HI Tatay ngan hi Nanay nagkakilala han 1919 ha kombensyon han International Bible Students ha Cedar Point, Ohio, U.S.A. Ginkasal hira ha urhi hito nga tuig. Natawo ako han 1922, ngan paglabay hin duha ka tuig natawo an akon bugto nga hi Paul. An akon asawa nga hi Grace natawo han 1930. An iya mga kag-anak nga hira Roy ngan Ruth Howell nagdaku sugad nga mga Estudyante han Biblia, ngan an iya lolo ngan lola mga Estudyante han Biblia liwat ngan kasangkayan ni Brother Charles Taze Russell.

Nakilala ko hi Grace han 1947, ngan nagpakasal kami han Hulyo 16, 1949. Antes kami magpakasal, prangka nga gin-istoryahan namon an mahitungod han amon kabubuwason. Nagdesisyon kami nga makigbahin ha bug-os-panahon nga pag-alagad ngan magpabilin nga waray anak. Han Oktubre 1, 1950, nagtikang kami pagpayunir nga magkaupod. Katapos, han 1952 gin-imbitar kami ha pansirkito nga buruhaton.

Inabat namon nga duha nga nagkinahanglan gud kami hin bulig basi matuman inin bag-o nga toka. Samtang nahibabaro ako tikang ha eksperyensyado nga kabugtoan, nagbiling liwat ako hin makakabulig kan Grace. Nakiistorya ako kan Marvin Holien, usa nga maiha na nga sangkay han amon pamilya nga may eksperyensya ha pagin nagbibiyahe nga paramangno, ngan ginpakianhan ko hiya: “Batan-on pa hi Grace ngan kulang hin eksperyensya. May mairirekomendar ka ba nga makakaupod niya hin pipira ka panahon basi magbansay ha iya?” “May-ada,” siring niya. “Hi Edna Winkle maiha na nga payunir nga makakabulig gud ha iya.” Ha urhi, nagsiring hi Grace mahitungod kan Edna: “Ginbuligan niya ako nga magin komportable ha pagbalay-balay, maaram hiya kon paonan-o aatubangon hin maopay an mga pagriwa, ngan iya ako gintutdoan nga mamati ha tagbalay basi mahibaro ako kon ano an angayan isiring. Hiya gud an akon ginkinahanglan!”

Nagserbi kami ni Grace ha duha nga sirkito ha estado han Iowa, upod na an mga bahin han estado han Minnesota ngan han South Dakota. Katapos iginbalhin kami ha New York Circuit 1, nga nag-uupod han distrito han Brooklyn ngan han Queens. Diri gud  namon hingangalimtan nga inabat kami nga kulang gud kami hin eksperyensya hito nga toka. Upod ha sirkito an Brooklyn Heights Congregation, nga nagkakatirok ha Kingdom Hall ha Bethel ngan may damu nga eksperyensyado nga Bethelite. Katapos han akon siyahan nga service talk dida hito nga kongregasyon, dinaop ha akon hi Brother Nathan Knorr ngan nagsiring hin sugad hini: “Malcolm, gintagan mo kami hin mga sagdon kon ano an papauswagon, ngan angayan adto. Hinumdumi, kon diri mo kami bubuligan pinaagi ha paghatag ha amon hin maloloy-on nga sagdon, gutiay la an imo bili ha organisasyon. Ipadayon iton maopay nga buhat.” Katapos han katirok, iginsumat ko ini kan Grace. Ha urhi, sinaka kami ha amon kwarto ha Bethel. Kapoy gud kami tungod han kabaraka salit nagtangis kami.

Paglabay hin pipira ka bulan, nakakarawat kami hin surat nga nag-iimbitar ha amon nga umiskwela ha ika-24 nga klase han Gilead, nga magradwar ha Pebrero 1955. Antes magtikang an klase ginsidngan kami nga an pagbansay ha amon diri para magin mga misyonero. Lugod, mabulig ito ha amon nga magin mas epektibo ha pansirkito ngan pandistrito nga buruhaton. Maopay gud nga eksperyensya an pag-eskwela ha Gilead, ngan nakabulig ito ha amon nga magin mapainubsanon.

