Kalipay Ko an Pag-alagad kan Jehova

Iginsumat ni Fred Rusk

Bata pa ako han naeksperyensyahan ko nga tinuod an ginsiring ni David ha Salmo 27:10: “Kon an akon amay ngan an akon iroy magpasibaya ha akon, dida hini kukuhaon ako ni Jehova.” Isusumat ko kon paonan-o ito nahitabo ha akon.

NAGDAKU ako ha estado han Georgia, U.S.A., ha uma hin gapas han akon lolo durante han Great Depression han dekada 1930. Hi Tatay nabido gud ha kamatay ni Nanay ngan han akon katatawo pa la nga bugto, ngan ginbilin niya ako kan Lolo. Kinadto hiya ha hirayo nga syudad basi didto magtrabaho. Ha urhi, nagsari hiya nga pakadtoon ako basi magkaupod na kami, pero waray gud ito mahitabo.

An magurang nga mga anak nga babaye ni Lolo an nasusunod ha balay. Bisan kon diri relihiyoso hi Lolo, an iya mga anak debotado nga mga Southern Baptist. Gintatarhog nira ako nga kakastiguhon kon diri ako umupod pagsingba kada Domingo. Salit tikang ha kabata, diri gud ako interesado ha relihiyon. Kondi nalilipay ako pag-eskwela ngan ha mga isport.

An Pagbisita nga Nakapabag-o han Akon Kinabuhi

Usa nga kulop han 1941, han 15 anyos ako, binisita ha amon balay an usa nga edaran nga lalaki ngan an iya asawa. Iginpakilala hiya ha akon nga “an imo Uncle Talmadge Rusk.” Dida ko pa la hiya nakilala, ngan hinbaroan ko nga Saksi ni Jehova hira nga mag-asawa. An iya iginsaysay mahitungod han katuyoan han Dios nga an mga tawo mabubuhi ha tuna ha waray kataposan iba gud ha akon nabatian ha singbahan. Ha amon pamilya, kadam-an an waray kumarawat han ira ginsiring ngan gintamay pa ngani ito. Waray na gud hira tuguti nga bumisita utro. Kondi an akon auntie nga hi Mary nga magurang ha akon hin tulo la ka tuig, kinarawat hin Biblia ngan hin mga publikasyon nga nagsaysay hito.

Nakombinse dayon hi Auntie Mary nga naagian niya an kamatuoran, ngan han 1942 nabawtismohan hiya sugad nga Saksi ni Jehova. Naeksperyensyahan liwat niya an igintagna ni Jesus nga nasiring: “An mga kaaway han tawo maaamo an mga aada ha panimalay niya.” (Mat. 10:34-36) Duro gud an pagkontra han pamilya. An usa niya nga magurang nga babaye nga prominente ha amon probinsya nakigkunsabo ha meyor ngan iginpaaresto hi Uncle Talmadge. Gin-akusaran hiya nga namamaligya nga waray lisensya ngan ginhukman nga salaan.

Ha dyaryo han amon syudad, iginreport nga an meyor, nga amo liwat an huwes, nagsiring ha mga nakadto ha korte: “An literatura nga iginpapanaltag hini nga lalaki . . . pariho kapeligroso han hilo.” Nag-apela hi Uncle ngan nagdaog, pero ginpriso anay hiya hin napulo ka adlaw.

 Kon Paonan-o Ako Ginbuligan ni Auntie Mary

Labot han pagsumat ha akon ni Auntie Mary mahitungod han iya bag-o nga gintotoohan, ginsangyawan liwat niya an amon mga amyaw. Inupod ako ha iya pag-study ha usa nga lalaki nga kinarawat han libro nga The New World. * Siring han asawa hini nga lalaki nga bug-os nga gab-i ginbasa han iya bana ito nga libro. Bisan kon diri ko karuyag nga mahidabi dayon ha mga butang nga may kalabotan ha relihiyon, naruyagan ko an akon bag-o nga nahibabaroan. Pero diri an mga katutdoan han Biblia an siyahan nga nakakombinse ha akon nga an mga Saksi an katawohan han Dios, kondi an paagi han pagtratar ha ira.

