Nahinunumdoman Mo Ba?

Nagpahimulos ka ba ha pagbasa han bag-o nga mga gowa han An Barantayan ngan The Watchtower? Kitaa kon mababaton mo an masunod nga mga pakiana:

• Ha ano nga paagi mapapariko ka han Dios?

Hadto, an iba sugad kanda Abraham ngan Salomon ginbendisyonan ni Jehova hin karikohan. Kondi an karikohan nga kinahanglan gud han mga Kristiano ngan igintutugot han Dios nag-uupod han pagtoo, kamurayaw, kakontento, ngan kalipay.—9/1-E, pahina 3-7.

• Ano an aton hibabaroan ha pagtalwas ni Jesus kan Pedro han nalulunod na hiya ha dagat? (Mat. 14:28-31)

Kon maobserbahan naton nga nagtitikaluya an pagtoo han usa nga bugto, simboliko nga iuunat naton an aton kamot ha pagbulig ha iya basi mas maparig-on an iya pagtoo.—9/15, pahina 8.

• Ano an iginsakripisyo ni Jehova ha pagluwas ha aton?

Nag-antos hi Jehova han ginpasakitan ngan gintamay an iya Anak. Sugad han ginpadagawan han pagin andam ni Abraham ha paghalad ha iya anak, hi Jehova nag-antos han ginpatay sugad hin kriminal an iya Anak.—9/15, pahina 28-29.

• Kay ano nga birilhon an Vatican Kodeks?

Usa ito nga Griego nga manuskrito nga tikang pa han mga 300 ka tuig katapos makompleto an Biblia. Haros kompleto ito han Hebreo nga Kasuratan ngan Kristiano Griego nga Kasuratan. Usa ito han ginagamit han mga eskolar ha pagsiguro kon ano an orihinal nga nakasurat ha Biblia.—10/1, pahina 18-20.

• Ano an igintututdo ha aton han Proberbios 24:27 mahitungod ha ‘pagtukod hin panimalay’?

An lalaki nga naruruyag pag-asawa kinahanglan mangandam para hito nga responsabilidad. Nag-uupod ini han pagin andam ha pagtagana han materyal nga panginahanglan han pamilya ngan ha pagpanguna ha espirituwal nga mga buruhaton.—10/15, pahina 12.

• Kay ano nga sayop an pagsiring nga an mga Saksi ni Jehova Protestante nga relihiyon?

Nagtikang an Protestantismo han ika-16 ka siglo ha Europa ha pangalimbasog nga magkaada reporma ha Iglesia Romana Katolika. An “Protestantismo” ginsusunod hadton nasuporta ha Repormasyon. Kondi an mga Saksi ni Jehova diri natuod han awtoridad han papa ha bug-os nga kalibotan ngan kinasingkasing nga nasuporta gud hira ha pagkaimportante han Biblia, pero diri nira ginsusunod an damu nga supak ha Kasuratan nga katutdoan ngan mga buruhaton han Protestante nga mga relihiyon.—11/1-E, pahina 19.

• Kinahanglan ba mag-aram han Hebreo ngan Griego basi masabtan an Biblia?

Diri. An pagkaada kahibaro hito nga mga yinaknan diri igo basi mas makasabot an usa ha mensahe han Biblia. Nagamit pa gihapon hin mga diksyonaryo ngan mga libro ha gramatika an usa nga nag-aram hito nga mga yinaknan. Ginsisiguro han Dios nga matipigan an mga pulong han iya gimaopayi nga Alagad pinaagi ha paghubad hito. Nagpapakita ini nga mahimo gamiton han usa an mga hubad han Biblia ha mga yinaknan yana ngan mahibabaro hiya han kamatuoran tikang hito.—11/1-E, pahina 20-23.

• Paonan-o hi Jehova ngan hi Jesus nagpakita ha aton hin susbaranan han maopay nga pamatasan?

Bisan kon hi Jehova an Soberano ha uniberso, buotan ngan matinalahuron hiya ha mga tawo. Han ginsugo niya hira Abraham ngan Moises, gin-gamit niya an Hebreo nga pulong nga nangangahulogan hin “alayon.” (Gen. 13:14; Eks. 4:6) Namamati liwat an Dios ha mga tawo. (Gen. 18:23-32) Sugad liwat hito hi Jesus, ngan kinaburut-on nga nabulig hiya ha iba, agsob nga gintatawag pa ngani hira ha ngaran.—11/15, pahina 25.

• Kay ano nga diri nagsasaurog han Bag-o nga Tuig an tinuod nga mga Kristiano?

An Bag-o nga Tuig importante nga pyesta ha kalendaryo han mga taga-Asia. Ginsasaurog ini basi magkaada swerte ngan magpakita hin pagtahod ha mga espiritu. Ginpapasidunggan ngan gintatahod han mga Kristiano an ira mga kag-anak, kondi diri hira nakikigbahin ha mga pangaon para ha namatay nga kaapoy-apoyan basi magin duok ha ira ngan panalipdan hira o uyonan hinin gintatagad nga mga dios ha panimalay.—12/1-E, pahina 20-23.