1, 2. (a) Ano an resulta kon gin-aataman hin maopay an mga karnero? (b) Kay ano nga damu nga tawo ha panahon ni Jesus an pariho hin mga karnero nga waray paraataman?

AN MGA karnero nagigin mahimsog kon ginmamangnoan hira hin maopay han ira paraataman. Sumala ha usa nga libro mahitungod ha pag-ataman hin karnero, “an paraataman nga basta nagpapasabsab la han panon pero diri ito ginpapanginano hin maopay, posible gud nga an iya mga karnero magin maluya ngan magkasakit paglabay hin pipira ka tuig.” Kondi kon an mga karnero gin-aataman hin maopay, magigin makusog ngan mahimsog ito.

² An klase han pag-ataman ngan atensyon nga iginhahatag han paraataman han panon han Dios ha tagsa nga karnero nga igintapod ha ira makakaapekto ha espirituwal nga kahimsog han bug-os nga kongregasyon. Bangin mahinumdoman naton nga hi Jesus nalooy ha mga tawo tungod kay “sugad hira hin gin-anitan ngan ginpabay-an nga mga karnero nga waray paraataman.” (Mat. 9:36) Kay ano nga nagin sugad hito an ira kahimtang? Tungod kay adton mga gintaporan nga magtutdo ha ira han Balaud han Dios mga matalumpiguson, sobra kaistrikto, ngan hipokrito. Imbes nga buligan ngan atamanon hin maopay an mga membro han ira panon, ito nga mga lider han relihiyon han Israel nagbutang hin “magbug-at nga pinas-an” ha ira mga sugbong.—Mat. 23:4.

3. Ano an sadang hinumdoman han mga tigurang samtang ginmamangnoan nira an mga karnero?

³ Salit an mga paraataman han karnero yana, an pinili nga mga tigurang, may seryoso nga responsabilidad. An mga karnero nga ira ginmamangnoan panag-iya ni Jehova ngan ni Jesus. Ini nga mga karnero birilhon gud kan Jesus, “an maopay nga paraataman,” nga iya pa ngani iginhatag an iya kinabuhi para ha ira. Iya hira “ginpalit” pinaagi han iya mismo “presyoso nga dugo.” (Juan 10:11; 1 Cor. 6:20; 1 Ped. 1:18, 19) Sadang hinumdoman pirme han mga tigurang nga an ira paramangno  hi Jesu-Kristo, “an maopay gud nga paraataman han mga karnero.” Salit may baratunon hira ha iya kon paonan-o nira ginmamangnoan an panon.—Heb. 13:20.

4. Ano an hihisgotan hini nga artikulo?

⁴ Kon sugad, paonan-o sadang mangnoan han mga tigurang an panon? An mga membro han kongregasyon ginsasagda nga ‘magin masinugtanon ha mga nangunguna’ ha ira. Ha luyo nga bahin, ginsasagdonan an mga tigurang nga ‘diri magmayor-mayor ha mga panag-iya han Dios.’ (Heb. 13:17; basaha an 1 Pedro 5:2, 3.) Paonan-o hira makakapanguna nga diri nagmamayor-mayor ha panon? Ha iba nga pagkayakan, paonan-o nira mamamangnoan an mga panginahanglan han panon nga diri gin-aabuso an awtoridad nga iginhatag ha ira han Dios?

5. Ano an aton mahibabaroan mahitungod kan Jehova ha Isaias 40:11?

⁵ May kalabotan kan Jehova, hi propeta Isaias nagsiring: “Hiya matubong han iya kapangon nga kakarnerohan sugad hin magbarantay han mga karnero, iya pagtitirukon an mga nati nga karnero dida ha iya butkon, ngan pagdadad-on hira ha iya dughan ngan magmamando ha malumo hadton may-ada han ira kabataan.” (Isa. 40:11) Iginpapakita hini nga teksto kon paonan-o ginmamangnoan ni Jehova adton magluya ngan nanginginahanglan hin panalipod ha kongregasyon. Sugad la nga an paraataman han karnero alerto ha panginahanglan han tagsa niya nga karnero ngan andam pirme manginano ha ira, hi Jehova maaram liwat han panginahanglan han tagsa nga indibiduwal ha kongregasyon ngan nalilipay hiya ha pagtagana hito. Sugad la nga ginkukugos han paraataman an igin-aanak pa la nga karnero kon ginkikinahanglan, liliawon ngan bubuligan liwat kita ni Jehova kon naatubang kita hin daku nga pagsari o durante han magkuri nga panahon. Hiya “an Amay han mahigugmaon nga kalooy.”—2 Cor. 1:3, 4.

