1, 2. (a) Kay ano nga nameligro an kongregasyon han Colosas ha siyahan nga siglo? (b) Ano an iginsagdon ha kabugtoan ha Colosas basi magpabilin hira nga marig-on?

NAMELIGRO an kongregasyon ha Colosas ha siyahan nga siglo! Iginpirit han pipira nga kabugtoan nga sundon han ngatanan an Mosaiko nga Balaud. Igin-aghat naman han iba an pagano nga pilosopiya nga asetisismo, nga nag-uupod han sobra nga pagpasakit ha kalugaringon. Para malikyan inin sayop nga mga katutdoan, ginpahamangnoan ni apostol Pablo an mga taga-Colosas: “Siguroha nga waray magbihag ha iyo pinaagi han pilosopiya ngan waray pulos nga panlimbong nga iginbasar ha tradisyon han tawo, ha basihan nga mga prinsipyo han kalibotan ngan diri uyon ha katutdoan han Kristo.”—Col. 2:8.

² Kon ipupokus hito nga mga dinihogan an ira hunahuna ha “basihan nga mga prinsipyo han kalibotan,” sugad hin iginsasalikway nira an tagana ni Jehova nga kaluwasan. (Col. 2:20-23) Basi mabuligan hira nga mapanalipdan an ira presyoso nga relasyon ha Dios, hi Pablo nagsagdon: “Pirme niyo hunahunaa an mga butang ha kahitas-an, diri an mga butang ha tuna.” (Col. 3:2) Oo, kinahanglan pirme hunahunaon han kabugtoan ni Kristo an ira espesyal nga paglaom nga kinabuhi nga waray kataposan nga ‘igin-andam ha ira ha langit.’—Col. 1:4, 5.

3. (a) Ano nga paglaom an pirme ginhuhunahuna han dinihogan nga mga Kristiano? (b) Ano nga mga pakiana an aton hihisgotan hini nga artikulo?

 ³ Yana, pirme liwat ginhuhunahuna han dinihogan nga mga Kristiano an Ginhadian han Dios ha langit ngan an ira paglaom nga magin mga “igkasi-manurunod han Kristo.” (Roma 8:14-17) Pero kumusta man adton may paglaom nga mabuhi dinhi ha tuna? Paonan-o nira maiaaplikar an sagdon ni Pablo? Paonan-o maipapakita han “iba nga mga karnero” nga pirme nira ginhuhunahuna “an mga butang ha kahitas-an”? (Juan 10:16) Ngan paonan-o kita magpapahimulos ha pag-usisa han ehemplo han magtinumanon nga kalalakin-an sugad kanda Abraham ngan Moises, nga bisan pa han mga kakurian, pirme nira ginhunahuna an mga butang ha kahitas-an?

4. Paonan-o pirme mahuhunahuna han iba nga mga karnero an mga butang ha kahitas-an?

⁴ Bisan kon an iba nga mga karnero waray langitnon nga paglaom, mahimo liwat nira pirme hunahunaon an mga butang ha kahitas-an. Paonan-o? Kon uunahon nira ha ira kinabuhi hi Jehova nga Dios ngan an mga buruhaton para ha Ginhadian. (Luc. 10:25-27) Ito an ginbuhat ni Kristo, ngan ito liwat an kinahanglan naton buhaton. (1 Ped. 2:21) Pariho ha aton kabugtoan ha siyahan nga siglo, napapalibotan kita hin sayop nga mga pangatadongan, kalibotanon nga mga pilosopiya, ngan materyalismo dinhi hinin sistema ni Satanas. (Basaha an 2 Corinto 10:5.) Sugad nga pagsubad kan Jesus, kinahanglan magin mabinantayon kita kontra ha mga peligro nga mahimo makadaot ha aton relasyon kan Jehova.

5. Paonan-o naton mauusisa an aton panhunahuna may kalabotan ha materyal nga mga butang?

⁵ Naiimpluwensyahan na ba kita han kalibotanon nga panhunahuna ha materyal nga mga butang? Kasagaran nga nahibabaroan ha aton ginhuhunahuna ngan ginbubuhat kon ano nga mga butang an importante ha aton. Hi Jesus nagsiring: “Kon hain an imo bahandi, aadto liwat an imo kasingkasing.” (Mat. 6:21) Basi hibaroan an sulod han aton kasingkasing, maopay nga usisahon naton an aton kalugaringon ha pana-panahon: ‘Mationan-o kadaku nga panahon an akon igin-gagahin ha paghinunahuna may kalabotan ha kwarta? Nauubos ba an akon panahon ha paghinunahuna mahitungod ha negosyo, kon paonan-o makakabiling hin maopay nga trabaho, o magkakaada hin mas komportable nga kinabuhi? O nangangalimbasog ba ako nga padayon nga ipokus an akon mata ha espirituwal nga mga butang?’ (Mat. 6:22) Hi Jesus nagsiring nga kon nakapokus kita ha “pagtinirok hin bahandi ha tuna,” posible nga madaot an aton relasyon kan Jehova.—Mat. 6:19, 20, 24.

