1, 2. Ano an bubuhaton han Ginhadian han Dios, ngan kay ano nga makakasarig kita nga maabot ito?

HAN katsaringsing han 31 C.E., ha usa nga bukid nga hirani ha Capernaum, gintutdoan ni Jesu-Kristo an iya mga sumurunod nga mag-ampo: “Kumanhi unta an imo Ginhadian.” (Mat. 6:10) Yana, damu an nagruruhaduha kon maabot pa ba an Ginhadian. Kondi nasarig kita nga babatunon an aton sinsero nga pag-ampo nga kumanhi unta an Ginhadian han Dios.

² Gagamiton ni Jehova an Ginhadian basi magkaurosa an iya pamilya ha langit ngan ha tuna. Matutuman ito nga iya katuyoan. (Isa. 55:10, 11) Ha pagkamatuod, hi Jehova nagin Hadi na yana! Ginpapamatud-an ito han makalilipay gud nga mga hitabo han naglabay nga 100 ka tuig. An Dios naghihimo hin dagku ngan urusahon nga mga buhat para ha minilyon nga iya maunungon nga mga sakop. (Sak. 14:9; Pah. 15:3) Kondi magkaiba an pagin Hadi ni Jehova ngan an pag-abot han Ginhadian han Dios nga igintutdo ni Jesus nga ig-ampo naton. Ha ano nga paagi magkaiba ini, ngan ano an epekto hini ha aton?

3. (a) Kakan-o nagtikang maghadi hi Jesus, ngan diin ito nahitabo? (b) Paonan-o mo mapapamatud-an nga an Ginhadian naestablisar han 1914? (Kitaa an footnote.)

³ Ha ikatarapos han ika-19 ka siglo, nagtikang masabtan han mga surugoon han Dios an kahulogan han igintagna ni Daniel sobra 2,500 ka tuig na an naglabay: “Ha mga adlaw hito nga kahadian an Dios  ha langit magpapabangon hin usa nga ginhadian, nga diri gud magugunaw.” (Dan. 2:44) Ha sulod hin mga dekada, nag-aram an mga Estudyante han Biblia ngan nasabtan nira nga magkakaada hin importante nga panhitabo ha tuig 1914. Hito nga tuig, damu nga tawo an positibo hinduro mahitungod han tidaraon. Usa nga parasurat an nagsiring: “Han 1914, an kalibotan puno hin paglaom ngan mga saad.” Pero han magtikang an Girra ha Kalibotan I ha urhi nga bahin hito nga tuig, natuman an tagna han Biblia. An mga gutom, linog, ngan peste sugad man an katumanan han iba pa nga tagna ha Biblia nagpamatuod nga nagtikang na hi Jesu-Kristo magmando ha langit sugad nga Hadi ha Ginhadian han Dios han 1914. * Pinaagi ha pagpalingkod ha iya Anak sugad nga Mesianiko nga Hadi, hi Jehova nagin Hadi ha iba nga paagi!

4. Ano an siyahan nga ginbuhat ni Jesus han nagin Hadi hiya? Ngan ano an iya sunod nga ginbuhat?

⁴ An siyahan nga butang nga ginbuhat han bag-o nga Hadi nga ginpili han Dios amo an pakig-away kan Satanas, an nangunguna nga kaaway han iya Amay. Ha langit, ginpaiwas ni Jesus ngan han iya mga anghel an Yawa ngan an mga demonyo. Nagresulta ito hin daku nga kalipay ha langit kondi duro nga pag-antos dinhi ha tuna. (Basaha an Pahayag 12:7-9, 12.) Katapos, gumios an Hadi ha pagputli, pagtutdo, ngan pag-organisa ha iya mga sakop dinhi ha tuna basi buhaton an kaburut-on han Dios. Aton hisgotan kon paonan-o an ira pagsunod ha giya ni Jesus naghahatag hin maopay nga susbaranan ha aton.