Pananglitan, usa ka adlaw nakita namon ni Auntie Mary ha nag-aaso nga surunogan hin basura an ebidensya nga ginsunog han iya mga magurang nga kababayin-an an iya mga literatura, pati na an ponograpo ngan nakarekord nga mga mensahe ha Biblia. Nasina gud ako, pero ginbusaan ako han akon usa nga auntie nga nagsiring, “Maabot an panahon papasalamatan mo kami hini nga amon ginbuhat.”

Han 1943, napiritan hi Auntie Mary nga bumaya ha amon balay kay nadiri hiya nga bayaan an iya bag-o nga relihiyon ngan umundang pagsangyaw ha iya mga amyaw. Hito nga panahon, malipayon gud ako nga hinbaroan ko na nga diri la kay may ngaran an Dios, hi Jehova, kondi mahigugmaon ngan mapinairon hiya nga Dios ngan diri niya ginsusunog an mga tawo ha naglalaga nga impyerno. Hinbaroan ko liwat nga hi Jehova may mahigugmaon nga organisasyon, bisan kon waray pa ako makatambong hin katirok.

Ha urhi, samtang nagti-trim ako han mga banwa ha amon bungsaran, may awto nga hinay-hinay nga pinarada ngan usa han mga lalaki nga sakay hito an nagpakiana kon ako ba hi Fred. Han hinbaroan ko nga mga Saksi hira, nagsiring ako, “Pasakya ako, ngan didto kita mag-istorya ha lugar nga waray makakabati ha aton.” Hi Auntie Mary an naghangyo ha ira nga bisitahon ako. An usa ha ira amo hi Shield Toutjian, usa nga nagbibiyahe nga ministro nga naghatag ha akon hin pagdasig ngan espirituwal nga giya ha panahon nga ginkikinahanglan ko gud ito. Ako na yana an ginkukontra han akon pamilya tungod kay gindidepensahan ko an gintotoohan han mga Saksi ni Jehova.

Hi Auntie Mary nga nakadto na ha Virginia nagsurat ha akon ngan nagsiring nga kon karuyag ko gud mag-alagad kan Jehova, puydi ako kumadto ha iya ngan didto umukoy. Nagdesisyon dayon ako nga kumadto. Ha Biernes han gab-i han Oktubre 1943, ginbutang ko ha kahon an pipira han akon importante nga mga gamit ngan ginhigot ito ha usa nga kahoy hirani ha amon balay. Pagka-Sabado, ginkuha ko ito, ha luyo ako inagi tipakadto ha balay han amon amyaw, ngan  sinakay tipakadto ha bungto. Katapos nagbiyahe ako ngadto ha syudad han Roanoke, diin naukoy hi Auntie Mary ha balay ni Edna Fowlkes.

Pag-uswag ha Espirituwal, Pagpabawtismo, Ngan Pag-alagad ha Bethel

Hi Edna usa nga mapinairon nga dinihogan nga bugto nga pariho kan Lydia ha Biblia. Nagplete hiya hin daku nga balay, ngan labot kan Auntie Mary, ginpaukoy liwat niya an asawa han iya bugto kaupod an iya duha nga anak nga hira Gladys ngan Grace Gregory. Ha urhi hira Gladys ngan Grace nagin mga misyonero. Sobra 90 anyos na yana hi Gladys, ngan matinumanon pa gihapon hiya nga nag-aalagad ha Bethel ha Japan.