6. Paonan-o naton madadaog an aton tendensya nga makasala?

⁶ Diri kita hingpit salit may tendensya kita nga tagbawon an aton kalugaringon ha mga butang nga nakakapalipay ha aton. (Basaha an Roma 7:21-25.) Kon diri kita magpapagiya ha baraan nga espiritu han Dios, mahimo kita masulay ha “mga buhat nga kanan kasisidman.” Nag-uupod ito han mga buhat sugad han “karisyohan nga waray-kontrol ngan paghubog . . . seksuwal nga imoralidad ngan mangil-ad nga paggawi.” (Roma 13:12, 13) Basi madaog “an mga butang ha tuna”—mga butang nga makaruruyag ha diri hingpit nga mga tawo—kinahanglan pirme naton hunahunaon an mga butang ha kahitas-an. Nagkikinahanglan ini hin pangalimbasog. Salit hi apostol Pablo nagsiring: “Ginsusuntok ko an akon lawas ngan gin-uuripon ito.” (1 Cor. 9:27) Kinahanglan diri liwat kita magin kampante kon karuyag naton makapabilin ha rumba para ha kinabuhi! Usisahon naton an ginbuhat han duha nga matinumanon nga kalalakin-an ha naglabay basi “mapalipay gud an Dios.”—Heb. 11:6.

7, 8. (a) Ano nga mga problema an gin-atubang nira Abraham ngan Sarah? (b) Ha ano iginpokus ni Abraham an iya hunahuna?

⁷ Han ginsugo ni Jehova hi Abraham nga bumalhin ha Canaan upod an iya panimalay,  sumugot dayon hiya. Tungod han pagtoo ngan pagkamasinugtanon ni Abraham, naghimo hi Jehova hin kasabotan ha iya, ngan nagsiring: “Hihimoon ko ikaw nga daku nga nasud, ngan bibendisyonan ko ikaw.” (Gen. 12:2) Pero lumabay na an mga tuig, waray pa gihapon anak hira Abraham ngan Sarah. Ginkalimtan na ba ni Jehova an iya saad kan Abraham? Labot pa hito, diri masayon an kinabuhi ha Canaan. Ginbayaan ni Abraham ngan han iya panimalay an ira balay ngan mga paryente ha Ur, usa nga mainuswagon nga syudad ha Mesopotamia. Nagbiyahe hira hin 1,000 ka milya (1,600 km) basi makaabot ha Canaan, diin nag-ukoy hira ha mga tolda, nag-antos hin kagutom, ngan nameligro ha mga tikasan. (Gen. 12:5, 10; 13:18; 14:10-16) Bisan pa hito, waray gud nira hunahunaa nga bumalik ha ira komportable nga kinabuhi ha Ur!—Basaha an Hebreo 11:8-12, 15.

⁸ Imbes nga magpokus ha “mga butang ha tuna,” hi Abraham nagpakita hin ‘pagtoo kan Jehova.’ (Gen. 15:6) Oo, ginhunahuna niya an mga butang ha kahitas-an salit nakagpokus hiya ha mga saad han Dios. Sugad nga resulta, ginbalosan an pagtoo ni Abraham han an Gihitaasi nga Dios nagpakita ha iya ngan nagsiring: “Siplat ngadto ha langit, ngan ihapa an mga bitoon, kon ikaw sadang makaihap ha ira: ngan hiya siniring ha iya: Masusugad man liwat an imo mga katulinan.” (Gen. 15:5) Naparig-on gud hito hi Abraham! Ha kada higayon nga ginkikita niya an langit nga puno hin mga bitoon, napapahinumdoman hiya han saad ni Jehova nga padadamuon an iya katulinan. Ngan ha itinanda nga panahon han Dios, nagkaada anak hi Abraham, sugad han iginsaad ha iya ni Jehova.—Gen. 21:1, 2.

9. Paonan-o an susbaranan ni Abraham magpapagios ha aton nga padayon nga magin okupado ha pag-alagad ha Dios?

⁹ Pariho kan Abraham, ginpapamulat liwat naton an katumanan han mga saad han Dios. (2 Ped. 3:13) Kon diri naton pirme huhunahunaon an mga butang ha kahitas-an, bangin umabat kita nga baga hin naglalangan an katumanan hini nga mga saad ngan bangin diri na kita magin madasigon ha espirituwal nga mga buruhaton. Pananglitan, naghimo ka ba hadto hin mga sakripisyo basi makagpayunir o mapauswag pa an imo ministeryo? Kon oo, takos ka kumendasyonan. Kumusta man yana? Hinumdumi, pirme ginhunahuna ni Abraham an “syudad nga may totoo nga mga pundasyon.” (Heb. 11:10) “Nagpakita [hiya] hin pagtoo kan Jehova, ngan tungod hito iginpahayag hiya nga matadong.”—Roma 4:3.

