Ginpipinamiling han hadi han Sirya an propeta han Dios nga hi Eliseo ngan hinbaroan niya nga hi Eliseo nakadto ha Dotan, usa nga pinader nga syudad nga nahimumutang ha igbaw han bungtod. An hadi nagsugo han iya kasundalohan ngadto ha Dotan, ngan hin kakabayohan ngan mga karomata ha pakig-away. Pagsirang han adlaw, napalibotan na han iya kasundalohan an Dotan.—2 Hadi 6:13, 14.

Han an surugoon ni Eliseo binuhát ngan ginawas, nakita niya an mga magdadakop kan Eliseo. Hiya nagsiring: “Abaa daw, agaron ko! Oonanhon ta pagbuhat?” Hi Eliseo binaton: “Ayaw kahadlok; kay hira nga dapig ha aton durodamu kay ha ira nga dapig ha ira.” Katapos hi Eliseo nag-ampo: “Jehova, nanginginyupo ako ha imo, pukrata an iya mga mata, nga hiya makakita.” An asoy nagpadayon: “Pinukrat ni Jehova an mga mata han batan-on nga lalaki; ngan hiya nakakita: ngan, kitaa, an bukid puno han kakabayohan ngan han mga karomata ha pakig-away nga kalayo nga naglilibot kan Eliseo.” (2 Hadi 6:15-17) Ano nga leksyon an aton hibabaroan tikang hini ngan ha iba pa nga hitabo ha kinabuhi ni Eliseo?

Bisan kon napalibotan hi Eliseo han kasundalohan han Sirya, kalmado hiya kay nasarig hiya kan Jehova ngan iya nakita nga ginpapanalipdan hiya ni Jehova. Diri kita naglalaom hin mga milagro yana, pero maaram kita nga ginpapanalipdan ni Jehova an iya katawohan sugad nga grupo. Ha usa nga paagi, kita liwat ginpapalibotan hin kakabayohan ngan mga karomata nga kalayo. Kon ‘makikita’ naton ito pinaagi han aton mga mata han pagtoo ngan kon pirme kita nasarig ha Dios, maabat kita nga talwas ngan bibendisyonan kita ni Jehova. (Sal. 4:8) Aton hisgotan kon ano an kapulsanan ha aton han iba nga panhitabo ha kinabuhi ni Eliseo.

Usa ka adlaw, han hi Eliseo nag-aarado ha usa nga uma, an propeta nga hi Elias dinaop ha iya ngan iginsul-ot ha iya an opisyal nga bado han propeta. Maaram hi Eliseo han karuyag sidngon hito. Gin-imbitar niya an iya kasangkayan ha usa nga panagtawo, nagsarit ha iya tatay ngan nanay, ngan binaya ha ira balay basi sumunod ngan magserbi kan Elias. (1 Hadi 19:16, 19, 21) Andam  hi Eliseo nga buhaton an anoman nga ipapabuhat ha iya han Dios, salit nagamit hiya ni Jehova ha damu nga paagi ngan ha urhi nag-alagad sugad nga propeta nga kasaliwan ni Elias.

Bangin unom ka tuig nga nagserbi hi Eliseo kan Elias. Hito nga panahon hi Eliseo an ‘naghuhuwad han tubig ngada han kamot ni Elias.’ (2 Hadi 3:11) An mga tawo hadto kasagaran na nga nagkakamot la kon nakaon. Katapos kumaon, an surugoon naghuhuwad hin tubig ha kamot han iya agaron basi malimpyohan ito. Salit an iba nga buruhaton ni Eliseo baga hin ubos o diri importante. Bisan pa hito, gintagad niya nga pribilehiyo an pagin surugoon ni Elias.

