1, 2. Ano an iginsagdon ni Jesus ha iya mga apostol, ngan kay ano nga ginbuhat niya ito?

TUIG adto han 32 C.E. Nakadto hi Jesus ha distrito han Galilea han nagkaada problema. An iya mga apostol naglantugi kon hin-o ha ira an gilalabawi. Hi Lukas nga nagsurat hin Ebanghelyo nagsumat han nahitabo: “Nagkaada hin lantogi an mga tinun-an kon hin-o ha ira an gilalabawi. Nasabtan ni Jesus an ira ginhuhunahuna, sanglit kinmuha hiya hin bata, ginpatukdaw ha iya ligid, ngan nagsiring ha ira, ‘Makarawat ha akon an bisan hin-o nga makarawat hini nga bata ha akon ngaran; ngan makarawat liwat han nagsugo ha akon an bisan hin-o nga makarawat ha akon. Kay an giuubosi ha iyo ngatanan amo an gilalabawi.’” (Luk. 9:46-48, Maopay nga Sumat) Mapailubon kondi marig-on nga ginbuligan ni Jesus an iya mga apostol nga masabtan nga kinahanglan hira magin mapainubsanon.

² An sagdon ba ni Jesus nga magin mapainubsanon uyon ha disposisyon han mga Judio ha siyahan nga siglo o kabaliktaran hito? Mahitungod han disposisyon han mga tawo hito nga panahon, ini an ginsiring han Theological Dictionary of the New Testament: “Ha tagsa nga kahimtang, pirme nabangon an pakiana kon hin-o an mas labaw, ngan an paghatag ha tagsa nga indibiduwal hin dungog nga angay ha iya importante nga butang nga pirme ginkakabarak-an.” Ginsasagdonan ni Jesus an iya mga apostol nga magin iba ha kadam-an.

3. (a) Ano an iginpapasabot han paggawi sugad nga giuubusi, ngan kay ano nga bangin makuri ha aton nga gumios ha sugad hito nga paagi? (b) Ano nga mga pakiana an aton hihisgotan hini nga artikulo?

³ An Griego nga pulong nga iginhubad nga “giuubosi” nagpapasabot han usa nga maaram han iya limitasyon, mapainubsanon, ubos, diri importante, o diri prominente ngan diri maimpluwensya. Naggamit hi Jesus hin bata basi ipatin-aw ha iya mga apostol nga sadang hira magin  mapainubsanon ngan karawaton an ira limitasyon. Ito nga sagdon aplikado ha tinuod nga mga Kristiano yana sugad la nga aplikado ito ha siyahan nga siglo. Bangin makuri ha aton nga gumawi sugad nga giuubusi ha pipira nga kahimtang. Tungod han pagkadiri-hingpit, may tendensya kita nga magpahitaas, nga bangin makaaghat ha aton nga maghingyap nga magin prominente. An mga tawo ha palibot naton nga mahilig makigkompetensya ngan an espiritu han kalibotan bangin makaimpluwensya ha aton nga magin makikalugaringon, makiawayon, o karuyag nga amo pirme an masunod. Ano an makakabulig ha aton nga magkultibar hin mapainubsanon nga disposisyon? Paonan-o ‘an giuubusi ha aton amo an gilalabawi’? Ha ano nga mga bahin han kinabuhi sadang kita mangalimbasog nga ipakita an mapainubsanon nga disposisyon?

4, 5. Ano an makakaaghat ha aton nga kultibaron an pagkamapainubsanon? Paghatag hin ehemplo.

⁴ Usa nga paagi ha pagkultibar han pagkamapainubsanon amo an pagpamalandong nga hi Jehova mas labaw gud ha aton. Ha pagkamatuod, “waray pagsusi han iya sarabotan.” (Isa. 40:28) Ha pag-unabi han pipira nga bahin han pagkaharangdon ni Jehova, hi apostol Pablo nagsurat: “O pagkahilarom han kamanggaran han kinaadman ngan hibabroan han Dios! Mationan-o pagkamatin-aw an mga paghukom niya, ngan diri hitultolan an iya mga dalan!” (Roma 11:33) Bisan kon nag-uswag na gud an kahibaro han tawo ha damu nga butang tikang han iginsurat ni Pablo ito nga mga pulong mga 2,000 ka tuig na an naglabay, tinuod la gihapon ito. Anoman kadamu an aton hinbabaroan, diri gud kita mauubosan hin mahibabaroan mahitungod kan Jehova, ha iya mga buhat, ngan ha iya mga paagi, ngan an pakasantop hito sadang makaaghat ha aton nga magpaubos.

