1, 2. Kay ano nga sadang kita magin interesado ha Salmo 45?

AN MAHIMAYAON nga hadi nakikig-away tungod ha kamatuoran ngan katadongan basi pirdihon an iya mga kaaway. Katapos han iya bug-os nga kadaogan, nagpakasal hiya ha usa nga mahusay nga maarasawa. An hadi pagdadayawon ngan diri hingangalimtan han ngatanan nga henerasyon nga maabot. Ini an nangunguna nga tema han Salmo 45.

² Kondi an Salmo 45 diri la makapainteres nga istorya nga may malipayon nga kataposan. An mga panhitabo nga gin-unabi dida hito may kapulsanan ha aton. May epekto ito ha aton kinabuhi yana ngan ha tidaraon. Salit usisahon naton hin maopay ini nga salmo.

3, 4. (a) Interesado kita ha ano nga “maopay nga butang,” ngan paonan-o ito makakaapekto ha aton kasingkasing? (b) Ha ano nga paagi ‘nagyayakan [kita] hin mga butang para ha hadi,’ ngan paonan-o an aton dila nagigin pariho hin pluma?

³ Basaha an Salmo 45:1. An “maopay nga butang” nga nakabantad ha kasingkasing han salmista nga tungod hito ‘nag-awas’ o napagios an iya kasingkasing amo an mga sumat mahitungod han hadi. An Hebreo nga berbo nga “nag-aawas” nagpapasabot hin “pagsukob,” o “pagkaladkad.” Tungod hinin “maopay nga butang,” an kasingkasing han salmista sugad  hin nagkaladkad ha kadasig ngan an iya dila nagin pariho hin ‘pluma hin parasurat nga malaksi.’

⁴ Kumusta man kita? An maopay nga sumat mahitungod han Mesianiko nga Ginhadian usa nga maopay nga butang nga nakakabantad ha aton kasingkasing. Han 1914, an mensahe han Ginhadian nagin mas “maopay” nga butang. Tikang hito nga panahon, an mensahe nga iginpapasamwak diri na mahitungod han tiarabot pa la nga Ginhadian kondi mahitungod han usa nga tinuod nga gobyerno nga nagmamando na yana ha langit. Ini an “maopay nga sumat han Ginhadian” nga aton iginsasangyaw ha “bug-os nga inuukyan nga tuna sugad nga pamatuod ha ngatanan nga nasud.” (Mat. 24:14) An aton ba kasingkasing ‘nakaladkad,’ o napapagios, tungod han mensahe han Ginhadian? Madasigon ba nga iginsasangyaw naton an maopay nga sumat han Ginhadian? Pariho han salmista, ‘nagyayakan [kita] hin mga butang para ha hadi’​—an aton Hadi nga hi Jesu-Kristo. Iginpapasamwak naton hiya sugad nga an nagmamando nga langitnon nga Hadi ha Mesianiko nga Ginhadian. Dugang pa, gin-aaghat naton an ngatanan, an mga magmarando ngan an mga ginmamandoan, nga magpasakop ha iya. (Sal. 2:1, 2, 4-12) Ngan an aton dila nagigin pariho hin ‘pluma hin parasurat nga malaksi’ tungod kay pirme naton ginagamit an Biblia ha aton pagsangyaw.

5. (a) Ha ano nga paagi nagin ‘matahom’ hi Jesus? (b) Paonan-o an Hadi nagyakan hin “makaruruyag nga mga pulong,” ngan paonan-o naton hiya masusubad?

⁵ Basaha an Salmo 45:2. An Kasuratan waray mag-unabi hin damu nga impormasyon mahitungod han hitsura ni Jesus. Pero sugad nga hingpit nga tawo, sigurado nga ‘matahom’ hiya. Kondi labi na nga nagin matahom hiya tungod han iya pagin matinumanon kan Jehova ngan han iya marig-on nga integridad. Dugang pa, gumamit hi Jesus hin “makaruruyag nga mga pulong” ha pagsangyaw han mensahe han Ginhadian. (Luc. 4:22; Juan 7:46) Ha aton pagsangyaw, nangangalimbasog ba kita nga subaron hiya pinaagi ha paggamit hin mga pulong nga makakapabantad ha kasingkasing han iba?​—Col. 4:6.

