1, 2. (a) Kan kanay kasal an maghahatag hin kalipay ha langit? (b) Ano an nabangon nga mga pakiana?

PIRME nagkikinahanglan hin daku nga panahon para maiandam an usa nga kasal. Kondi tatagdon naton an espesyal hinduro nga kasal​—an usa nga hadianon nga kasal. Hunahunaa la! Mga 2,000 ka tuig na ito nga igin-inandam. Ngan yana, nagtitikahirani na ito nga pagtampo han karaslon nga lalaki ngan han iya maarasawa. Diri na mag-iiha, an malipayon nga musika mababatian ha bug-os nga palasyo han Hadi, ngan an daku nga mga grupo ha langit magkakanta: “Dayawa niyo hi Jah, kay hi Jehova nga aton Dios nga Makagarahum-ha-ngatanan nagtikang na paghadi. Magkalipay kita ngan magrayhak ngan maghimaya ha iya, kay inabot na an kasal han Kordero ngan an iya maarasawa andam na.”​—Pah. 19:6, 7.

² “An Kordero,” nga an iya kasal maghahatag hin kalipay ha langit, amo hi Jesu-Kristo. (Juan 1:29) Ano an iya isusul-ot para han kasal? Hin-o an iya maarasawa? Paonan-o an iya maarasawa igin-aandam para han kasal? San-o mahitatabo an kasal? Kon ini nga kasal maghahatag hin kalipay ha langit, maduyog ba liwat ha kalipay adton may paglaom nga mabuhi ha waray kataposan dinhi ha tuna? Karuyag gud naton hibaroan an baton hini nga mga pakiana salit padayon nga usisahon naton an Salmo 45.

3, 4. (a) Ano an ginsisiring mahitungod han bado nga pankasal han Karaslon nga lalaki, ngan ano an nakakadugang han iya kalipay? (b) Hin-o an “mga anak nga babaye han mga hadi” ngan an “hadi nga babaye” nga naduyog ha kalipay han Karaslon nga lalaki?

³ Basaha an Salmo 45:8, 9. Iginsul-ot han Karaslon nga hi Jesu-Kristo an iya hadianon nga bado nga pankasal. Angayan gud la nga mahamot hinduro ito pariho hadton “gimamaupayi nga mga pahamot,” sugad han mirra ngan kasia, nga iginsasalakot ha baraan nga lana nga ginagamit ha pagdihog ha Israel.​—Eks. 30:23-25; Maopay nga Sumat.

⁴ An maopay nga musika nga nababatian ha bug-os nga palasyo nakakadugang han kalipay han Karaslon nga lalaki samtang nagtitikahirani an iya kasal. Naduyog ha iya kalipay an “hadi nga babaye,” an langitnon nga bahin han organisasyon han Dios, nga nag-uupod han “mga anak nga babaye han mga hadi,” nga amo an baraan nga mga anghel. Makalilipay gud pamatian an mga tingog ha langit nga nagpapahayag: “Magkalipay kita ngan magrayhak . . . kay inabot na an kasal han Kordero”!

5. Hin-o an magigin “asawa han Kordero”?

⁵ Basaha an Salmo 45:10, 11. Nakilala na naton an Karaslon nga lalaki, pero hin-o an iya maarasawa? Simboliko hiya nga maarasawa nga ginkukompwesto han mga membro han kongregasyon nga ginpapangunahan ni Jesu-Kristo. (Basaha an Efeso 5:23, 24.) Magigin bahin hira han Mesianiko nga Ginhadian ni Kristo. (Luc. 12:32) Inin 144,000 nga dinihogan nga mga Kristiano “padayon nga nasunod ha Kordero bisan diin hiya kumadto.” (Pah. 14:1-4) Nagin “asawa [hira] han Kordero” ngan maukoy hira ha langit upod niya.​—Pah. 21:9; Juan 14:2, 3.

6. Kay ano nga an mga dinihogan gintawag nga “anak nga babaye han hadi,” ngan kay ano nga ginsugo hira nga ‘kalimtan an ira katawohan’?

⁶ An maarasawa waray la tawaga nga “O anak nga babaye” kondi gintawag liwat hiya nga “an anak nga babaye han hadi.” (Sal. 45:13) Hin-o ini nga “hadi”? Hi Jehova. Iya gin-ampon an dinihogan nga mga Kristiano sugad nga iya “mga anak.” (Roma 8:15-17) Tungod kay magigin langitnon hira nga mga maarasawa, ginsugo hira: ‘Hingalimti an imo kalugaringon nga katawohan, ngan an balay han imo [unudnon] nga amay.’ Kinahanglan ‘pirme nira hunahunaon an mga butang ha kahitas-an, diri an mga butang ha tuna.’​—Col. 3:1-4.