5. Ano nga paglimpyo an nahitabo tikang han 1914 ngan ha temprano han 1919?

⁵ Katapos limpyohan ni Jesus an langit tikang ha maraot nga impluwensya ni Satanas ngan han mga demonyo, ginsugo ni Jehova hi Jesus nga usisahon ngan putlion ha espirituwal an iya mga sumurunod dinhi ha tuna. Iginhulagway ini ni propeta Malakias sugad nga espirituwal nga paglimpyo. (Mal. 3:1-3) Iginpapakita han kasaysayan nga nahitabo ini tikang han 1914 ngan ha temprano han 1919. * Basi magin membro han pamilya ni Jehova ha bug-os nga uniberso, kinahanglan nga magin limpyo kita, o baraan. (1 Ped. 1:15, 16) Kinahanglan magpabilin kita nga diri mahugawan han buwa nga relihiyon o han politika hini nga kalibotan.

6. Paonan-o igintatagana an espirituwal nga pagkaon, ngan kay ano nga importante ito?

⁶ Katapos, gin-gamit ni Jesus an iya awtoridad sugad nga Hadi ha pagpili hin “matinumanon ngan maaramon nga uripon.” Ini nga uripon regular nga magtatagana hin makapahimsog nga espirituwal nga pagkaon para ha ngatanan nga nagkukompwesto han “usa nga panon” nga ginmamangnoan ni Jesus. (Mat. 24:45-47; Juan 10:16) Tikang han 1919, matinumanon nga ginbubuhat han usa nga gutiay nga grupo han dinihogan nga kalalakin-an an mabug-at nga responsabilidad ha pagpakaon ha “mga surugoon ha panimalay.” An hura nga espirituwal nga pagkaon nga igintatagana hini nga grupo nabulig ha aton basi magin marig-on an aton pagtoo. Nabulig ito nga magin mas determinado kita nga magpabilin nga limpyo ha espirituwal, moral, mental, ngan pisikal. Nagtututdo liwat ito ngan nag-aandam ha aton basi makigbahin kita hin bug-os ha pinakaimportante nga buruhaton ha tuna yana. Ginsasalingabot mo ba ini nga mga tagana?

7. Ano an pinakaimportante nga buruhaton nga gintikangan ni Jesus han nakanhi pa hiya ha tuna, ngan tubtob san-o ito magpapadayon?

⁷ Han nagtikang an ministeryo ni Jesus dinhi ha tuna, hiya nagsiring: “Kinahanglan ipasamwak ko liwat an maopay nga sumat han Ginhadian han Dios ha iba nga mga syudad, kay ginsugo ako tungod hini.” (Luc. 4:43) Ha sulod hin tulo ngan tunga ka tuig, gintagad ni Jesus ini nga  buruhaton sugad nga pinakaimportante ha iya kinabuhi. Iya gintutdoan an iya mga disipulo: “Ha paglakat niyo, pagsangyaw kamo: ‘An Ginhadian han langit hirani na.’” (Mat. 10:7) Katapos mabanhaw hi Jesus, nagtagna hiya nga ipapasamwak han iya mga sumurunod ini nga mensahe “tubtob ha pinakahirayo nga lugar ha tuna.” (Buh. 1:8) Nagsaad hiya nga susuportahan niya mismo inin importante nga buruhaton tubtob ha aton panahon.—Mat. 28:19, 20.