6. Sugad nga espirituwal nga paraataman han karnero, paonan-o masusubad han tigurang an susbaranan ni Jehova?

⁶ Maopay gud nga leksyon an mahibabaroan han espirituwal nga paraataman han karnero tikang ha aton langitnon nga Amay! Pariho kan Jehova, kinahanglan gud hiya magin alerto ha panginahanglan han mga karnero. Pinaagi ha paghibaro han ira naieksperyensyahan nga mga problema ngan han espisipiko nga mga butang nga nagkikinahanglan dayon hin pagtagad, maihahatag niya ha ira an ginkikinahanglan nga pagdasig ngan bulig. (Prob. 27:23) Matin-aw nga an tigurang kinahanglan maggahin hin panahon ha pakig-istorya ngan ha pagpamati ha kabugtoan. Bisan kon diri hiya nanginginlabot han ira personal nga kinabuhi, diri niya ginbabalewaray an iya nakikita ngan nababatian ha kongregasyon, ngan mahigugmaon nga naggagahin hiya hin panahon basi ‘buligan an mga magluya.’—Buh. 20:35; 1 Tes. 4:11.

7. (a) Paonan-o gintratar an mga karnero han Dios ha panahon nira Esekiel ngan Jeremias? (b) Ano nga leksyon an aton mahibabaroan ha pagsalikway ni Jehova ha diri maunungon nga espirituwal nga mga paraataman han karnero?

⁷ Tagda an disposisyon han mga paraataman han karnero nga iginsalikway han Dios. Ha panahon nira Esekiel ngan Jeremias, iginsalikway ni Jehova adton mga paraataman han karnero tungod kay imbes nga mangnoan unta nira hin maopay an iya mga karnero, waray nira ito buhata. Han waray nagbabantay ha mga karnero, nameligro ito tikang ha magbangis nga hayop ngan nagpatlaag ito. Imbes nga pakaunon an mga karnero, ginpabay-an ito han mga paraataman ngan an ira kalugaringon lugod an ira ginpakaon. (Esek. 34:7-10; Jer. 23:1) Ito liwat an hinungdan kon kay ano nga iginsalikway han Dios an mga lider han Kakristianohan. An pagsalikway ni Jehova hito nga mga paraataman han karnero nagtututdo hin leksyon ha mga tigurang nga kinahanglan nira mangnoan an panon ni Jehova ha husto ngan ha mahigugmaon nga paagi.

8. Paonan-o nagpakita hi Jesus hin maopay nga susbaranan ha pagsagdon ha kabugtoan?

⁸ Tungod han pagkadiri-hingpit, bangin diri dayon masabtan han pipira nga kabugtoan kon ano  an ginlalaoman ha ira ni Jehova. Bangin mapakyas hira ha pagbuhat uyon ha mga sagdon tikang ha Kasuratan, o bangin gumios hira ha paagi nga nagpapakita nga diri hira hamtong ha espirituwal. Ano an bubuhaton han mga tigurang? Sadang nira subaron an pagin pasensyoso ni Jesus. Han nagdiskusyon an mga disipulo kon hin-o ha ira an magkakaada gidadakui nga awtoridad ha Ginhadian, waray hiya masina ha ira. Lugod, padayon nga gintutdoan niya hira ngan gintagan hin mahigugmaon nga sagdon mahitungod ha pagpaubos. (Luc. 9:46-48; 22:24-27) Pinaagi han paghimsawi ha ira ni Jesus, igintutdo niya an importante nga leksyon ha pagpaubos, usa nga kalidad nga kinahanglan ipakita han Kristiano nga mga paramangno.—Basaha an Juan 13:12-15; 1 Ped. 2:21.

9. Ano nga sayop nga panhunahuna han iya mga apostol an gintadong ni Jesus?

⁹ An panhunahuna ni Jesus may kalabotan ha papel han espirituwal nga paraataman han karnero kaiba gud ha panhunahuna nira Santiago ngan Juan. Inin duha nga apostol nangalimbasog gud nga magkaada hin prominente nga posisyon ha Ginhadian. Kondi gintadong ni Jesus an ira sayop nga panhunahuna, hiya nagsiring: “Maaram kamo, ginbubut-an la han mga Hentil han mga nangungulo ha ira, ngan karuyag gud han mga dumagko ha ira nga abaton han kadam-an an ira katungdanan. Kundi diri kinahanglan mahinabo ini ha iyo. . . . An hin-o man nga karuyag magin labaw ha iyo amo lugod an iyo magin suruguon.” (Mat. 20:25, 26, An Baraan nga Kasuratan) Kinahanglan atohan han mga apostol an tendensya nga ‘magpakaagaron,’ o ‘magbuot-buot’ ha kabugtoan.

10. Ha ano nga paagi karuyag ni Jesus nga mangnoan han mga tigurang an panon, ngan ano nga ehemplo an iginpakita ni Pablo may kalabotan hini?

