1, 2. Ano an kadungganan nga an mga Saksi ni Jehova la an may-ada, ngan ano an imo inaabat mahitungod hito?

DAMU an naghuhunahuna nga daku nga dungog kon tagan hira hin premyo tungod han ira maopay gud nga ginbuhat. Pananglitan, an pipira nakakarawat han Nobel Prize tungod han ira aktibo nga pagbulig basi magkaada kamurayawan butnga han magkaaway nga mga nasud. Kondi mas daku gud nga kadungganan nga sugoon han Dios sugad nga iya representante ha pagbulig ha mga tawo nga makigmurayaw ha ira Maglalarang!

² Sugad nga mga Saksi ni Jehova, kita la an may-ada hito nga kadungganan. Ha pagpanguna han Dios ngan ni Kristo, nakikimalooy kita ha mga tawo nga ‘magpahiuli ha Dios.’ (2 Cor. 5:20) Ginagamit kita ni Jehova basi ipahirani ha iya an mga tawo. Sugad nga resulta, minilyon ha sobra 235 nga katunaan an nabuligan nga magkaada maopay nga relasyon ha Dios ngan magkaada paglaom nga mabuhi ha waray kataposan. (Tito 2:11) Aktibo gud kita nga nag-iimbitar ha ‘bisan hin-o nga naruruyag nga kumuha han tubig han kinabuhi nga waray bayad.’ (Pah. 22:17) Tungod kay ginpapabilhan naton ini nga toka ngan maduruto nga ginbubuhat ito, husto la nga tawagon kita nga katawohan nga “aktibo ha mag-opay nga buhat.” (Tito 2:14) Aton yana hisgotan kon paonan-o an aton pagin aktibo ha mag-opay nga buhat nabulig ha aton nga madani an mga tawo nga kilalahon hi Jehova. An usa nga paagi amo an aton pagsangyaw nga buruhaton.

3. Ano an iginpapasarig ha aton han pagin aktibo ni Jehova?

³ Ha pag-unabi han mahihimo han pagmando han Anak han Dios, an libro han Isaias nasiring: “An kainit [o “pagin aktibo”] ni Jehova han mga kasundalohan magbubuhat hini.” (Isa. 9:7; NW) Ginpapabug-atan hini nga mga pulong nga interesado gud an aton langitnon nga Amay ha kaluwasan han katawohan. An susbaranan ni Jehova ha pagin aktibo nagpapakita gud nga kinahanglan bug-os-kasingkasing nga sumuporta kita, magin madasigon, ngan magin aktibo ha buruhaton nga iya iginhatag ha aton sugad nga mga parapasamwak han Ginhadian.  An aton duro nga hingyap nga mabuligan an mga tawo nga makilala an Dios repleksyon han pagin aktibo ni Jehova. Salit sugad nga mga igkasi-magburuhat han Dios, determinado ba kita nga buhaton an ngatanan nga aton mahihimo ha pagpasamwak han maopay nga sumat?—1 Cor. 3:9.

4. Paonan-o iginpakita ni Jesus an susbaranan ha pagpabilin nga aktibo ha ministeryo?

⁴ Tagda liwat an pagin aktibo ni Jesus. Nagpakita hiya hin hingpit nga susbaranan ha pagpabilin nga aktibo ha ministeryo. Bisan pa han duro nga pagkontra, nagpabilin hiya nga aktibo ha pagsangyaw tubtob ha kataposan han iya kinabuhi dinhi ha tuna. (Juan 18:36, 37) Tungod kay maaram hiya nga hirani na hiya mag-antos ngan mamatay, mas nagin determinado hiya nga buligan an iba nga makilala hi Jehova.

