Gamita an Kada Adlaw han Imo Kinabuhi ha Paghimaya ha Dios

“PABATIA ako han imo mahigugmaon nga kalooy ha pagkaaga,” nag-ampo kan Jehova hi salmista David. “Itutdo ako han dalan diin ako maglalakat.” (Sal. 143:8) Kon ha imo pagmata ginpapasalamatan mo hi Jehova tungod han bag-o nga adlaw, pariho ka ba kan David nga naghahangyo ha Dios nga giyahan ka ha paghimo hin mga desisyon? Sigurado nga ito an imo ginbubuhat.

Sugad nga dedikado nga mga alagad ni Jehova, “mangaon [man kita], o manginom, o bisan ano an [aton] pagbuhaton,” nangangalimbasog kita nga ‘buhaton an ngatanan ha himaya han Dios.’ (1 Kor. 10:31) Maaram kita nga an aton panggawi ha kada adlaw mahimo magpasidungog o magpasipara kan Jehova. Nahinunumdom liwat kita nga an Biblia nasiring nga gin-aakusahan ni Satanas an kabugtoan ni Kristo ngan an ngatanan nga katawohan han Dios ha tuna “ha adlaw ngan gab-i.” (Pah. 12:10) Salit determinado kita nga pamatud-an nga buwaon hi Satanas ngan lipayon hi Jehova pinaagi han sagrado nga pag-alagad ha aton langitnon nga Amay “ha adlaw ngan gab-i.”—Pah. 7:15; Prob. 27:11.

Hisgotan naton hin madaliay an duha nga importante nga paagi kon paonan-o naton gagamiton an kada adlaw han aton kinabuhi ha paghimaya ha Dios. An siyahan amo an pagsiguro kon ano an sadang naton unahon ngan ikaduha, an pagpakita hin konsiderasyon ha iba.

Pagtuman han Aton Saad

Han nagdedikar kita kan Jehova, iginpahayag naton ha iya an kinasingkasing nga hingyap nga mag-alagad ha iya. Nagsaad liwat kita nga maglalakat ha iya mga dalan ha “ikinaadlaw”—oo, ha kadayonan. (Sal. 61:5, 8) Kon sugad, paonan-o naton gintutuman ito nga saad? Paonan-o naton ipinapakita an bug-os kasingkasing nga gugma kan Jehova kada adlaw?

Matin-aw nga iginsasaysay ha Biblia an mga responsabilidad nga ginlalaoman ni Jehova nga tutumanon naton. (Deut. 10:12, 13) An pipira hito mababasa ha kahon nga  “Mga Responsabilidad nga Hatag han Dios,” ha pahina 22. Ito ngatanan tikang ha Dios, salit importante ito. Ano an aton uunahon kon may duha o sobra pa nga nagkikinahanglan han aton atensyon?

Gin-uuna naton an sagrado nga pag-alagad sugad han pag-aram han Biblia, pag-ampo, pagtambong ha mga katirok, ngan pagtuman han ministeryo. (Mat. 6:33; Juan 4:34; 1 Ped. 2:9) Kondi, ha bug-os nga adlaw diri la espirituwal nga buruhaton an aton ginhihimo. Upod na hito an pagtrabaho, pag-eskwela, ngan damu nga buruhaton ha balay. Naghihimo liwat kita hin maopay nga eskedyol han aton sekular nga trabaho ngan han aton iba pa nga buruhaton basi diri ito makaulang ha aton sagrado nga pag-alagad, sugad han pagtambong ha mga katirok. Pananglitan, kon magbabakasyon kita ginsisiguro naton nga diri ito mahituman ha pagbisita han paramangno han sirkito, espesyal ngan sirkito nga asembleya, o distrito nga kombensyon. May mga higayon nga mahimo dunganon naton an pagbuhat han pipira nga responsabilidad. Pananglitan, an paglimpyo han Kingdom Hall mahimo magin proyekto han pamilya, o nagsasangyaw kita ha aton mga katrabaho o kaeskwela samtang naniniudto. Oo, kon nagdidesisyon kita sugad han pamiling hin trabaho, pagpili hin kurso, o kasangkayan, nadepende ito ha aton siyahan nga prayoridad ha kinabuhi—an pagsingba kan Jehova, an aton mahigugmaon nga Amay.—Ekles. 12:13.

 Magpakita hin Konsiderasyon ha Iba

Karuyag ni Jehova nga magin matinagaron kita ngan magbuhat hin maopay ha iba. Ha luyo nga bahin, igin-aaghat ni Satanas an pagin makikalugaringon. An iya kalibotan puno hin mga tawo nga ‘mahigugmaon ha kalugaringon’ ngan “mahigugmaon ha kalipayan” sugad man hadton ‘nagpupugas ngadto ha unod.’ (2 Tim. 3:1-5; Gal. 6:8) Damu an diri naghuhunahuna han epekto ha iba han ira ginbubuhat. “An mga buhat han unod” nakikita ha bisan diin.—Gal. 5:19-21.

