HAN Septyembre 7, 1950, nagin membro ako han pamilya han Bethel ha Brooklyn. Hito nga panahon, 355 nga kabugtoan an membro hito tikang ha iba-iba nga nasud nga nag-iedad hin 19 tubtob 80 anyos. Damu ha ira an dinihogan nga Kristiano.

Hi Nanay an nagtutdo ha akon nga mag-alagad ha aton “malipayon nga Dios.” (1 Tim. 1:11) Bata pa ako han nagtikang hiya mag-alagad kan Jehova. Han Hulyo 1, 1939, han dyes anyos ako, nabawtismohan ako ha usa nga zone assembly (sirkito nga asembleya na yana) ha Columbus, Nebraska, U.S.A. Mga 100 kami nga nagkatirok ha usa nga ginpletehan nga pasilidad basi mamati hin nakarekord nga pahayag ni Joseph Rutherford nga may ulohan “Fascism or Freedom.” Ha katunga-tungaan han pahayag, usa nga grupo hin nasisina nga mga tawo an nagtirirok ha gawas hiton gutiay nga pasilidad nga amon ginkakatirokan. Nagpirit hira nga sumulod, ginpaundang an amon katirok, ngan ginpabaya kami ha bungto. Tungod hito, kumadto kami ha uma han usa nga bugto nga hirayo ha bungto ngan iginpadayon namon didto an katirok. Salit diri ka mahipapausa kon kay ano nga diri ko gud hingangalimtan an petsa han akon bawtismo!

Ginpangalimbasogan gud ni Nanay nga padakuon ako ha kamatuoran. Bisan kon hi Tatay maopay nga tawo ngan buotan nga amay, gutiay la an iya interes ha relihiyon o ha akon espirituwalidad. Hi Nanay ngan an iba pa nga kabugtoan ha Omaha Congregation an nagparig-on gud ha akon.

Han hirani na ako maggradwar ha hayskul, kinahanglan ko na magdesisyon kon ano an akon bubuhaton ha akon kinabuhi. Kada bakasyon, nag-aalagad ako sugad nga vacation pioneer (auxiliary payunir na yana), upod han iba pa nga akon mga kaedad.

Duha nga batan-on nga brother nga paggagradwar pa la han ikapito nga klase han Gilead—hira John Chimiklis ngan Ted Jaracz—an igintoka ha amon lugar sugad nga nagbibiyahe nga mga paramangno. Diri ako makatoo han hinbaroan ko nga mga 20 anyos pa la hira. Hito nga panahon, 18 anyos ako ngan maggradwar na ha hayskul. Nahinunumdoman ko pa han ginpakianhan ako ni Brother Chimiklis kon ano an akon bubuhaton ha  akon kinabuhi. Katapos ko bumaton, iya ako gindasig: “Sige, sulod dayon ha bug-os panahon nga pag-alagad. Diri ka la maaram kon diin ka hito mahimo dad-on.” Daku gud an epekto ha akon hini nga sagdon pati na han ira maopay nga ehemplo. Salit paggradwar ko han 1948, nagpayunir ako.

Han Hulyo 1950, kumadto ako upod an akon mga kag-anak ha Yankee Stadium ha New York City para ha internasyonal nga kombensyon. Tumambong ako han miting para ha mga naruruyag mag-alagad ha Bethel. Nagsurat ako nga nalilipay ako nga mag-alagad didto.

Bisan kon tumugot hi Tatay nga magpayunir ako ngan padayon nga umukoy ha balay, pero karuyag niya nga maghatag ako hin kwarta para han akon urukyan ngan pagkaon. Usa ka adlaw han temprano han Agosto, samtang tilakat ako pamiling hin trabaho, ginkita ko anay an amon mailbox. May surat ako tikang ha Brooklyn. Pirmado ito ni Nathan H. Knorr, nga nasiring: “Nakarawat namon an imo aplikasyon para ha pag-alagad ha Bethel. Maaram ako nga karuyag mo magpabilin ha Bethel tubtob nga igintutugot han Ginoo. Salit alayon pagreport ha Bethel ha 124 Columbia Heights, Brooklyn, New York, ha Septyembre 7, 1950.”

Pag-uli ni Tatay tikang ha trabaho hito nga adlaw, ginsumatan ko hiya nga may trabaho na ako. Nagsiring hiya, “Maopay, diin ka man magtatrabaho?” Binaton ako, “Ha Brooklyn Bethel, $10.00 kada bulan an akon makakarawat.” Medyo nakalasan hiya hito, kondi nagsiring hiya nga kon ito an akon karuyag, kinahanglan ko buhaton an akon gimaopayi. Waray pag-iha katapos hito, ha kombensyon ha Yankee Stadium han 1953, nabawtismohan hi Tatay!

