paggawi nga nakakadisturbo o nakakapakdol ha iba.—1 Kor. 10:31, 32; 2 Kor. 6:3.
Ano an Sadang Ig-ampo?
20. Isaysay an Roma 8:26, 27.
20 May panahon nga bangin diri kita maaram kon ano an aton isisiring ha pribado nga pag-ampo. Hi Pablo nagsurat: “Diri kita maaram ha pag-ampo sugad ha aton kinahanglan; kondi an [baraan nga] espiritu ngahaw amo an nakikimalooy tungod ha aton, nga may pagharoy nga diri sadang hiasoy. Ngan hiya [Dios] nga nag-uusisa han mga kasingkasing nakilala ha hunahuna han espiritu.” (Roma 8:26, 27) Iginpasurat ni Jehova ha Kasuratan an damu nga pag-ampo. Kon gagamiton naton ini nga giniyahan nga mga pag-ampo nga basihan han aton mga pangamuyo, kakarawaton ini ni Jehova sugad nga aton mismo pag-ampo salit ginbabaton niya ito. Kilala kita han Dios ngan maaram hiya han kahulogan han iya iginpasurat ha mga parasurat han Biblia pinaagi han iya espiritu. Ginbabaton ni Jehova an aton mga pangamuyo kon an espiritu “nakikimalooy” para ha aton. Kondi samtang mas nagtitikahilarom an aton pagsabot ha Pulong han Dios, nagigin mas masayon naton mahunahuna an angay ig-ampo.
21. Ano an aton paghihisgotan ha masunod nga artikulo?
21 Sugad han aton hinbaroan, damu an iginpapahayag han aton pag-ampo mahitungod ha aton. Pananglitan, nagpapahayag ito kon mationan-o kita nagin duok kan Jehova ngan mationan-o kahilarom an aton hinbabaroan ha iya Pulong. (Jak. 4:8) Ha masunod nga artikulo, aton paghihisgotan an pipira nga pag-ampo ngan mga pulong ha pag-ampo nga nakarekord ha Biblia. Ano an epekto han sugad nga pag-usisa ha Kasuratan ha aton pagdaop ha Dios ha pag-ampo?
Ano an Imo Baton?
• Ano an sadang magin disposisyon naton kon nadaop kita kan Jehova ha pag-ampo?
• Kay ano nga angay naton ig-ampo an aton mga igkasi-tumuroo?
• Ano an iginpapahayag han aton pag-ampo mahitungod ha aton ngan ha aton motibo?
• Paonan-o kita sadang gumawi durante han publiko nga pag-ampo?
[Mga Pakiana]
[Retrato ha pahina 4]
Pirme ka ba nagdadayaw ngan nagpapasalamat kan Jehova?
[Retrato ha pahina 6]
An aton paggawi ha publiko nga pag-ampo sadang magpasidungog pirme kan Jehova