Samtang naukoy ako ha balay ni Edna, regular ako nga natambong ha mga katirok ngan ginbansay ha ministeryo. Tungod kay may kagawasan ako ha pag-aram han Pulong han Dios ngan pagtambong ha mga katirok, natagbaw an akon hingyap nga mas makilala hi Jehova. Han Hunyo 14, 1944, nabawtismohan ako. Hi Auntie Mary ngan an magbugto nga Gregory nagtikang magpayunir ngan igintoka ha norte han Virginia. Nakabulig hira ha pag-establisar hin kongregasyon ha Leesburg. Temprano han 1946, nagpayunir ako ha kahirani nga probinsya. Han katpaso hito nga tuig, kami ngatanan nagbiyahe basi tumambong ha diri-hingangalimtan nga internasyonal nga kombensyon ha Cleveland, Ohio, han Agosto 4-11.

Hito nga kombensyon, hi Nathan Knorr, an nangunguna ha organisasyon hito nga panahon, naghisgot han mga plano ha pagdugang hin mga pasilidad ha Brooklyn Bethel. Upod hito an pagtukod hin bag-o nga residence building ngan pagpadaku han printery. Damu nga batan-on nga kalalakin-an an ginkinahanglan. Nagdesisyon ako nga karuyag ko nga didto mag-alagad kan Jehova. Salit ginpasa ko an akon aplikasyon, ngan katapos hin pipira ka bulan, han Disyembre 1, 1946, gintawag ako ha Bethel.

Paglabay hin mga usa ka tuig, an printery overseer nga hi Max Larson binisita ha akon ha Mailing Department. Ginsidngan niya ako nga didto na ako magtatrabaho ha Service Department. Didto, damu an akon hinbaroan mahitungod han pag-aplikar han mga prinsipyo ha Biblia ngan han paggios han organisasyon han Dios, labi na han nagtatrabaho ako upod ni T. J. (Bud) Sullivan, an department overseer.

Pipira ka beses nga ginbisita ako ni Tatay ha Bethel. Han edaran na hiya, nagin relihiyoso na hiya. Han ultimo niya nga pagbisita, han 1965, hiya nagsiring, “Puydi ka bumisita ha akon, pero diri na gud ako mabalik nganhi pagbisita ha imo.” Pipira ka beses ko hiya ginbisita antes hiya namatay. Natoo gud hiya nga makadto hiya ha langit. Pero naglalaom ako nga aada hiya ha panumdoman ni Jehova, ngan kon amo, ha pagkabanhaw aanhi hiya ha tuna ngan may paglaom nga mabuhi  ha waray kataposan ha ginpahiuli nga Paraiso, diri ha langit sugad han iya ginhunahuna.

Iba Pa nga Diri Hingangalimtan nga Kombensyon Ngan Pagpanukod

An mga kombensyon importante nga mga hitabo nga pirme nagriresulta hin espirituwal nga pag-uswag. Sugad gud hito an internasyonal nga kombensyon ha Yankee Stadium ha New York han dekada 1950. Han 1958, ha usa nga sesyon, an Yankee Stadium ngan Polo Grounds napuno hin 253,922 nga delegado tikang ha 123 nga nasud. Diri ko gud hingangalimtan an usa nga nahitabo hito nga kombensyon. Samtang nabulig ako ha convention office, hi Bugto Knorr nagdadagmit nga dinaop ha akon. Siring niya, “Fred, nangalimot ako pagtoka hin bugto nga magpapahayag ha ngatanan nga payunir nga aadto na yana ha ginpletehan nga katirokan nga hirani dinhi. Puydi ka ba kumadto dayon ngan maghatag hin maopay nga pahayag ha bisan ano nga topiko nga imo mahunahuna samtang tipakadto ka?” Nag-inampo ako samtang tipakadto ngan inabot ako didto nga naghahangos.