⁵ Pananglitan, an nakabulig kan Leo * nga magin mapainubsanon amo an pakasantop nga diri gud niya mahibabaroan an ngatanan mahitungod ha mga linarang han Dios. Sugad nga batan-on, hilig gud niya an syensya. Karuyag niya masabtan hin maopay an mahitungod han uniberso, salit ineskwela hiya hin astrophysics ngan ha urhi may importante hiya nga nasantop. Hiya nagsiring: “Basado ha akon gin-adman, nasantop ko nga diri gud bug-os nga masasabtan han tawo an uniberso kon pinaagi la han mga teoriya han syensya yana. Salit binalhin ako ha kurso nga abogasiya.” Inabot an panahon nga hi Leo nagin abogado ngan katapos nagin huwes. Ha urhi, hiya ngan an iya asawa nag-Bible study upod han mga Saksi ni Jehova, kinarawat han kamatuoran, ngan nagpabawtismo. Bisan kon edukado gud hi Leo, ano an nakabulig ha iya nga magin mapainubsanon? Hiya binaton, “An pakasantop nga anoman kadamu an aton mahibaroan mahitungod kan Jehova ngan ha uniberso, damu gud la gihapon an aton madidiskobrehan.”

6, 7. (a) Ano nga maopay gud nga susbaranan ha pagkamapainubsanon an iginpakita ni Jehova? (b) Paonan-o an pagkamapainubsanon han Dios nakakahimo ha usa nga “gilalabawi”?

 ⁶ Usa pa nga nabulig ha aton nga magin mapainubsanon amo an paghinumdom nga hi Jehova mismo nagpapakita hin pagkamapainubsanon. Tagda ini: “Kita mga kabulig han Dios ha pagbuhat.” (1 Kor. 3:9) Hunahunaa ito! Hi Jehova nga Dios, an Gihitaasi, nagpapasidungog ha aton ha paagi nga ginhatagan kita niya hin oportunidad nga buhaton an aton ministeryo gamit an iya Pulong, an Biblia. Bisan kon hi Jehova an nagpapatubo han mga liso nga aton gintatanom ngan ginsasaribohan, gintatagan kita niya hin dungganon nga toka nga magbuhat kaupod niya. (1 Kor. 3:6, 7) Diri ba maopay gud ito nga ehemplo han pagkamapainubsanon han Dios? Sigurado nga an susbaranan ni Jehova ha pagkamapainubsanon sadang makaaghat ha tagsa ha aton nga gumawi sugad nga giuubusi.

⁷ Daku gud an epekto ha salmista nga hi David han susbaranan han Dios ha pagkamapainubsanon. Hiya nagkanta kan Jehova: “Imo liwat ihinatag ha akon an taming han imo kaluwasan; ngan an imo pagkamanunuton [“pagkamapainubsanon,” NW] nakahimo ha akon nga daku.” (2 Sam. 22:36) Maaram hi David nga nahimo la niya an dagku nga butang nga iya ginbuhat ha Israel tungod kay hi Jehova nagpakita hin pagkamapainubsanon pinaagi ha paghatag hin pagtagad ngan pagbulig ha iya. (Sal. 113:5-7) Diri ba sugad liwat kita hito? May-ada ba mga kalidad, abilidad, ngan pribilehiyo an bisan hin-o ha aton nga ‘waray naton makarawat’ tikang kan Jehova? (1 Kor. 4:7) An nagawi sugad nga giuubusi nagigin “gilalabawi” tungod kay nagigin mas birilhon hiya sugad nga surugoon ni Jehova. (Luk. 9:48, Maopay nga Sumat) Aton usisahon kon paonan-o.

8. Paonan-o an pagkamapainubsanon nakakaapekto ha aton disposisyon ha organisasyon ni Jehova?

⁸ Importante nga magin mapainubsanon kita basi magin malipayon ha organisasyon han Dios ngan masuportahan an mga kahikayan han kongregasyon. Pananglitan, tagda hi Petra, usa nga batan-on nga babaye nga ginpadaku ha Saksi nga pamilya. Tungod kay karuyag niya nga hiya an masunod, binaya hiya ha kongregasyon. Paglabay hin mga tuig, nakig-upod na liwat hiya ha kongregasyon. Malipayon na hiya yana ha organisasyon ni Jehova ngan naruruyag gud pagsuporta ha mga kahikayan han kongregasyon. Ano an nakapabag-o han iya disposisyon? “Basi magin malipayon ako ha organisasyon han Dios,” siring niya, “an duha nga pinakaimportante nga kalidad nga kinahanglan ko masabtan ngan kultibaron amo an pagpaubos ngan pagkarawat han akon mga limitasyon.”

