HAN an katawohan han Dios bumaya ha Babilonya hadton 537 B.C.E., iginpakita ni Jehova nga interesado hiya ha ira ruta tipabalik ha Jerusalem. Hiya nagsiring ha ira: “Pag-andam kamo han dalan han katawohan; tak-upi, tak-upi an dalan; pagkuhaa an mga bato.” (Isa. 62:10) Paonan-o daw la nira ito ginhimo? Bangin may pipira nga Judio nga nag-una para hawanan o kuhaon an mga nakakaulang ha dalan ngan tak-upan an mga lubak. Sigurado nga nakabulig gud ito ha ira mga igkasi-Judio nga magin masayon an ira pagbiyahe tipabalik ha ira tuna nga natawohan.

Ha pariho nga paagi, naglalakat kita ha usa nga dalan nga tipakadto ha pagkab-ot hin espirituwal nga mga tumong. Karuyag ni Jehova nga waray makaulang ha aton ha paglakat hito nga dalan. An iya Pulong nag-aaghat ha aton: “Himoa nga patag an agianan han imo mga tiil, ngan tukora an ngatanan mo nga dalan.” (Prob. 4:26) Batan-on ka man o adulto, magpapahimulos ka hito nga sagdon han Dios.

Bangin nakabati ka na nga may nagsiring mahitungod ha usa nga tin-edyer: ‘Maopay gud an iya magigin kabubuwason.’ Kasagaran na nga an mga batan-on mahimsog an panlawas, alerto an panhunahuna, ngan disidido nga maglampos. Husto an ginsisiring han Biblia: “An himaya han mga batan-on amo an ira kusog.” (Prob. 20:29) Kon gagamiton han usa nga batan-on an iya abilidad ngan kusog ha pag-alagad kan Jehova, makakab-ot niya an iya espirituwal nga mga tumong ngan magigin tinuod hiya nga malipayon.

Bangin naoobserbaran mo nga ginpapabilhan liwat han kalibotan an mga abilidad ngan talento han mga batan-on. Kon an usa nga batan-on nga Saksi maopay ha klase, bangin pagkinumbinsihon hiya hin guidance counselor, titser, o igkasi-estudyante nga umiskwela ha unibersidad basi magin malampuson hini nga kalibotan. O kon an usa nga batan-on nga Saksi maopay ha isport, bangin aghaton hiya han iba nga himoon ito  sugad nga iya propesyon. Naeksperyensyahan mo na ba ito, o may kilala ka ba nga nakakaeksperyensya hin sugad nga pagsulay? Ano an makakabulig ha usa nga Kristiano basi makahimo hin maaramon nga desisyon?

An mga katutdoan ha Biblia mabulig ha usa nga magin andam ha paglakat ha pinakamaopay nga dalan ha kinabuhi. An Eklesiastes 12:1 nasiring, “Hinumdumi yana an imo Magburuhat ha mga adlaw han imo pagkabatan-on.” Ano an pinakamaopay nga paagi basi maipakita mo o han usa nga batan-on nga ‘nahinunumdoman niyo an iyo Magburuhat’?

Tagda hi Eric * nga taga-West Africa. Mahilig hiya ha soccer. Han 15 anyos hiya, napili hiya nga mag-uyag hin team nga magrirepresentar ha usa nga nasud. Tungod hito, posible nga makakarawat hiya han pinakamaopay nga pagbansay ha Europe, bangin magin propesyonal pa ngani hiya nga parauyag. Kondi paonan-o nakaapekto ha iya an sagdon nga ‘hinumdumi yana an imo Magburuhat’? Ngan ano an aton hibabaroan tikang ha iya eksperyensya?

Han naeskwela pa hi Eric nagtikang hiya mag-aram ha Biblia upod han mga Saksi ni Jehova. Hinbaroan niya nga permanente nga susulbaron han iya Maglalarang an mga problema han katawohan. Nasantop niya an pagkaimportante nga gamiton an iya panahon ngan kusog ha pagbuhat han kaburut-on han Dios. Salit nagdesisyon hiya nga diri ipadayon an iya propesyon ha isport. Lugod nagpabawtismo hiya ngan nagin madasigon ha pag-alagad. Waray pag-iha nagin ministeryal nga surugoon hiya ngan ha urhi nakaeskwela ha Bible School for Single Brothers.

Kon ginpili ni Eric an iya propesyon ha isport, bangin sikat ngan riko na hiya yana. Kondi nabuligan hiya han usa nga prinsipyo ha Biblia: “An kanan riko manggad amo an iya masarig nga syudad, ngan ginhuhunahuna niya ini nga usa nga hitaas nga padir.” (Prob. 18:11 [Dara. 18:11, Baraan nga Biblia]) Oo, ilusyon la an seguridad nga mahimo ihatag han karikohan. Ngan tungod han pagin pursigido han iba nga magriko, kasagaran nga ‘ginbubuno nira an ira kalugaringon hin damu nga kasakit.’—1 Tim. 6:9, 10.