8. Paonan-o gindasig han Hadi nga magsangyaw an iya mga sakop dinhi ha tuna?

⁸ Han 1919, an “maopay nga sumat han Ginhadian” nagkaada hin dugang nga importansya. (Mat. 24:14) An Hadi nagmamando na ha langit, ngan iya gintirok an usa nga gutiay nga grupo han nalimpyohan na nga mga sakop dinhi ha tuna. Kinaburut-on nga sumugot hira han matin-aw nga sugo ni Jesus: Isangyaw ha bug-os nga tuna an maopay nga sumat nga an Ginhadian han Dios nagmamando na ha langit! (Buh. 10:42) Pananglitan, han Septyembre 1922, haros 20,000 nga nasuporta ha Ginhadian an nagkatirok ha usa nga internasyonal nga kombensyon ha Cedar Point, Ohio, U.S.A. Handurawa la an ira kalipay han iginpahayag ni Brother Rutherford an tema nga “An Ginhadian,” ngan nagsiring: “Kitaa, an Hadi nagmamando na! Kamo an iya mga ahente nga magpapasamwak hito. Salit ipasamwak, ipasamwak, ipasamwak, an Hadi ngan an iya ginhadian.” Kinabuwasan, 2,000 nga delegado an nakigbahin ha pagsangyaw, ngan an pipira nagbiyahe pa ngani hin haros 72 ka kilometro tikang ha lugar han kombensyon. Tungod kay nadasig an usa nga delegado, hiya nagsiring: “Diri ko gud hingangalimtan an panawagan nga ipasamwak an Ginhadian ngan an kadasig han mga natambong!” Ito liwat an inabat han iba.

9, 10. (a) Ano nga mga eskwelahan an gin-organisa basi mabansay an mga magwarali han Ginhadian? (b) Paonan-o ka nakapahimulos hini nga mga pagbansay?

⁹ Han 1922, sobra 17,000 nga magwarali han Ginhadian an nagsasangyaw ha 58 nga nasud ha bug-os nga kalibotan. Pero kinahanglan nira an pagbansay. Han siyahan nga siglo, an Pinili nga Hadi naghatag hin matin-aw nga mga instruksyon kon ano an isasangyaw, kon diin, ngan kon paonan-o magsasangyaw. (Mat. 10:5-7; Luc. 9:1-6; 10:1-11) Ha pariho nga paagi, ginsisiguro ni Jesus nga an ngatanan nga nakikigbahin yana ha pagsangyaw han Ginhadian makakakarawat hin mga instruksyon ngan magkakaada mga gamit nga ginkikinahanglan basi epektibo nga makagsangyaw. (2 Tim. 3:17) Pinaagi han Kristiano nga kongregasyon, ginbabansay ni Jesus ha ministeryo an iya mga sakop. An usa nga paagi amo an Teokratiko nga Eskwelahan ha Ministeryo, nga ginhihimo ha sobra 111,000 nga kongregasyon ha bug-os nga tuna. Pinaagi hini nga eskwelahan, nabuligan na an sobra pito ka milyon nga magwarali kon paonan-o hira epektibo nga makakagsangyaw ngan makakagtutdo ha “ngatanan nga klase hin tawo.”—Basaha an 1 Corinto 9:20-23.

¹⁰ May iba pa nga mga eskwelahan nga gin-organisa basi bansayon an mga tigurang, payunir, solo nga mga brother, mga Kristiano nga mag-asawa,  mga Branch Commitee ngan han ira asawa, nagbibiyahe nga mga paramangno ngan han ira asawa, ngan mga misyonero. * An mga estudyante han usa nga klase han Bible School for Christian Couples nagpahayag han ira apresasyon para hini nga eskwelahan, hira nagsiring: “An espesyal nga pagbansay nga nakarawat namon nagpahilarom han amon gugma kan Jehova ngan nagin mas epektibo kami ha pagbulig ha iba.”

11. Paonan-o nakakagpadayon an mga magwarali han Ginhadian bisan pa han mga pangalimbasog ni Satanas nga pugngan an buruhaton?