Makalilipay kay dungan kami nga gintawag ha Bethel han akon partner ha pagpayunir nga hi Alfred Nussrallah, salit mag-upod kami nga nagbiyahe. Ha urhi nag-asawa hiya kan Joan, umiskwela hira ha Gilead, nagin misyonero ha Lebanon, ngan katapos nag-alagad hira sugad nga nagbibiyahe nga paramangno ha United States.

Ha Bindery an akon siyahan nga toka ha Bethel, nagtatahi ako hin mga libro. An siyahan nga libro nga akon gintahi amo an What Has Religion Done for Mankind? Paglabay hin mga walo ka bulan ha Bindery, iginbalhin ako ha Service Department ilarom ha pagpanguna ni Brother Thomas J. Sullivan. Makalilipay gud nga makatrabaho hiya ngan makapahimulos han espirituwal nga kinaadman ngan hilarom nga pagsabot nga iya nakuha dida ha organisasyon ha sulod hin mga katuigan.

Paglabay hin haros tulo ka tuig nga pagtrabaho ha Service Department, ginsidngan ako ni Max Larson, an factory overseer, nga karuyag ako kaistoryahon ni Brother Knorr. Naghunahuna ako kon may nabuhat ba ako nga sayop. Nakaginhawa gud ako han nagsiring hi Brother Knorr nga karuyag niya hibaroan kon may plano ba ako pagbaya ha Bethel. Nanginginahanglan hiya hin temporaryo nga magtatrabaho ha iya opisina ngan karuyag niya hibaroan kon mahihimo ko ito. Nagsiring ako nga waray ako plano nga bumaya. Ha pagkamatuod, nakapribilehiyo ako nga makagtrabaho ha iya opisina ha sulod hin 20 ka tuig.

Agsob ako magsiring nga diri ko gud mababaydan an pagbansay nga akon nakarawat tikang kanda Brother Sullivan ngan Brother Knorr, pati han iba pa nga Bethelite, sugad kanda Milton Henschel, Klaus Jensen , Max Larson, Hugo Riemer, ngan Grant Suiter. *

 An kabugtoan nga akon nakatrabaho mga organisado gud ha pagbuhat han ira mga toka. Hi Brother Knorr maduruto gud para ha bug-os nga pagpauswag han mga buruhaton han Ginhadian. An iya mga nakatrabaho nagsiring nga masayon hiya daupon. Bisan kon iba-iba an amon opinyon ha usa nga butang, diri kami nag-aalang ha pagpahayag han amon ginhuhunahuna ngan padayon la gihapon hiya nga nasarig ha amon.

Usa ka higayon, nagsiring ha akon hi Brother Knorr nga kinahanglan asikasuhon bisan an baga hin gutiay la nga mga butang. Pananglitan, ginsumatan niya ako nga han factory overseer pa hiya, tumawag ha iya hi Brother Rutherford ngan nagsiring: “Brother Knorr, kon makadi ka na tikang ha factory para kumaon, dad-i ako hin mga parâ. Ibutang na la ito ha akon lamesa.” Hi Brother Knorr nagsiring nga dayon hiya napakadto ha ginbubutangan han mga suplay, nakuha hin mga parâ, ngan iginbubutang ito ha iya bursa. Katapos kon udto, iya ito iginbubutang ha opisina ni Brother Rutherford. Gutiay la ito nga butang, pero kinahanglanon ito ni Brother Rutherford. Katapos hi Brother Knorr nagsiring ha akon: “Karuyag ko nga may tinaharan nga mga lapis ha akon lamesa. Salit alayon pagbutang hito didto kada aga.” Ha sulod hin damu ka tuig, ginsisiguro ko nga tinaharan an iya mga lapis.

Agsob kami sidngan ni Brother Knorr nga kinahanglan mamati kami hin maopay kon may iginpapabuhat ha amon nga espisipiko nga toka. Makausa, gintagan niya ako hin espisipiko nga instruksyon kon paonan-o bubuhaton an usa nga butang, kondi waray ako mamati ha iya hin maopay. Sugad nga resulta, naalohan hiya tungod ha akon. Nahadlok gud ako ha iya salit naghimo ako hin halipot nga surat ngan nagsiring nga nagbabasol gud ako han akon nabuhat, ngan maopay siguro nga ibalhin na la ako ha iba nga departamento. Han tikaudto, gindaop ako ni Brother Knorr ha akon lamesa. Hiya nagsiring: “Robert, nabasa ko an imo surat. Nakasayop ka. Ginsidngan ko na ikaw mahitungod hito, ngan sigurado ako nga magigin mas mabinantayon ka na ha sunod. Sige, balik na kita ha aton trabaho.” Gin-apresyar ko gud an iya pagin buotan ngan pagin makonsiderasyon.