5. Ano an ginbuhat ni Jesus uyon ha iya ilustrasyon mahitungod han kahoy nga igera?

⁵ Pananglitan, han katrakdag han 32 C.E., naghatag hi Jesus hin ilustrasyon mahitungod han usa nga tawo nga ha iya urubasan may kahoy nga igera nga waray mamunga ha sulod hin tulo ka tuig. Han ginsidngan niya an parauma nga pudlon ito, an parauma naghangyo nga tagan hiya hin panahon basi butangan ito hin abuno. (Basaha an Lucas 13:6-9.) Hito nga panahon, gutiay la nga disipulo an matatawag nga bunga han pagsangyaw ni Jesus. Kondi sugad han iginpakita hito nga ilustrasyon mahitungod han parauma, gin-gamit ni Jesus an iya halipot nga panahon nga nabibilin—mga unom ka bulan—basi magin mas aktibo pa gud ha pagsangyaw ha Judea ngan Perea. Pipira ka adlaw antes hiya mamatay, nagtangis hiya para ha iya mga igkasi-Judio kay kadam-an ha ira an waray kumarawat han iya mensahe.—Mat. 13:15; Luc. 19:41.

6. Kay ano nga sadang kita magin mas aktibo ha ministeryo?

⁶ Tungod kay aanhi na kita ha durho han kataposan nga mga adlaw, diri ba importante gud nga magin mas aktibo kita ha pagsangyaw? (Basaha an Daniel 2:41-45.) Daku gud nga kadungganan nga magin mga Saksi ni Jehova! Ha bug-os nga kalibotan, kita la an katawohan nga makakagsumat han tinuod nga solusyon ha mga problema han mga tawo. Hinin bag-o la, usa nga kolumnista ha dyaryo an nagsiring nga imposible mabaton ini nga pakiana, “Kay ano nga nahitatabo ha mag-opay nga tawo an magraot nga butang?” Sugad nga mga Kristiano, responsabilidad ngan pribilehiyo naton nga isumat an mga baton han Biblia ha sugad hito nga mga pakiana ha ngatanan nga naruruyag mamati. Damu an aton hinungdan nga ‘mapuno hin kadasig pinaagi han baraan nga espiritu’ samtang gintutuman naton an igintoka ha aton han Dios. (Roma 12:11) Bibendisyonan han Dios an aton aktibo nga pag-ebanghelyo, ngan mabubuligan naton an iba nga makilala ngan higugmaon hi Jehova.

7, 8. Paonan-o an aton pagsakripisyo nagpapasidungog kan Jehova?

⁷ Sugad han iginpapakita han mga eksperyensya ni apostol Pablo, an aton ministeryo mahimo magresulta hin “mga gab-i nga waray pagkaturog” ngan “mga panahon nga waray kinakaon.” (2 Cor. 6:5) Matin-aw nga iginhuhulagway hini nga mga pulong kon ano an pagsakripisyo, ngan iginpapahinumdom hini ha aton an mga payunir nga gin-uuna an ministeryo kondi nagtatrabaho liwat basi suportahan an ira mga panginahanglan ha pinansyal. Hunahunaa liwat an aton maduruto nga mga misyonero ‘nga iginbubuhos an ira kalugaringon pariho hin halad nga irimnon’ basi buligan an mga tawo ha iba nga mga nasud. (Fil. 2:17) Kumusta man an aton maduruto nga mga tigurang nga usahay diri nakakakaon o diri nakaturog basi mangnoan an mga karnero ni Jehova? Aada liwat an aton lagas ngan may sakit nga kabugtoan nga nangangalimbasog gud nga makatambong ha mga katirok ngan umupod ha pagsangyaw. Napaparig-on gud kita kon aton ginhuhunahuna ini ngatanan nga surugoon ni Jehova nga andam magsakripisyo. An sugad nga mga pangalimbasog nakakaapekto ha panhunahuna han iba ha aton ministeryo.

⁸ Ha usa nga surat ha dyaryo nga Boston Target ha Lincolnshire, United Kingdom, usa nga magbarasa nga diri Saksi an nagsiring: “Nawawara na an pagtoo han mga tawo ha mga relihiyon . . . Ano  an ginbubuhat hini nga mga lider han singbahan ha bug-os nga adlaw? Diri gud hira nagawas ngan nakikiistorya ha mga tawo pariho han ginbuhat ni Kristo . . . An relihiyon la nga baga hin nagtatagad amo an mga Saksi ni Jehova, nga nakadto ngan nakikiistorya ha mga tawo ngan sinsero gud nga nagbubuhat han pagsangyaw han kamatuoran.” Hinin makikalugaringon nga kalibotan, an aton pagsakripisyo nagpapasidungog kan Jehova nga Dios.—Roma 12:1.