6. Paonan-o hi Jesus ginbendisyonan han Dios ha “kadayonan”?

⁶ Tungod han bug-os-kasingkasing nga debosyon ni Jesus, ginbendisyonan ni Jehova an iya ministeryo dinhi ha tuna ngan ginbalosan hiya katapos niya mamatay sugad nga halad. Hi apostol Pablo nagsurat: “Han nagin tawo hiya [Jesus], nagpaubos hiya ngan nagin masinugtanon tubtob ha kamatayon, oo, kamatayon ha pasakitan nga kahoy. Tungod liwat hini nga hinungdan, iginbutang hiya han Dios ha hitaas nga posisyon ngan mahigugmaon nga gintagan hiya hin ngaran nga labaw han ngatanan nga ngaran, basi ha ngaran ni Jesus lumuhod an tagsa nga tuhod han mga aadto ha langit ngan aanhi ha tuna ngan aada ha ilarom han tuna, ngan an tagsa nga dila dayag nga kumarawat nga hi Jesu-Kristo an Ginoo para ha himaya han Dios nga Amay.” (Fil. 2:8-11) Ginbendisyonan ni Jehova hi Jesus ha “kadayonan” pinaagi han pagbanhawa ha iya ngan paghatagi hin imortal nga kinabuhi.​—Roma 6:9.

7. Ha ano nga mga paagi gindihogan han Dios hi Jesus labaw han iya “mga kaupod”?

⁷ Basaha an Salmo 45:6, 7. Tungod kay hinigugma gud ni Jesus an katadongan ngan nangangalas hiya ha bisan ano nga mahimo magpasipara ha iya Amay, gindihogan hiya ni Jehova sugad nga Hadi han Mesianiko nga Ginhadian. Gindihogan hiya hin “lana han kalipayan” labaw han iya “mga kaupod,” nga amo an mga hadi han Juda nga tulin ni David. Ha ano nga mga paagi? Hi Jehova  mismo an nagdihog ha iya. Gindihogan liwat hiya sugad nga Hadi ngan Hitaas nga Saserdote. (Sal. 2:2; Heb. 5:5, 6) Dugang pa, gindihogan hiya diri pinaagi hin lana kondi pinaagi han baraan nga espiritu, ngan an iya pagmando diri dinhi ha tuna kondi ha langit.

8. Kay ano nga masisiring nga ‘an Dios an lingkuranan nga hadianon ni Jesus,’ ngan kay ano nga makakasiguro kita nga matadong an iya ginhadian?

⁸ Han 1914, ginpalingkod ni Jehova an iya Anak sugad nga Mesianiko nga Hadi ha langit. ‘An setro han iya ginhadian amo an setro han katadongan,’ salit sigurado nga matadong ngan may hustisya an iya pagmando. Legal an iya awtoridad tungod kay an ‘Dios an iya lingkuranan nga hadianon.’ Karuyag sidngon, hi Jehova an pundasyon han iya ginhadian. Dugang pa, an pagmando ni Jesus magpapadayon ha “waray kataposan.” Diri ba daku gud nga kadungganan an pag-alagad kan Jehova ilarom han iya gamhanan nga pinili nga Hadi?

9, 10. (a) Kakan-o iginhigot ni Kristo ha hawak an iya espada, ngan paonan-o niya gin-gamit dayon ito? (b) Ha ano pa gagamiton ni Kristo an iya espada?