¹⁰ Ginlalaoman ni Jesus nga mamangnoan han mga tigurang an panon pariho han iya pagmangno hito. Kinahanglan andam hira magin surugoon han ira kabugtoan, diri magin mga agaron. Iginpakita ni apostol Pablo iton mapainubsanon nga disposisyon. Iya ginsidngan an mga tigurang ha Efeso: “Maaram gud kamo kon paonan-o ko ginbuhat an akon buruhaton han kaupod ako niyo tikang pa han pag-abot ko ha distrito han Asia. Mapainubsanon gud nga nagpapauripon ako ha Ginoo.” Karuyag gud hini nga apostol nga ito nga mga tigurang magin mapainubsanon ngan magin maduruto ha pagbulig ha ira kabugtoan. Hiya nagsiring: “Ha ngatanan nga butang, iginpakita ko ha iyo nga kinahanglan buligan niyo ha sugad nga paagi an mga magluya.” (Buh. 20:18, 19, 35) Iya ginsidngan an mga taga-Corinto nga diri hiya nagbubuot han ira pagtoo. Lugod, igkasi-magburuhat la nira hiya para ha ira kalipay. (2 Cor. 1:24) Hi Pablo nagpakita hin maopay nga ehemplo han pagkamapainubsanon ngan pagkamaduruto para ha mga tigurang yana.

11, 12. Paonan-o mahimo buligan han tigurang an usa nga bugto ha paghimo hin desisyon?

¹¹ An usa nga tigurang kinahanglan ‘sumunod gud ha masasarigan nga pulong may kalabotan ha iya arte ha pagtutdo.’ (Tito 1:9) Kondi kinahanglan buhaton niya ini ha “espiritu han pagkamalumo.” (Gal. 6:1) Imbes nga piriton an kabugtoan nga buhaton an usa nga butang ha partikular nga paagi, nangangalimbasog an maopay nga paraataman nga buligan hira nga maghimo hin maaramon nga desisyon nga ginpapagios tungod han ira gugma kan Jehova ngan ha Iya Pulong. Pananglitan, mahimo buligan han tigurang an usa nga bugto ha paghimo hin importante nga desisyon pinaagi ha paghisgot hin mga prinsipyo ha Biblia o hin artikulo ha aton mga publikasyon. Mahimo niya aghaton an bugto nga hunahunaon kon ano an magigin epekto han iya mga desisyon ha iya relasyon kan Jehova. Mahimo liwat niya pahinumdoman an bugto han pagkaimportante han pangaro ha Dios hin giya pinaagi ha pag-ampo antes hiya maghimo hin desisyon. (Prob. 3:5, 6) Katapos han paghisgot, pasasagdan han tigurang an bugto nga maghimo han iya kalugaringon nga desisyon.—Roma 14:1-4.

¹² Kon nagsasagdon an mga tigurang, iginbabasar gud la nira ito ha Kasuratan. Salit importante  nga gamiton gud nira hin maopay an Biblia ngan sundon kon ano an ginsisiring hito. An pagbuhat hito nabulig ha mga tigurang nga diri gud abusuhon an ira awtoridad. Kay kon huhunahunaon, diri nira panag-iya an mga karnero, ngan an tagsa ha kongregasyon may baratunon kan Jehova ngan kan Jesus sumala ha mga desisyon nga ira ginhihimo.—Gal. 6:5, 7, 8.

13, 14. Ha ano nga mga bahin sadang magin susbaranan an mga tigurang ha panon?

¹³ Katapos sagdonan ni apostol Pedro an mga tigurang nga diri ‘magmayor-mayor,’ gindasig niya hira nga “magin mga susbaranan ha panon.” (1 Ped. 5:3) Paonan-o magigin susbaranan an mga tigurang ha panon? Tagda an duha nga kwalipikasyon nga kinahanglan maabot hadton “nagtatalinguha pagkab-ot hin pribilehiyo sugad nga paramangno.” Kinahanglan may-ada hiya ‘maopay nga panhunahuna’ ngan “nagmamangno hin maopay ha iya panimalay.” Kon pamilyado an usa nga tigurang, kinahanglan magin maopay hiya nga susbaranan ha pagmangno ha iya pamilya, tungod kay “kon an bisan hin-o nga lalaki diri maaram magmangno han iya panimalay, paonan-o niya mamangnoan an kongregasyon han Dios?” (1 Tim. 3:1, 2, 4, 5) Basi an usa magin kwalipikado sugad nga paramangno, sadang hiya magkaada maopay nga panhunahuna, karuyag sidngon, nasasabtan niya hin matin-aw an mga prinsipyo ha Kasuratan ngan maaram hiya kon paonan-o ito iaaplikar ha iya kinabuhi. Kalmado hiya bisan ha magkuri nga sitwasyon ngan naghuhunahuna anay hin maopay antes magdesisyon. Kon an mga tigurang may-ada hini nga mga kalidad, an kabugtoan masarig gud ha ira.