Samtang madagmit nga nagtitikadamu an mga kongregasyon ha New York City han dekada 1950 ngan 1960, diri na igo an ginpipletehan nga mga pasilidad nga ginagamit sugad nga Kingdom Hall. Salit tikang han 1970 tubtob 1990, tulo nga pasilidad ha Manhattan an ginpalit ngan gin-ayad basi magin angayan nga katirokan. Ako an tsirman han mga building committee hini nga mga proyekto, ngan damu an akon makalilipay nga eksperyensya kon paonan-o hura nga ginbendisyonan ni Jehova an mga kongregasyon nga nagburublig ha gastos ngan pagtukod hini nga mga katirokan nga ginagamit pa gihapon yana sugad nga mga sentro han tinuod nga pagsingba.

Mga Pagbag-o ha Akon Kinabuhi

Usa ka adlaw han 1957, samtang nagbabaktas ako ha parke butnga han residence building ngan printery tipakadto ha trabaho, tigda nga inuran. Nakita ko ha unhan an usa nga mahusay nga batan-on nga Bethelite. Waray hiya payong, salit ginpasuno ko hiya. Dida ko nakilala hi Marjorie, ngan tikang han ginkasal kami han 1960, malipayon nga nag-aalagad kami kan Jehova nga magkaupod, maopay man o maraot an kahimtang. Ginselebrar namon an ika-50 nga anibersaryo han amon kasal han Septyembre 2010.

Waray pag-iha han binalik kami tikang ha amon honeymoon, ginsidngan ako ni Bugto Knorr nga igintoka ako nga magin instruktor ha Gilead School. Espesyal gud ito nga pribilehiyo! Tikang han 1961 tubtob 1965, nagkaada lima nga mas maiha nga klase nga an kadam-an han mga estudyante mga Bethelite nga gintagan hin espesyal nga pagbansay ha pagdumara hin sanga nga opisina. Ha katrakdag han 1965, binalik an mga klase ha lima ka bulan, ngan nakasentro na liwat ito ha pagbansay hin mga misyonero.

 Han 1972, tikang ha Gilead School igintoka ako nga magin overseer han Writing Correspondence Department. An pagsaliksik basi mabaton an iba-iba nga pakiana ngan masulbad an mga problema nakabulig ha akon nga mas masabtan an mga katutdoan ha Biblia ngan kon paonan-o iaaplikar an higtaas nga prinsipyo han aton Dios ha pagbulig ha iba.

Katapos, han 1987 igintoka ako ha bag-o nga departamento nga gintatawag nga Hospital Information Services. Nagkaada mga seminar basi tutdoan an mga tigurang nga membro han mga Hospital Liaison Committee kon paonan-o makikiistorya ha mga doktor, huwes, ngan social worker basi isaysay an aton Kasuratanhon nga basihan ha diri pagpaabuno hin dugo. Usa nga daku nga problema amo an pag-abuno hin dugo ha mga anak han mga Saksi bisan kon diri natugot an mga kag-anak. Kasagaran na nga an mga doktor nakuha hin court order basi buhaton ito.

Kon iginsusuhestyon ha mga doktor an mga alternatibo ha pag-abuno hin dugo, kasagaran na nga nasiring hira nga waray hira suplay hito o mahal ito hinduro. Kon may surgeon nga nasiring hito, ini an kasagaran ko nga ginsisiring, “Dok, puydi ko makita an imo kamot?” Kon iginpapakita na niya ito, nasiring ako, “Maaram ka Dok, aada ha imo an usa han gimaopayi nga alternatibo ha dugo.” Ini nga pagdayaw han iya abilidad ha pag-opera nagpapahinumdom ha iya han usa nga butang nga maaram gud hiya—an paghirot ha paggamit hin scalpel makakabulig basi gutiay la an makarag nga dugo.

Ha naglabay nga duha ka dekada, hura nga ginbendisyonan ni Jehova ini nga mga pangalimbasog nga matutdoan an mga doktor ngan huwes. Daku an nabag-o ha ira disposisyon han mas nasabtan na nira an aton gintotoohan. Hinbaroan nira nga ginpapamatud-an han pagsaliksik mahitungod ha medisina nga epektibo an mga alternatibo ha dugo ngan damu nga doktor an andam bumulig ngan mga hospital diin puydi ibalhin an usa nga pasyente.