Iba gud an disposisyon hadton nagpapakita hin gugma, pagkabuotan, ngan pagkamaopay ha iba tungod kay ginpapagios hira han baraan nga espiritu ni Jehova. (Gal. 5:22) An Pulong han Dios nagtututdo ha aton nga sadang naton unahon pirme an kaopayan han iba imbes nga an aton kalugaringon. Salit, matinagaron gud kita ha usa kag usa kondi diri kita naghihilabot ha personal nga mga butang. (1 Kor. 10:24, 33; Fil. 2:3, 4; 1 Ped. 4:15) Makonsiderasyon kita labi na ha mga igkasi-tumuroo. Kondi, mabinuligon liwat kita ha mga diri-tumuroo. (Gal. 6:10) Yana nga adlaw, maipapakita mo ba an mahigugmaon nga pagtagad ha iba?—Kitaa an kahon nga  “Magpakita hin Konsiderasyon,” ha pahina 23.

 An pagpakita hin konsiderasyon diri la ha panahon nga may okasyon o ha partikular nga sitwasyon. (Gal. 6:2; Efe. 5:2; 1 Tes. 4:9, 10) Lugod, kada adlaw nangangalimbasog kita nga hibaroan an kahimtang han iba ngan andam bumulig ha ira bisan kon diri kombinyente ha aton. Karuyag naton nga kinaburut-on nga ipaangbit an anoman nga may-ada kita—an aton panahon, katigayonan, eksperyensya, ngan kinaadman. Makakasarig kita nga kon mahinatagon kita ha iba, hi Jehova mahinatagon liwat ha aton.—Prob. 11:25; Luk. 6:38.

Sagrado nga Pag-alagad “ha Adlaw Ngan Gab-i”

Posible gud ba an sagrado nga pag-alagad kan Jehova “ha adlaw ngan gab-i”? Oo, pinaagi han pagin regular ngan maduruto ha ngatanan nga bahin han aton pagsingba. (Buh. 20:31) Gintutuman naton an sagrado nga pag-alagad pinaagi han pagbasa ngan pamalandong han Pulong han Dios kada adlaw, padayon nga pag-ampo, pagtambong ha ngatanan nga katirok, ngan pagsangyaw ha ngatanan nga higayon.—Sal. 1:2; Luk. 2:37; Buh. 4:20; 1 Tes. 3:10; 5:17.

Ginbubuhat gud ba naton an sugad nga sagrado nga pag-alagad kan Jehova? Kon amo, an aton hingyap nga lipayon hiya ngan pamatud-an nga buwaon hi Satanas makikita ha ngatanan nga bahin han aton pagkinabuhi ha kada adlaw. Nangangalimbasog kita ha paghimaya kan Jehova ha ngatanan nga aton ginbubuhat ngan anoman an aton kahimtang. Ginsusunod naton an iya mga prinsipyo ha aton pagyakan ngan panggawi, ngan kon naghihimo hin mga desisyon. Gin-aapresyar naton an iya mahigugmaon nga pagmangno ngan bulig pinaagi han bug-os nga pagsarig ha iya ngan paggamit han aton bug-os nga kusog ha pag-alagad ha iya. Ngan ginkakarawat naton an iya sagdon ngan disiplina kon nagsasayop kita tungod han pagkadiri-hingpit.—Sal. 32:5; 119:97; Prob. 3:25, 26; Kol. 3:17; Heb. 6:11, 12.

Padayon nga himayaon naton an Dios kada adlaw. Makakarepresko ito ha aton ngan magpapahimulos kita han mahigugmaon nga pagmangno han aton langitnon nga Amay ha waray kataposan.—Mat. 11:29; Pah. 7:16, 17.

[Kahon/Mga Retrato ha pahina 22]

 Mga Responsabilidad nga Hatag han Dios

• Padayon nga pag-ampo.—Roma 12:12.

• Pagbasa ngan pag-aram han Biblia, pag-aplikar hito.—Sal. 1:2; 1 Tim. 4:15.

• Pagsingba kan Jehova ha kongregasyon.—Sal. 35:18; Heb. 10:24, 25.

• Pagtagana han materyal, espirituwal, ngan emosyonal nga panginahanglan han pamilya.—1 Tim. 5:8.

• Pagsangyaw han maopay nga sumat han Ginhadian, ngan paghimo hin mga disipulo.—Mat. 24:14; 28:19, 20.

• Pag-ataman han aton pisikal, espirituwal, ngan emosyonal nga kahimsog nga nag-uupod han pagkaada maopay nga kaliawan.—Mar. 6:31; 2 Kor. 7:1; 1 Tim. 4:8, 16.

• Pagtuman han mga responsabilidad ha kongregasyon.—Buh. 20:28; 1 Tim. 3:1.

• Pagmintinar ngan paglimpyo han aton balay ngan han Kingdom Hall.—1 Kor. 10:32.

[Kahon/Retrato ha pahina 23]

 Magpakita hin Konsiderasyon

• Ha lagas nga igkasi-tumuroo.—Leb. 19:32.

• Ha may sakit ha pisikal o emosyon.—Prob. 14:21.

• Ha kakongregasyon nga nagkikinahanglan gud hin anoman nga maaakos mo paghatag.—Roma 12:13.

• Ha imo kapamilya.—1 Tim. 5:4, 8.

• Ha balo nga igkasi-tumuroo.—1 Tim. 5:9.

• Ha maduruto nga tigurang ha iyo kongregasyon.—1 Tes. 5:12, 13; 1 Tim. 5:17.