9. Ano an makakapagios ha aton nga magpabilin nga aktibo ha mag-opay nga buhat ha aton ministeryo?

⁹ Kondi, ano an aton bubuhaton kon baga hin nagtitikawara na an aton pagin aktibo ha ministeryo? Sadang naton pamalandungon an nahihimo ni Jehova pinaagi han pagsangyaw nga buruhaton. (Basaha an Roma 10:13-15.) An katalwasan nadepende ha pagkaada pagtoo kan Jehova ngan pagtawag ha iya ngaran, kondi diri ito bubuhaton han mga tawo kon diri naton hira sangyawan. An pakasantop hini sadang magpagios ha aton nga magpabilin nga aktibo ha mag-opay nga buhat ngan magin mauyatom ha pagpasamwak han maopay nga sumat han Ginhadian.

10. Kay ano nga masisiring naton nga an maopay nga paggawi nakakadani ha mga tawo nga kilalahon hi Jehova?

¹⁰ Importante an pagin aktibo ha ministeryo, pero diri ito igo ha pagdani ha mga tawo nga kilalahon an Dios. An ikaduha nga paagi nga nakakadani ha mga tawo ha Dios amo an maopay nga Kristiano nga paggawi. Ginpabug-atan ni Pablo an pagkaimportante han aton paggawi han hiya nagsurat: “Diri gud kami naghihimo hin hinungdan nga makapakdol, basi waray makita nga sayop ha amon sagrado nga buruhaton.” (2 Cor. 6:3) An aton maopay nga pagyakan ngan matadong nga paggawi naghahatag hin kadayawan ha katutdoan han Dios, ngan tungod hito nadadani an iba nga singbahon hi Jehova. (Tito 2:10) Ha pagkamatuod, agsob kita makabati hin mag-opay nga resulta kon nakikita han sinsero nga mga tawo nga nagawi kita pariho kan Kristo.

11. Kay ano nga sadang naton hunahunaon ngan ig-ampo an epekto ha iba han aton paggawi?

¹¹ Sugad la nga an aton maopay nga paggawi  mahimo makaaghat ha mga tawo nga maruyag paghibaro han kamatuoran, an maraot nga paggawi mahimo magin hinungdan nga diri hira maruyag nga makilala hi Jehova. Salit aadto man kita ha trabaho, ha balay, o ha eskwelahan, nangangalimbasog kita nga diri hatagan an bisan hin-o hin hinungdan nga makakita hin sayop ha aton ministeryo ngan paggawi. Kon tinuyo nga magbubuhat kita hin sala, nakakadaot gud an magigin resulta hito. (Heb. 10:26, 27) Sadang ini magpagios ha aton nga hunahunaon hin maopay an aton ginbubuhat ngan an impresyon han iba ha aton pagkinabuhi. Samtang nagtitikaraot an moralidad hini nga kalibotan, magigin mas masayon para ha sinsero nga mga tawo nga makita an “ginkakalainan niya nga nag-aalagad ha Dios ngan niya nga diri nag-aalagad ha iya.” (Mal. 3:18) Oo, an aton maopay nga Kristiano nga paggawi usa nga importante nga paagi ha pagbulig ha mga tawo nga magpahiuli ha Dios.

12-14. Paonan-o an aton pag-ilob ha mga pagsari ha pagtoo nakakaapekto ha panhunahuna han iba ha aton ministeryo? Paghatag hin ehemplo.

