1. Kay ano nga bangin diri kita magin mapailubon ha paghulat?

HAN maestablisar an Mesianiko nga Ginhadian han 1914, nagtikang an kataposan nga mga adlaw han sistema ni Satanas. Sugad nga resulta han girra ha langit, iginlabog ni Jesus an Yawa ngan an mga demonyo nganhi ha tuna. (Basaha an Pahayag 12:7-9.) Maaram hi Satanas nga “halipot na la an iya panahon.” (Pah. 12:12) Kondi ito nga “panahon” umabot na hin haros 100 ka tuig, ngan an pipira bangin naghuhunahuna nga an kataposan nga mga adlaw maiha na hinduro. Nawawad-an na ba kita hin pagpailob samtang ginhuhulat naton an panahon han pagbungkag ni Jehova ha sistema ni Satanas?

2. Ano an hihisgotan hini nga artikulo?

² Peligroso an pagin diri mapailubon kay mahimo ito magresulta nga gumios dayon kita nga diri anay naghuhunahuna. Ano an mabulig ha aton nga maghulat hin mapailubon? Ini nga artikulo mabulig ha aton pinaagi ha pagbaton han masunod nga mga pakiana. (1) Ano an aton hibabaroan tikang ha ehemplo ni propeta Mika mahitungod ha pagpailob? (2) Ano nga mga hitabo an magigin tigaman nga hirani na an kataposan? (3) Paonan-o naton maipapakita nga mapasalamaton kita ha pagpailob ni Jehova?

3. Ha panahon ni Mika, ha ano maipapariho an kahimtang han Israel?

³ Basaha an Mika 7:2-6. Nakita han propeta ni Jehova nga hi Mika an pagtikaluya han espirituwalidad han mga Israelita tubtob nga waray na gud hira magin matinumanon kan Jehova durante han pagmando han maraot nga hi Hadi Ahas. Iginpariho ni Mika an diri matinumanon nga mga Israelita ha “baknit,” usa nga tunukon nga tanom. Sugad la nga an baknit nakakasamad ha usa nga naglalakat dida hito, nadaot liwat han maraot nga mga Israelita an bisan hin-o nga nakaupod nira. Nagtikaduro pa gud an karaotan kay bisan ha sulod han pamilya, nawara an gugma ha usa kag usa. Tungod kay maaram  hi Mika nga diri niya mababag-o an kahimtang, sinsero nga igin-ampo niya ito kan Jehova. Katapos, mapailubon nga naghulat hiya ha paggios han Dios. Sinarig hiya nga tatadungon ito ni Jehova ha Iya itinanda nga panahon.

4. Ano nga mga pagsari an aton naieksperyensyahan?

⁴ Pariho kan Mika, nagkikinabuhi kita kaupod han mga tawo nga makikalugaringon. Damu an “diri mapasalamaton, diri maunungon, waray gugma ha mga kapamilya.” (2 Tim. 3:2, 3) Nasusubo kita kon an aton mga katrabaho, kaeskwela, ngan mga amyaw nagpapakita hin makikalugaringon nga disposisyon. Kondi, an pipira nga surugoon han Dios nakakaeksperyensya hin mas makuri nga pagsari. Hi Jesus nagsiring nga an iya mga sumurunod kukontrahon han ira mga kapamilya, ngan gin-gamit niya an pariho nga mga pulong ha Mika 7:6 ha paghulagway han magigin epekto han iya mensahe. Hiya nagsiring: “Kinanhi ako basi pahinaboon an pagkabahin-bahin han anak nga lalaki kontra ha iya amay, han anak nga babaye kontra ha iya iroy, ngan han umagad nga babaye kontra ha iya ugangan nga babaye. Oo, magigin kaaway han usa nga tawo an iya mismo panimalay.” (Mat. 10:35, 36) Makuri gud ilubon an pagtamay ngan pagkontra han mga kapamilya nga diri pariho ha aton an pagtoo! Kon naieksperyensyahan naton ito, diri kita sadang manluya. Lugod, hinaot magpabilin kita nga matinumanon ngan mapailubon nga maghulat kan Jehova para tadungon an kahimtang. Kon padayon kita nga mangangaro han iya bulig, tatagan kita niya hin ginkikinahanglan nga kusog ngan kinaadman basi makailob.

5, 6. (a) Paonan-o ginbalosan ni Jehova hi Mika? (b) Ano nga panhitabo an waray makita ni Mika?