¹¹ Nakikita ni Satanas ini ngatanan nga mga pangalimbasog nga maisangyaw ngan maitutdo an maopay nga sumat han Ginhadian. Ginagamit niya an direkta ngan an tuso nga mga paagi nga pugngan an mensahe han Ginhadian ngan an mga parasamwak hito basi mapaundang an buruhaton. Kondi diri maglalampos an iya mga pangalimbasog. Ginpalingkod ni Jehova an iya anak “nga mas hitaas gud kay ha ngatanan nga gobyerno, awtoridad, gahum, [ngan] pagmando.” (Efe. 1:20-22) Sugad nga Hadi, ginagamit ni Jesus an iya awtoridad basi panalipdan ngan giyahan an iya mga disipulo basi masiguro nga matuman an kaburut-on han iya Amay. * An maopay nga sumat padayon nga iginsasangyaw, ngan minilyon hadton tangkod an kasingkasing an gintututdoan han mga paagi ni Jehova. Pribilehiyo gud naton nga makigbahin hinin makalilipay nga buruhaton!

12. Ano an mga pag-uswag ha organisasyon tikang han maestablisar an Ginhadian?

¹² Tikang han maestablisar an Ginhadian han 1914, ginpauswag ni Jesus an pag-organisa ha mga surugoon han Dios ha pagbuhat han kaburut-on han iya Amay. (Basaha an Isaias 60:17.) Han 1919, nagpili hin usa nga direktor han pag-alagad ha tagsa nga kongregasyon basi manguna ha pagsangyaw nga buruhaton. Han 1927, gin-organisa an pagsangyaw ha balay-balay ha kada Domingo. Han 1931, ginkarawat han mga surugoon ni Jehova an ngaran nga Mga Saksi ni Jehova, ngan nagpagios ini ha ira nga magin mas madasigon ha mga buruhaton para ha Ginhadian. (Isa. 43:10-12) Han 1938, an mga paramangno ha kongregasyon diri na ginpipili pinaagi hin pagbutos, lugod kinahanglan nira maabot an Kasuratanhon nga mga kwalipikasyon. Han 1972, an pagpanginano ha kongregasyon igintoka ha lawas han mga tigurang imbes nga ha usa la nga paramangno han kongregasyon. An ngatanan nga kwalipikado nga kalalakin-an gindasig nga makigbahin ha ‘pag-ataman han panon han Dios nga igintapod ha ira.’ (1 Ped. 5:2) Han 1976, an Nagmamando nga Lawas gin-organisa ha unom nga komite basi manginano ha mga buruhaton para ha Ginhadian ha bug-os nga kalibotan. Tikang pa hadto, ginpapauswag ni Jesus an pag-organisa ha iya mga sakop ha teokratiko nga paagi.

13. Ano an epekto ha imo kinabuhi han mga nahimo han 100 ka tuig nga pagmando han Ginhadian?

 ¹³ Tagda an nahimo han Mesianiko nga Hadi durante han iya siyahan nga 100 ka tuig nga pagmando. Ginlimpyohan niya an usa nga grupo han katawohan basi magrepresentar kan Jehova. Gin-giyahan niya an pagsangyaw han maopay nga sumat han Ginhadian ha 239 nga nasud ngan gintutdoan an minilyon nga mahibaro han mga paagi ni Jehova. Iya ginpahinabo nga magkaurosa an sobra pito ka milyon nga maunungon nga mga sakop, nga an tagsa ha ira kinasingkasing nga nagbubuhat han kaburut-on han iya Amay. (Sal. 110:3) Oo, dagku ngan urusahon an mga buhat ni Jehova pinaagi han Mesianiko nga Ginhadian. Damu pa gud an makalilipay nga mahitatabo ha tidaraon!

14. (a) Ano an aton ginhahangyo kon nag-aampo kita nga: “Kumanhi unta an imo Ginhadian”? (b) Ano an aton tinuig nga teksto para ha 2014, ngan kay ano nga angayan ito?