10. Ano nga klase hin kinabuhi an gindak-an ni Moises?

¹⁰ An usa pa nga lalaki nga pirme naghunahuna han mga butang ha kahitas-an amo hi Moises. Han batan-on pa hiya, “gintutdoan [hiya] han ngatanan nga kinaadman han mga Ehiptohanon.” Diri ini ordinaryo la nga edukasyon. Hito nga panahon, an Ehipto amo an pinakagamhanan nga nasud ngan hi Moises membro han panimalay ni Paraon. Diri urusahon nga tungod han iya hitaas nga edukasyon, hi Moises nagin ‘gamhanan ha mga pulong ngan mga buhat.’ (Buh. 7:22) Hunahunaa an mga oportunidad nga mahimo niya mapahimulosan! Kondi iginpokus ni Moises an iya hunahuna ha mas importante nga butang—an pagbuhat han kaburut-on han Dios.

11, 12. Ano nga edukasyon an mas ginpabilhan ni Moises, ngan kay ano nga makakasiring kita hito?

¹¹ Bata pa hi Moises, gintutdoan na hiya han iya nanay nga hi Jokebed mahitungod han Dios han mga Hebreohanon. Mas ginpabilhan ni Moises an kahibaro tikang kan Jehova ngan ginhunahuna niya nga mas importante ito kay ha bisan ano nga karikohan. Salit iya iginsalikway an mga pribilehiyo ngan oportunidad nga posible unta niya mapahimulosan tungod kay membro hiya han panimalay ni Paraon. (Basaha an Hebreo 11:24-27.) Oo, an pagtoo ni Moises ngan an edukasyon nga iya nakarawat tikang kan Jehova nagpagios ha iya nga hunahunaon an mga butang ha kahitas-an.

 ¹² Napahimulosan ni Moises an pinakamaopay nga sekular nga edukasyon ha iya panahon, kondi gin-gamit ba niya ito basi magkaada hiya awtoridad, magin sikat, o magin riko ha Ehipto? Waray. Ha pagkamatuod, an Biblia nasiring nga “diniri hiya nga tawagon nga anak han kan Paraon anak nga babaye; mas ginpili niya nga maltratuhon hiya kaupod han katawohan han Dios imbes nga pahimulsan an temporaryo nga kalipayan han sala.” Matin-aw, gin-gamit ni Moises an edukasyon tikang ha Dios basi matuman an katuyoan ni Jehova.

13, 14. (a) Ano an nakabulig kan Moises basi magin kwalipikado ha toka nga ihahatag ha iya ni Jehova? (b) Pariho kan Moises, ano an kinahanglan naton buhaton?

¹³ Hinigugma ni Moises hi Jehova ngan an Iya katawohan. Han 40 anyos na hi Moises, ginhunahuna niya nga andam na hiya bumulig ha katawohan han Dios basi matalwas tikang ha pagkauripon ha Ehipto. (Buh. 7:23-25) Pero antes pa ihatag ni Jehova ito nga toka, may mga kalidad nga kinahanglan pa makultibar hi Moises. Kinahanglan niya magin mapainubsanon, mapailubon, malumo, ngan magkaada pagpugong ha kalugaringon. (Prob. 15:33) Kinahanglan ni Moises an pagbansay nga mabulig ha iya basi mailob an tiarabot nga mga pagsari ngan kakurian. An iya pagin paraataman hin karnero ha sulod hin pipira ka dekada mabulig ha iya nga makultibar inin diosnon nga mga kalidad.

¹⁴ Nakabulig gud ba kan Moises an pagbansay nga iya nakarawat sugad nga paraataman hin karnero? Oo! An Biblia nasiring nga hi Moises nagin “labi nga maaghop, labaw han ngatanan nga tawo ha bawbaw han tuna.” (Num. 12:3) Nakultibar niya an pagkamapainubsanon, nga nakabulig ha iya nga magin mapailubon ha pakig-upod ha iba-iba nga tawo ngan ha pag-atubang ha magkuri nga problema. (Eks. 18:26) Kinahanglan liwat naton kultibaron an mag-opay nga kalidad nga mabulig ha aton basi makatalwas ha “daku nga kasakitan” ngan makasulod ha matadong nga bag-o nga kalibotan han Dios. (Pah. 7:14) Kaya ba naton makig-upod ha mga tawo, bisan ha mga madagmit masina o ha mga sensitibo hinduro? Maopay kon susundon naton an igin-aghat ni apostol Pedro ha iya mga igkasi-tumuroo: “Pasidunggi niyo an ngatanan nga klase hin tawo, higugmaa an ngatanan nga kabugtoan.”—1 Ped. 2:17.