⁵ Ginbalosan ni Jehova an pagpailob ni Mika. Nakita ni Mika an kamatay ni Hadi Ahas ngan an kataposan han iya maraot nga pagmando. Nakita niya an anak ni Ahas, an maopay nga hi Hadi Hesekia, nga sumaliwan ha paghadi ngan nagpahiuli han putli nga pagsingba. Nakita liwat niya an katumanan han iya igintagna mahitungod han Samaria han ginsakop han mga Asiryahanon an norte nga ginhadian han Israel.—Mika 1:6.

⁶ Kondi waray makita ni Mika an katumanan han ngatanan nga iginpatagna ha iya ni Jehova. Pananglitan, hi Mika nagsurat: “Ha urhi nga mga adlaw mahinanabo, nga an bukid han kan Jehova balay pagtitindugon ha bawbaw han mga bukid, ngan ini pagpapahitas-on labaw han mga bungtod; ngan an mga katawohan mahuyog ngada hini. Ngan damu nga nasud an makada ngan masiring: Kadi kamo, ngan kadto kita ha bukid ni Jehova.” (Mika 4:1, 2) Maiha na nga namatay hi Mika antes pa matuman ito nga tagna. Bisan pa hito, determinado hiya nga magpabilin nga maunungon kan Jehova tubtob ha kamatayon, anoman an buhaton han mga tawo nga nakapalibot ha iya. May kalabotan hini, hiya nagsurat: “An ngatanan nga katawohan naglalakat an tagsa-tagsa ha ngaran han iya dios: ngan kita maglalakat ha ngaran ni Jehova nga aton Dios ha kagihaponan.” (Mika 4:5) Mapailubon nga naghulat hi Mika durante han makuri nga mga panahon tungod kay nasarig gud hiya nga tutumanon ni Jehova an ngatanan Niya nga saad. Inin matinumanon nga propeta sinarig gud kan Jehova.

7, 8. (a) Kay ano nga may maopay kita nga hinungdan nga sumarig kan Jehova? (b) Ano an sadang naton buhaton basi magin mas madagmit an paglabay han panahon?

⁷ May-ada ba kita pariho hito nga pagsarig kan Jehova? May maopay nga hinungdan nga sumarig kita. Nakikita naton mismo an katumanan han tagna ni Mika. “Ha urhi nga mga adlaw,” minilyon nga tikang ha ngatanan nga nasud, tribo, ngan pinulongan an nasagka ha “bukid han kan Jehova balay.” Bisan kon tikang hira ha magkaaway nga mga nasud, ginhihimo hini nga mga magsiringba “an ira mga kampilan nga mga arado,” ngan diri na hira ‘nag-aaram han away.’ (Mika 4:3) Daku gud nga pribilehiyo nga magin usa kita hinin mamurayawon nga katawohan ni Jehova!

⁸ Syempre, karuyag naton nga tapuson na ni Jehova inin maraot nga sistema. Kondi basi makaghulat kita hin mapailubon, kinahanglan kitaon  naton an mga butang uyon ha pagkita ni Jehova. May-ada na hiya itinanda nga adlaw kon san-o niya huhukman an katawohan pinaagi han “usa nga tawo nga iya ginpili,” hi Jesu-Kristo. (Buh. 17:31) Pero antes pa hito, an Dios naghahatag hin higayon ha ngatanan nga klase hin tawo nga magkaada “husto nga kahibaro ha kamatuoran,” ngan magkinabuhi uyon hito basi matalwas. Namimeligro gud an birilhon nga kinabuhi han mga tawo. (Basaha an 1 Timoteo 2:3, 4.) Kon sagipo kita ha pagbulig ha iba nga magkaada hin husto nga kahibaro mahitungod ha Dios, an panahon nga nahibibilin antes umabot an paghukom ni Jehova mas madagmit la nga malabay. Kon umabot na an kataposan, malilipay gud kita nga nagin sagipo kita ha pagsangyaw nga buruhaton!

9-11. Natuman na ba an 1 Tesalonica 5:3? Isaysay.

⁹ Basaha an 1 Tesalonica 5:1-3. Diri na mag-iiha, an mga nasud magpuproklamar hin “Kamurayawan ngan kasigurohan!” Kon karuyag naton nga diri malimbongan hito nga proklamasyon, kinahanglan “padayon kita nga mag-agma ngan tipigan naton an aton maopay nga panhunahuna.” (1 Tes. 5:6) Basi makapabilin kita nga nagmamata ha espirituwal, repasuhon naton hin madaliay an mga panhitabo nga magtutugway hinin makatirigamnan nga proklamasyon.