7. (a) Paonan-o igin-aandam ni Kristo an iya maarasawa? (b) Ano an pagtagad han maarasawa ha iya magigin bana?

⁷ Ha sulod hin mga siglo na, igin-aandam ni Kristo an iya maarasawa para ha ira kasal ha langit. Iginsaysay ni apostol Pablo nga “hinigugma han Kristo an kongregasyon ngan iginhatag an iya kalugaringon para hito, basi niya mabaraan ito, nga ginlilimpyohan ito pinaagi ha paghugasi hin tubig, nga amo an pulong han Dios, kay karuyag niya nga an kongregasyon magin dungganon ha iya pagkita, waray buring, waray depekto, o bisan ano nga sugad hito, lugod magin baraan ngan waray hugaw.” (Efe. 5:25-27) Ginsidngan niya an mga dinihogan ha kadaan nga Corinto: “Naabugho ako tungod ha iyo pariho han pangabugho han Dios, kay iginsaad ko nga ipakasal kamo ha usa nga lalaki basi maipresentar ko kamo ha Kristo sugad hin putli nga birhen.” (2 Cor. 11:2) Tungod kay an pagsingba han maarasawa limpyo ngan ginkakarawat han Dios, gintatagad hiya han Hadi nga hi Jesu-Kristo sugad nga ‘matahom.’ Ngan gintatagad hi Kristo han iya maarasawa sugad nga “ginoo” ngan ‘gintatahod’ sugad nga magigin bana.

8. Kay ano nga angayan la nga an maarasawa nga babaye iginhulagway sugad nga “makaruruyag kaopay”?

⁸ Basaha an Salmo 45:13, 14a. An maarasawa nga babaye iginpresentar sugad nga “makaruruyag kaopay” para ha hadianon nga kasal. Ha Pahayag 21:2, igintanding hiya ha usa nga  syudad, an Bag-o nga Jerusalem, ngan gin-adornohan para ha iya magigin bana. Inin syudad ha langit may-ada han “himaya han Dios” ngan nagraranggat “sugad han haspe nga bato nga nag-iinggat sugad katin-aw han kristal.” (Pah. 21:10, 11) An karanggat han Bag-o nga Jerusalem iginhulagway hin maopay ha libro han Pahayag. (Pah. 21:18-21) Diri urusahon nga iginhulagway han salmista an maarasawa nga babaye sugad nga “makaruruyag kaopay”! Angayan la ito tungod kay an hadianon nga kasal mahitatabo ha langit.

9. Hin-o an “hadi” diin igindul-ong an maarasawa nga babaye, ngan ano an bado han maarasawa nga babaye?

⁹ An maarasawa nga babaye igindul-ong ha iya magigin bana​—an Mesianiko nga Hadi. Igin-inandam hiya han Hadi, ‘ginlilimpyohan hiya pinaagi ha paghugasi hin tubig, nga amo an pulong han Dios.’ “Baraan [hiya] ngan waray hugaw.” (Efe. 5:26, 27) An maarasawa nga babaye kinahanglan liwat magsul-ot hin bado nga angayan hito nga okasyon. Ngan ito gud an iya ginbuhat! Oo, an “iya panapton sinamayan hin bulawan,” ngan “ha mga sul-ot nga panapton nga binurdahan hiya igdudul-ong ngadto ha hadi.” Tungod kay ikakasal hiya ha Kordero, “gintugotan hiya nga magsul-ot hin bado nga mainggat, limpyo, ngan maopay an klase han tela, kay an maopay nga klase hin tela nagsisimbolo han matadong nga mga buhat han mga baraan.”​—Pah. 19:8.

10. San-o mahitatabo an kasal han Kordero?

¹⁰ Basaha an Pahayag 19:7. San-o mahitatabo an kasal han Kordero? Bisan kon an Pahayag 19:7 nasiring nga an “iya maarasawa andam na” para han kasal, an sunod nga mga bersikulo hito diri naghuhulagway han aktuwal nga kasal. Lugod matin-aw nga naghuhulagway ito mahitungod han kataposan nga bahin han daku nga kasakitan. (Pah. 19:11-21) Nangangahulogan ba ini nga an kasal mahitatabo antes tapuson han Karaslon nga Hadi an iya pakig-away? Diri. An mga bisyon ha libro han Pahayag waray ipresentar uyon ha sunod-sunod nga mga hitabo. Ha Salmo 45, an hadianon nga kasal mahitatabo katapos ihigot ha hawak han Hadi nga hi Jesu-Kristo an iya espada ngan ‘sumulong ha pagdarag-an’ kontra ha iya mga kaaway.​—Sal. 45:3, 4.