⁹ Basaha an Salmo 45:3. Ginsugo ni Jehova an Iya pinili nga Hadi nga ‘ihigot an iya espada ha iya hawak,’ pinaagi hito gintagan niya hi Jesus hin awtoridad basi makig-away ha ngatanan nga nakontra ha pagkasoberano han Dios ngan ipadapat an Iya paghukom ha ira. (Sal. 110:2) Tungod kay hi Kristo an diri napipirde nga Girriro nga Hadi, gintatawag hiya nga “maisog [o, “gamhanan,” NW].” Han 1914, iginhigot niya an iya espada ha iya hawak ngan nagin madaugon hiya kontra kan Satanas ngan ha mga demonyo, nga tikang ha langit iya iginhulog nganhi ha tuna.​—Pah. 12:7-9.

¹⁰ Tinikangan pa la ito han madaugon nga pakig-away han Hadi. Kinahanglan niya “tapuson an iya pakig-away.” (Pah. 6:2) Ipapadapat pa ni Jehova an iya paghukom ha ngatanan nga bahin han sistema ni Satanas dinhi ha tuna, ngan kinahanglan mabungkag hi Satanas ngan an iya mga demonyo. An siyahan nga bubungkagon amo an Babilonya nga Gamhanan, an imperyo han buwa nga relihiyon ha kalibotan. Gagamiton ni Jehova an politikal nga mga magmarando ha pagbungkag hinin maraot nga “puta.” (Pah. 17:16, 17) Sunod, bubungkagon han Girriro nga Hadi an politikal nga sistema ni Satanas. Katapos hito, tatapuson ni Kristo nga gintatawag liwat nga “an anghel han kahiladman,” an iya pakig-away pinaagi ha paglabog kan Satanas ngan han iya mga demonyo ngadto ha kahiladman. (Pah. 9:1, 11; 20:1-3) Aton hisgotan kon paonan-o igintagna han Salmo 45 inin makalilipay nga mga panhitabo.

11. Ha ano nga paagi hi Kristo nakikig-away ‘tungod han kamatuoran’?

¹¹ Basaha an Salmo 45:4. An Girriro nga Hadi diri nakikiggirra basi sakupon an mga teritoryo ngan an mga tawo. May maopay gud nga katuyoan an iya matadong nga pakiggirra. Nakikig-away hiya “tungod han kamatuoran, han kaaghop ngan han kamatadong.” An pinakaimportante nga kamatuoran nga kinahanglan depensahan amo an pagkasoberano ni Jehova ha bug-os nga uniberso. Gin-ayat ni Satanas an katungod ni Jehova ha pagmando han nagrebelde hiya. Tikang hito nga panahon, iton pinakaimportante nga kamatuoran ginkontra han mga demonyo ngan han mga tawo. Yana inabot na an panahon para makig-away an kan Jehova pinili nga Hadi basi parig-unon an kamatuoran nga hi Jehova an soberano ha kadayonan.

12. Ha ano nga paagi an Hadi susbaranan ha “kaaghop”?

¹² An Hadi maopay liwat nga susbaranan ha “kaaghop.” Sugad nga bugtong nga Anak han Dios, hiya mismo nagpakita hin maopay nga susbaranan han pagpaubos ngan maunungon nga pagpasakop ha pagkasoberano han iya Amay. (Isa. 50:4, 5; Juan 5:19) An ngatanan nga maunungon nga sakop han Hadi kinahanglan magsubad han iya ehemplo ngan mapainubsanon nga magpasakop ha pagkasoberano ni Jehova. Adton  nagbubuhat la hini an makakasulod ha iginsaad han Dios nga bag-o nga kalibotan.​—Sak. 14:16, 17.

13. Ha ano nga paagi hi Kristo nakikig-away ‘tungod han katadongan’?

¹³ Hi Kristo nakikig-away liwat ‘tungod han katadongan.’ An katadongan nga gindidepensahan han Hadi amo an “pagkamatadong han Dios”​—an suruklan ni Jehova ha kon ano an husto ngan sayop. (Roma 3:21; Deut. 32:4) Mahitungod han Hadi nga hi Jesu-Kristo, hi Isaias nagtagna: “An usa nga hadi maghahadi ha pagkamatadong.” (Isa. 32:1) An pagmando ni Jesus magpapahinabo nga matuman an saad nga “bag-o nga mga langit” ngan “bag-o nga tuna,” nga dida hito “maukoy an katadongan.” (2 Ped. 3:13) An ngatanan nga umurukoy hiton bag-o nga kalibotan kinahanglan sumunod ha mga suruklan ni Jehova.​—Isa. 11:1-5.