Ha sulod hin walo ka tuig nga akon pag-alagad ha Bethel, waray ako iba nga plano kondi ipadayon an akon pagin Bethelite. Kondi nagbag-o ito. Han internasyonal kombensyon ha Yankee Stadium ngan ha Polo Grounds han 1958, nakita ko hi Lorraine Brookes nga nakilala ko han 1955 han payunir pa hiya ha Montreal, Canada. Bumilib ako han iya disposisyon ha bug-os panahon nga pag-alagad ngan han iya pagin disidido pagkadto bisan diin hiya itoka han organisasyon ni Jehova. Tumong niya nga makaeskwela ha Gilead. Han 1956, han 22 anyos hiya, nakaeskwela hiya han ika-27 nga klase hito. Pakagradwar niya, igintoka hiya ha Brazil sugad nga misyonero. Nagkaada kami utro komunikasyon han 1958, ngan sumugot hiya nga magpakasal kami. Han sumunod nga tuig, nagplano kami magpakasal ngan naglalaom nga magigin misyonero kami.

 Han iginsumat ko kan Brother Knorr an amon plano, nagsuhestyon hiya nga maghulat kami hin tulo ka tuig, katapos magpakasal kami, ngan mag-alagad ha Brooklyn Bethel. Hito nga panahon, basi magpabilin ha Bethel an mga nag-aasawa, an usa ha ira kinahanglan nakag-alagad na ha Bethel hin napulo ka tuig o sobra pa ngan an usa naman nakatulo ka tuig na. Salit inuyon hi Lorraine nga mag-alagad anay hin duha ka tuig ha Brazil Bethel ngan hin usa ka tuig ha Brooklyn Bethel antes kami magpakasal.

Ha sulod hin duha ka tuig, nagkukomunikar kami pinaagi la hin surat. Mahal hinduro an pagtawag ha telepono, ngan waray pa e-mail hito nga panahon! Han ginkasal kami han Septyembre 16, 1961, pribilehiyo gud namon nga hi Brother Knorr an nagkasal ha amon. Tinuod, iton pipira la ka tuig nga amon paghulat baga hin maiha gud nga panahon. Kondi yana, samtang ginhuhunahuna namon an amon 50 ka tuig nga malipayon nga pag-asawa, kombinsido kami nga husto gud la nga naghulat kami!

Han 1964, nakapribilehiyo ako nga bumisita ha iba nga mga nasud sugad nga zone overseer. Hito nga panahon, diri pa igin-uupod han mga bana an ira asawa ha pagbisita. Kondi han 1977 nagbag-o ito, puydi na nira ig-upod an ira asawa. Hito nga tuig, gin-updan namon ni Lorraine hira Grant ngan Edith Suiter ha pagbisita ha sanga nga mga opisina han Germany, Austria, Greece, Cyprus, Turkey, ngan Israel. Ha kabug-osan, mga 70 nga nasud an akon nakadtoan.

Han bumisita kami ha Brazil han 1980, nakakadto kami ha Belém, usa nga syudad ha ekwador diin nagin misyonero hadto hi Lorraine. Ginbisita liwat namon an mga kabugtoan ha Manaus. Samtang may nagpapahayag ha usa nga estadyum, may nakita kami nga grupo nga nangangalingkod nga diri nagbubuhat han kustomre han mga taga-Brazil nga an kababayin-an nagbibisobiso ngan an mga brother nakikiglamano. Kay ano?

Hira an aton hinigugma nga kabugtoan tikang ha usa nga komunidad han may mga leprosi ha kagurangan han Amazon. Basi diri hira makatapon, ginlilikyan nira nga dumuok ha iba. Kondi nabantad gud nira an amon kasingkasing, ngan diri gud namon hingangalimtan an kalipay ha ira nawong! Tinuod gud an ginsiring ni Isaias: “An akon mga surugoon magkakanta tungod han kahimongaya han kasingkasing.”—Isa. 65:14.

Agsob namon dumdumon ni Lorraine an amon sobra 60 ka tuig nga bug-os kasingkasing nga pag-alagad kan Jehova. Malipayon gud kami han mga bendisyon ni Jehova tungod kay nagpagiya kami ha iya organisasyon. Bisan kon diri na ako nakakakadto ha iba-iba nga nasud sugad han akon nabubuhat hadto, pero nagtatrabaho pa gihapon ako kada adlaw sugad nga kabulig han Nagmamando nga Lawas, han Coordinators’ Committee ngan han Service Committee. Ginpapabilhan ko gud an pribilehiyo nga makabulig bisan gutiay la ha pagsuporta ha bug-os kalibotan nga pagminagburugto ha sugad hini nga paagi. Padayon nga nalilipay kami nga makita an damu nga batan-on nga nasulod ha bug-os panahon nga pag-alagad nga may disposisyon sugad han kan Isaias: “Iini ako; pakadtoa ako.” (Isa. 6:8) Masisiring hinin damu hinduro nga indibiduwal nga tinuod gud an ginsiring ha akon hadto han paramangno han sirkito: “Sige, sulod dayon ha bug-os panahon nga pag-alagad. Diri ka la maaram kon diin ka hito mahimo dad-on.”