¹⁰ Katapos han duha nga girra ha kalibotan, an mga nasud nangalimbasog nga magkaada kamurayawan. Han natapos an siyahan nga girra ha kalibotan, naestablisar an League of Nations ha paglaom nga makakaghatag ito hin kamurayawan. Ha urhi, katapos han ikaduha nga girra ha kalibotan, naglaom an mga tawo nga an United Nations an maghahatag hin kamurayawan ha tuna. Sinarig an gobyerno ngan an mga lider han relihiyon nga inin duha nga organisasyon amo an maghahatag hin kamurayawan ha katawohan. Pananglitan, iginproklamar han United Nations an 1986 sugad nga Internasyonal nga Tuig han Kamurayawan. Hito nga tuig, an mga lider tikang ha damu nga nasud ngan relihiyon nakigkita ha papa han Iglesia Katolika ha Assisi, Italy, basi urosa nga mag-ampo para han kamurayawan.

¹¹ Kondi ito nga proklamasyon o an iba pa nga puropariho hito diri amo an katumanan han tagna  ha 1 Tesalonica 5:3. Kay ano? Tungod kay an igintagna nga ‘tigda nga kabungkagan’ waray pa mahitabo.

12. Ano an aton hinbabaroan mahitungod han proklamasyon nga “Kamurayawan ngan kasigurohan”?

¹² Hin-o an maghihimo hinin makatirigamnan nga proklamasyon nga “Kamurayawan ngan kasigurohan”? Ano an magigin papel han mga lider han Kakristianohan ngan han iba pa nga relihiyon? Paonan-o makikigbahin hini nga proklamasyon an mga lider han magkalain-lain nga gobyerno? Waray iginsusumat ha aton an Biblia. An aton la hinbabaroan amo nga anoman an paagi han pagproklamar hito o bisan kon baga hin tinuod ito, diri ito magigin tinuod nga “kamurayawan ngan kasigurohan.” Inin daan nga sistema magpapabilin nga kontrolado ni Satanas. Dunot na gud ini ngan diri na mababag-o. Makasurubo gud kon an bisan hin-o ha aton tumoo ha propaganda ni Satanas ngan diri magpabilin nga neutral!

13. Kay ano nga ginpupugngan han mga anghel an nakakabungkag nga mga hangin?

¹³ Basaha an Pahayag 7:1-4. Samtang ginhuhulat naton an katumanan han 1 Tesalonica 5:3, ginpupugngan han gamhanan nga mga anghel an nakakabungkag nga mga hangin han daku nga kasakitan. Ano an ira ginhuhulat? Usa nga importante nga hitabo an iginhulagway ni apostol Juan—an ultimo nga pagselyo ha dinihogan nga “mga uripon han aton Dios.” * Kon matapos na iton ultimo nga pagselyo, bubuhian na han mga anghel an nakakabungkag nga mga hangin. Ano an sunod nga mahitatabo?

14. Ano an tigaman nga hirani na gud an kataposan han Babilonya nga Gamhanan?

¹⁴ Mabubungkag an Babilonya nga Gamhanan, an imperyo han buwa nga relihiyon ha kalibotan, ngan takos gud ha iya ito nga kabungkagan. An “mga katawohan, mga grupo hin mga tawo, mga nasud, ngan mga pinulongan” diri gud makakabulig ha iya. Nakikita na naton nga hirani na an iya kataposan. (Pah. 16:12; 17:15-18; 18:7, 8, 21) Ha pagkamatuod, nakikita yana nga kulang na an nasuporta ha iya. Makikita ha media nga nagtitikaduro an pagpakaraot ha mga relihiyon ngan ha mga lider hito. Bisan pa hini, an mga lider han Babilonya nga Gamhanan diri naghuhunahuna nga namimeligro na gud hira. Nagsasayop gud hira! Katapos han proklamasyon nga “Kamurayawan ngan kasigurohan!” an mga gobyerno han sistema ni Satanas tigda nga maatake ha buwa nga relihiyon ngan bubungkagon ito. Diri na gud maeksister utro an Babilonya nga Gamhanan! Takos gud hulaton hin mapailubon an sugad nga makatirigamnan nga panhitabo.—Pah. 18:8, 10.

15. Kay ano nga hi Jehova mapailubon nga naghuhulat?

¹⁵ Bisan pa kon ginpapasiparahan han mga tawo an ngaran ni Jehova, mapailubon hiya nga naghuhulat han husto nga panahon basi gumios. Diri niya karuyag nga mabungkag an bisan hin-o nga tangkod an kasingkasing. (2 Ped. 3:9, 10) Ito ba liwat an aton inaabat? Antes umabot an adlaw ni Jehova, maipapakita naton an aton pagpasalamat han iya pagpailob ha masunod nga mga paagi.