15, 16. (a) Kay ano nga importante gud nga pirme naton hunahunaon an mga butang ha kahitas-an? (b) Kay ano nga importante nga an mga Kristiano pirme magpakita hin maopay nga panggawi?

¹⁵ Nagkikinabuhi kita ha “peligroso gud nga mga panahon nga makuri pakiangayan.” (2 Tim. 3:1) Salit basi makapabilin kita nga alerto ha espirituwal, kinahanglan pirme naton hunahunaon an mga butang ha kahitas-an. (1 Tes. 5:6-9) Hisgotan naton kon paonan-o naton ito mahihimo ha tulo nga bahin han aton kinabuhi.

¹⁶ Panggawi: Maaram hi Pedro nga importante an maopay nga panggawi. Hiya nagsiring: “Padayon nga manggawi kamo hin maopay ha butnga han mga nasud, basi . . . magin mga testigo hira han mag-opay nga buhat nga ira nakita ha iyo, ngan sugad nga resulta, pagdayawon nira an Dios.” (1 Ped. 2:12) Aada man kita ha balay, ha trabaho, ha eskwelahan, ha ministeryo, o kon nagpapahalibway, nangangalimbasog gud kita nga madayaw hi Jehova pinaagi han aton maopay nga panggawi. Tinuod, tungod han pagkadiri-hingpit, kita ngatanan nakakasala. (Roma 3:23) Kondi pinaagi han padayon nga “pakig-away han maopay nga pakig-away para ha pagtoo,” malalamposan naton an aton tendensya nga makasala.—1 Tim. 6:12.

17. Paonan-on naton masusubad an disposisyon ni Kristo Jesus? (Kitaa an retrato ha tinikangan hini nga artikulo.)

¹⁷ Disposisyon: Basi padayon nga maipakita an maopay nga panggawi, kinahanglan may-ada kita husto nga disposisyon. Hi apostol Pablo nagsiring: “Ipadayon niyo ini nga iyo disposisyon nga pariho han kan Kristo Jesus.” (Fil. 2:5) Ano an disposisyon ni Jesus? Mapainubsanon  hiya. Nagpagios ini ha iya nga magsakripisyo para ha ministeryo. Pinakaimportante ha iya an pagsangyaw ha iba mahitungod han maopay nga sumat han Ginhadian han Dios. (Mar. 1:38; 13:10) Para kan Jesus, an Pulong han Dios amo an gihitaasi nga awtoridad. (Juan 7:16; 8:28) Maduruto nga gin-adman niya an Baraan nga Kasuratan basi hiya makagkotar, makadepensa, ngan makagsaysay hito. Kon mapainubsanon kita ngan maduruto ha aton ministeryo ngan ha personal nga pag-aram han Biblia, mas masusubad naton an panhunahuna ni Kristo.

18. Ha ano nga importante nga paagi masusuportaran naton an buruhaton ni Jehova?

¹⁸ Suporta: Katuyoan ni Jehova nga “ha ngaran ni Jesus lumuhod an tagsa nga tuhod han mga aadto ha langit ngan aanhi ha tuna.” (Fil. 2:9-11) Bisan pa han hitaas nga posisyon ni Jesus, mapainubsanon nga nagpasakop hiya ha kaburut-on han iya Amay, ngan ito liwat an sadang naton buhaton. (1 Cor. 15:28) Paonan-o? Pinaagi ha bug-os-kasingkasing nga pagsuporta ha buruhaton nga iginsugo ha aton, nga amo an ‘panutdo ha mga tawo han ngatanan nga nasud basi magin mga disipulo.’ (Mat. 28:19) Karuyag liwat naton ‘buhaton an maopay ha ngatanan,’ pinaagi ha pagbuhat hin maopay ha aton igkasi-tawo ngan ha kabugtoan.—Gal. 6:10.

19. Ano an sadang naton magin determinasyon?

¹⁹ Mapasalamaton gud kita nga ginpapahinumdoman kita ni Jehova nga pirme hunahunaon an mga butang ha kahitas-an! Basi mabuhat ito, kinahanglan “dalaganon naton an rumba nga iginbutang ha aton atubangan.” (Heb. 12:1) Hinaot kita ngatanan magbuhat hin ‘bug-os-kalag para kan Jehova,’ ngan an aton langitnon nga Amay magbabalos han aton sinsero nga pangalimbasog.—Col. 3:23, 24.