¹⁴ Maipapakita liwat han mga tigurang an maopay nga ehemplo pinaagi ha pagpanguna ha ministeryo. May kalabotan hini, nagpakita hi Jesus hin maopay nga susbaranan para ha mga paramangno. An pagsangyaw han maopay nga sumat han Ginhadian usa nga importante nga bahin han iya buruhaton dinhi ha tuna. Iya iginpakita ha iya mga disipulo kon paonan-o ini bubuhaton. (Mar. 1:38; Luc. 8:1) Yana, nadadasig gud an mga magwarali nga magsangyaw kaupod han mga tigurang, makita an ira kadasig hinin nagluluwas han kinabuhi nga buruhaton, ngan mahibaro tikang ha ira mga paagi han pagtutdo! An pagin determinado gud han mga paramangno nga maggahin hin panahon ngan gamiton an ira kusog ha pagsangyaw han maopay nga sumat bisan pa han ira damu nga buruhaton nag-aaghat ha bug-os nga kongregasyon nga magin madasigon liwat. An mga tigurang mahimo liwat magpakita hin maopay nga susbaranan ha kabugtoan pinaagi ha pagpangandam ngan pakigbahin ha mga katirok ngan ha iba pa nga buruhaton, sugad han paglimpyo ngan pagmintinar han Kingdom Hall.—Efe. 5:15, 16; basaha an Hebreo 13:7.

15. Ano an pipira nga hinungdan kon kay ano nga nagsi-shepherding an mga tigurang?

¹⁵ An maopay nga paraataman han karnero nagios dayon basi buligan an karnero nga nasamad o may sakit. Ha pariho nga paagi, kinahanglan panginanoon dayon han mga tigurang an kabugtoan nga nag-aantos o nagkikinahanglan hin espirituwal nga bulig. An mga edaran ngan an may  mga sakit bangin nagkikinahanglan hin pisikal nga bulig, pero mas ginkikinahanglan nira an espirituwal nga bulig ngan pagdasig. (1 Tes. 5:14) An mga batan-on ha kongregasyon bangin naatubang hin mga pagsari, sugad han pag-ato han “mga hingyap han pagkabatan-on.” (2 Tim. 2:22) An pag-shepherding nag-uupod hin pagbisita ha mga membro ha kongregasyon ha panapanahon basi hibaroan an problema nga naieksperyensyahan nira ngan dasigon hira pinaagi hin angayan nga mga sagdon tikang ha Kasuratan. Kon papanginanoon dayon han mga tigurang an problema han kabugtoan, damu nga problema an masusulbad antes pa ito magin seryoso.

16. Kon an usa nga membro han kongregasyon nanginginahanglan hin bulig ha espirituwal, ano an bubuhaton han mga tigurang?

¹⁶ Kumusta man kon an usa nga bugto may seryoso nga problema ngan namimeligro nga madaot an iya relasyon kan Jehova? “May-ada ba ha iyo may sakit?” nagpakiana an parasurat han Biblia nga hi Santiago. “Tawagon niya an mga tigurang han kongregasyon, ngan paampoon hira para ha iya, ngan hirogan nira hiya hin lana ha ngaran ni Jehova. Ngan an pag-ampo nga may pagtoo makakaopay ha may sakit, ngan bubuligan hiya ni Jehova nga mag-opay. Sugad man, kon nakasala hiya, papasayloon hiya.” (San. 5:14, 15) Bisan kon an usa nga masakit ha espirituwal diri ‘tumawag hin mga tigurang,’ sadang nira buligan dayon hiya kon mahibaroan nira an iya sitwasyon. Kon nag-aampo an mga tigurang upod an kabugtoan, nag-aampo para ha ira, ngan nabulig ha panahon han kakurian, ginpapamatud-an han mga tigurang nga makarepresko hira ha espirituwal ngan makapadasig ha kabugtoan nga ira gin-aataman.—Basaha an Isaias 32:1, 2.

17. Ano an magigin resulta kon susubaron han mga tigurang “an maopay gud nga paraataman han mga karnero”?

¹⁷ Ha ngatanan nga ginbubuhat han espirituwal nga mga paraataman han karnero ha organisasyon ni Jehova, nangangalimbasog hira nga subaron “an maopay gud nga paraataman han mga karnero,” hi Jesu-Kristo. Pinaagi han espirituwal nga bulig hinin kalalakin-an nga nangunguna ha kongregasyon, an panon nagpapahimulos gud ngan padayon nga nag-uuswag. Tungod hini ngatanan, mapasalamaton gud kita ngan napapagios nga dayawon an aton mahigugmaon ngan gimaopayi nga Paraataman, hi Jehova.