¹² Ha surat ni Pablo ha mga taga-Corinto, iya iginsaysay nga nag-antos hiya hin mga kasakitan, kakurian, pagkastigo, ngan kapriso. (Basaha an 2 Corinto 6:4, 5.) Kon nakakaeksperyensya kita hin mga pagsari ha pagtoo, an aton pagpailob mahimo makabulig ha iba nga karawaton an kamatuoran. Ha pag-ilustrar: Pipira ka tuig an naglabay, ginsarihan pagpoo an mga Saksi ni Jehova ha usa nga lugar ha Angola. Duha nga bawtismado nga Saksi ngan 30 nga interesado nga natambong na ha aton mga katirok an gindakop. Katapos, gintirok an mga umurukoy hito nga lugar basi magkita samtang ginlalatigo han mga parakontra inin inosente nga mga biktima tubtob nga magkasasamad hira. Bisan an kababayin-an ngan kabataan ira liwat ginlatigo. Katuyoan hito nga hadlukon an mga tawo basi waray mamamati ha mga Saksi ni Jehova. Kondi katapos hito, damu nga umurukoy an naghangyo ha mga Saksi hin pag-aram ha Biblia! Sugad nga resulta, an pagsangyaw nagpadayon, mas damu nga tawo an nagin Saksi, ngan ginbendisyonan an kabugtoan.

¹³ Iginpapakita hini nga ehemplo an mahimo magin daku nga epekto ha iba han aton marig-on nga pagsunod ha mga prinsipyo han Biblia. Bangin mahunahuna naton kon ano kadamu an napahiuli ha Dios tungod han kaisog ni Pedro ngan han iba nga apostol. (Buh. 5:17-29) Ha aton kahimtang, an aton mga kaeskwela, katrabaho, o kapamilya bangin kumarawat han kamatuoran kon makita nira nga marig-on kita nga nagbubuhat han husto.

¹⁴ Ha bisan ano nga panahon, may mga kabugtoan kita nga gintitimaraot. Pananglitan, ha Armenia, mga 40 nga brother an priso tungod han ira pagin neutral, ngan damu pa an posible mapriso ha masunod nga mga bulan. Ha Eritrea, 55 nga kabugtoan an priso, nga an iba ha ira sobra 60 anyos na an edad. Ha South Korea, mga 700 nga kabugtoan an priso tungod han ira pagtoo. Nahitatabo ini ha sulod hin 60 ka tuig na. Ig-ampo naton nga an pagkamatinumanon han aton kabugtoan nga gintitimaraot ha iba-iba nga nasud maghahatag hin kadayawan ha Dios ngan mabulig ha mga nahigugma ha katadongan nga dumapig ha tinuod nga pagsingba.—Sal. 76:8-10.

15. Pag-unabi hin eksperyensya kon paonan-o an pagin tangkod mahimo makadani ha iba ha kamatuoran.

¹⁵ An aton pagin tangkod mahimo liwat makadani ha mga tawo ha kamatuoran. (Basaha an 2 Corinto 6:4, 7.) Pananglitan, tagda ini nga eksperyensya: Usa nga sister an nag-aandam pagbayad han iya pasahe ha bus han ginsidngan hiya han iya kakilala nga diri hiya kinahanglan magbayad hin pasahe, kay hirani man la an iya hahaw-asan. Siring han sister nga kinahanglan magbayad, anoman ito kahirani. Katapos hito, hinaw-as na an iya kakilala. Dida hito, an drayber han bus nagpakiana ha iya, “Saksi ni Jehova ka ba?” “Oo,” siring niya. “Kay ano nga nagpakiana ka?” “Nabatian ko an iyo pag-istorya mahitungod han pagbayad han tiket, ngan maaram ako nga an mga Saksi ni Jehova kaupod ha gutiay na la nga mga tawo nga nabayad hin tiket ngan tangkod ha ngatanan nga butang.” Paglabay hin pipira ka bulan, usa nga lalaki an dinaop ha sister ha katirok ngan nagsiring, “Nahinunumdom ka ha akon? Ako an drayber han bus nga nakiistorya ha imo mahitungod han pagbayad han tiket. Han nakita ko an  imo paggawi, nagdesisyon ako nga mag-aram han Biblia upod han mga Saksi ni Jehova.” An aton reputasyon ha pagin tangkod nagrirekomendar ha aton sugad nga matataporan nga mga ministro.