Pakagradwar namon, igintoka kami ha pandistrito nga buruhaton. Upod ha amon distrito an mga estado han Indiana, Michigan, ngan Ohio. Katapos, diri ginlalaoman nga han Disyembre 1955, nakakarawat kami hin surat tikang kan Brother Knorr nga nasiring: “Magin prangka gud la kamo, ngan magin tangkod ha pagsumat ha akon yana. Kon sumiring kamo nga andam kamo kumanhi ha Bethel ngan magpabilin dinhi . . . o kon andam kamo kumarawat hin toka ha iba nga nasud katapos niyo mag-alagad ha Bethel hin pipira ka panahon, sumati ako. Kon mas karuyag niyo an pandistrito ngan pansirkito nga buruhaton, karuyag ko mahibaroan.” Binalos kami nga malilipay kami pagbuhat han bisan ano nga itutoka ha amon. Ginpakadto dayon kami ha Bethel!

Upod han mga toka nga akon nakarawat durante han akon makalilipay nga mga tuig han pag-alagad ha Bethel an paghatag hin mga pahayag ngan pagtutdo ha iba-iba nga lugar ha bug-os nga Estados Unidos. Binulig ako ha pagbansay ngan pagbulig ha damu nga batan-on nga brother nga ha urhi nagkaada mas dagku nga responsabilidad ha organisasyon ni Jehova. Ha urhi, nagin sekretaryo ako ni Brother Knorr ha opisina nga nag-oorganisa han pagsangyaw nga buruhaton ha bug-os nga kalibotan.

Makalilipay gud an mga tuig nga nagtrabaho ako ha Service Department. Didto nakaupod ko ha trabaho hi T. J. (Bud) Sullivan. Hadto hiya an paramangno hito  nga departamento hin damu ka tuig. Kondi damu liwat an akon nahibaroan tikang ha iba. Usa ha ira hi Fred Rusk, nga gintokahan nga magbansay ha akon. Nahingangatawa ako kon nahinunumdoman ko nga nagpakiana ako ha iya, “Fred, kay ano nga damu an imo ginbabag-o ha iba han akon mga surat?” Tinawa hiya, kondi igindugang niya inin seryoso nga punto, “Malcolm, kon nagyayakan ka, puydi mo pa ig-esplikar an imo ginsiring, pero kon nagsusurat ka, labi na kon tikang ito dinhi, kinahanglan klaro ngan husto ito tubtob ha mahihimo.” Katapos, malumo hiya nga nagsiring, “Ayaw kahadlok. Maopay an imo ginbubuhat, ngan pag-abot han panahon, mag-uuswag ka gihapon.”

Ha paglabay han mga tuig, nakakarawat hi Grace hin iba-iba nga toka ha Bethel, upod na an pagin housekeeper, nga nagtitipig nga malimpyo ngan maopay an mga kwarto ha Bethel. Naruyagan gud niya an iya trabaho. Tubtob yana, kon may mga panahon nga iginkikita namon an iba nga brother nga mga batan-on pa nga Bethelite hito nga mga tuig, nahiyom hira nga nasiring kan Grace, “Gintutdoan mo gud ako kon paonan-o oopayon an higdaan, ngan maaram ka, naruyagan gud ito ni Nanay.” Naruyagan liwat ni Grace an pagtrabaho ha Magazine, Correspondence, ngan Tape Duplicating nga mga departamento. An pagtrabaho hiton iba-iba nga toka nakabulig ha iya nga apresyaron nga anoman o diin man an amon toka ha organisasyon ni Jehova, pribilehiyo ito ngan bendisyon. Tubtob yana ito pa gihapon an iya gin-aabat.

Ha kabutngaan han dekada 1970, nasantop namon nga nagkikinahanglan hin dugang nga atensyon an amon nagtitikalagas nga mga kag-anak. Inabot an panahon nga kinahanglan namon maghimo hin makuri nga desisyon. Diri namon karuyag bayaan an Bethel ngan an amon mga igkasi-surugoon ni Jehova nga hinigugma na gud namon. Kondi inabat ko nga responsabilidad ko an pag-ataman ha amon mga kag-anak. Salit inabot an panahon nga binaya kami ha Bethel, kondi naglaom kami nga kon magbag-o an amon kahimtang, bangin kami makabalik.

Basi suportahan an amon kalugaringon ha pinansyal, nag-ahente ako hin insurance. Diri ko gud hingangalimtan an ginsiring ha akon han usa nga manidyer durante han pagbansay ha akon: “An kalamposan hini nga negosyo nadepende ha pagbisita ha mga tawo ha gab-i. Ito an panahon nga makakaistorya mo hira. Waray na mas importante pa kay han pagbisita ha mga tawo kada gab-i.” Binaton ako, “Sigurado nga nagyayakan ka basado ha imo eksperyensya, ngan ginrirespeto ko ito. Kondi may mga responsabilidad liwat ako may kalabotan ha pagsingba nga waray ko gud pagpasibay-i, ngan diri ko karuyag nga pasibay-an ito yana. Mabisita ako ha mga tawo ha iba nga gab-i, pero ha Martes ngan Huwebes han gab-i, kinahanglan ko tumambong ha importante hinduro nga mga katirok.” Ginbendisyonan gud ako ni Jehova ha diri ko pagpalya ha mga katirok tungod han trabaho.