9. Ano an disposisyon han mapainubsanon nga tawo ha espirituwal nga pagkaon nga aton nakakarawat, ngan kay ano nga nagigin mas birilhon hiya tungod hito?

⁹ An mapainubsanon nga tawo mapasalamaton gud ha mga tagana ni Jehova, upod na an espirituwal nga pagkaon. Salit an sugad nga indibiduwal maduruto nga nag-aaram han Biblia ngan nagbabasa han Barantayan ngan Awake! nga mga magasin. Pariho han damu nga matinumanon nga surugoon ni Jehova, bangin nabatasan niya nga basahon an tagsa nga bag-o nga publikasyon antes ito ibutang ha estante han iya librarya. Kon iginpapakita naton nga mapainubsanon ngan mapasalamaton kita pinaagi ha pagbasa ngan pag-aram han aton mga publikasyon nga basado ha Biblia, nag-uuswag kita ha espirituwal, ngan mas nagagamit kita ni Jehova ha pag-alagad ha iya.—Heb. 5:13, 14.

10. Paonan-o naton maipapakita an pagkamapainubsanon ha sulod han kongregasyon?

¹⁰ An usa nga nagawi sugad nga giuubusi nagigin “gilalabawi” ha usa pa nga paagi. An tagsa nga kongregasyon may kwalipikado nga kalalakin-an nga ginpili ha paggiya han baraan nga espiritu ni Jehova basi mag-alagad sugad nga mga tigurang. Hira an naghihimo hin mga kahikayan ha espirituwal nga mga buruhaton sugad han mga katirok, pagsangyaw, ngan pag-shepherding.  Kon aton iginpapakita an pagkamapainubsanon pinaagi ha kinaburut-on nga pagsuporta hini nga mga kahikayan, nakakabulig kita basi magkaada kalipay, kamurayawan, ngan pagkaurosa ha sulod han kongregasyon. (Basaha an Hebreo 13:7, 17.) Kon usa ka nga tigurang o ministeryal nga surugoon, iginpapakita mo ba an pagkamapainubsanon pinaagi ha pagin mapasalamaton ha responsabilidad nga iginhatag ha imo ni Jehova?

11, 12. Ano nga disposisyon an makakahimo ha aton nga magin mas birilhon ha organisasyon ni Jehova, ngan kay ano?

¹¹ An usa nga nagawi sugad nga giuubusi nagigin “gilalabawi,” o mas birilhon ha organisasyon ni Jehova, kay tungod han iya pagkamapainubsanon nagigin maopay ngan mapulsanon hiya nga surugoon han Dios. Kinahanglan sagdonan ni Jesus an iya mga disipulo nga gumawi sugad nga giuubusi kay an pipira ha ira naimpluwensyahan han disposisyon han kadam-an hito nga panahon. “Nagkaada hin lantogi an mga tinun-an kon hin-o ha ira an gilalabawi,” siring han Lukas 9:46 (Maopay nga Sumat). Posible ba nga magtikang liwat kita paghunahuna nga mas maopay kita ha aton mga igkasi-tumuroo o ha iba nga mga tawo? Damu ha kalibotan an mapahitas-on ngan makikalugaringon. Sadang kita magin iba ha mga mapahitas-on pinaagi ha pagin mapainubsanon. Kon ginbubuhat naton ito ngan gin-uuna an kaburut-on ni Jehova, nagigin mas makapadasig kita ha aton kabugtoan.

¹² Kon nasasabtan naton an sagdon ni Jesus nga gumawi sugad nga giuubusi, napapagios kita nga ipakita an pagkamapainubsanon ha ngatanan nga bahin han kinabuhi. Aton hisgotan an tulo nga bahin.

13, 14. Paonan-o an bana o asawa sadang gumawi sugad nga giuubusi, ngan ano an mahimo magin epekto hini ha ira relasyon sugad nga mag-asawa?

¹³ Sugad nga mag-asawa. Damu nga tawo yana an naghuhunahuna la han ira katungod salit igin-iinsister nira ito bisan kon natatamakan na nira an katungod han iba. Kondi an mapainubsanon nga tawo ginigiyahan han disposisyon nga igin-aaghat ha aton ni Pablo. Ha iya surat ha mga taga-Roma, hiya nagsiring: “Padayunon ta an mga butang nga nakakahimo hin kamurayawan, ngan mga bagay nga nakakarig-on ha usa kag usa.” (Roma 14:19) An usa nga nagawi sugad nga giuubusi nangangalimbasog nga makigmurayaw ha ngatanan ngan labi na ha iya hinigugma nga asawa o bana.