Yana, damu liwat nga Kristiano an sinulod ha iba-iba nga klase han bug-os-panahon nga pag-alagad. Ginbubuhat nira ito tungod han pagtoo ngan han hingyap nga buhaton an ira gimaopayi ha pag-alagad kan Jehova. An iba nabaya ha ira balay basi magtrabaho ha Bethel, ha mga proyekto ha panukod, ngan ha iba pa nga toka. Bangin hunahunaon han damu nga tawo nga an ira trabaho ubos o diri importante. Kondi waray ha aton sadang maghunahuna hin sugad hito, kay ginpapabilhan gud ito ni Jehova.—Heb. 6:10.

Antes han Dios ‘kuhaon hi Elias ngadto ha langit pinaagi hin alipuros nga hangin,’ ginsugo niya hi Elias nga kumadto ha Bet-el tikang ha Gilgal. Ginsidngan ni Elias hi Eliseo nga diri na umupod, kondi hi Eliseo binaton: “Diri ako mabaya ha imo.” Samtang nagbibiyahe hira, duha pa ka beses nga ginsidngan ni Elias hi Eliseo nga diri na umupod pero waray sumugot hi Eliseo. (2 Hadi 2:1-6) Sugad la nga hi Ruth waray bumulag kan Noemi, hi Eliseo waray liwat bumulag kan Elias. (Rut 1:8, 16, 17) Kay ano? Matin-aw nga tungod ito kay ginpabilhan ni Eliseo an pribilehiyo nga iginhatag ha iya han Dios nga magserbi kan Elias.

Hi Eliseo nagpakita hin maopay nga susbaranan ha aton. Kon makakarawat kita hin pribilehiyo ha organisasyon han Dios, papabilhan gud naton ito kon huhunahunaon naton pirme nga nag-aalagad kita kan Jehova. Waray na kadungganan nga malabaw pa hito.—Sal. 65:4; 84:10.

Samtang nagbibiyahe inin duha nga lalaki, hi Elias nagsiring kan Eliseo: “Pangaro kon ano in bubuhaton ko para ha imo, nga diri pa ako kukuhaon tikang ha imo.” Sugad han ginbuhat ni Solomon damu ka tuig antes hito, hi Eliseo naghangyo liwat hin usa nga butang nga makakabulig ha iya nga mag-alagad kan Jehova hin mas maopay. Naghangyo hiya nga an ‘duha ka bahin han espiritu ni Elias mangadto ha iya.’ (1 Hadi 3:5, 9; 2 Hadi 2:9) Ha Israel, an suhag nga anak nga lalaki nakakakarawat hin duha nga bahin ha panurundon. (Deut. 21:15-17) Karuyag sidngon, naghangyo hi Eliseo nga magin manurunod ni Elias, o kasaliwan sugad nga propeta. Dugang pa, matin-aw nga karuyag ni Eliseo nga magin maisugon pariho kan Elias, nga ‘maabugho para kan Jehova.’—1 Hadi 19:13, 14.

Ano an baton ni Elias ha hangyo han iya surugoon? “Nangaro ka hin makuri nga butang,” siring han propeta. “Kon ikaw makakita han pagkuha ha akon tikang ha imo, maamo ito para ha imo; kondi kon diri, diri ito masusugad.” (2 Hadi 2:10) Duha an karuyag sidngon han baton ni Elias. Siyahan, an Dios gud la an makakagbuot kon makakarawat ni Eliseo an iya ginhangyo. Ikaduha, kon karuyag ni Eliseo nga makarawat ito, kinahanglan diri hiya bumulag kan Elias anoman an mahitabo.

Iginhatag ba han Dios an ginhangyo ni Eliseo? An asoy nasiring: “Nahinabo, han hira naglilinakat pa, ngan naghihinimangraw, nga, kitaa, dida kinita in usa nga karomata nga kalayo, ngan kakabayohan nga kalayo, nga nagbulag ha ira nga duha; ngan hi Elias sinaka pinaagi han alipuros nga hangin ngadto ha langit. Ngan hi Eliseo nakakita hini.” * Ito an baton ni Jehova ha hangyo ni Eliseo. Nakakita hi Eliseo nga ginkuha hi Elias tikang ha iya, nakakarawat hin duha nga bahin han espiritu ni Elias, ngan nagin propeta han Dios kasaliwan ni Elias.—2 Hadi 2:11-14.