¹⁴ Bisan kon ginpalingkod na ni Jehova ha trono an iya Anak nga hi Jesu-Kristo sugad nga Mesianiko nga Hadi han 1914, diri pa ini an bug-os nga baton ha aton pag-ampo nga “kumanhi unta an imo Ginhadian.” (Mat. 6:10) Igintagna han Biblia nga hi Jesus ‘maghahadi ha butnga han iya mga kaaway.’ (Sal. 110:2) An tawhanon nga mga gobyerno nga kontrolado ni Satanas nakontra pa gihapon ha Ginhadian. Kon gin-aampo naton nga umabot na an Ginhadian han Dios, ginhahangyo naton ha Dios nga tapuson na han Mesianiko nga Hadi ngan han iya kaupod nga mga magmarando an gobyerno han tawo ngan bungkagon adton mga aanhi ha tuna nga nakontra ha Ginhadian. Ini nga panhitabo magtutuman han ginsiring ha Daniel 2:44 nga an Ginhadian han Dios “magpipinitpinit ngan mag-aanaw hini ngatanan nga ginhadian.” Magwawara ito han tawhanon nga mga magmarando nga nakontra ha Ginhadian. (Pah. 6:1, 2; 13:1-18; 19:11-21) Hirani na hinduro ito mahitabo. Angayan gud an aton tinuig nga teksto para ha 2014, an ika-100 nga anibersaryo han kaestablisar han Ginhadian han Dios ha langit, nga ginkotar ha Mateo 6:10: “Kumanhi unta an imo Ginhadian”!

15, 16. (a) Ano an makalilipay nga mga hitabo durante han Usa ka Yukot ka Tuig nga Pagmando? (b) Ano an ultimo nga pagbubuhaton ni Jesus sugad nga Mesianiko nga Hadi, ngan ano an magigin kahulogan hito may kalabotan ha katuyoan ni Jehova para ha ngatanan niya nga linarang?

¹⁵ Katapos bungkagon han Mesianiko nga Hadi an mga kaaway han Dios, ilalabog niya hi Satanas ngan an mga demonyo ha kahiladman ha sulod hin 1,000 ka tuig. (Pah. 20:1-3) Hito nga mga panahon nga waray na an maraot nga impluwensya, magios dayon an Ginhadian basi mapahimulosan han mga tawo an kapulsanan han halad-lukat ni Jesus ngan wad-on an ngatanan nga epekto han sala ni Adan. Babanhawon han Hadi an minilyon nga nagkamatay ngan mag-oorganisa hiya ha bug-os nga kalibotan hin programa nga magtututdo ha ira mahitungod kan Jehova. (Pah. 20:12, 13) An bug-os nga tuna magigin paraiso sugad ha hardin han Eden ngan magigin hingpit na an ngatanan nga magtinumanon nga katawohan.

¹⁶ Ha ikatarapos han Usa ka Yukot ka Tuig nga Pagmando ni Kristo, matutuman an katuyoan ni Jehova ha tuna. Katapos ibabalik na ni Jesus an Ginhadian ha iya Amay. (Basaha an 1 Corinto 15:24-28.) Diri na pagkikinahanglanon an usa nga tagapamutnga kan Jehova ngan ha iya mga anak dinhi ha tuna. Papahinaboon han Dios nga magkaurosa an ngatanan niya nga anak ha langit ngan ha tuna sugad nga membro han iya pamilya ha bug-os nga uniberso.

17. Mahitungod ha Ginhadian, determinado ka nga buhaton an ano?

¹⁷ An makalilipay nga mga hitabo han 100 ka tuig nga pagmando han Ginhadian nagpapasarig ha aton nga kontrolado ni Jehova an mga butang ngan matutuman an iya katuyoan dinhi ha tuna. Hinaot padayon kita nga magin maunungon nga mga sakop ngan ipasamwak an Hadi ngan an iya Ginhadian. Hihimoon naton ito nga may bug-os nga pagsarig nga ha diri na mag-iiha, babatunon ni Jehova an aton sinsero nga pag-ampo: “Kumanhi unta an imo Ginhadian”!