Tikang han 1996, kami ni Marjorie dinhi na nag-aalagad ha Watchtower Educational Center ha Patterson, New York, mga 110 ka kilometro ha norte han Brooklyn. Nagtrabaho ako hin madaliay ha Service Department ngan ha pipira ka panahon usa ako han nagtutdo ha mga Bethelite ngan ha mga nagbibiyahe nga paramangno. Hinin naglabay nga 12 ka tuig, ako na liwat an overseer ha Writing Correspondence, nga ginbalhin na tikang ha Brooklyn ngadto ha Patterson.

Mga Problema Tungod han Kalagas

Nagin mas makuri na ha akon an pagtuman han akon mga toka ha Bethel han nagin mga 85 anyos ako. Sobra napulo ka tuig na nga may-ada ako kanser. An akon inaabat pariho han inabat ni Hesekia, nga gindugangan han Dios an iya kinabuhi. (Isa. 38:5) May sakit liwat an akon asawa, ngan nagbubuligay kami basi mailob niya an Alzheimer’s disease. Hi Marjorie usa nga epektibo nga ministro ni Jehova ngan maopay nga susbaranan ngan magsaragdon ha mga batan-on. Pirme niya ako ginbubuligan ngan maunungon hiya nga padis. Maduruto hiya mag-aram han Biblia ngan maopay magtutdo hito, ngan damu han amon espirituwal nga mga anak an padayon nga nakikigkomunikar ha amon.

An akon auntie nga hi Mary namatay han Marso 2010 ha edad nga 87. Maopay hiya nga magturutdo han Pulong han Dios ngan nakabulig ha iba nga dumapig ha tinuod nga pagsingba. Damu ka tuig hiya nga nag-alagad hin bug-os-panahon. Mapasalamaton gud ako nga iya ako ginbuligan nga mahibaro han kamatuoran ha Pulong han Dios ngan magin pariho ha iya, usa nga surugoon han aton mahigugmaon nga Dios, hi Jehova. Ginlubong hiya sapit han iya bana, nga misyonero hadto ha Israel. Nasarig ako nga aada hira ha panumdoman ni Jehova ngan naghuhulat han pagkabanhaw.

Ha paghinumdom han akon 67 ka tuig nga pag-alagad kan Jehova, mapasalamaton ako han iya hura nga bendisyon ha akon. Kalipay ko gud an pagbuhat han kaburut-on ni Jehova! Nasarig ako ha iya diri matupngan nga pagkabuotan, ngan naglalaom gud ako nga makapahimulos ha saad han iya Anak: “Bisan hin-o nga mabaya ha mga balay o mga kabugtoan nga lalaki, o mga kabugtoan nga babaye, o amay, o iroy, o mga anak, o mga tuna tungod ha akon ngaran makakakarawat hin usa ka gatos ka pilo, ngan manununod han kinabuhi nga waray kataposan.”—Mat. 19:29.

[Footnote]

[Retrato ha pahina 19]

Ha uma hin gapas han akon lolo ha Georgia, U.S.A., han 1928

[Retrato ha pahina 19]

Hira Auntie Mary ngan Uncle Talmadge

[Retrato ha pahina 20]

Hira Auntie Mary, Gladys, ngan Grace

[Retrato ha pahina 20]

Ha akon bawtismo han Hunyo 14, 1944

[Retrato ha pahina 20]

Ha Service Department ha Bethel

[Retrato ha pahina 21]

Kami ni Auntie Mary ha internasyonal nga kombensyon ha Yankee Stadium han 1958

[Retrato ha pahina 21]

Ha adlaw han amon kasal ni Marjorie

[Retrato ha pahina 21]

Kami ni Marjorie han 2008