16. Ano an mahimo magin resulta kon iginpapakita naton an hilawig nga pagpailob, gugma, ngan pagkabuotan? Paghatag hin ehemplo han ginbubuhat han mga lider han buwa nga relihiyon.

¹⁶ Nakakabulig liwat kita nga madani an mga tawo kan Jehova kon iginpapakita naton an mga kalidad sugad han hilawig nga pagpailob, gugma, ngan pagkabuotan. An iba nga nag-oobserbar ha aton mahimo maghingyap nga mahibaro mahitungod kan Jehova, ha iya mga katuyoan, ngan ha iya katawohan. Daku gud an kaibahan han disposisyon ngan paggawi han tinuod nga mga Kristiano ha pakita la nga debosyon ha Dios han mga tawo nga an pagsingba kasagaran nga ginbubuhat basi manlimbong. An iba nga lider han relihiyon nagriko tungod han panlimbong ha ira mga membro, ngan ira ginagamit an kadam-an han kwarta nga ira nakuha basi magkaada marahalon nga mga balay ngan sarakyan. An usa nagpahimo pa ngani hin balay hin ayam nga may aircon! Oo, damu han mga nasiring nga sumurunod hira ni Kristo an diri nasunod ha iya sugo nga ‘maghatag nga waray bayad.’ (Mat. 10:8) Lugod, pariho han magraot nga saserdote ha kadaan nga Israel, hira “nagtututdo tungod han suhol,” ngan kadam-an han ira igintututdo diri uyon ha Kasuratan. (Mika 3:11) An sugad nga hipokrito nga paggawi diri nabulig ha bisan hin-o nga magpahiuli ha Dios.

17, 18. (a) Paonan-o naton napapasidunggan hi Jehova kon aton ginsusubad an iya mga kalidad? (b) Ano an nagpapagios ha imo nga magpabilin nga aktibo ha mag-opay nga buhat?

¹⁷ Ha luyo nga bahin, an kasingkasing han mga tawo nababantad kon ira nasasantop nga igintututdo naton an kamatuoran ngan nakikita an aton maopay nga pagtratar ha aton igkasi-tawo. Pananglitan, ha pagbalay-balay han usa nga payunir, usa nga edaran na nga balo nga babaye nga iya nakaistorya an nagsiring dayon nga diri hiya interesado. Siring han babaye nga han ginpindot han brother an doorbell, nakadto hiya ha kusina ngan natungtong hin hagdan kay karuyag niya liwanan an bombilya. An brother nagsiring, “Delikado nga buhaton mo ito nga ikaw la.” Ginliwanan han brother an bombilya ngan katapos binaya. Han hinbaroan han anak han babaye an nahitabo, binilib gud hiya salit nangalimbasog hiya pagbiling ha brother basi magpasalamat. Ha urhi, kinarawat hiya hin pag-aram ha Biblia.

¹⁸ Kay ano nga determinado ka nga magpabilin nga aktibo ha mag-opay nga buhat? Bangin tungod kay maaram ka nga kon aktibo kita ha ministeryo ngan ginbubuhat an mga butang nga uyon ha kaburut-on han Dios, ginpapasidunggan naton hi Jehova ngan mabubuligan naton an iba nga matalwas. (Basaha an 1 Corinto 10:31-33.) An pagin aktibo ha pagsangyaw han maopay nga sumat ngan an aton maopay nga paggawi resulta han aton kinasingkasing nga hingyap nga ipakita an gugma ha Dios ngan ha igkasi-tawo. (Mat. 22:37-39) Kon aktibo kita ha mag-opay nga buhat, magkakaada kita tinuod nga kalipay ngan pagkakontento yana. Dugang pa, ginpapamulat naton an adlaw nga an ngatanan nga katawohan magigin aktibo ha tinuod nga pagsingba ngan magpapasidungog ha aton Maglalarang, hi Jehova.