Kay Ano nga Sadang Pasidunggan an mga Lagas?

HA BAYBAYON han California, E.U.A., makikita an kahoy nga usa han may pinakadamu nga retrato. Gintatawag ito nga Lone Cypress. An iba nasiring nga sobra 250 ka tuig na iton maopay pagkit-on nga kahoy. Tungod han karig-on hito, nagin bantogan ito ngan gin-aataman ha iba-iba nga paagi. Pananglitan, ginparig-on ito pinaagi hin mga kable ngan ginbutangan hin mga bato an palibot han puno hito.

An Lone Cypress nagpapahinumdom ha aton han lagas na naton nga mga igkasi-Kristiano nga nagpapakita hin makatirigamnan nga pagpailob. Usa nga maopay hinduro nga paagi han ira pagpakita hini amo an pagpasamwak han maopay nga sumat. Hi propeta Joel nagtagna nga an “mga lagas” magpapasamwak han mensahe han Biblia. (Joel 2:28-32; Buh. 2:16-21) Hunahunaa la an damu nga oras nga ira ginagamit ha maduruto nga pagbulig ha iba nga mahibaro han “Maopay nga Sumat han ginhadian”! (Mat. 24:14) An pipira ha ira nag-ilob hin damu ka tuig nga pagtimaraot o iba pa nga kakurian. Kon an Lone Cypress bantogan tungod han karig-on pero ginpaparig-on pa pinaagi hin mga bato ngan kable, an mga edaran labi na gud nga takos pabilhan, tahuron, ngan pasidunggan!

Hi Jehova nga Dios nagsugo ha iya katawohan ha kadaan nga panahon: “Tumindog ka ha atubangan han mga ubanon, ngan tahora an bayhon han tigurang nga tawo.” (Leb. 19:32) Ha katawohan ni Jehova yana, damu an maopay nga susbaranan nga matinumanon nga ‘naglalakat kaupod han Dios’ hin damu na ka tuig. (Mika 6:8) Samtang padayon nga ginsusunod nira an mga prinsipyo ha  Kasuratan, an ira pagin ubanon usa gud nga “pudong-pudong han himaya.”—Prob. 16:31.

Hi apostol Pablo nagsiring ha batan-on nga hi Timoteo: “Ayaw pagsawaya an usa nga tigurang.” Lugod, kinahanglan trataron hiya ni Timoteo “sugad ha amay” ngan “an mga tigurang nga babaye sugad ha mga iroy.” (1 Tim. 5:1, 2) Salit hi Timoteo kinahanglan “tumindog,” siring pa, ha atubangan han mga ubanon. Kon sugad, matin-aw nga ginlalaoman ni Jehova nga matinalahuron an aton pakiistorya ha mga lagas.

An Roma 12:10 nasiring: “Palabihon niyo an usa kag usa ha kadungganan.” Sigurado nga an mga paramangno ha kongregasyon nagpapasidungog ha lagas nga kabugtoan. Kondi kita ngatanan sadang magpasidungog ha usa kag usa.

Syempre, an mga kapamilya an siyahan nga may responsabilidad ha ira mga kag-anak ngan kaapoyan. May kalabotan ha Lone Cypress, an mga tawo naghimo hin mga paagi basi magpabilin ito nga buhi, ngan padayon nga ginbubuhat nira ito. Kon sugad, kinahanglan maghimo liwat kita hin mga paagi nga matipigan an dignidad han aton nagtitikalagas nga mga kag-anak ngan kaapoyan. Pananglitan, an pagpamati hin maopay ha ira mabulig ha aton nga diri ipirit an aton karuyag ngan diri igbalewaray an ira pagbati.—Prob. 23:22; 1 Tim. 5:4.

Birilhon gud kan Jehova an mga lagas. Diri niya hira ginpapabay-an. (Sal. 71:18) Ha pagkamatuod, ginpaparig-on hira han Dios basi makapadayon ha pag-alagad ha iya hin matinumanon. Hinaot padayon liwat nga buligan ngan pasidunggan naton an mga lagas.

[Mga Retrato ha pahina 7]

Sugad han Lone Cypress nga kinahanglan parig-unon, an mga lagas liwat kinahanglan tahuron ngan pasidunggan

[Ginkuhaan han Retrato]

American Spirit Images/age fotostock