Ginpurot ni Eliseo an opisyal nga bado ni Elias nga nahulog tikang ha iya ngan iginsul-ot ito. Ito nga bado an nagpakilala nga hi Eliseo propeta na han Dios. Ha urhi nakita an dugang nga proyba nga propeta hiya han Dios han milagroso nga iya gintunga an katubigan ha Salog Jordan.

Sigurado nga daku gud an epekto kan Eliseo han iya nakita han hi Elias sinaka ha langit pinaagi han alipuros nga hangin. Bisan hin-o mahipapausa gud ha pakakita hin karomata ha pakig-away nga kalayo ngan kakabayohan nga kalayo! Pamatuod ito nga iginhatag ni Jehova an ginhangyo ni Eliseo. Kon ginbabaton ni Jehova an aton mga pag-ampo, diri kita nakakakita hin bisyon han  mga karomata ha pakig-away nga kalayo ngan kakabayohan nga kalayo. Kondi maaram kita nga ginagamit han Dios an iya daku nga gahum basi siguruhon nga matuman an iya kaburut-on. Ngan kon aton nakikita nga ginbibendisyonan ni Jehova an tunan-on nga bahin han iya organisasyon, sugad hin aton ‘nakikita’ nga nagios an iya karomata ha langit.—Esek. 10:9-13.

Damu an eksperyensya ni Eliseo nga nakakombinse ha iya nga gamhanan gud hi Jehova. Ha pagkamatuod, an baraan nga espiritu han Dios binulig ha iya nga magbuhat hin 16 nga milagro—doble han kadamu han nahimo ni Elias. * An ikaduha nga higayon nga hi Eliseo nakakita hin kakabayohan ngan karomata ha pakig-away nga kalayo amo an didto ha Dotan han ginpalibotan hiya han kasundalohan han Sirya, nga gin-unabi ha tinikangan hini nga artikulo.

Bisan kon hi Eliseo napalibotan han mga kaaway didto ha Dotan, nagpabilin hiya nga kalmado. Kay ano? Kay marig-on an iya pagtoo kan Jehova. Kinahanglan liwat naton an sugad hito nga pagtoo. Salit mag-ampo kita ha pangaro han baraan nga espiritu han Dios basi maipakita naton an pagtoo ngan an iba pa nga bahin han bunga han espiritu.—Luc. 11:13; Gal. 5:22, 23.

An nahitabo ha Dotan nagin dugang nga hinungdan nga hi Eliseo sumarig kan Jehova ngan ha iya mga kasundalohan nga anghel. Maaram hiya nga an Dios nagsugo hin mga anghel basi palibotan an syudad ngan an mga naglilikos hito. Pinaagi han pagbuta ha mga kaaway, milagroso nga gintalwas han Dios hi Eliseo ngan an iya surugoon. (2 Hadi 6:17-23) Hiton makuri nga kahimtang ngan ha iba nga sitwasyon, hi Eliseo nagpakita hin pagtoo ngan bug-os nga pagsarig kan Jehova.

Pariho kan Eliseo, sarig kita kan Jehova nga Dios. (Prob. 3:5, 6) Kon bubuhaton naton ito, ‘an Dios malolooy ngan magbubulahan ha aton.’ (Sal. 67:1) Oo, diri literal nga napapalibotan kita hin mga karomata ngan kakabayohan nga kalayo. Kondi durante han tiarabot nga “daku nga kasakitan” papanalipdan ni Jehova an iya katawohan. (Mat. 24:21; Pah. 7:9, 14) Samtang waray pa ito, aton pirme hinumdoman nga “an Dios amo an aton arayopan.”—Sal. 62:8.