Damu nga batan-on an nagin malipayon ngan nagkaada hin tinuod nga seguridad pinaagi ha pagsulod ha bug-os panahon nga pag-alagad. Hi Eric nagsiring: “Umapi ako ha usa nga daku nga ‘team’ han bug-os panahon nga mga surugoon ni Jehova. Ito an pinakamaopay nga team nga akon maaapihan, ngan nagpapasalamat ako kan Jehova nga gin-giyahan niya ako ha amo la nga dalan ngadto ha tinuod nga kalipay ngan kalamposan ha kinabuhi.”

Kumusta ka man? Imbes nga magkab-ot hin kalibotanon nga mga tumong, kay ano nga diri mo parig-unon an ‘imo mga dalan’ ha pag-alagad kan Jehova pinaagi ha pagpayunir?—Kitaa an kahon nga “ Nakapahimulos hin mga Butang nga Diri Maihahatag han Unibersidad.”

Samtang nabisita an usa nga mag-asawa ha sanga nga opisina ha United States, naobserbaran nira nga malipayon an mga Bethelite nga nag-aalagad didto. Ha urhi an sister nagsurat: “Nagin komportable kami hinduro ha amon rutina.” Salit nagdesisyon an mag-asawa nga dugangan pa an ira panahon ngan kusog ha pag-alagad kan Jehova.

May mga panahon nga baga hin makuri para ha mag-asawa an paghimo hin mga pagbag-o. Kondi usa ka adlaw ira ginpamalandong an inadlaw nga teksto nga mababasa ha Juan 8:31 diin hi Jesus nagsiring: “Kon pirme niyo ginbubuhat an akon ginsisiring, mga disipulo ko gud kamo.” Samtang ginhuhunahuna ito, hira nagsiring: “Bawi gud an anoman nga sakripisyo nga amon ginbubuhat para pasimplehon an amon kinabuhi.” Iginbaligya nira an ira daku nga balay, iginsalikway an mga butang nga diri kinahanglanon, ngan bumalhin ha usa nga kongregasyon nga nanginginahanglan hin bulig. Payunir na hira yana ngan nabulig liwat ha pagtukod hin mga Kingdom Hall ngan nagbuboluntaryo ha distrito nga mga kombensyon. Ano an ira inabat? “Diri namon ginlalaoman nga sugad kamakalilipay an pagkinabuhi hin simple, nga ginbubuhat kon ano gud la an iginpapabuhat han organisasyon ni Jehova.”

Hi Solomon nagsurat: “Itan-aw ha matadong an imo mga mata ha unhan, ngan itan-aw an imo mga lakop-lakop ha matadong ha imo atubangan.” (Prob. 4:25) Pariho ha usa nga drayber nga nakapokus ha dalan nga iya gin-aagian, sadang naton likyan an mga butang nga mahimo makaulang ha aton ha paghimo hin espirituwal nga mga tumong ngan ha pagkab-ot hito.

Ano nga espirituwal nga mga tumong an mahimo mo kab-uton? Maopay gud nga tumong an pagsulod ha bug-os panahon nga pag-alagad. Puydi ka liwat mag-alagad ha hirani nga kongregasyon nga nanginginahanglan  hin eksperyensyado nga mga magwarali basi makobrehan an ira haluag nga teritoryo. O puydi ka magboluntaryo ha usa nga kongregasyon nga damu an magwarali pero gutiay la an tigurang ngan ministeryal. Kay ano nga diri makiistorya ha paramangno han sirkito basi hibaroan mo kon puydi ka makagboluntaryo? Kon karuyag mo mag-alagad ha iba nga lugar, mahimo ka maghangyo hin impormasyon mahitungod ha higrayo nga kongregasyon nga nanginginahanglan hin bulig. *

Tagdon naton utro an panhitabo nga iginhulagway ha Isaias 62:10. An pipira nga Judio bangin nangalimbasog gud para patagon ngan hawanan an dalan tipakadto ha ira tuna nga natawohan ngan basi makaabot an katawohan han Dios ha ira destinasyon. Kon nangangalimbasog ka ha pagkab-ot hin mga tumong para ha sagrado nga pag-alagad, ayaw pag-undang. Ha bulig han Dios, mahimo mo liwat ito makab-ot. Padayon nga pangaro kan Jehova hin kinaadman samtang nangangalimbasog ka nga kuhaon an anoman nga mga ulang. Ha urhi, makikita mo kon paonan-o ka bubuligan han Dios nga ‘himoon nga patag an agianan han imo mga tiil.’—Prob. 4:26.