16, 17. (a) Kay ano nga sadang naton buligan an mga diri-aktibo? (b) Kay ano nga yana na an panahon nga bumalik kan Jehova an mga diri-aktibo?

¹⁶ Buligi adton mga diri-aktibo. Hi Jesus nagsiring nga may kalipay ha langit kon may bisan usa la nga nabibilngan nga nawara nga karnero. (Mat. 18:14; Luc. 15:3-7) Matin-aw nga gintatagad gud ni Jehova an ngatanan nga nagpapakita hin gugma ha iya ngaran, bisan kon diri hira aktibo yana ha pag-alagad ha iya. Kon ginbubuligan naton an sugad nga mga indibiduwal nga bumalik ha kongregasyon, napapalipay naton hi Jehova ngan an mga anghel.

¹⁷ Usa ka ba hadton diri-aktibo yana ha pag-alagad ha Dios? Bangin may usa ha kongregasyon nga nakapasubo ha imo salit umundang ka ha pakig-upod ha organisasyon ni Jehova. Tungod kay bangin lumabay na an mga panahon tikang han nahitabo ito, pakianhi an imo kalugaringon:  ‘Mas malipayon ba ngan mas may katuyoan an akon kinabuhi yana? Hi Jehova ba an nakapasubo ha akon, o an diri hingpit nga tawo? May ginhimo ba hi Jehova nga nakadaot ha akon?’ Ha pagkamatuod, pirme niya ginbubuhat an makakaopay ha aton. Bisan kon diri kita nagkikinabuhi uyon ha aton dedikasyon, gintutugotan niya nga magpahimulos kita han mag-opay nga butang nga iya igintatagana. (San. 1:16, 17) Diri mag-iiha, maabot na an adlaw ni Jehova. Yana na an panahon nga bumalik ha aton mahigugmaon nga langitnon nga Amay ngan ha kongregasyon—an amo la nga talwas nga lugar hinin kataposan nga mga adlaw.—Deut. 33:27; Heb. 10:24, 25.

18. Kay ano nga sadang naton suportahan an mga nangunguna?

¹⁸ Maunungon nga suportahi an mga nangunguna. Sugad nga mahigugmaon nga Paraataman han karnero, gin-gigiyahan ngan ginpapanalipdan kita ni Jehova. Iya ginpili an iya Anak sugad nga Nangunguna nga Paraataman han iya panon. (1 Ped. 5:4) Ginmamangnoan han mga tigurang ha sobra 100,000 nga kongregasyon an tagsa nga karnero han Dios. (Buh. 20:28) Kon maunungon kita nga nasuporta hadton pinili nga manguna ha aton, iginpapakita naton an aton pagpasalamat kan Jehova ngan kan Jesus tungod han ngatanan nga ira ginbuhat para ha aton.

19. Paonan-o kita makakahimo hin marig-on nga depensa kontra kan Satanas?

¹⁹ Magin duok ha usa kag usa. Ano an karuyag sidngon hini? Kon ginsusulong an binansay hin maopay nga mga sundalo, naglilinya hira nga saragpit. Pinaagi hito, nakakahimo hira hin marig-on nga depensa. Nagtitikaduro an pag-atake ni Satanas ha katawohan han Dios. Diri yana panahon nga makig-away ha kabugtoan. Panahon yana para magin duok kita ha usa kag usa, palabyon an mga kaluyahan han iba, ngan ipakita an aton pagsarig ha pagpanguna ni Jehova.

20. Ano an sadang naton buhaton yana?

²⁰ Hinaot kita ngatanan magpabilin nga nagmamata ha espirituwal ngan magpakita hin naghuhulat nga disposisyon. Mapailubon nga maghulat kita ha proklamasyon nga “Kamurayawan ngan kasigurohan!” ngan ha ultimo nga pagselyo ha mga pinili. Katapos hito, bubuhian han upat nga anghel an nakakabungkag nga mga hangin, ngan an Babilonya nga Gamhanan mabubungkag. Samtang ginhuhulat naton inin makatirigamnan nga mga panhitabo, sundon naton an giya hadton pinili nga manguna ha organisasyon ni Jehova. Magin duok gud kita ha usa kag usa ha pag-ato ha Yawa ngan ha mga demonyo! Yana an panahon nga sundon naton an sagdon han salmista: “Pangusog kamo, ngan magmaisog an iyo kasingkasing, kamo ngatanan nga may paglaom kan Jehova.”—Sal. 31:24.