11. Ha ano nga pagkasunod-sunod nga panhitabo tatapuson ni Kristo an iya pakig-away?

¹¹ Salit masisiring naton nga an pagkasunod-sunod han mga panhitabo amo ini: Siyahan, ipapadapat an paghukom ha “gamhanan nga puta,” an Babilonya nga Gamhanan, an imperyo han buwa nga relihiyon ha kalibotan. (Pah. 17:1, 5, 16, 17; 19:1, 2) Sunod, ipapadapat ni Kristo an paghukom han Dios ha iba pa nga bahin han maraot nga sistema ni Satanas ha tuna pinaagi ha pagbungkag hito ha Armagedon, an “pakiggirra ha daku nga adlaw han Dios nga Makagarahum-ha-ngatanan.” (Pah. 16:14-16; 19:19-21) Ha urhi, tatapuson han Girriro nga Hadi an iya pakig-away pinaagi ha paglabog kan Satanas ngan ha mga demonyo ngadto ha kahiladman nga tungod hito sugad hira hin patay na nga waray mahihimo.​—Pah. 20:1-3.

12, 13. (a) San-o mahitatabo an kasal han Kordero? (b) Ha langit, hin-o an magkakalipay ha kasal han Kordero?

¹² An dinihogan nga mga Kristiano nga namamatay durante han presensya ni Kristo ginbabanhaw ngadto ha langit. Diri mag-iiha katapos bungkagon an Babilonya nga Gamhanan, titirukon ni Jesus an ngatanan nga nanhibilin nga membro han maarasawa nga klase. (1 Tes. 4:16, 17) Salit antes magtikang an girra ha Armagedon, ngatanan nga membro han “maarasawa” aadto na ha langit. Katapos hito nga girra, mahimo na mahitabo an kasal han Kordero. Magigin makalilipay gud ito nga okasyon! An Pahayag 19:9 nasiring: “Malipayon an mga gin-imbitar ha panihapon ha kasal han Kordero.” Oo, magigin malipayon gud an 144,000 nga membro han maarasawa nga klase. Ngan an Karaslon nga Hadi malilipay gud nga an ngatanan han iya hadianon nga kaupod simboliko nga ‘nakaon ngan nainom  kaupod niya ha lamesa han iya Ginhadian.’ (Luc. 22:18, 28-30) Kondi diri la an Karaslon nga lalaki ngan an iya maarasawa an malilipay ha ira kasal.

¹³ Sugad han gin-unabi na, an daku hinduro nga grupo ha langit urosa nga magkakanta: “Magkalipay kita ngan magrayhak ngan maghimaya ha iya [Jehova], kay inabot na an kasal han Kordero ngan an iya maarasawa andam na.” (Pah. 19:6, 7) Kondi kumusta man an mga surugoon ni Jehova dinhi ha tuna? Maduyog ba liwat hira hito nga kalipay?

14. Hin-o an ‘uray nga mga kaupod’ han maarasawa nga babaye nga gin-unabi ha Salmo 45?

¹⁴ Basaha an Salmo 45:12, 14b, 15. Igintagna ni propeta Sakarias nga ha panahon han kataposan, an mga tawo ha mga nasud malilipay gud ha pakig-upod ha nanhibilin han espirituwal nga Israel. Hiya nagsurat: “Hadto nga mga adlaw mahinanabo, nga an napulo ka tawo tikang ha ngatanan nga yinaknan han mga nasud magunit, hira magunit han saya niya nga usa nga Judio, ha pagsiring: Kami maupod ha iyo, kay kami nakabati nga an Dios aada kaupod niyo.” (Sak. 8:23) Ha Salmo 45:12, inin simboliko nga ‘napulo nga tawo’ gin-unabi sugad nga an “anak nga babaye ha Tiro” ngan ‘an mga salapion ha mga tawo.’ Makadto hira ha mga dinihogan nga nanhibilin ngan magdadara hin mga regalo, basi uyonan hira ngan buligan ha espirituwal. Tikang han 1935, gintugotan han minilyon nga tawo nga dad-on hira han mga nanhibilin “ngadto ha pagkamatadong.” (Dan. 12:3) Ginputli hinin maunungon nga mga kaupod han mga dinihogan an ira kinabuhi ngan nagin espirituwal hira nga mga uray. Inin ‘uray nga mga kaupod’ han maarasawa nga babaye nagdedikar han ira kalugaringon kan Jehova ngan ira ginpamatud-an nga matinumanon hira nga mga sakop han Karaslon nga Hadi.