14. Paonan-o an too nga kamot ni Kristo magbubuhat hin “magpakaharadlok nga mga butang”? (Kitaa an retrato ha tinikangan hini nga artikulo.)

¹⁴ Han nagtikang sumakay an Hadi ha iya busag nga kabayo, may-ada hiya espada nga nakahigot ha iya hawak. (Sal. 45:3) Kondi maabot an panahon nga iya ito huhulbuton pinaagi han iya too nga kamot. An salmista nagtagna: “An imo too nga kamot magtututdo ha imo hin mga magpakaharadlok nga mga butang.” (Sal. 45:4) Kon ipadapat na ni Jesu-Kristo an paghukom ni Jehova ha Armagedon, magbubuhat hiya hin “magpakaharadlok nga mga butang” kontra ha iya mga kaaway. Diri kita maaram kon ano an iya gagamiton ha pagbungkag han sistema ni Satanas. Kondi magigin makaharadlok gud ito para ha mga naukoy ha tuna nga diri nasunod ha pahamangno nga magpasakop ha pagmando han Hadi. (Basaha an Salmo 2:11, 12.) Ha tagna ni Jesus may kalabotan ha panahon han kataposan, nagsiring hiya nga an mga tawo “madidismayo tungod ha kahadlok ngan pagpinamulat han mga mahitatabo ha bug-os nga inuukyan nga tuna, kay mababay-og an gamhanan nga mga butang ha langit.” Hiya nagdugang: “Ngan makikita nira an Anak han tawo nga nalusad upod han dampog nga may gahum ngan daku nga himaya.”​—Luc. 21:26, 27.

15, 16. Hin-o an magkukompwesto han “kasundalohan” nga masunod kan Kristo ha pakig-away?

¹⁵ Gin-unabi ha libro han Pahayag an pag-abot han Hadi nga “may gahum ngan daku nga himaya” basi ipadapat an paghukom. Ito nasiring: “Nakita ko nga naabrihan an langit. Kitaa! usa nga busag nga kabayo, ngan an nasakay hito gintatawag nga Matinumanon ngan Totoo. Naghuhukom hiya ngan nakikiggirra uyon ha katadongan. Ngan an kasundalohan ha langit nga nakasakay ha busag nga mga kabayo nagsinunod ha iya, ngan an ira sul-ot nga bado busag, limpyo, ngan maopay an klase han tela. Ha iya baba nagawas an matarom ngan hilaba nga espada nga gagamiton niya ha pag-atake ha mga nasud. Mamandoan niya hira gamit an tungkod nga puthaw. Sugad man, iya tatamaktamakan an purog-an han ubas han duro nga kasina han Dios nga Makagarahum-ha-ngatanan.”​—Pah. 19:11, 14, 15.

¹⁶ Hin-o an magkukompwesto han langitnon nga “kasundalohan” nga masunod kan Kristo ha pakig-away? Han siyahan nga iginhigot ni Jesus ha iya hawak an iya espada basi paiwason ha langit hi Satanas ngan an mga demonyo, kaupod niya an “iya mga anghel.” (Pah. 12:7-9) Baga hin makatadunganon an paghunahuna nga ha girra ha Armagedon, kaapi ha kasundalohan ni Jesus an baraan nga mga anghel. May iba pa ba nga kaapi hito nga kasundalohan? Hi Jesus nagsaad ha iya dinihogan nga kabugtoan: “An nagdadaog ha pakig-away ngan nagsusubad han akon mga buhat tubtob ha kataposan tatagan ko hin awtoridad ha mga nasud, pariho han awtoridad nga nakarawat ko tikang ha akon Amay. Pagmamandoan niya an katawohan gamit an tungkod nga puthaw basi mabuong hira pariho hin mga surudlan nga hinimo tikang ha lapok.” (Pah. 2:26, 27) Salit kaapi liwat ha langitnon nga kasundalohan ni Kristo an iya dinihogan nga kabugtoan, nga hito nga panahon makakakarawat na han ira balos  ha langit. An dinihogan nga iya mga igkasi-magmarando aada ha iya sapit kon buhaton na niya an “magpakaharadlok nga mga butang” samtang iya ginmamandoan an mga nasud gamit an tungkod nga puthaw.