Han namatay hi Nanay ha nursing home han Hulyo 1987, nakadto kami. An head nurse dinaop kan Grace ngan nagsiring: “Mrs. Allen, uli na ngan pahuway. Maaram an ngatanan nga pirme ka nakadi basi  atamanon an imo ugangan. Hinaot magin murayaw ka ngan kampante kay ginhimo mo an ngatanan nga imo maaakos.”

Han Disyembre 1987, nag-aplay kami nga mag-alagad utro ha Bethel, an lugar nga amon gud naruruyagan. Kondi paglabay hin pipira la ka adlaw, hinbaroan namon nga hi Grace may kanser ha colon. Katapos maoperahan ngan mag-opáy, nagsiring an mga doktor nga waray na hiya kanser. Kondi hito nga panahon, nakakarawat kami hin surat tikang ha Bethel nga nagrekomendar nga ipadayon namon an amon ministeryo kaupod an lokal nga kongregasyon. Determinado kami nga magpadayon ha amon buruhaton para ha Ginhadian.

Inabot an panahon nga nagkaada ako higayon nga makatrabaho ha Texas. Nahunahuna namon nga magigin maopay para ha amon an mas mapaso nga klima didto, ngan ito gud an nahitabo. Didi ha Texas, mga 25 ka tuig na nga kaupod namon an mahigugmaon nga kabugtoan nga nagin duok na gud ha amon.

Hi Grace pauroutro nga nagkaada kanser ha colon ngan thyroid, ngan hinin bag-o la nagkaada hiya kanser ha suso. Kondi waray gud hiya magreklamo han iya kahimtang o magkwestyon han prinsipyo han pagkaulo ngan pagkooperar. Agsob hiya pakianhan, “Ano an sekreto han iyo kalamposan sugad nga mag-asawa ngan han kalipay nga nakikita ha iyo?” Naghatag hiya hin upat nga hinungdan: “Mag-best friend kami. Nag-iistorya kami kada adlaw. Nalilipay kami nga maggahin hin panahon nga magkaupod kada adlaw. Ngan diri gud kami nakaturog kon nasisina pa kami ha usa kag usa.” Syempre, usahay diri kami nagkakasinabtanay, pero nagpapasaylo kami ngan ginkakalimtan ito, ngan epektibo gud ito.

Ha ngatanan nga pagsari nga amon gin-agian, may mag-opay nga leksyon nga amon hinbaroan:

1.  Sarig pirme kan Jehova ngan karawata an iya igintutugot. Ayaw gud sarig ha imo kalugaringon nga pagsabot.—Prob. 3:5, 6; Jer. 17:7.

2.  Sarig ha paggiya han Pulong ni Jehova, anoman an kahimtang. Importante an pagsugot kan Jehova ngan ha iya mga balaud. Usa la an imo puydi pilion—magin masinugtanon o diri.—Roma 6:16; Heb. 4:12.

3.  An pinakaimportante ha kinabuhi amo an pagkaada maopay nga ngaran kan Jehova. Unaha an iya kaburut-on, diri an pamiling hin materyal nga mga karikohan.—Prob. 28:20; Ekles. 7:1; Mat. 6:33, 34.

4.  Pag-ampo nga magin mabungahon ngan aktibo ha pag-alagad kan Jehova tubtob ha imo mahihimo. Pagpokus ha imo mahihimo, diri ha diri mo mahihimo.—Mat. 22:37; 2 Tim. 4:2.

5.  Waray iba nga organisasyon nga ginbibendisyonan ngan gin-uuyonan ni Jehova.—Juan 6:68.

An tagsa ha amon ni Grace nag-alagad kan Jehova hin sobra 75 ka tuig na, ngan sugad nga mag-asawa, nag-alagad kami ha iya hin haros 65 ka tuig na. Nagin makalilipay gud an amon pag-alagad kan Jehova nga magkaupod hini ngatanan nga dekada. Naglalaom ngan nag-aampo kami nga maeksperyensyahan liwat han ngatanan nga aton kabugtoan nga mapulsanon gud an kinabuhi kon nasarig kita kan Jehova.