¹⁴ Tagda an may kalabotan ha pagpahalibway. Bangin magkaiba nga klase hin pagpahalibway an karuyag han mag-asawa. An bana bangin naruruyag nga ha iya libre nga oras aada la hiya ha balay ngan magbasa hin libro. Ha luyo nga bahin, an asawa bangin naruruyag kumaon ha gawas o bumisita ha kasangkayan. Diri ba mas masayon ha asawa nga tahuron an iya bana kon iya nakikita nga mapainubsanon an iya bana ngan diri kay kalugaringon la nga karuyag an ginhuhunahuna kondi nagpapakita hin sinsero nga konsiderasyon ha iya mga karuyag ngan diri karuyag? Ngan ginhihigugma ngan gin-aapresyar gud han bana an iya asawa kon gintatagad han asawa an karuyag han iya bana ngan diri iginpipirit nga hiya an masunod! Nagigin marig-on an relasyon han mag-asawa kon an tagsa ha ira nagawi sugad nga giuubusi.—Basaha an Filipos 2:1-4.

15, 16. Ano nga disposisyon an iginpakita ni Mika, ngan paonan-o ini sadang makaapekto ha aton paggawi ha kongregasyon?

¹⁵ Ha kongregasyon. Ha kalibotan, damu an naghuhunahuna nga kinahanglan makuha dayon nira an ira karuyag. Gutiay la an ira pagpailob ngan nadiri gud hira paghulat. An pagkultibar han mapainubsanon nga disposisyon nabulig ha aton nga maghulat kan Jehova. (Basaha an Mika 7:7.) Kon mapainubsanon kita ngan naghuhulat kan Jehova, bibendisyonan kita. Maabat kita nga talwas, maliliaw,  ngan magigin malipayon. Salit pariho kan Mika, kinahanglan magin mapailubon kita ngan maghulat!

¹⁶ Maliliaw ka liwat kon mapainubsanon ka nga ‘maglaom,’ o maghulat kan Jehova. (Sal. 42:5) Bangin karuyag mo magin tigurang basi mas makabulig ha kongregasyon. (1 Tim. 3:1-7) Syempre, sadang mo buhaton an ngatanan nga imo mahihimo basi giyahan ka han baraan nga espiritu nga makultibar an mga kalidad nga ginkikinahanglan ha usa nga paramangno. Kondi ano man kon mas maiha an imo paghulat kay han iba? An usa nga mapainubsanon mapailubon nga naghuhulat hin pribilehiyo. Padayon nga mag-aalagad hiya kan Jehova hin malipayon ngan malilipay ha bisan ano nga toka nga ihatag ha iya.

17, 18. (a) Ano an mga kapulsanan kon nangangaro kita hin pasaylo ngan andam liwat magpasaylo ha iba? (b) Ano an igin-aaghat ha Proberbios 6:1-5?

¹⁷ Ha aton relasyon ha iba. Kadam-an nga tawo an nakukurian pagpangaro hin pasaylo. Kondi an mga surugoon han Dios nagkukultibar hin mapainubsanon nga disposisyon pinaagi han pagkarawat han ira mga sayop ngan pagpangaro hin pasaylo. Andam liwat hira magpasaylo ha mga sala han iba. An pagpahitaas nagriresulta hin pagkabahin-bahin ngan samok, kondi an pagpasaylo nagriresulta hin kamurayawan ha aton mga igkasi-tumuroo.

¹⁸ Bangin kinahanglan ‘magpaubos kita’ pinaagi han sinsero nga pagpangaro hin pasaylo ha iba kon waray naton matuman an usa nga ginkasabotan tungod han mga kahimtang nga diri naton kontrolado. Bisan kon bangin may sayop liwat hiya, kon mapainubsanon kita, mas huhunahunaon naton an aton sayop ngan andam kita pagkarawat hito.—Basaha an Proberbios 6:1-5.

19. Ano an mga hinungdan nga an tagsa ha aton sadang magin mapasalamaton ha sagdon han Biblia nga gumawi sugad nga giuubusi?

¹⁹ Mapasalamaton gud kita ha pag-aghat han Kasuratan nga kultibaron an mapainubsanon nga disposisyon! Bisan kon usahay makuri ha aton an pagpakita hin sugad nga disposisyon, an paghunahuna nga mas labaw gud ha aton hi Jehova ngan an paghinumdom nga hiya mismo nagpapakita hin pagkamapainubsanon makakapagios ha aton nga kultibaron iton maopay nga kalidad. Ha pagbuhat hito, magigin mas birilhon kita sugad nga mga surugoon ni Jehova. Salit hinaot an tagsa ha aton gumawi sugad nga giuubusi.