17. (a) Ano an ginsisimbolohan han busag nga kabayo nga ginsasakyan ni Kristo? (b) Ano an ginsisimbolohan han espada ngan han pana?

¹⁷ Basaha an Salmo 45:5. An Hadi nasakay ha busag nga kabayo nga nagsisimbolo han limpyo ngan matadong nga pakig-away ha paniplatan ni Jehova. (Pah. 6:2; 19:11) Labot la ha espada, may-ada liwat hiya pana. Aton mababasa: “Nakita ko an usa nga busag nga kabayo, ngan an nasakay hito may pana; ngan gintagan hiya hin korona, ngan sinulong hiya basi pirdihon an mga kaaway ngan tapuson an iya pakig-away.” An espada ngan an pana nagsisimbolo han paagi nga gagamiton ni Kristo ha pagpadapat han paghukom ha iya mga kaaway.

18. Paonan-o mapapamatud-an nga ‘matarom an mga pana’ ni Kristo?

¹⁸ Pinaagi hin siday, igintagna han salmista nga ‘matarom an mga pana’ han Hadi, nalapos ito ha ‘kasingkasing han iya mga kaaway’ ngan ‘nagtutumba han katawohan ha ubos niya.’ An pamatay mahitatabo ha bug-os nga tuna. An tagna ni Jeremias nasiring: “An mga pamamatayon ni Jehova makikita hadto nga adlaw tikang ha usa nga kataposan han tuna bisan ngadto ha luyo nga kataposan han tuna.” (Jer. 25:33) An pariho nga tagna nasiring: “Nakita ko liwat an usa nga anghel nga natindog ha adlaw, ngan ginuliat hiya ngan nagsiring ha ngatanan nga tamsi nga nagkakalupad ha kabutngaan han langit ngan tuna: ‘Kadi, pagkatirok kamo para ha daku nga panihapon han Dios, basi niyo kaunon an unod han mga hadi, an unod han mga kumander ha militar, an unod han magkusog nga kalalakin-an, an unod han mga kabayo ngan han mga sakay hito, an unod han ngatanan, han mga tawo nga may kagawasan sugad man han mga uripon, ngan han mga ubos ngan mga prominente.’”​—Pah. 19:17, 18.

19. Paonan-o madaugon nga tatapuson ni Kristo an iya pakig-away?

¹⁹ Katapos bungkagon ni Kristo an maraot nga sistema ni Satanas dinhi ha tuna, ha iya ‘pagkaharangdon’ padayon hiya nga ‘magdadaog.’ (Sal. 45:4, Maopay nga Sumat) Iya tatapuson an iya pakig-away pinaagi ha paglabog kan Satanas ngan han mga demonyo ngadto ha kahiladman. Magpapabilin hira didto tubtob nga matapos an Usa ka Yukot ka Tuig nga Pagmando. (Pah. 20:2, 3) Tungod kay hito nga panahon an Yawa ngan an iya mga demonyo sugad hin patay na nga waray mahihimo, diri na nira maiimpluwensyahan an mga umurukoy ha tuna. An katawohan bug-os nga magpapasakop ha ira madaugon ngan mahimayaon nga Hadi. Kondi antes magin paraiso an bug-os nga tuna, may usa pa nga hinungdan nga dumuyog hira ha kalipay han ira Hadi ngan ha iya mga kaupod ha langit. Iton makalilipay nga panhitabo hihisgotan ha sunod nga artikulo.