15. Paonan-o ginsusuportahan han ‘uray nga mga kaupod’ adton maarasawa nga klase nga aanhi pa ha tuna?

 ¹⁵ An mga nanhibilin han maarasawa nga klase mapasalamaton gud hinin ‘uray nga mga kaupod’ tungod han ira madasigon nga pagsuporta ha pagsangyaw han “maopay nga sumat han Ginhadian” ha bug-os nga tuna. (Mat. 24:14) Diri la an “espiritu ngan an karaslon nga babaye [an] padayon nga nasiring: ‘Kadi!’” kondi pati adton mga nakakabati nasiring: “Kadi!” (Pah. 22:17) Oo, hinbatian han “iba nga mga karnero” an mga membro han mga dinihogan nga nasiring “Kadi!” ngan dumuyog hira ha ira ha pagsiring “Kadi!” ngadto ha mga umurukoy ha tuna.​—Juan 10:16.

16. Ano nga pribilehiyo an iginhatag ni Jehova ha iba nga karnero?

¹⁶ Hinigugma han nanhibilin nga mga dinihogan an ira mga kaupod, ngan nalilipay hira ha paghibaro nga an Amay han Karaslon nga lalaki, hi Jehova, tumugot nga inin iba nga karnero makapribilehiyo nga dumuyog ha duro nga kalipay para ha kasal han Kordero didto ha langit. Igintagna nga inin ‘uray nga mga kaupod’ ‘idudul-ong bunyog an karayhak ngan kalipay.’ Oo, an iba nga karnero nga naglalaom nga mabuhi ha waray kataposan dinhi ha tuna, maduyog ha kalipay han pamilya ni Jehova ha bug-os nga uniberso kon mahitabo na ha langit an kasal han Kordero. Angayan gud la nga iginhuhulagway han libro han Pahayag an mga membro han “daku nga grupo” sugad nga “natindog . . . ha atubangan han trono ngan ha atubangan han Kordero.” Nagbubuhat hira hin sagrado nga pag-alagad kan Jehova ha tunan-on nga bungsaran han iya espirituwal nga templo.​—Pah. 7:9, 15.

17, 18. Paonan-o magigin mabungahon an kasal han Kordero, ngan hin-o an magigin mga anak ni Kristo durante han iya Usa ka Yukot ka Tuig nga Pagmando?

¹⁷ Basaha an Salmo 45:16. An ‘uray nga mga kaupod’ han langitnon nga maarasawa ni Kristo mas malilipay pa gud kon makita nira nga an ginkasal magin mabungahon na ha bag-o nga kalibotan. Ipupokus han Karaslon nga Hadi an iya atensyon dinhi ha tuna ngan iya babanhawon an iya tunan-on nga “mga amay,” o kaapoy-apoyan nga magigin iya mga “anak” dinhi ha tuna. (Juan 5:25-29; Heb. 11:35) Tikang ha ira, magtutoka hiya hin “mga prinsipe ha bug-os nga tuna.” Sigurado nga hi Kristo magtutoka hin iba pa tikang ha matinumanon nga mga tigurang yana basi manguna ha bag-o nga kalibotan.​—Isa. 32:1.

¹⁸ Durante han Usa ka Yukot ka Tuig nga Pagmando ni Kristo, magigin amay liwat hiya han iba. Ha pagkamatuod, magigin Amay hi Jesus han ngatanan nga umurukoy ha tuna nga makakakarawat han kinabuhi nga waray kataposan tungod kay nagpakita hira hin pagtoo ha iya halad lukat. (Juan 3:16) Salit hiya an ira magigin “Amay ha Kadayonan.”​—Isa. 9:6, 7.

19, 20. Paonan-o nakakaapekto ha ngatanan nga Kristiano yana an makalilipay nga mga panhitabo nga gin-unabi ha Salmo 45?

¹⁹ Basaha an Salmo 45:1, 17. Oo, an mga panhitabo nga nakarekord ha Salmo 45 nakakaapekto ha ngatanan nga Kristiano. An mga dinihogan nga nanhibilin dinhi ha tuna interesado gud ha paglaom nga ha diri na mag-iiha makakaupod nira ha langit an ira kabugtoan ngan an Karaslon nga lalaki. An iba nga karnero napapagios nga magin mas mapinasakupon ha ira mahimayaon nga Hadi ngan nagpapasalamat hira ha pribilehiyo nga magin kaupod han mga nanhibilin dinhi ha tuna nga membro han iya maarasawa nga klase. Katapos han ira kasal, hi Kristo ngan an iya mga kaupod ha Ginhadian hura nga magbibendisyon ha mga umurukoy ha tuna.​—Pah. 7:17; 21:1-4.

²⁰ Samtang ginpapamulat naton an katumanan han “maopay nga butang” may kalabotan ha Mesianiko nga Hadi, diri ba kita napapagios nga ipakilala an iya ngaran? Hinaot kaupod kita hadton mga ‘magpapasalamat ha Hadi ha waray kataposan.’